Makoho Aakhuliwe

◼ Mulaleeryi amwaamuthiyana onnaphwanela owariha muru va yoohuserya ya Piipiliya ya vamukhorani wakhala wi onahooliwa ti mulaleeryi amwaamulopwana?

Vaavaa mulaleeryi amwaamuthiyana oneeciheiye yoohuserya ya Piipiliya yootikitheryeya elakaniwe nave mulaleeryi a Omwene amwaamulopwana ari vaava, mulaleeryi amwaamuthiyana onaphwanela owariha muru. (1 Akor. 11:3-10) A Sentinela 15 a Yulyu a 2002, epaaxina 27, onnathariha: “Ela ti yoohuserya elakaniwe, yeeyo muchu oneeciha yoohuserya eyo ti yoowo onahoolela. Mmikhalelo seiya, yoohuserya eyo ennapaka makupa a muloko. Wakhala wi Namoona oopatisiwa amwaamuthiyana toneeciha yoohuserya eyo ari vamoha ni Namoona oopatisiwa amwaamulopwana, murokora owo onaphwanela owariha muru.” Emohamoha yaahaala weeriwano wakhala wi mulaleeryi a Omwene oohipatisiwa tonamuhoola murokora owo. Eyo enaphwanela weeriwano naamwi yoohuserya eyo yeecihiwaka vachokoni, vamukhorani, nari nipuro nikina.

Mmukhalelo mukina, wakhala wi yoohuserya ya Piipiliya ya vamukhorani nlelo ti yoohitikitheryeya, hori woochuneya murokora owariha muru akhala vamoha ni mulaleeryi a Omwene amwaamulopwana, naamwi wakhala wi yoolakelela ya opaka erevisita eri wooniherya yoohuserya ya Piipiliya nari othokororya miseelo sa ekaruma ahu ya ohuserya yaweemereryiwa. Vawoona wi soohuserya sa Piipiliya sa vamukhorani inatikitheryiwa vakhaani vakhaani, moorweela wa irevisita sa wuuluulela sooya vahoolo, alaleeryi anaphwanela othokororya mikhalelo ni okhala oophimelela va olakelela ti liini anaphwanelaaya owariha muru.