Mikhalelo Mivyaani sa Onamoona wa Vanlakani

1. Ntakiheryo taani aKiristu a nsana noopacerya avanhaaya?

¹ AKiristu a nsana noopacerya yaaheerano vancipale opwaha olaleerya empa ni empa. Awo tho yaanalaleerya vanlakani. (Saw. 20:20) Ntoko yawooniherya, awo yaanaya o empa ya Muluku, weiwo yaasuwelaaya wi yaahaala waaphwanya achu ancipale. (Saw. 5:42) Vaavaa aareiye o Atene, murummwa Paulo aalaleerya mahiku oothene wa yaawo yaakhala mmapuro a maroca. (Saw. 17:17) Olelo, mukhalelo ahu woopacerya wa olaleerya michaka yaphaama onnatitelela okhala orummwa wa empa ni empa. Nyenya, hiyaano tho ninnaya mapuro a ikaaro, mapuro a maroca, iparki, arampha atokotoko, ni mapuro makina wi nalaleerye weiwo achu anaphwanyeyaayawo. Alaleeryi oothene annaceenyeryiwa wi evahe onamoona wa vanlakani wakhala wooweryeya, ancipale anahaala okhalano ekari ya opaka makupa mu mikhalelo miili mivyaani sa onamoona wa vanlakani.

2. Mukhalelo taani woohakalala opacenrye mu Novempuru 2011?

² Onamoona wa Vanlakani mu Ipooma Itokotoko: Ntoko elociwaaya mu Anuário de 2013 va ipaaxina 16 ni 17, mukhalelo woohakalala wa onamoona wa vanlakani opacenrye o Epooma ya Nova York mu Novempuru a 2011. Meesa ni ikaarata ni sawooniherya sooreera ni soolaleeryiwa mu ilocelo sincipale saanaperekhiwa mmapuro a epooma achu ancipale aneecaaya ni meco. Khata nihiku macikhwi aachu anneeca, ophitaanyerya ancipale anakhala mu ipa sookhapeleliwa ni achu yaawo wiiliwiili ahinaphwanyeya vaate. Sookhumelelavo saari saphaama. Mu mweeri mmoha hiihaanoru, saakaiwa irevista 3.797 ni aliivuru 7.986. Alipa oovira ancipale yaaveka yoohuserya ya Piipiliya. Woona wi oceenyeryiwa waari opaceryiha soohuserya sa Piipiliya, endereso yoothene yaahiiwa ni alipa oochuna yaanarumihiwa mwawaakuveya o muloko woophwanelela wi ethokororyiwe achu awo.

3. Mukhalelo yoola onannuwihiwa mwawiihai?

³ Nthowa na sookhumelelavo sa mukhalelo yoola, vano onnannuwihiwa veelapo yoothene mmapuro awaaciwamo. Efiliyale ya vanipuroni enahaala osuwela ipooma saahaala ophura. Iho ipooma irino eriyari ya soowela nari nipuro ntokotoko na muteko nari ipreedio ineeriha wi achu ancipale eneeca ni meco. Yamala, efiliyale enahaala opacerya wiiwanana ni miloko seiyo inahaala opaka makupa ni ovaha sooleliherya sawaacereryeya. Mapiyoneero a elukuluku yoothene ni avameekhaaya tanaphariheliwa muteko, naamwi mapuro makina mapiyoneero ookhaviherya annuuka tho mmuteko yoola.

4. Onamoona wa vanlakani mu ipooma itokotoko oneeriwano hai?

⁴ Onamoona Oneeriwano Hai: Yaale anavaha onamoona wa vanlakani mu ipooma itokotoko wiiliwiili anawehererya wi muchu arwe va meesa nari echu yawooniherya. Vaavaa muchu onaacameleiye, onnawompwa wi akuxe yoolaleeryiwa onachuneiye. Mapiyoneero annahakalala waakhula makoho awe oothene orweela mu Soorempwa. Wakhala wi ookuxa yoolaleeryiwa, mapiyoneero hanaloca nrehereryo na sooveleela soochuna. Nyenya wakhala wi owo ookoha moota muteko ahu onakhaviheryiwaaya, mapiyoneero annamuleela wi sooveleela soochuna poti oveleeliwa o endereso eromoliwe va yoolaleeryiwa. Wakhala wooweryeya, awo annamukoha: “Munnachuna wi muchu ooxekuryeni vaate vanyu?” nari “Ophitaanyerya yoolaleeryiwa ela, munnasuwela wi hiyaano ninnavaha yoohuserya ya Piipiliya yoohiliveliwa?”

