Mutitelele Owaniha wi Mwaakhele Mareeliho a Yehova
“Ntakhara wòwana ni Muluku nave wovòtha.”—MAPHATXUWELO 32:29.
MACIPO: 60, 38
TIHEENI NNAHUSERYAAHU ORWEELA WA . . .
Yakopo ni Rakele?
Yosefe?
Paulo?
1, 2. Ekhoco taani akapuro a Yehova anakhalaayano?
AKAPURO oothene oororomeleya a Muluku annawaniha, ovinyerya Apeli eekhaikhai ophiyerya achu oororomeleya olelo. Murummwa Paulo aahaaleela Akristu a Eheepri wi awo ‘yavilela ekhotxo etokotoko’ woona wi yaachuna weemereryiwa ni Yehova ni waakhela mareeliho. (Ahebri 10:32-34) Paulo aalikanyiha owetha wa Akristu yaale ni achu yaapaka mapokha Eekriki, ntoko ochimaka, ni owaniha. (Ahebri 12:1, 4) Olelo, nri mu ochimaka ntakhara okumi, nave nookhalano amwiicani anachuna oniweiha ni oniyeleeliha ohakalala ni omwaakhela phatamari ahu oomwaahiyu.
2 Ekhoco ahu ori “owana” ni Satana ni elapo awe. (Éfeso 6:12) Ti wookhweleyaxa okhoma wi nihivoloweliwe ni mahusiheryo a elapo yeela, ni saweera soonanara, ntoko ocapaheya, omulya soona, ni ohapaliwa naari olya mirece. Nnaphwanela tho otitelela owaniha ni sooceecheiha sahu.—2 Korinto 10:3-6; Kolosi 3:5-9.
3. Muluku onanivyakiha hai wi niwane ni amwiicani ahu?
3 Apwanne ti wooweryeya ovootha ekhoco ni amwiicani yaala akuru? Aai, nyenya onamukhala woovila! Paulo aahiilikanyiha ni namawana vaavaa aalonceiye ariki: “Ti hiha owana waka, nave nkinawana ntoko kinamana etxheku.” (1 Korinto 9:26) Hiiha ntoko mulipa oowana onawaneiye ni mukina, nnaphwanela owaniha ni amwiicani ahu. Yehova onnanikhaviherya nave onnanivyakiha wi neerekeno hiiha. Owo onneerano yeela moorweela wa Piipiliya. Owo tho onnanikhaviherya moorweela wa soolaleeryiwa inathipeleya Mpiipiliyanini, mithukumano Seekristu, sa muceche ni sa ekulucu. Mano munnapharihela mahusiheryo oothene munaakhelaanyu? Wakhala wi hooye, himuwerya okhoma ni mwiicani, munii mukhale ntoko namawana onamana echeku.
4. Nnii nsepe hai ovoothiwa ni yoonanara?
4 Nnaphwanela okhala awiilipelela ilukuluku soothene. Ntakhara heeni? Nthowa nawi amwiicani ahu anahaala oniphara mu elukuluku nihinaweheryaahu naari nivelavenle. Piipiliya onnanceenyerya nave onnanlopola ariki: “Ohìhiye ovothiwe ti yonanara, nto ovothe yonanara ni yaphama.” (Aroma 12:21) Natitelela owana ni mwiicani, nnanwerya ovootha! Nyenya, wakhala wi ninnahiya olipelela nave nimaala owaniha, voocharela, Satana, elapo awe, ni sooceecheiha sahu sinanwerya onivootha. Mwawiihiiha muhivelavele. Muhiceecheye nave muheemererye wi mata anyu evolole!—1 Pedro 5:9.
5. (a) Tiheeni nnaphwanelaahu wuupuwelela wi neemereryiwe ni waakhwela mareeliho a Muluku? (b) Sootakiherya taani sa Mpiipiliyani nnahaalaahu othokororya?
5 Naariki nivoothe, nnaphwanela wuupuwela mathowa ananeeriha owaniha. Ti nthowa nawi nnachuna weemereryiwa ni Muluku ni waakhela mareeliho. Ahebri 11:6 onnaloca: “Yole onamwatxamela Muluku onnaphwanela wemererya wi Muluku okhala, nave wi ti owo onavaha ntxhuwelo yale anamwasya.” Omwaavya Yehova enataphulela olapa mwakuru wakhala wi ninnachuna weemereryiwa ni yoowo. (Saweriwa T’arummwa 15:17) Mpiipiliyani, sookhalamo sootakiherya saphaama sa alopwana ni athiyana yaawo yenreno hiiha. Yakopo, Rakele, Yosefe ni Paulo oothene yaala yaakumanano mikhalelo soovila mmuupuweloni ni omwiilini. Nave yaawerya okhumelela phaama. Sootakiherya saya yawooniherya wi wakhala wi ninnawetha, nnanwerya tho waakhela mareeliho a Yehova. Hankooni noone.
