Munniirehererya wa Yawuupuxerya?

Aari 13 a Nisani a 33 E.K. Yesu aanasuwela wi waari ohiyu wookuchula ni asinthamwene awe oororomeleya ahaakumve wiipiwa. Owo aaphwanela omulya Paskha awe ookuchula ni oohuserya nave otikitherya nlakano nivyaani, Yoolya Yaaphiya. Ntoko yaweereya yoochuneya waari woophwanelela wiirehererya. Nyenya owo aamuruma Petro ni Yohane wi erehererye ichu. (Luka 22:7-13) Iyaakha soothene ovinyerya vaavaa, ti woochuneya wa Akiristu yaawo anachuna Wuupuxerya yaweereya yeeyo okhala awiirehererya. (Luka 22:19) Ichu taani soochuneya nnaphwanelaahu orehererya ntakhara Wuupuxerya wa 3 Apirili onarwa?

Wiirehererya wa Atokweene:

• Opaka marehereryo wi ephariheliwe Empa ya Omwene naari nipuro nikina noophwanelela. Nnaphwanela okhalano mipaco sawaakhwanela, ekamaama, nave onoopavo echeku. Opaka marehereryo a oreherya nipuro woosiilo.

• Omuthanla namaloca oophwanelela, muhooleli, ni anna wi epake nivekelo wa ineneeryo.

• Wakhala wi onahaala okhalavo muthukumano mukina va nipuro nenno, ooweherya onahaala weerano phaama opaka marehereryo wi evolowe ni okhuma va nipuro mu elukuluku yoophwanelela.

• Waathanla alipa oothoonyerya mapuro ni alipa ooviriha ineneeryo.

• Opaka marehereryo a ineneeryo soophwanelela, ntoko iparatho, akoopho a viinyu, meesa oophwanelela, ni ekuwo ya vameesa.

Wiirehererya wa Alaleeryi:

• Opaka marehereryo a omaliha elukuluku yincipale mmukipici wa okawa mwopelo.

• Opaka elista ya oohuserya a Piipiliya, amusi, asinthamwene a oxikola, a omuteko, ni asuweli akina wi naawope.

• Waalakhanya ni wuupuwelela soorepa sa Piipiliya sinaloca sa okhwa wa Yesu.

• Ophiya elukuluku yaphaama omuthukumano wa yawuupuxerya wi ewaakheleke alipa oowompwa.