5. Mphurelo taani mutheli mmoha ophwannyeiye mu wuuka mmukhalelo yoola?

⁵ Wuuka mmukhalelo yoola onnaruuha mphurelo. Mutheli mmoha oorepa: “Weemela va meesa ni owoona achu macikhwi nihiku nnihiku ennatannya mirima sahu wa muteko yoowo oneeriwano wi waaphiyerya achu oothene veelaponi. Owoona achu yaala ancipale ni wuupuwela moota Yehova onamuthokororyeiye muchu ti muchu ennalipixa yoolakelela ahu ya otitelela ohela muteko woolaleerya va nipuro noopacerya mu okumi ahu. Hiyaano ninnamwaanyiherya Yehova aalikhelaka mirima sa oothene yaawo anavira va meesa, awaavyaka yaale ari oophwanelela. Hiyaano nnoona okhala vakhiviru va ankeelo anamalapa akhwiihu.

6. (a) Mukhalelo taani mukina wa onamoona wa vanlakani onarehereryiwa ni miloko mincipale, nave ohiyanne hai ni onamoona wa vanlakani mu ipooma itokotoko? (b) Miloko inii ewerye hai wiiwanana vaavaa inavahaaya onamoona wa vanlakani?

⁶ Onamoona wa Vanlakani Onarehereryiwa Vanipuroni: Mu waaceererya onamoona wa vanlakani mu ipooma itokotoko, mukhalelo mukina muvyaani onnarehereryiwa ni makhuuru mancipale a mansiau mu ekulucu aya ya vanipuroni. Ni mukhalelo yoola, alaleeryi annapharihela meesa nari echu yawooniherya mmapuro awaaciwamo mpuwa mwa munlaano wa ekulucu ya muloko aya. Ola ti woohiyana ni onamoona wa vanlakani mu ipooma itokotoko, yoowo onaapharihela achu a miloko mincipale wi elaleerye mapuro mamohamoha awaaciwamo mu ipooma inathanliwa ni efiliyale.​—Moone ekaaxa “Wiiwanana Waphaama Ti Wookhweleya.”

7. Weiwo eraaya yooweryeya, mansiau anahaala orehererya hai onamoona va vanlakani vanipuroni?

⁷ Mansiau anahaala othokororya wakhala wi ekulucu ya muloko yookhalano mapuro achu ancipale aneecaaya ni meco nave elakelele wakhala wi yaahaala okhala phaama orehererya onamoona wa vanlakani. Mapuro a okuhavo meesa ni echu yawooniherya anaphitaanyerya mapuro a ikaaro, mapuro a vanlakani, iparki, arampha awaaciwamo, ilooxa itokotoko, ipa sa anaxikola, mapuro a nceke, ni mapuro a saweereya sa vayaakhani. Ti yaphaama ohela meesa va nipuro nimohamoha, mmahiku mamohamoha, ni ilukuluku imohamoha. Ehooniwa wi ohela meesa va makhuuru a ilooxa itokotoko ennakumiherya mphurelo ohiya ohela vaate va elooxa emoha etokotoko weiwo achu anaxekuryaaya erino yoolakelela. Mapuro makina, ntoko aneeciwa ni ancipale, poti ophwanelela echu ekhaani yawooniherya soolaleeryiwa. Mansiau poti okumiha mu Site ahu ichu savameekhaaya sa wooniherya irevista A Sentinela ni Despertai! ni liivuru Piipiliya Onahusiha Eheeni. Ichu seiya inarehereryiwa xaxaxa wi iphariheliwe mmukhalelo yoola wa onamoona wa vanlakani. Wa yaawo anapaka makupa anahaala ophara muteko owo mmukhalelo mmoha ntoko yaale anapaka onamoona wa vanlakani mu ipooma itokotoko nave anaphwanela ochariha vakhiviru khiviru ohoolela wa ooweherya a muteko. Wakhala wi awo aakhalano endereso ya muchu onachuna ohinakhala mu ekulucu aya, awo mwawaakuveya anaphwanela orepa eformulaario Queira Visitar (S-43) nave emunnye namarepa.