MUNAHAALA OREELIHIWA WAKHALA WI MOOVILELA
6. Tiheeni yaamukhavihenrye Yakopo ovilela, nave aareelihiwe hai? (Moone eruku yoopacerya.)
6 Mulopwana a nroromelo Yakopo aawaniha nave aavilela nthowa nawi aanamusivela Yehova nave aanacicimiha onthamwene awe ni yene. Owo aakhalano nroromelo nawaakhwanela mu soolaiherya sa Yehova wi areelihe nloko naari evyo awe. (Maphatxuwelo 28:3, 4) Vaavaa Yakopo aareiyeno iyaakha waacamela 100, owo aaphiyerya owana ni munkeelo wi aakhele mareeliho oorweela wa Muluku. (Mwaalakhanye Maphatxuwelo 32:25-29.) Apwanne Yakopo aakhalano ikuru sawaakhwanela wi awane ni munkeelo ooweryaxa? Hooye! Nyenya aari oolakelela, nave aahooniherya wi aaphwanela olapa mwakuru wi aakhele mareeliho! Yehova aamureeliha Yakopo nthowa na ovilela wawe nave amvaha nsina nawi Isarayeli, nenlo nnataphulela “Owana, naari Ovilela ni Muluku.” Yakopo aamwaakhela phatamari yoowo tho nnamwaavyaahu, eyo ti wi weemereryiwa ni waakhela mareeliho a Yehova.
7. (a) Mukhalelo taani wooceecheiha Rakele aareiyeno? (b) Tiheeni Rakele eenreiye, nave aareelihiwe hai?
7 Mwaara a Yakopo, Rakele, aanawerya tho woona mukhalelo Yehova eereiye akhwaaniherye yeeyo aamulaihenryeiye iyawe. Nyenya naakhalavo nikacamiho. Rakele haawerya okhalano anamwane. Mu ilukuluku sakhalai, eyo yaanaathananiha vancipale athiyana. Rakele aatitelenle hai owaniha moohipwacha mukhalelo awe wooceecheiha? Rakele haayelenle ewehereryo. Moohiyana, owo aatitelela owaniha moorweela wa ovekela wa Yehova ikwaha sincipale. Yehova aawiriyana nivekelo neeparipari na Rakele, nave aahiisoona okhala ooreelihiwa vaavaa aareiyeno anamwane. Ti nthowa nene aalonceiye: “Kòtepa owana . . . nto kòvòtha.”—Maphatxuwelo 30:8, 20-24.
8. Makacamiho taani Yosefe aareiyeno, nave ti mwawiihai okhanleiye yootakiherya yaphaama wa hiyo?
8 Yootakiherya ya nroromelo na Yakopo ni Rakele akhweya yaamvolowela mwanaya Yosefe nave yaamukhaviherya vaavaa aareiyeno makacamiho muukumini. Vaavaa Yosefe aareiyeno iyaakha 17, okumi awe waatorokeya moomalela. Annawe, yaari ananrima, yaamukuliha ntoko kapuro. Ohoolo waya, aakhala iyaakha sincipale mukariposo o Yikuputu, naamwi ahirino nthowa. (Maphatxuwelo 37:23-28; 39:7-9, 20, 21) Nyenya Yosefe haaceechen’ye naari osarasareya, nave heerenrye wunla ikuhu. Ntakhara heeni? Nthowa nawi Yosefe aanacicimiha onthamwene awe ni Yehova nave aanalipiherya ni murima awe woothene. (Onamukutxho 19:18; Aroma 12:17-21) Yootakiherya ya Yosefe enanwerya onikhaviherya. Naamwi onamwane ahu waari woonanara naari okumi ahu wa hiihaano okhalaka ntoko hiwaano ewehereryo, nnaphwanela otitelela owaniha ni ovilela. Vaavaa nneeraahuno, nnaphwanela ororomela wi Yehova onahaala onireeliha.—Mwaalakhanye Maphatxuwelo 39:21-23.
