Mukhale Awaakuveya Waakhaviherya Yaale Enooniherya Nchuno Mmichaka Saphaama

1. Achu enaakhulela hai michaka sahu? (Saweeriwa ti Arummwa 13:47, 48; 16:14, 15)

ACHU ancipale mu nsana noopacerya yaaheemererya eparipari vaavaa yiiwalaaya michaka saphaama. (Mwaalakhanye Saweeriwa ti Arummwa 13:47, 48; 16:14, 15.) Mmukhalelo mmohamoha tho olelo, ancipale annasiveliwa vaavaa aniiwaaya michaka sa phaama mu ekwaha aya yoopacerya. Naamwi yaale woopaceryani ahinooniherya nchuno ni michaka sa phaama sa Omwene, ohoolo waya annahula murima aya wi yeemererye. Tiheeni nnaphwanelaahu weera naaphwanya achu “arino nchuno” mmuteko ahu woolaleerya?

2. Ntakhara heeni nnaphwanelaahu olikanyiha muteko wa waapaka oohuserya ni muteko wa mulipa oolima?

² Muthokororye niphwanaphwaniho nimoha. Muteko ahu wa waapaka oohuserya onanwerya olikanyihiwa ni mulipa oolima. Vaavaa sawiima sikina siniichwaaya owo onnarukula, naamwi ahimalinhe olima ni waala makupa makina. Mmukhalelo mmohamoha, vaavaa nnamphwanyaahu muchu yoowo ori ooreheryeya weemererya michaka sahu, nnaphwanela omukhaviherya okhala oohuserya a Kristu mwawaakuveya. Voocharela, ntitelele winnuwiha nchuno na achu akina yaawo anachuna elukuluku yincipale wi yoone ochuneya waya yeeyo aniiwaaya. (Yoh. 4:35, 36) Miruku sinanwerya onikhaviherya othanla mukhalelo wa phaama ntakhara oowiriyana ahu. Hankooni noone yeeyo nnaphwanelaahu weera variyari va opaceryiha ovaanela wi naakhaviherye achu yaawo ari oorehereya opaka matorokelo. Nnahaala ovaanela tho mukhalelo nneeraahu naakhaviherye otitelela oya vahoolo.

MUKHALELO WA WAAKHAVIHERYA YAALE ARINO NCHUNO NTAKHARA MICHAKA SAPHAAMA

3. Mmuteko woolaleerya, tiheeni nnaphwanelaahu weera wakhala wi noomphwanya muchu orino nchuno? (1 Akorintu 9:26)

³ Vaavaa nnaphwanyaahu achu anooniherya nchuno mmuteko ahu woolaleerya, nnaphwanela waakhaviherya mwawaakuveya. Nave tho ninnaphwanela waavaha yoohuserya ya Piipiliya mwawaakuveya ni waawopa ntakhara mithukumano sahu omapacereryo wa ovaanela wahu.—Mwaalakhanye 1 Akorintu 9:26.

4. Mutharihe yaweereya ya muchu yoowo aari oorehereya opacerya yoohuserya ya Piipiliya mwawaakuveya.

⁴ Mvahe yoohuserya ya Piipiliya. Akina a yaawo nnavaanelaahuno ennakhala ooreheryeya ntakhara yoohuserya ya Piipiliya mwawaakuveya. Ntoko yootakiherya, waari nihiku naneexexe, namwali mmoha o Kanata aahaacamela ekarinya ya soolaleeryiwa nave akuxa eproxura Mpuhe Okumi Okhala Wookhala! Murokora yoowo aalaleerya ni ekarinya aahimutharihela wi orweela mu eproxura yeela owo aanwerya okhalano yoohuserya ya Piipiliya ehinaliveliwa. Mwali ole aahooniherya nchuno nave yaahivahereryana manuumero a telefoni. Voocharela, mu nihiku nimohamoha nenle mwali ole aahimurumihela michaka murokora akohaka vooloca sa yoohuserya. Vaavaa murokora aamukonheiye waakhanle wi yaanwerya okumana omakuchuwelo wa esumana, mwali ole aahaakhula: “Munoona hai okhale omeelo? Kinamukhalano elukuluku.” Awo yaahipacerya yoohuserya nihiku naneethanu. Nave mwali ole aahoonela mithukumano mu ekwaha awe yoopacerya omakuchuwelo wa esumana yeele nave aatitelela oya vahoolo mwawaakuveya.

