Mpwanne Muri Ooreheryeya Ntakhara Mukonelo?

Paskha ookuchula a Yesu aahaala okhalano yootaphulela. Woona wi okhwa wawe waahaacamela, owo aapaka marehereryo a omulya Paskha ni arummwa awe ni opaceryiha muyakha muvyaani ori wuupuwelela, Yoolya ya Apwiya. Nyenya owo aamuruma Pedro ni Yohani wi yarehererye ekwartu. (Luka 22:7-13; moone eruku va ekaapa.) Ela ennanuupuxerya ochuneya waya wiirehererya ntakhara Mukonelo mu 27 a Marsu. Nyenya muloko onahaala opaka marehereryo a namaloca, ineneeryo, ni ikina. Mwa yeeyo, tiheeni mmoha ti mmoha a hiyo onaphwaneleiye weera wi iirehererye ntakhara Mukonelo?

Murehererye murima anyu. Waalakhanya ni wuupuwelela soorepa sa Piipiliya sa Mukonelo. Yoochariha enanwerya ophwanyiwa mu liivuru Muthokororye Yoorepa ya Nihiku. Mu apendicê B12 mu Tradução do Novo Mundo revisada onnathariha sincipale. (Moone tho Yoochariha ya Mithukumano Okumi ni Muteko Ahu Weekristu ya Apirili a 2020.) Imusi sinanwerya ophwanya sooleeliherya wi ethokororye variyari va malapelo aya a echoko ntakhara ochuneya waya woopola moorweela wa omuthokororya Mulipeleli, Yoolaleeryiwa ya Indice naari Yoohoolela ya Otholathola ya Anamoona a Yehova.

Mwaawope akina wi ephiye va muthukumano. Mwiirehererye wi mukhaviherye mukipici yoola wa nwopelo. Nwuupuwele yaale munachunaanyu waawopa, ntoko mu ekwaha yoopacerya, oohuserya a Piipiliya, amwaacamani, asinthamwene ni asuweli. Asitokweene a muloko anaphwanela waawopa yaale ari ooceecheya. Muupuwele, wakhala wi muchu hari mukuma mmankaanyuwo, munanwerya ophwanya elukuluku ni nnipuro na Mukonelo weiwo onakhaleiyewo moorweela wa ocapunya HIYAANO NAANI makupa a epaaxina ya jw.org ni othanla “Wuupuwelela.”

Echu taani ekina nnaphwanelaahu weera wi niirehererye?