Muni Nwerye Hai Okhala Nthamwene Eeparipari?

APWANNE nyuwaano muhintoko wiisoona wi mwaahaala ohoolela makacamiho mukhatiinyu? Nnakhala mu “ilukuluku sa sookacamiha, soovila ovilela” nneeraahu niwerye wiisoona okhala ooceecheya ni oovalaanyeya. (2 Tim. 3:1) Mwawiihiiha,vaavaa nnahoolelaahu makacamiho aakhalawo achu eri oorehereya wi enikhaviherye. Piipiliya onnathariha ochuneya waya okhalano asinthamwene eeparipari mu “ilukuluku sa makacamiho.”—Mas. 17:17.

TI MWAWIIHAI ASINTHAMWENE EEPARIPARI ENEERAAYA ENIKHAVIHERYE?

Murummwa Paulo aahiphuravo wa asinthamwene a mukwaha yaawo aaryeiyeno. (Ako. 4:​7-11) Vaavaa Paulo aawaleliweiye o Roma, asinthamwene awe yaahipaka sincipale seiho Paulo ahaaweryeiye opaka meekheiye. Ntoko yootakiherya, Epafrotitu aahivahererya wa Paulo ichu soochuneya seiho anna ni arokora yaaruminhaaya o Filipo. (Afi. 4:18) Tikiku aahiveleela ikaarata sa Paulo wa miloko soohiyanahiyana. (Ako. 4:7) Nnikhaviheryo na asinthamwene awe, Paulo aahiwerya waakhwaniherya muteko awe woolaleerya moohipwacha owaleliwa mu ekaripoosu yoovalaanyeya. Muni nwerye hai okhala nthamwene eeparipari olelo?

Sootakiherya sa mmahiku ahu, sinnooniherya ochuneya waya okhala nthamwene eeparipari. Moone yaweereya ya murokora yoowo oonihenrye okhala nthamwene a Elisapeti, piyoneera ookilatheya o Espanya. Vaavaa amama awe yaaphwanyiwaayano ereca ya kanser, murokora aahimwinviyaarela Elisapeti michaka sincipale soolipiha seiho saathipeleya mu soorepa sa Mpiipiliyani. Elisapeti ooloca: “Vaavaa koonnaaka michaka sawe, kaahihakalala osuwela wi ookhala muchu onakuupuwela nave kaahikhala oolipiheya ni kinapaka yeeyo kaachunaaka opakaka.”—Mas. 18:24.

Nnanwerya olipiha onthamwene ahu ni anna ni arokora ahu, morweela wa waakhaviherya mmuteko woolaleerya naari mmithukumano. Ntoko yootakiherya, apwanne nyuwaano mwaanwerya wiivaha wi mmukuxe munna naari murokora awuuluvala ntakhara mithukumano naari mmuteko woolaleerya? Mweerano yeeyo, nyuwaano munampuha olipihana wa mukina ni mukhwaawe. (Aro. 1:12) Nyenya, Akiristu akina hanawerya okhuma vaate. Ti mwawiihai nneeraahu nikhale nthamwene eeparipari wa yaawo?

MUKHALE NTHAMWENE EEPARIPARI WA YAALE AHINAWERYA OKHUMA VAATE

Anna akina aakhalano makacamiho a okumi naari mikhalelo mikina seiho sinawooceeliha woonela mithukumano. Moone yootakiherya ya David, yoowo aarino ereca ya kanser. Mu miyeeri opwaha mithanu nammoha, owo aanaakhela oloola wa nthowa na ereca awe ya kanser. Variyari wa olooliwa wawe, David ni amwaariye Lidia, yanoonela mithukumano empharihelaka interneti

Nikhaviheryo taani awo yaakhenlaaya wa asinthamwene aya a muluko? Omakuchuwelo wa muthukumano ori woothene, akina a mu Empa ya Omwene yaaniivaha wi eloce ni David vamoha ni amwaariye moorweela wa vitio konfrensia. Ohiya yeeyoru, vaavaa David ni amwaariye yaavahereryaaya maakhulo, voocharela yaanaakhela michaka soolipiha sa soorepa wa asinthamwene aya. Teevi yaari yookhumelela? David ni Lidia yaaniisoona okhala oosiveliwa ni anna ni arokora aya naari mano wiisoona omeekha.