5. Mmikhalelo mikina, tiheeni nnaphwanelaahu weera nihaakumve ovaha yoohuserya ya Piipiliya? (Moone tho iruku.)

⁵ Eparipari wi, tahi wi achu oothene enahaala waakhulelaka ntoko namwali yoole, ni weemererya yoohuserya ya Piipiliya mwawaakuveya. Ikwaha ikina onamuchuneya wi ninnuwihe nchuno na muchu. Nnanwerya weerano yeeyo moorweela wa oloca yeeyo muchu owo onasiveliweiyeno. Natitelela okhalano mukhalelo waphaama nave ntitelela wooniherya wi ninnaapwacha achu, mwawaakuveya nnanwerya opaceryiha yoohuserya ya Piipiliya. Tiheeni nnaphwanelaahu oloca vaavaa nnavahaahu yoohuserya ya Piipiliya? Hankooni noone yeeyo anna ni arokora yaawo eri a mavyakelo a opaceryiha soohuserya sa Piipiliya eloncaaya.

6. Tiheeni nnaphwanelaahu weera wi muchu owo atitelele okhalano nchuno na ovaanela?

⁶ Anna yaala ni arokora aaloca wi mmapuro makina naalocaka vooloca sa yoohuserya ya Piipiliya ti yaphaama osepa oloca ichu ntoko “yoohuserya,” “yoohuserya ya Piipiliya,” naari “kinamoohusiha”. Awo ahiiwexexa wi mukhalelo waphaama wa oloca onaphara muteko tuula: “ochekulela,” “othokororya,” ni “omwiiwexexa Piipiliya.” Wi muchu atitelele okhalano nchuno na ovaanela, munanwerya oloca wi: “Ti yootikhiniha mukhalelo Piipiliya onavahereryeiye maakhulo a makoho oochuneyaxa a mookumini,” naari “Piipiliya tahi wi onaphariheleya wa yaaleru eri mmalapelo owo onnavahererya miruku ntakhara okumi ahu wa nihiku ti nihiku.” Nave tho nnanwerya oloca wi: “Hamuni mmalihe elukuluku yincipale; pahiru mu aminutu 10 naari 15 munanwerya ohuserya ichu soochuneya seiho sinahaala opaka matorokelo mu okumi anyu.” Wi nihimututuxe muchu owo ti waphaama ohipharihela masu enoonya ntoko “nlakano” naari enahaala wooniherya wa owo okhala ookhinyereryeya onaakhelaka “esumana yoothene.”

7. Ti liini achu akina yiiwexenxaaya wi yaanahuserya eparipari? (1 Akorintu 14:23-25)

⁷ Munwope ntakhara muthukumano. Mu elukuluku ya murummwa Paulo, akina yaahiiwexexa wi yaanahuserya eparipari vaavaa yaaphwanyeyaaya mmithukumano. (Mwaalakhanye 1 Akorintu 14:23- 25.) Mweeparipari, ti yeeyo eneereya mmahiku ahu. Oohuserya ancipale a Piipiliya ennapacerya oya vahoolo vaavaa enapaceryaaya ophiya mmithukumano. Teevi eri elukuluku yoophwanelela ya onwopa muchu yoowo oonihenrye nchuno ntakhara mithukumano? Mmwaha 10 wa liivuru Mpuhe Okumi Okhala Wookhala! wookhalamo nwopelo. Nyenya nyuwaano hamunaphwanela oweherya ophiya mmwaha yoola wi munwope muchu owo. Ekwaha yoopacerya ovaanela, munanwerya onwopa muchu owo wi aphwanyeye va mithukumano sa omakuchuwelo wa esumana. Akhweya munanwerya omuleela muru wa mwaha naari nikupa nimoha na Mulipeleli noosivenleeni.