8. Wakhala wi haavovo marehereryo mmuloko anyu a onamoona wa vanlakani, ikari taani nlelo irivo sa olaleerya vanlakani?

⁸ Onamoona wa Vanlakani mu Orummwa Wanyu Mukhatinyu: Miloko mikina poti ohikhalano nipuro mu ekulucu aya erino nikupa achu ancipale aneecaayawo ni meco nnaphwanelela ohelavo meesa nari opharihela echu yawooniherya soolaleeryiwa. Nyenya mmiloko seiyo, alaleeryi annalipihiwa wi ethokororye ophitaanyerya onamoona wa vanlakani mu orummwa waya mukhataaya. Mu ekulucu anyu wookhalamo mapuro a maroca, rampha a ilooxa, nari elooxa yawaaceliwa? Wookhalamo eparki nari nipuro achu anathukumanaayawo? Wookhalamo saweereya seelapo sineeriwa mu ekulucu anyu? Wakhala wi sookhalamo, nlelo munanwerya opuha onamoona wa vanlakani.

9. Ntakhara heeni nnaphwanela wiilipixerya waalaleerya achu weiwo anaphwanyeyaayawo?

⁹ Yehova onnakhwela wi “atchu othene evuluwe, wi ephiye voróra eparipari.” (1 Tim. 2:4, 5) Mwawiihiiha, ninneererya waaphiyerya achu ancipale anaweryeya ni michaka ya Omwene makuchuwelo ehaakumve ophiya. (Mat. 24:14) Mmapuro mancipale ti woovila waaphwanya achu vaate. Nyenya, nnanwerya oloca ni yaawo vanlakani vaavaa anakhumaaya vaate. Onamoona wa vanlakani mukhalelo mmoharu yoowo achu ancipale anahaalaaya ophwanya ekari ya owiriyana michaka yaphaama. Hankooni nikhwaaniherye phaama orummwa wahu moorweela wa waalaleerya achu weiwo anaphwanyeyaayawo.​—2 Tim. 4:5.

[Ekaaxa va epaaxina 5]

Wiiwanana Waphaama Ti Wookhweleya

Ennalociwa wi alaleeryi a miloko sawaacamana ikwaha ikina annavaha onamoona wa vanlakani mu rampha mmohamoha, nipuro na ikaaro nimohamoha, ni ohoolo wa mapuro mamohamoha a maroca nari soowela. Alaleeryi a miloko soohiyana annahiya irevista mu koredore mmohamoha, esaala ya oweherya, nari mapuro a ocapa, nave annalaleerya mapuro mamohamoha a maroca. Ela ennaweeriha alipa maroca ni anamakhala amwaacamani onanariwa, naamwi alaleeryi ehilaleeryaka va elukuluku emohamoha. Mwawiihiiha, ti waphaama okhala mpuwa mwa ekulucu ya muloko vaavaa nnavahaahu onamoona wa vanlakani.

Wakhala wi alaleeryi annachuna ovaha onamoona wa vanlakani mu ekulucu ya muloko wawaacamana, awo anaphwanela oloca ni ooweherya a muteko aya. Owo onahaala oloca ni ooweherya a muteko a muloko mukina avekaka weemereryiwa alaleeryi ehaakumve opwaha. Weiwo miloko sa ilocelo soohiyana ithanliwe olaleerya va nipuro nimohamoha, ooweherya a muteko anaphwanela olocihana mukina ni mukhwaawe wi esepe waanyeenyeiha achu mwaayiini. Moorweela wa wiiwanana waphaama, ichu soothene enahaala weereya “mophwanelela ni mokwasulela.”​—1 Akor. 14:40.

[Eruku va epaaxina 6]

[Eruku va epaaxina 6]