OKUMI WEEKIRISTU

Makupa Mavyaani a Opaceryihano Ochekula

Ovinyerya mu Yaneru a 2016, epaaxina yookuchula ya Mulipeleli ennakhalano makupa arino muru “Tiheeni Piipiliya Onaloceiye?” Makupa ala apakeliwe wi enikhaviherye opaceryiha ochekula onahaala onikeriha mu mwaha wa Piipiliya. Makupa ala analikana ni mukhalelo wa ifolyeto sahu. Aakhalavo maakhulo oothanla, nave voocharela Yoorepa enaakhula nikoho, ni miyaha sawaaceererya.

Ochekula waphaama vooloca sa Piipiliya onnakhaviherya opaceryiha yoohuserya ya Piipiliya. Mpharihele makupa yaala mavyaani wi mwaakhaviherye ancipale omaliha etala aya yoomunepani.​—Mat 5:6.

MUKHALELO WA WEERANO:

1 Mukohe moonelo wa namakhala vooloca sa nikoho.

2 Munwiriyane wi musuwele mukhalelo aakhunleiye.

3 Mwaalakhanye yoorepa eri vathi va muru “Piipiliya Onii,” nave mmukohe tiheeni iiwexenxeiye va yoorepa eyo. Wakhala wi ookhalano elukuluku, mutitelele ochekula, mpharihelaka mwaha vathi va muru onii “Echu Taani Ekina Nnahuseryaahu Orweela Mpiipiliyani?”

4 Mumvahe erevista.

5 Mvaanele nihiku munahaalaanyu okookela othokororya nikoho nanaawiili.