8. Tiheeni nnaphwanelaahu weera vaavaa nnanwopaahu muchu wi aphiye mmithukumano? (Yesaya 54:13)

⁸ Vaavaa munanwopaanyu muchu yoowo oonihenrye nchuno, mmutharihele mukhalelo mithukumano sahu siryaaya soohiyana ni yeeyo akhweya oonneiye mmalapelo makina. Oohuserya a Piipiliya mmoha yoowo aaphwanyen, ye va yoohuserya ya Mulipeleli mu ekwaha awe yoopacerya, aahimukoha muhusihaawe ariki: “Apwanne mulipa oomweeciha Mulipeleli oosuwela masina a achu oothene?” Murokora aahimutharihela, hiiha ntoko nsuwenlaahu masina a amusi ahu oothene, hiyaano tho ninniilipixerya wi nisuwele masina a anna ni arokora ahu. Oohuserya owo aahiloca wi tahi yeeyo eneereya mmalapelo awe. Echu ekina yoohiyana nnaphwanelaahu oloca eri yoolakelela ya mithukumano sahu. (Mwaalakhanye Yesaya 54:13.) Hiyaano nnathukumana wi nimulapele Yehova, nihuserye vooloca sa yoowo ni olipihana mukina ni mukhwaawe. (Ahe. 2:12; 10:24, 25) Ti nthowa nene mithukumano sahu siryaaya sooreheryeya wi sinihusihe, sihiphitaanyeryakavo mihapo naari sookhovelela. (1 Ako. 14:40) Ohiya yeeyoru, Ipa sahu sa Omwene mapuro wi nihuseryekemo, ti nthowa nene enakhalaaya ooreheryeya phaama. Moorweela wa ohipaka makupa a elapo hannavuwiha epartitu eri yoothene ya epoliitika. Nave tho hannapaka makupa mu ovaanela naari waakaaha miyoonelo sa achu. Echu enahaala okhaviherya ori omooniha mwawaakuveya oohuserya exilema eni: Tiheeni Eneereya mu Empa ya Omwene? Mwawiihiiha, owo onahaala oyaaka omuthukumano asuwenle yeeyo eneereya weiwo.

9-10. Tiheeni nnaphwanelaahu oloca wa muchu yoowo akhweya onuuliwa muru ophiya mmithukumano? (Moone tho eruku.)

⁹ Akina ennoovelela woonela mithukumano sahu yuupuwelaka wi enahaala “okhala Namoona a Yehova.” Mwawiihiiha, mmuleele muchu owo wi ninnasiveliwa owaakhela achu yaawo enarweela onixekurya nave wi hinnaakhinyererya oloca naari weera echu variyari va mithukumano naari tho wi ekhale Anamoona a Yehova. Emusi yoothene ennaakheliwa ophitaanyeryavo tho anamwane. Mmithukumano sahu anamwane henavalaanyiwa ni asitiithi aya. Ohiya yeeyo asitiithi ni anamwane aya enakiraathi vamoha nave tho enahuserya vamoha. Mwawiihiiha, asitiithi ennasuwela wi anamwane aya eri naani nave tho ennasuwela yeeyo awo enahuseryaaya. (Malam. 31:12) Hasinavekiwawo sooveleela naari ovirihiwa iparatho wi muchu ahelemo ikhorowa. Hiyaano nnachariha nlamulo na Yesu: “Mwaakhenle mahaleene, mvaheke mahaleene.” (Mat. 10:8) Nyuwaano tho munanwerya oloca wi tahi woochuneya muchu owara yoowara yoowalamela wi aphiye mmithukumano. Muluku hanatikitheryeya ni mukhalelo ahu wa vaate, nyenya owo onoona murima.—1 Sam. 16:7.

¹⁰ Wakhala wi muchu oorwa mmithukumano mpake owetha wanyu wi muchu owo akhale ootaphuwa. Mmusuwelihe atokweene a mmulokoni ni anna akina. Wakhala wi owo ohiisoona okhala ootaphuwa ti yawooneya wi onahaala ochuna okooka. Wakhala wi muchu owo haanono Piipiliya, muchariheke vamoha soorepa Mpiipiliyani mwanyu. Ohiya yeeyoru mmooniherye mukhalelo nyuwaano munamucharihaanyu mulipa ooloca mwaha naari yoohuserya ya mulipeleli.

