Mwiirehererye wa Yawuupuxerya ni Murima Woohakalala
1. Ewora ya Yawuupuxerya ti elukuluku yaphaama weera eheeni?
1 Yawuupuxerya Nanawiili, 26 a Marsu, ennavaha ekari yaphaama ya ohakalala ntakhara marehereryo a Muluku a nivuluxo. (Yes. 61:10) Nari yawuupuxerya enoorwa eyo ehaakumve ophiya, munepa woohakalala onahaala onikhaviherya wiirehererya phaama. Mwawiihai?
2. Tiheeni enanituunyerya opaka marehereryo a wuupuwelela Yawuupuxerya?
2 Orehererya Yawuupuxerya: Mukonelo wa Apwiya ti wawiiseela nyenya onuupuweliwa mookhweya. Nlelo, enachuneya orehererya ehaakumve wi ichu sookhweleya sihivevuliwe. (Masi. 21:5) Elukuluku ni nipuro noophwanelela nnaphwanela othanliwa. Ineneeryo soophwanelela inaphwanela ophwanyiwa. Nipuro na muthukumano nnaphwanela weelihiwa ni orehereryiwa. Namaloca othanliwe onaphwanela wiirehererya phaama, nave ichu ni akhaviheryi anaphwanela okhala ooreheryeya. Moohikhwa minikwa sincipale sa seiya sinnapakiwa. Orehererya yoola honeeriwano pahiru nthowa na olamuleliwa. Onarweela mu ohakalala nthowa na owerya wa woopola wa mukucho.—1 Pet. 1:8, 9.
3. Nnii nrehererye hai murima ahu wa Mukonelo wa Apwiya?
3 Orehererya Murima: Ori tho wookhweleya orehererya murima ahu wi nthamalele yootaphulela ya Yawuupuxerya. (Esd. 7:10) Wi neereno hiihaa, nnaphwanela waavya elukuluku wi nthokororye waalakhanyiwa wavameekhaaya wa Piipiliya wa Yawuupuxerya nave namala nuupuwelele mahiku ookuchula a okumi wa Yesu veelaponi yavathi. Wuupuwelela munepa wawiiveleela wa Yesu enahaala onipurula wi nimutakiherye yoowo.—Gal. 2:20.
4. Mphurelo taani wa mukucho onoohakalalihaani vancipale?
4 Okhwa wa Kiristu woovuwiha olamulelo wa Yehova. Onnavaha woopola wa yoocheka ni okhwa. (1 Yoh. 2:2) Onnahula ephiro ya waataana wa murecele ni Muluku ni ephiro ya okumi woohimala. (Kol. 1:21, 22) Onnalipiha tho yoolakelela ahu ya okhala mwawiiwanana ni wiiveleela wahu wa Yehova ni otitelela okhala oolipa ntoko oohuserya a Kiristu. (Mat. 16:24) Vaavaa nyuwano muniirehereryaanyu wi murwe va Yawuupuxerya enoorwa eyo, ohakalala wanyu waaceereryeye!