Ntakhara Heeni Nnaphwanelaahu Waavya Ikano?

1. Ti mwawiihai nnahaalaahu opaka soolakelela mwa miruku ni oweeriha apalanu ahu okhumelela phaama? (Masiposipo 13:10; 15:22)

OOTHENE ahu ninnachuna opaka soolakelela mwa miruku. Nave oothene ahu ninnachuna wi apalanu ahu ekhumeleleke phaama. Masu a Muluku annanleela mukhalelo wa okhwaaniherya soolakelela seiya piili.—Mwaalakhanye Masiposipo 13:10; 15:22.

2. Tiheeni Yehova ororomeliheiye weera ntakhara hiyo?

² Chiryene, muchu aphaama yoowo nnaphwanelaahu ochimakelawo waavya miruku ni ekano ti Tiithi ahu Yehova. Owo onnaniroromeliha onikhaviherya, ariki: “Kinamoovaha ikano koovareryaka.” (Sal. 32:8) Masu yaala, annooniherya wi Yehova onnapaka sincipale ohiya pahiru onivaha ikano—owo onnampwacha mmoha ti mmoha a hiyo nave onnanikhaviherya opharihela muteko ikano sawe.

3. Makoho taani nnahaalaahu waakhula mmwaha yoola?

³ Mmwaha yoola, nnahaala opharihela Masu a Muluku wi enikhaviherye waakhula makoho maxexe: (1) Mikhalelo taani kinaphwanelaaka okhalano wakhala wi kinnachuna ophuravo wa ikano saphaama? (2) Taani onaphwanela okivaha ikano saphaama? (3) Kini keerihe hai muupuwelo ni murima aka okhala woohuleya? (4) Ntakhara heeni kinnaphwanela osepa waaveka akina wi epake yoolakelela wa miyaano?

MIKHALELO TAANI KINAPHWANELAAKA OKHALANO?

4. Mikhalelo taani nnaphwanelaahu okhalano wi niphurevo orweela wa ekano yaphaama?

⁴ Nnaphwanela okhala awiiyeviha ni oophimelela wi niphure orweela wa ikano saphaama. Nnaphwanela osuwela wi nnanwerya ohikhalano mavyakelo naari masuwelelo wi niwerye wiipakela yoothanla yamiruku. Naahikhalano wiiyeviha ni ophimelela, Yehova hawerya onikhaviherya, mwawiihiiha, ekano vyakala yeeyo nnaakhelaahu naawaalakhanyaka Masu a Muluku enanwerya onichawa ntoko maahi a vanlukuni. (Mik. 6:8; 1 Pet. 5:5) Nyenya, wakhala wi na achu awiiyeviha ni oophimelela, nnahaala ochariha mooreheryeya ikano sa Mpiipiliyani seiho nnawiriyanaahu nave nnamukumihavo mphurelo wa seiho.

5. Ichu taani saahaala omweeriha Tavite okhala awiirumiha?

⁵ Moone yeeyo nnahaalaahu ohuserya orweela wa yootakiherya ya mwene Tavite. Ovootha wawe waanwerya omweeriha owo wiirumiha. Ahaakumve okhala mwene, owo aari oovuwa nthowa na mavyakelo awe ntoko namiipa macipo. Ophiyerya tho wi owo aahiwompwa wi iisooneihe wa mwene. (1 Sam. 16:18, 19) Amanle omuthanla Tavite ntoko mwene oocharela, Yehova aahimuvyakiha ni munepa Awe waweela. (1 Sam. 16:11-13) Owo aasuweliwa variyari va achu awe moorweela wa owiipha amwiicani aya, ophitaanyerya mfilisti awoopiha Koliya. (1 Sam. 17:37, 50; 18:7) Waakhanle wi Tavite aari awiirumiha wanthowa na opaka ichu itokweenexa, akhweya aanwerya wuupuwela wi owo haaphwanela owiriyana ikano sa akina. Nyenya Tavite heenreno.