MUNI MMUKHAVIHERYE HAI MUCHU YOOWO ONAAMPACERYARU OMUHUSERYA PIIPILIYA

11. Muni mooniherye hai wi munnacicimiha elukuluku ni marehereryo a oohuserya?

¹¹ Vaavaa nneecihaahu yoohuserya ya Piipiliya ni muchu tiheeni nnaphwanelaahu okhalano mmuupuweloni? Mucicimiheke elukuluku ni marehereryo awe. Ntoko yootakiherya, wakhala wi moovaanela elukuluku mphiyeke mu elukuluku yeeyo, naamwi mmukuma anyu achu erino yookhovelela ya waatarasaara. Ohiya yeeyo, akhweya yaamukhala phaama ohilekelihaxa yoohuserya mu nihiku noopacerya. Ophiyerya wi alaleeryi akina amavyakelo aaloca wi ti yaphaama ohiyereryaka yoohuserya naamwi muchu owo alocaka wi ookhalano elukuluku. Mukhaleno ekaasoope wi muhiloceke vancipale. Mmuhiyeke oohuserya okhala ootaphuwa wi aloceke moonelo awe.—Mas. 10:19.

12. Teevi enaphwanela okhala yoolakelela ahu ovinyerya woopaceryani wa yoohuserya?

¹² Ovinyerya woopaceryani, yoolakelela anyu ekhale ya omukhaviherya oohuserya anyu omusuwela Yehova ni Yesu ni wunnuwiha osivela ntakhara yaawo. Mukhalelo mmoha wa weerano yeeyo ori moorweela wa ohiivuwiha mukhatiinyu mu masuwelelo anyu a Piipiliya, nyenya pahiru mmasu a Muluku. (Saw. 10:25, 26) Murummwa Paulo aari yootakiherya yaphaama wa yeeyo. Vaavaa owo aahusiheiye achu aatikitheryeya wa Yesu Kristu yoowo aaruule veelaponi wi anikhaviherye omusuwela ni omusivela Yehova. (1 Ako. 2:1, 2) Ohiya yeeyoru, Paulo aahaakhaviherya akina woona ochuneya waya winnuwiha mikhalelo saphaama seiho sahaala olikanyihiwa ni ooru, eparata ni maluku asisapo. (1 Ako. 3:11-15) Mikhalelo seiha sinnaphitaanyeryavo nroromelo, miruku, wiiwexexa ni omoova Yehova. (Sal. 19:9, 10; Mas. 3:13-15; 1 Pet. 1:7) Mutakiherye mukhalelo wa ohusiha wa Paulo wi mwaakhaviherye oohuserya anyu winnuwiha nroromelo noolipa ni onthamwene wawaacameleya ni Tiithi aya oosivela a wirimu.—2 Ako. 1:24.

13. Nni niwerye hai okhala oopixa murima ni aniphwanya vaavaa nnamukhaviheryaahu oohuserya? (2 Akorintu 10:4, 5) (Moone tho eruku.)

¹³ Vaavaa munahusihaanyu muchariheke yootakiherya ya Yesu ya okhala oopixa murima ni aniphwanya. Musepe opaka makoho yaawo enahaala omweeriha muchu wiisoona ohikhala phaama. Wakhala wi oohuserya ookhalano nikacamiho na weemererya mwaha wammoori, mutitelele yoohuserya nave voocharela mukookele oloca sa mwaha yoowo mu elukuluku ekina. Ohiya weererya omukhinyererya oohuserya weemererya nihusiheryo nammoori, mumvahe elukuluku wi eparipari ethipeleye mmurimani mwawe. (Yoh. 16:12; Ako. 2:6, 7) Piipiliya onnalikanyiha mahusiheryo oowoka ni exiri yoolipa yeeyo nnachunaahu okumula. (Mwaalakhanye 2 Akorintu 10:4, 5) Nihaakumve okwatelela nroromelo na oohuserya mu soororomela sawe, nnaphwanela omukhaviherya oteka ixiri ivyaani naari omuroromela Yehova ntoko nchawelo nawe.—Sal. 91:9.

