MWAHA WA EKAAPA | VAAVAA OOSIVELIWA AHU ONAKHWEIYE

Apwanne ti Yoonanara Winla?

Montoko ohooxeya ni ereca mu elukuluku vakhaani? Akhweya mwaapenuwa mwawaakuveya nave mucuwala. Osooseya honalikana ni yeeyo. Dr. Alan Wolfelt aarepa mu liivuru Healing a Spouse’s Grieving Heart ariki: “Hiyaavovo echu enalikana ni osooseya. Nyenya moovira wa elukuluku ni nikhaviheryo na akina munahaala omaliha osooseya.

Ntoko yootakiherya, muthokororye yaweereya ya Aaparahamu vaavaa mwaariye aakhwileiye. Piipiliya onaloca wi “Abrahamu àmunlela Sara wa nthowa na okhwa wawe.” Masu “àmunlela” anooniherya wi yaaviravo elukuluku yincipale wi amalihe osooseya wawe.a Yootakiherya ekina ti Yakopo, yoowo aawokiwe wi mwanawe Yosefe aakhuuriwa ni mwaasinama a mutakhwani. Owo aahinla “mahiku mantxipale” ophiyerya wi amusi awe hiyawenrye omuhakararya. Ivinrevo iyaakha sincipale nlelo yaanamuthananiha.—Maphatxuwelo 23:2; 37:34, 35; 42:36; 45:28.

Emohamoha enneereya olelo wa yaale anamuyeleela mookhwani muchu yoowo yaatannaayano. Muthokororye sootakiherya piili inacharela.

“Iyaka, Roperto okhwile mu 9 a Yulyu a 2008. Nihiku yaakhumelenlaaya epahu hinaari noohiyana nnihiku nikina. Nimanle olya, naaheera yeeyo naakhovelenlaahu weera ayaaka omutekoni, naanuulana, naakhupaarelana nave naalocelana masu, ‘kinnoosivela.’ Ivinre iyaakha thanu nammoha nlelo kinnasooseya mmurimani mwaka. Kinoona wi nkirwa kicuwale omuyeleela waka Roperto.”—Kail, a iyaaka 60.

“Naamwi ivinrevo opwaha iyaakha 18, kimanle omuyeleela mwaaraka kaamusivelaaka, nlelo kinnoona omeekha nave kinnasooseya nthowa na omuyeleela mwaaraka. Vaavaa kinoonaaka echu yookisivela, kinnamuupuwela mwaaraka, wi owo tho aahaala osiveliwa woona ichu kinoonaka.”—Etienne, a iyaakha 84.

Ti yawooneya wi moonelo ni osooseya ntoko yoola tahi woonanara. Muchu ti muchu onathanana mmukhalelo awe, nave hiyaahaala okhala yamiruku waakaaha mukhalelo muchu mukina onooniheryeiye osooseya. Mu elukuluku emohamoha, nnaphwanela osepa wiithoriha mukhatiihu wakhala wi ninnooniherya osooseya woovirelela mphimo. Nnii nivilele hai ni osooseya?

[Nsu na vathi]