6. Nnasuwela hai wi Tavite anasiveliwano waakhela ikano? (Moone tho ekaapa.)

⁶ Amanle okhala mwene, Tavite aahikhalano onthamwene wawaacameleya ni achu yaawo yaamvaha ikano. (1 Math. 27:32-34) Mweeparipari, naamwi ahaakumve okhala mwene, Tavite ilukuluku soothene aari ooreheryeya owiriyana vaavaa akina yaamvahaaya ikano. Owo aaheemererya ekano ohiya pahiru sa alopwana, nyenya tho ya muthiyana mmoha awiichaniwa Apikayeli. Owo aari mwaara a Napali mulopwana oohicicimiha, oohithamalela ni anrima. Tavite mwawiiyeviha aahipharihela ekano awe yaphaama, nave ntoko yookhumelela, aahisepa opaka yoohesa etokweene.—1 Sam. 25:2, 3, 21-25, 32-34.

7. Tiheeni nnahuseryaahu ni yootakiherya ya Tavite? (Eklesiyaste 4:13) (Moone tho iruku.)

⁷ Nnanwerya ohuserya mahusiheryo avakhaani orweela wa Tavite. Ntoko yootakiherya, nnanwerya osuwela opaka echu yaphaama naari nnanwerya okhalano ekari ya waahoolela akina. Naamwiihiiha, nihirwe nuupuwele wi noosuwela soothene nave wi hannachuna ovahiwa ikano. Nave hiiha ntoko Tavite, nnaphwanela okhala ooreheryeya owiriyana ikano, moohipwacha taani onanivaha. (Mwaalakhanye Eklesiyaste 4:13.) Wakhala wi noheerano, nnahaala osepa opaka soohesa itokweene seiho inahaala otannyerya othanana wa hiyaano ni akina.

TAANI ONAPHWANELA OKIVAHA IKANO SAPHAAMA?

8. Ntakhara heeni Yonata aanwerya omvaha ikano saphaama Tavite?

⁸ Muupuwele nihusiheryo nikina nenlo nnahuseryaahu ni yootakiherya ya Tavite. Owo aahiwiriyana ikano seiho aakhenleiye wa achu yaawo yaarino onthamwene waphaama ni Yehova ni wiiwexexa waphaama wa nikacamiho nooluluwanya nenlo aahooleleiye. Ntoko yootakiherya, vaavaa aachuneiye osuwela waakhanle wi aanwerya orehererya onthamwene awe ni mwene Sawuli, Tavite aahiwiriyana ekano ya Yonata mwana a Sawuli. Ntakhara heeni Yonata aahimvaha ikano saphaama? Nthowa nawi Yonata ohiya pahiru aarino onthamwene waphaama ni Yehova, nyenya tho aahimusuwela phaama Sawuli. (1 Sam. 20:9-13) Nni nipharihele hai nihusiheryo nenla?

9. Taani nnaphwanelaahu omwaavya vaavaa nnachunaahu ekano yaphaama? Mvahe yootakiherya. (Masiposipo 13:20)

⁹ Vaavaa nnachunaahu ikano, yaamukhala phaama omukoha muchu orinono onthamwene waphaama ni Yehova nave osuwenle phaama mwaha yoowo nnachunaahu nikhaviheryo.a (Mwaalakhanye Masiposipo 13:20.) Ntoko yootakiherya, mwaanyiherye wi munna ori mmiravo onnamwaavya oothelanano oophwanelela. Taani aahaala omvaha ikano saphaama? Nthamwene yoowo ori muciye onanwerya okhala oophwanelela wakhala wi ikano sawe sithipelen’ye mmalakiheryo a Mpiipiliyani. Nyenya ti yawooneya wi munna yoola ori mmiravo onanwerya waakhela ikano sooluluwanyaxa ni soophara muteko wakhala wi amukonhe mutheli oolipa omunepani yoowo omusuwenleiye phaama nave ori mutheli ni oohakalala mu elukuluku yincipale.

10. Vano tiheeni nnahaalaahu othokororya hiihaano?

¹⁰ Nohoona mikhalelo miili seiho nnaphwanelaahu okhalano, hiihaa tho ntoko muchu yoowo onaphwanela onivaha ikano saphaama. Vano hankooni noone ntakhara heeni nnaphwanelaahu weeriha muupuwelo ni murima okhala woohuleya naari waakhanle wi ninnaphwanela waaveka akina onipakela soolakelela.

KINI KEERIHE HAI MUUPUWELO NI MURIMA AKA OKHALA WOOHULEYA?

11-12. (1) Tiheeni nnaphwanelaahu osepa opaka? (2) Tiheeni Mwene Rehopowamu eenreiye vaavaa aaphwaneleiye opaka yoolakelela yoochuneya?

