Wunnuwiha Mavyakelo Ahu mu Orummwa​—Waavyakiha avyaani

Ntakhara Heeni ti Yoochuneya: Oomuchara avyaani a Kiristu anaphwanela ohuserya okhapelela “itchu sothe sene” owo olamulenleiye, enaphitaanyerya waahusiha akina eparipari. (Mat. 28:19, 20) Avyaani ancipale aaheemereryiwa woosiilo opaka makupa a Exikola ya Orummwa Woomuluku, nave akina aavaha onamoona woohilakelela wa amusi naari asinthamwene. Mwawiihiiha, vaavaa anatitelelaaya ohuserya ni osuwela wi Yehova onachuna wi achu oothene ewiriyane michaka saphaama, awo anahaala wooniherya nchuno nawe na oya mmuteko wa orummwa. (Arom. 10:13, 14) Muvyaani amanle weemereryiwa ntoko mulaleeryi oohipatisiwa, ovyakihiwa phaama onahaala omukhaviherya okhala oolipa vaavaa onapaceryeiye oya vahoolo mmakupa oomunepani​—Luka 6:40.

Mukhalelo wa Weerano Yeela:

• Mmukhaviherye mulaleeryi muvyaani okhalano soolaleeryiwa onachuneiye wi alaleerye ni ohusiha. Mmoonihe mukhalelo munarehereryaanyu murupa anyu wa olaleerya, nave mmuleele yoolakelela ya yoolaleeryiwa eri yoothene mukunxaanyu.

• Muthanle yawooniherya ya ntakiheryo mu Orummwa Wahu wa Omwene nave mooniherye. Mmukhaviherye mulaleeryi muvyaani oloca yawooniherya eyo mmasu awe. Mukhalelo wa wooniherya onnaphwanyeya mu liivuru Ministério Teocrático, epaaxina 82, yoowo ori wa wunlaana mu ekulucu anyu. Mucicimiherye ochuneya wa owarela phaama ni wiirehererya​—2 Akor. 6:3, 4.

• Mvahe ovyakiha wooya vahoolo. Mmoonihe mulaleeryi muvyaani meesa a soolaleeryiwa, nave mmuhusihe mukhalelo wa opharihela ichu sookravaariwa mmuteko wa empa ni empa. Mmoonihe mukhalelo wa orumiha yookravariwa wa muchu oonihenrye nchuno. Mmuhusihe mukhalelo wa ompharihela jw.org mu orummwa ni efolyeto Boas Novas para Pessoas de Todas as Nações. Mmukhaviherye wunnuwiha nchuno na achu aaphwannyeiye​—1 Akor. 3:6.

• Mpise murima, nave mmuthamalele. (Masi. 25:11) Mvahe yootakiherya yaphaama. Mvai anyu ni wooniherya wanyu opwacha onahaala okhalano mphurelo muhoolo.

Mweererye Ela Variyari va Mweeri:

• Mulape empa ni empa ni oohuserya anyu, nave mmukuxe wa oxekurya naari yoohuserya ya Piipiliya. Wakhala wi himwaano yoohuserya, mwaawope alaleeryi vakhaani arino mavyakelo wi mulape vamoha.