OKUMI WEEKIRISTU

Wunnuwiha Mavyakelo Ahu Mu Orummwa​—Otikitherya Mathipelo a Oxekurya

NTAKHARA HEENI TI YOOCHUNEYA:

Nnachuna ohela maahi mmiso weeparipari naanlaahu. (1Kor 3:6) Vaavaa nnamphwanyaahu muchu yoowo onnooniherya nchuno, ti yaphaama ompakela nikoho wi nthokororye vaavaa nnakookelaahuwo. Ela enahaala waaceererya nchuno nawe ni okhweiha wiirehererya wahu wa oxekurya onacharela. Vaavaa nnamuxekuryaahu, nnaphwanela omuleela wi nrwenle wi naakhule nikoho naahiyalaahu mu ekwaha yookuchula.

MUKHALELO WA WEERANO YEELA:

• Vaavaa munareheryaanyu mapaceryiho a olaleerya empa ni empa, murehererye nikoho wi mwaakhule mu oxekurya onacharela. Nnaphwanela okhala nikoho nenlo nnaakhuliwa mu ekaruma munavahaanyu, naari nnaakhuliwa mu yoolaleeryiwa ya ohuserya munachunaanyu omvaha mu oxekurya onacharela.

• Vaavaa munamalihaanyu ovaanela ni muchu oonihenrye nchuno, mmuleele wiivaha wanyu wa ochuna oloca ni yoowo wanaawiili, voocharela mpake nikoho na ovaanela mureherenryaanyu. Mulakane elukuluku ni nihiku na ovaanela.

• Wakhala wi moomuleela elukuluku munahaalaanyu omuxekurya, mweereno mwawiiwanana ni masu anyu.​—Mat 5:37.