¹¹ Vakina vaya, muchu onanwerya wooneya ntoko wi onaavya ikano, nyenya mweeparipari, owo pahiru anachunaka osuwela miyoonelo sa achu akina vooloca sa yoolakelela yeeyo opankeiye. Muchu ntoko yoola, mweeparipari haano muupuwelo ni murima woohuleya. Owo onaphwanela woona ntoko olopola wa yeeyo yeeren’ye ni Mwene Rehopowamu.

¹² Rehopowamu aamuraceela Mwene Solomoni ntoko mulamuleli o Isarayeli. Vaavaa Rehopowamu aaryeiye mwene, achu yaahikhala ni ichu saphaama, nyenya yuupuwela wi Solomoni aahaalapiha vancipale. Muloko wa achu waaya wa Rehopowamu nave emveka wi aavukule murici saya. Rehopowamu aahaaveka wi emvahe elukuluku wi uupuwele vooloca sa yoolakelela aahaaleiye opaka. Owo aaheerano phaama, moorweela wa oveka ikano wa atokweene yaawo yaamukhaviherya Solomoni. (1 Mam. 12:2-7) Mwawiihiiha, owo haapharihenle ikano seiho aavahiweiye ni atokweene yaale. Ntakhara heeni owo eenreiyeno yeela? Apwanne Rehopowamu aapaka yoolakelela wa yeeyo aahaaleiye weera naari wi pahiru aamwaavya muchu wi eemererye moonelo awe? Mmukhalelo wawooneya, owo aaphwanya yoolakelela achuneiye mu ekano yeeyo aakhenleiye wa asinthamwene awe yaawo yaari amiravo. (1 Mam. 12:8-14) Rehopowamu aahaaleela achu mwawiiwanana ni yeeyo ene asinthamwene awe yaloncaaya. Ntoko yookhumelela, nloko naakawanyeya, nave opacerya vaavale Rehopowamu aahikhalano makacamiho ootitelela.—1 Mam. 12:16-19.

13. Nni nsuwenle hai waakhanle wi nookhalano murima ni muupuwelo woohuleya?

¹³ Tiheeni nnahuseryaahu ni yootakiherya ya Rehopowamu? Vaavaa nnavekaahu ikano nnaphwanela okhalano muupuwelo ni murima woohuleya. Nni nsuwele hai waakhanle wi ninneerano? Nnanwerya wiikoha: ‘Apwanne kinnaveka ikano nave voocharela kikhooca mwawaakuveya nthowa nawi tahi yeeyo kaachunaaka owiriyana?’ Moone yootakiherya.

14. Tiheeni nnaphwanelaahu wuupuwela vaavaa nnaakhelaahu ekano? Mvahe yootakiherya. (Moone tho eruku.)

¹⁴ Mwaanyiherye wi munna ohaakhela yamahala ya muteko waphaama. Ahaakumve weemererya owo onnaveka ikano wa atokweene. Munna onnathariha wi muteko waahaala omweeriha okhala ocai ni emusi awe mu elukuluku yincipale. Mutokweene onnamuupuxerya munna nlakiheryo na Mpiipiliyani wi murici awe woopacerya ori ovahererya soothowa soomunepani sa emusi awe. (Aef. 6:4; 1 Tim. 5:8) Naanyiherye wi munna mwawaakuveya onnaphwanya soohesa mmasu a mutokweene nave onnaakoha anna akina vooloca sa mwaha yoowo ophiyerya aleeliwe yeeyo onachuneiye wiiwa. Apwanne chiryene munna onaavya ikano, naari owo oolakelela nave wi pahiru onamwaavya muchu onahaala weemererya moonelo awe? Nnaphwanela wuupuwela wi murima ahu ti woowoka. (Yer. 17:9) Vakina vaya, ekano yeeyo nnachunahuxa, eri ekano yeeyo nihinachunaahu owiriyana.

APWANNE KINNAPHWANELA WAAVEKA AKINA WI EPAKE YOOLAKELELA WA MIYAANO?

15. Nnaphwanela okhalano ekaasoope wa eheeni, nave ntakhara heeni?

¹⁵ Mmoha ti mmoha a hiyaano ookhalano murici wa opaka soolakelela sawe. (Aka. 6:4, 5) Ntoko nthokoronryaahu, muchu a miruku onnaavya ikano sa Masu a Muluku ni sa Akristu awiichwelavo ahaakumve opaka yoolakelela. Mwawiihiiha, nnaphwanela okhalano ekaasoope wi nihaaveke akina onipakela soolakelela. Akina ananwerya opaka nikoho wa muchu yoowo emusuwenlaaya eriki: “Tiheeni mwaahaalaanyu weera waakhanle wi nyuwaano muri mmukhalelo yoola?” Akina ananwerya weerano moochekulela, elikanyihaka yeeyo muchu oneereiye ahuupuwelenle mwawiixeela vooloca sa mwaha.

