Onamoona Muvyaani wa Vanlakani Woohakalaliha
1. Tiheeni miloko irino mapuro awaaciwamo sinaceenyeriwaaya weera?
1 Miloko seiho irino mapuro awaaciwamo sinnaceenyeriwa ovaha onamoona wa vanlakani, ipharihelaka meesa naari yawooniherya ya soolaleeryiwa. Wakhala wi ennaphariheliwa yawooniherya ya soolaleeryiwa, mulaleeryi mmoha onaphwanela weemela naari okiraathi vakhiviru va yawooniherya. Nave alaleeryi apiili anaphwanela olipelelaka meesa. Yaawo analipelela meesa annaceenyeryiwa okhala awiwehererya, oonthamwene, ni oovyaka. Wakhala wi ookhalavo muchu oonihenrye nchuno, mmoha onaphwanela opacerya ochekula, akhweya aloce ariki: “Montoko wiikoha tiheeni Piipiliya onaloceiye sa mwaha yoola?” Mulaleeryi mukina naari eeli anaphwanela ovareryaka meesa vaavaa anavahaaya onamoona woohilakelela.
2. Muloce yaweereya enooniherya ochuneya wa ovaha onamoona wa vanlakani nipharihelaka yawooniherya ya soolaleeryiwa.
2 Mukhalelo ola, onnakumiherya soohuserya sa Piipiliya sincipale ivyaani. Nthamwene mmoha a oxikola aalakelela orepela wa Anamoona a Yehova, nyenya owo haawenrye ophwanya Empa ya Omwene. Esumana yoocharela owo aahoona yawooniherya ya soolaleeryiwa. Aapacerya yoohuserya ya Piipiliya, vano namahuserya yoole, mulaleeryi oopatisiwa nave onnapaka makupa a mukhalelo yoola wa onamoona.
3. Akina anoona hai vooloca sa mukhalelo yoola wa onamoona wa vanlakani?
3 Murokora mmoha yoowo aapanke makupa a mukhalelo yoola wa onamoona wa vanlakani onnaloca: “Akina anneemela va yawooniherya wi eveke soolaleeryiwa ivyaani. Akina hantonko wiiwa vooloca sa Anamoona a Yehova. Kinoona wi ni mukhalelo yoola ancipale anahaala ophwanyiwa.” Murokora mukina onnaloca tho, “Ola onamoona muvyaani wa vanlakani woohakalaliha, ntakhara wi achu annarwa wa weyo, naamwi ahirino nchuno awo anakhala ootikiniheya.”
4. Ntakhara heeni ti wa mphurelo oruuha yawooniherya ya soolaleeryiwa nipuro ni elukuluku emohamoha ya esumana eri yoothene?
4 Enakhala yamphurelo oruuha yawooniherya ya soolaleeryiwa mu nipuro ni nihiku nimohamoha, nave mu elukuluku emohamoha ya esumana eri yoothene. Ntoko yookhumelela, achu annarwa mootaphuwa wa yawooniherya nave annapaka makoho ni oveka soolaleeryiwa. Muloko anyu wookhalano marehereryo a onamoona wa vanlakani? Wakhala wi tihiiha, nyuwaano munanwerya opaka makupa a onamoona yoola woohakalaliha ni wa mphurelo wa “ovuwiha ovuwa wa Omwene wa Muluku.”—Luka 9:60.