Ohuserya Moorweela wa Alaleeryi Arino Mavyakelo

Hiyaano chiryene ninnathamalela nthowa na alaleeryi arino mavyakelo mmulokoni. Ancipale aamurumeela Yehova moororomeleya mu iyaakha sincipale. Akina aaphwanya mavyakelo aphaama mu orummwa hiihaanoru. Alaleeryi yaala annoona mukhalelo Yesu onahooleleiye muloko Weekiristu mmahiku yaala ookuchula moorweela wa omwaramwaxa michaka ya omwene ni waapaka oohuserya. (Mat. 28:19, 20) Moorweela wa wiivoliiherya mu orummwa, awo ahaakhela “otokwene wopwaha wa’kuru” vaavaa anakumanaaya ni saweeha naari makacamiho. (2 Akor. 4:7) Sookhalawo sincipale wi nihuserye sa alaleeryi yaala arino mavyakelo oomunepani. Vaavaa anavahiwaaya ekari, awo annahakalala waahusiha akina yeeyo ahusenryaaya. (Sal. 71:18) Mwawiihiiha, nnaphwanela waavyaavya ohuserya sa yaawo. Nnii neereno mwawiihai?

Mu Orummwa. Wi ekhale a mphurelo mu orummwa, alaleeryi avyaani naari arino mavyakelo vakhaani anaphwanela ovyakihiwa. Ananwerya ohuserya vancipale moorweela wa ovarerya mukhalelo alaleeryi arino mavyakelo anaakhwaniheryaaya orummwa waya. (Moone mwaha onaphwanyeya mu Mulipeleli 15 a Fevereru, 2015, “Mukhapelele Mvai Anyu mu Orummwa,” mu eparakrafo yaneeraru vathi va muru “Mwaakhaviherye Alaleeryi Avyaani.”) Mphunre hai moorweela wa olapa ni alaleeryi yaawo mu orummwa?

Mwanwerya onwopa mulaleeryi orino mavyakelo-aphaama wi mulape vamoha mmuteko wa olaleerya? Wakhala wi mulaleeryi owo onamwiiceliwa, akhweya nyuwaano ilukuluku ikina munaphwanela weeciha yoohuserya anyu ya Piipiliya owannyawe. Emanle yoohuserya, mveke wi mulaleeryi owo avahe moonelo awe ni malakiheryo.

Mmalihe Elukuluku Anyu ni Yaawo: Mwaasuwele alaleeryi arino mavyakelo moorweela wa omaliha elukuluku ni yaawo. Mmuwope mmoha a yaawo mmalapelo anyu a echoko nave mumpakele makoho. Wakhala wi mulaleeryi owo onamwiiceliwa, mwanwerya opaka marehereryo wi mpake malapelo a echoko owannyawe? Mmukohe mukhalelo owo aavolonweiye mu eparipari. Mareeliho taani aphwannyeiye? Oya vahoolo taani onneiye mu ekulucu? Ohakalala taani aphwannyeiye nthowa na omulapela Yehova?

Mukhale awiiwexexa ni oophimelela vooloca sa nikhaviheryo awo anaweryaaya woovahaani. Ntoko oothene hiyo, alaleeryi yaawo aakhalano mavyakelo oohiyana hiyana mu orummwa. (Arom. 12:6-8) Akina a yaawo ari awuuluvala, nave elukuluku anaweryaaya omaliha ni hiyaano ennakukuceya. Naamwi hiiha, nnanwerya ohuserya sincipale moorweela wa yaawo nthowa na mavyakelo aya a omurumeela Yehova moororomeleya.