Wunnuwiha Mavyakelo ahu mu Orummwa—Waarepela Yaale Yoonihenrye Nchuno
“Wiweheryerye mekhá, ni mahusiheryo awo.” (1 Tim. 4:16) Ekano ela yooveereliwa ya murummwa Paulo wa Timoteo ennooniherya wi, moohipwacha waakhanle wi na avyaani nari oovyaka, nnaphwanela wiilipixerya wi n‵ye vahoolo ntoko anamalaleya. Wi enikhaviherye weerano yeela, makupa mavyaani anahaala orwaaka mu Orummwa Wahu wa Omwene ni muru: “Wunnuwiha Mavyakelo ahu mu Orummwa”. Khata mwaha onahaala othokororya mavyakelo mamoha oochuneya nave onahaala ovaha sooleeliherya sa weerano yeeyo. Annaceenyeryiwa oothene wi epharihele mavyakelo yaawo variyari va mweeri. Wamala mweeri, Muthukumano wa Muteko onahaala ovaha ekari ya oloca mphurelo onarweela mu weerano mavyakelo yaawo. Mweeri yoola ninnaceenyeryiwa waarepela yaale arino nchuno.
Ntakhara Heeni ti Yoochuneya: Wi naakhwaniherye orummwa wahu, nnaphwanela weera ohiya pahiru olaleerya. Nnaphwanela waachikela yaale oonihenrye nchuno ni waahusiha yaawo, nihelaka maahi mmiso wa eparipari yoowo nanlaahu. (Mat. 28:19, 20; 1 Akor. 3:6-9) Ela enaphitaanyerya omwaavya owo wanawiili, nlocaka sa makacamiho awe, ni nunnuwihaka ochekula wahu woopacerya. Mwawiihiiha,vaavaa nnamphwanyaahu yoowo onooniherya nchuno, nnaphwanela orepela vooloca sa yeeyo.
Moota wa Weerano Yeela:
• Mvarerye waakhanle wi mookhalano ikaruma soorepelano mmurupani mwanyu. Mukhapelele soorepela sanyu saphaama ni soorehererya nave sahiihaano. Murepele mwamala ovaanela.
• Murepele ichu vooloca sa namakhala. Nsina nawe taani ni ichu ikina ntoko, nipuro nawe, naari numero na telefone. Tiheeni monnaanyu vooloca sa yoowo ni emusi awe yeeyo munaweryaanyu opharihela?
• Murepele ichu vooloca sa ovaanela wanyu. Soorepa taani mwaalakhannyaanyu? Tiheeni owo aalonceiye sa soororomela sawe? Yoolaleeryiwa taani mwaamvanhaanyu? Murepele elukuluku, nihiku na esumana, ni nihiku na omuxekurya.
• Murepele yeeyo munachunaanyu weera ekwaha yoocharela. Tiheeni muroromelinhaanyu othokororya? Ti liini muroromelinhaanyu okooka?
• Murepele khata ekwaha munakookelaanyuwo. Hanakhumelela makacamiho wakhala wi moorepela ichu sincipale opwaha munachunaanyu.
Mweererye ela Variyari va Mweeri:
• Vaavaa munarepelaanyu, mwaaleele yaawo onalapa ni nyuwo yeeyo munarepaanyu.