MUNI MMUKHAVIHERYE HAI MUCHU YOOWO ONAAMPACERYARU WOONELA MITHUKUMANO?

14. Nnaphwanela waakhalihaka hai yaale enaampaceryaru woonela mithukumano sahu?

¹⁴ Yehova onachuna wi nihikhale a nthalu, nikhale ooreera murima ni achu oothene moohipwacha sookhovelela saya, mukhalelo aya woomwiilini naari elapo eyariwaaya. (Tiy. 2:1-4, 9) Vano, nni nooniherye hai osivela wa yaale enaampaceryaru ophiya mmithukumano?

15-16. Nni niweerihe hai yaale enaampaceryaru ophiya mithukumano okhala ootaphuwa?

¹⁵ Achu akina ennaphiya mmithukumano sahu nthowa na ochuna woona yeeyo eneereya naari nthowa nawi ewompwale ni muchu a muloko mukina. Wakhala wi moomoona muchu yoowo onaampaceryaru ophiya mu empa anyu ya Omwene, mmwaakhele nave mvaanele ni yoowo. Mukhaleno ekaasoope wi ohakalala wanyu ohimweerihe okhala oohaleeliheya. Munwope muchu owo wi akiraathi vamoha ni nyuwaano, mumphariheleke Piipiliya anyu vamoha ni yoowo naari mveke yoolaleeryiwa ntakhara yoowo. Ohiya yeeyoru, mweererye wiiwexexa miyoonelo sawe. Mulopwana mmoha yoowo aaxekunrye Empa ahu ya Omwene, aahiloca wa munna yoowo aamwaakhenle wi aahuuliheya muru nthowa na ohiwara soowara soophwanelela. Munna aahimweeriha mulopwana ole okhala ootaphuwa nave aahimutharihela wi hiyaano Anamoona a Yehova na achu oolikana ni akina. Moovira wa elukuluku mulopwana ole aahipatisiwa nave hantonko ocuwala naakhulo nenle na munna. Vaavaa nnachekulaahu ni muchu yoowo onanixekurya, sihaakumve naari wookuchulani wa mithukumano nnaphwanela wuupuwela ela: Nnachuna omooniherya wi ninnampwacha nyenya nihivolowelaka miyaha sawe.—1 Pet. 4:15.

¹⁶ Nlelo sookhalavo mikhalelo sa omukhaviherya muchu yoowo onanixekurya okhala ootaphuwa mmithukumano. Mu ochekulela wanyu, mmaakhulo anyu, vaavaa munaperekhaanyu makupa anyu naari vaavaa munalocaanyu sa muchu yoowo ohinamurumeela Yehova muloceke mmukhalelo wa ncicimiho. Musepe oloca masu yaawo enahaala omunyeenyeiha naari omweeriha wi muchu owo ahichune tho ophiya wanaawiili mmithukumano sahu. (Titu 2:8; 3:2) Ntoko yootakiherya, hannachuna othoriha naari oloca moonanara soororomela sa akina. (2 Ako. 6:3) Anna yaawo enaperekha miyaha sa vanlakani enaphwanela okhalano ekaasope ni yeeyo. Anna yaala tho ennooniherya opwacha vaavaa enatharihaaya masu naari miyaha seiho achu yaawo enanixekurya ehiniiwexexaaya phaama.

17. Tiheeni nnaphwanelaahu weera vaavaa nnaaphwanyaahu achu erino “nchuno noophwanelela na waakhela ekumi yoohimala”?

¹⁷ Nihiku ti nihiku nnavira, muteko wa waapaka oohuserya onakhala wawaakuveya. Nave hiyaano nnahaala otitelela owaavya achu yaawo erino “nchuno noophwanelela na waakhela ekumi yoohimala.” (Saw. 13:48) Wakhala wi eyo yoheereya hannaphwanela woovelela ovaha yoohuserya ya Piipiliya naari onwopa ntakhara mithukumano. Neerano yeeyo, nnahaala waakhaviherya okhalano mapacereryo a ovolowa mu “mphiro onakeriha wookumini.”—Mat. 7:14.