16. Mukhalelo taani waapacenrye o Korintu vooloca sa seiyo saaveleeliwa mukucho wa soophwaniherya nave taani aarino murici wa yoolakelela ya okhuura emece? (1 Akorintu 8:7; 10:25, 26)

¹⁶ Muupuwele sa yoolakelela yeeyo Akristu a muloko wo Korintu yaaphwanelaaya opaka vooloca sa enama yeeyo akhweya yaavahiwa mukucho wa soophwaniherya. Paulo aaloca wa Akristu yaale wi: “Noosuwela wi yoophwaniherya tahi echweenevo mweelaponi, nave wi haavo Muluku mukina, voohikhala mmoharu.” (1 Ako. 8:4) Wa nthowa na yeeyo Paulo aalonceiye, akina a mmulokoni yaalakelela okhura emece yeeyo yaakuliwa omusika, naamwi eyo eveleliwe wa soophwanyiherya. Akina yaahilakelela ohikhuura enama wi ehikacamihe yawuupuxerya ya murima aya. (Mwaalakhanye 1 Akorintu 8:7; 10:25, 26.) Ela yaari yoolakelela ya muchu mukhateiye. Paulo hantonko waaceenyerya Akristu o Korintu waapakela soolakelela akina naari ocharihaka yeeyo akina yeeraaya. Mmoha ti mmoha aaphwanela ‘omwaakhula meekheiye Muluku.’—Aro. 14:10-12.

17. Tiheeni enahaala weereya wakhala wi nnachariha soolakelela sa akina? Mvahe yootakiherya (Moone tho iruku.)

¹⁷ Ti mwawiihai mukhalelo woolikana ni yoola waahaalaaya weereya olelo? Muupuwele mwaha vooloca sa ifrasau sa nikhami. Mukristu ti Mukristu onnaphwanela opaka yoolakelela awe vooloca sa weemererya naari hooye ifrasau seiya.b Eparipari wi mwaha yoola onanwerya okhala woovila wiiwexexa. Nyenya opaka yoolakelela ya mukhalelo yoola ennapaka makupa a murici wa Mukristu ti Mukristu. (Aro. 14:4) Wakhala wi nnachariha yoolakela ya achu akina nnahaala oceecheiha yawuupuxerya ya murima ahu. Pahiru nnaphwanela ovyakiha yawuupuxerya ya murima ahu ni opharihela muteko yeeyo. (Ahe. 5:14) Vano, tiliini nnaphwanelaahu oveka ekano wa Mukristu awiichwelavo? Vaavaa nnapakaahu otholathola wahu, nyenya nlelo nnachuna nikhaviheryo wi niiwexexe mukhalelo malakiheryo a Mpiipiliyani waakhanle wi enniiwanana nnikacamiho nahu.

MUTITELELE WAAVYA IKANO

18. Tiheeni Yehova oneereiye wa hiyaano?

¹⁸ Yehova onnooniherya ororomela otokweene wa hiyaano moorweela wa oneemererya opaka soolakelela sahu. Owo onnanivaha Masu awe Mpiipiliyani, nave tho asinthamwene a miruku yaawo enanikhaviherya wiiwexexa mukhalelo wa opharihela malakiheryo a Mpiipiliyani. Mmikhalelo seiya, Yehova onnanikhapelela ntoko Tiithi oosivela. (Mas. 3:21-23) Tiheeni nnaphwanelaahu weera wi nooniherye othamalela wahu wa yoowo?

19. Nni ntitelele hai omuhakalaliha Yehova?

¹⁹ Muupuwele ela: Asitiithi annasiveliwa owoona anamwane aya ekhalaka alapeli a Yehova awiichwelavo, amiruku ni yaakhaviheryaka akina. Mmukhalelo mmohamoha, Yehova onnahakalala vaavaa onanooneiye nikhalaka awiichwelavo mmakupa omunepani, naavyaka ikano nave nipakaka soolakelela seiyo inamucicimiha yoowo.