Mpharihele Phaama Elukuluku Anyu mu Orummwa
Mu eyaakha ya muteko ya 2014 Anamoona a Yehova aamaliha iwora sawaakhwana 1.945.487.604 mu orummwa—ela yawooniherya wi nri oolakelela okhala ooweiwa mmuteko wa Yehova! (Sal. 110:3; 1 Akor. 15:58) Woona wi “elukuluku yokhuveya” apwanne ti wooweryeya opharihela elukuluku ahu mu orummwa wi nloce ni achu ancipale?—1 Akor. 7:29.
Wi nipharihele phaama elukuluku ahu mu orummwa onachuneya waakuveya. Ntoko yootakiherya, wakhala wi nyuwaano munnamaliha ewora emoha naari sawaaca mu orummwa muhilonce ni muchu, mwanwerya otoroka wi mwaaphwanye nave muloce ni achu ancipale? Makhalelo toohiyana nipuro nnipuro. Naamwi hiiha, malakiheryo anacharela ananwerya wookhaviheryaani opharihela phaama elukuluku anyu, mwawiihiiha nyuwaano munahaala osepa “omana etxheku.”—1 Akor. 9:26.
• Onamoona wa Empa ni Empa: Mu iyaakha sincipale, alaleeryi aakhovelela opacerya nihiku naya mu orummwa moorweela wa olaleerya empa ni empa. Mwawiihiiha, woona wi achu ancipale annalapa variyari va nihiku, ntakhara heeni oheererya olaleerya empa ni empa oxekuwa naari ohiyu, achu ancipale eri mmavaate mwaya yiichuuwaka? Variyari va nihiku, olaleerya mmakhwaalani naari mmapuro a maroca onahaala okhala wa mphurelo.
• Onamoona wa Vanlakani: Meesa ni yawooniherya ya soolaleeryiwa inaphwanela okuhiwa mmapuro awaaciwamo ekulucu ya muloko anyu achu ancipale aneecaaya ni meco. (Moone Orummwa Wahu wa Omwene wa Yulyu a 2013, epaax. 5.) Wakhala wi achu annavukuwa va nipuro naathanliwe wa onamoona wa vanlakani, nikhuuru na muteko wa Muloko nnaphwanela olakelela wi meesa naari yawooniherya ya soolaleeryiwa ithaamiheriwe nipuro nikina.
• Oxekurya ni Soohuserya sa Piipiliya: Apwanne mwanwerya otoroka marehereryo anyu a oxekurya ni soohuserya sa Piipiliya vaavaa makhalelo makina a orummwa anakhalaaya oovila? Ntoko yootakiherya, wakhala wi orummwa wa empa ni empa ti wa mphurelo Nawoorowa wooxixelo, mwanwerya weeciha soohuserya sanyu sa Piipiliya elukuluku ekina? Vaavaa munapakaanyu oxekurya, apwanne mwanwerya opaka makhuuru makhaani wi mwaakhwaniherye phaama orummwa wanyu?
Woona wi nnaphwanela waalakhanyerya elukuluku ahu vaavaa nniivoliiheryaahu mu orummwa, ohakalala wahu onnaacereryeya vaavaa nnakhumelela ahu phaama. Wakhala wi mohoona wi oya mmukhalelo mmoha wa orummwa tahi wa mphurelo mu elukuluku yammoori, mweererye makhalelo makina. Mvekele wa Yehova, “mwanene sokhupa,” ni ohoolela wawe munanwerya opharihela phaama elukuluku anyu mu orummwa!—Mat. 9:38.