Apwanne mwaanwerya opaka marehereryo wi mukhume vamoha mmuteko woolaleerya ni munna naari murokora yoowo ahinawerya okhuma vaate? Ni marehereryo avakhaani, nnanwerya wooniherya wi hinaacuwanle yaale anahoolela makacamiho. (Mas. 3:27) Munoona hai waavya elukuluku wi murepe ikaarata naari ovaha onamoona moorweela wa telefoni ni yaawo? Yaawo ahinawerya okhuma vaate ananwerya woonela mithukumano ntakhara muteko woolaleerya moorweela wa vitio konfrensia. David ni Lidia yaahithamalela ntakhara mareherreryo yaala. David onnathariha: “Pahiru okhala nnikhuuru nahu na mmuteko woolaleerya ntakhara ovaanela wa vakhaani ni mavekelo aanikhaviherya vancipale.” Ohiya yeeyo, wakhala wi mikhalelo sanyu sinaweemereryaani naari wakhala waphaama weerano yeeyo, munanwerya vakina vaya omukuxaka oohuserya anyu a Piipiliya ni oyano wa munna naari murokora yoowo ohinakhumela vaate wi mweecihe vamoha yoohuserya eyo weiwo.

Vaavaa nnamalihaahu elukuluku ni anna ni arokora ahu yaawo ahinawerya okhuma vaate, ninnaasuwela phaama ni mikhalelo saya saphaama, nave niinakhala asinthamwene aphaama wa yaawo. Ntoko yootakiherya, vaavaa muniiwaanyu mukhalelo awo anamuhusihaaya muchu Masu a Muluku ni omukhaviherya omwaacamela Yehova, nyuwaano munamutikhiniheya ni yaawo. Nyuwaano munanwerya waapaka asinthamwene avyaani wakhala wi munnaakhaviherya anna ni arokora olaleerya ni oya mmithukumano.—2 Ako. 6:13.

Paulo aahiphwanya nihakararyo nthowa na okhala ni nthamwene awe Titu. (2 Ako. 7:​5-7) Yaweereya yeela ennanuupuxerya wi nnanwerya waahakararya annihu ohiya pahiru wooniherya niphwanya wa oothoiwa, nyenya tho okhala ni yaawo ni opaka yeeyo nnaweryaahu wi naakhaviherye yaawo.—1 Yoh. 3:18.

MUKHALE NTHAMWENE EEPARIPARI VARIYARI VA ELUKULUKU YA WIIKARIWA

Anna ni arokora ahu o Rusiya aavaha yootakiherya yaphaama moorweela wa okhaviheryana mukina ni mukhwaawe. Moone yeeyo yeerenye ni Sergey ni amwaariye Tatyana. Emanle otholatholiwa empa aya ni polisia, awo yaahikuxiwa wi yakohakohiwe. Tatyana aahihiiwa nave aakookela owaani. Sergey onnathariha: “Vaavaa [Tatyana] aaphin’yeiye owaani, murokora mmoha oolipa murima aahimana mukhora ahu. Yaahirwa tho asinthamwene ancipale nave yaahinikhaviherya okookiherya ichu mmapuroni.”

Sergey onnaaceererya: “Miyaano kinnatepa osiveliwa ni Masiposipo 17:​17, yoowo oni: ‘Nthamwene eeparipari onnooniherya osivela ilukuluku soothene, nave onnakhala munna ooyariwano mu ilukuluku sa makacamiho.’ Variyari va elukuluku yeele ya wiikariwa, kaahichuna vancipale nikhaviheryo na asinthamwene aka. Nave koohuserya wi masu enaphwanyeya mu Masiposipo 17:17 teeparipari. Yehova aahaarumiha asithamwene oolipa murima wi ekikhaviyerye.”a

Vaavaa nnahoolelaahu mikhalelo soovila, ninnaachuna asinthamwene wi enikhaviherye. Nnahaala waachuna yaawo moopwahaxa variyari va yoohooxa etokotoko. Mwawiihiiha, nipake owetha ori woothene wi nikhale nthamwene eparipari hiihaano!—1 Pet. 4:​7, 8.