Wunnuwiha Mavyakelo ahu mu Orummwa—Opaka Mathipelo a Oxekurya
Ntakhara Heeni ti Yoochuneya: Vaavaa nnamphwanyaahu muchu oonihenrye nchuno, hiyaano nnachuna okooka vaavaa owo onahaaleiye okhala owaani wi niwerye ohela maahi mmiso wa eparipari yeele naanlaahu. (1 Akor. 3:6) Wiiliwiili enachuneya opaka mathipelo a oxekurya nihaakumve opwahavo moorweela wa waavya nihiku nnaweryaahu okooka. Mwawaacererya, ti woophwanelela ohiya nikoho wi nthokororye elukuluku ekina nnahaalaahu okooka. Ela enahaala omukhaviherya namakhala ochuna oxekuryiwa, nave wakhala wi nikoho nnaakhuliwa mu yoolaleeryiwa nimuhiyenryaahu, owo onahaala osiveliwa waalakhanya. Opaka mathipelo a oxekurya woocharela oneeriha okhala wookhweya okooka ntakhara wi mwaha nnahaalaahu othokororya woothanliwa woosiilo, nave namakhala onahaala osuwela tiheeni onaweheryeiye. Vaavaa nnakumanaahu wanaawiili, hiyaano nnaphwanela oloca wi nchinke wi naakhule nikoho naahin’yaahu oxekurya ovinre nave nipwahiherye.
Mukhalelo wa Weerano Yeela:
• Vaavaa munarehereryaanyu masu anyu a empa ni empa, murehererye tho nikoho wi mwaakhule mu oxekurya onacharela. Nlo nnanaphwanela orweela mu yoolaleeryiwa munavahaanyu nihiku nenlo, naari nnanwerya okhala nikoho nnaakhuliwa mu yoolaleeryiwa emoha ya ohuserya, yeeyo munahaalaanyu opaceryiha vaavaa munakookaanyu.
• Vaavaa munakuchulaanyu ovaanela wanyu ni muchu yoowo onooniherya nchuno, mmuleele yoochuna anyu ya oloca ni yoowo wanaawiili nave voocharela mmoonihe nikoho noocharela mureherenryaanyu. Mu ikulucu ikina achu annatepa waaceliwa nave annoovelela olakana ni nyuwaano wi mwaaxekurye wanaawiili. Mmukhalelo yoowo, nyuwaano munaphwanela oloca: “Elukuluku yeela ti yoophwanelela woophwanyaani owaani? [Nwehererye naakhulo.] Esumana enoorwa, kaamusiveliwa weemela wi kaakhule nikoho nenla mwawaakuveya . . . Wakhala wi mohaaceliwa, munaphwanela okileela vaavaa kinachikaaka.”
• Wakhala wi moomuleela namakhala wi munahaala okooka mu elukuluku yoolakaniwa, murepele yeeyo. (Mat. 5:37) Omakuchuwelo wa ekwaha yookookela, mwaavye mathipelo a oxekurya woocharela.
Mweererye Ela Variyari va Mweeri:
• Vaavaa munarehereryaanyu mapaceryiho anyu, murehererye tho nikoho wi mwaakhule ekwaha yoocharela. Muuke ni mulaleeryi mukina yoowo munalapaanyuno.