9. Nnii nimutakiherye hai Yakopo, Rakele ni Yosefe?
9 Olelo, nnanwerya tho ovilela makacamiho. Akhweya munnahooseya nthowa na ohikhalavo ekhaikhai, othanyiwa nthowa na mwiili anyu, naari oruwaniwa nthowa na okhaleliwa nrima. Ohiya okhala ooceecheya, muupuwele yeeyo yaamukhavihenrye Yakopo, Rakele ni Yosefe otitelela omurumeela Yehova ni ohakalala. Muluku aahaalipiha ni waareeliha nthowa nawi yaanathamalela onthamwene aya ni yoowo. Yaatitelela owaniha ni opaka ichu mwawiiwanana ni mavekelo aya. Woona wi nnakhala mu mahiku oomaliherya, ti wookhweleya otitelela olipiha ewehereryo ahu ya omwaahiyu! Mano, muri awiiveleela owaniha, eyo ti wi, olapa mwakuru, wi mweemereryiwe ni Yehova?
MWIILIPISERYE WI MWAAKHELE MAREELIHO
10, 11. (a) Ntakhara heeni ninnaphwanela wiilipiserya wi naakhele mareeliho a Muluku? (b) Tiheeni eni enikhaviherye opaka soothanla soophwanelela?
10 Ntakhara heeni ninnaphwanela wiilipiserya wi naakhele mareeliho a Muluku? Woona wi naachu oohiphaameya, ninnawaniha ni soochuna soonanara. Akina anawaniha wi ekhaleno moonelo waphaama vooloca sa muteko woolaleerya, akina nthowa na makacamiho a ekumi naari omeekha. Aakhalavo tho nlelo akina yaawo anoona okhala woovila omulevelela muchu yoowo aachekenle. Moohipwacha elukuluku nimalinhaahu nimurumeelaka Yehova, oothenaahu nnaphwanela owaniha ni ichu sineeriha okhala woovila omurumeela Muluku, yoowo onaareeliha achu a nroromelo.
11 Mweeparipari, onamukhala woovila okhala Mukristu ni opaka yoothanla yoophwanelela, xaxaxa vaavaa nnawanihaahu ni soochuna sahu soonanara. (Yeremiya 17:9) Wakhala wi munnoona hiiha, mvekele wa Yehova mvekaka munepa awe waweela. Mvekele nave munepa waweela onamookhaviheryaani okhalano ikuru wi mpake yeeyo eri yoophwanelela, ohoolo waya munamwaakhela mareeliho a Muluku. Mukhale oolakelela okhala mwawiiwanana ni mavekelo anyu. Mweererye omwaalakhanya Piipiliya mahiku oothene, ni waavya elukuluku wi mukhaleno yoohuserya ya muchu mukhateiye ni malapelo eechoko.—Mwaalakhanye Salumu 119:32.
12, 13. Akristu apiili akhaviheryen’ye hai ovareryela soochuna soonanara?
12 Sookhalavo sootakiherya sincipale mukhalelo Masu a Muluku, munepa awe, ni soolaleeryiwa sahu Seekristu saakhavihenryaaya anna ni arokora ahu ovootha soochuna soonanara. Mmiravo mmoha aahaalakhanya mwaha Como vencer desejos errados? olaleeryiwe mu Despertai! 8 a Tesempuru a 2003. Tiheeni eenreiye? “Kinnawaniha wi kivareryeleke muupuwelo aka wooheseya. Vaavaa kaalakhannyaaka mwaha wi ‘wa achu ancipale ekhoco ya ovootha soochuna soonanara ti etokotoko,’ eyo yaakeriha woona wi kinapaka makupa a onna. Kinniisoona wi nkiri meekhaaka.” Mmiravo mmohamoha tho yoola aakhavihereya orweela wa mwaha Deus aprova estilos de vida alternativos? yoowo onaphwanyeya mu Despertai! 8 a Outupuru a 2003. Mmwaha yoola, owo aahoona wi wa akina owana waari wootitelela, ntoko “mpùla mmwilini.” (2 Korinto 12:7) Chiryene vaavaa yaatitelelaaya owaniha wi ekhapelele meecelo aya aweela, awo yaanakhalano moonelo waphaama ntakhara omwaahiyu. Owo onnaloca: “Wa nthowa nenla, kinuupuwela wi vaavaa nihiku nnaviraaya, kinnawerya otitelela okhala oororomeleya. Kinnatepa omuthamalela Yehova onapharihela marehereryo awe wi anikhaviherye woopowa nihiku ti nihiku mu elapo yeela yoonanara.”
13 Thokororyani tho yaweereya ya murokora o Estatu Unitu. Owo oorepa: “Kinachuna woothamalelaani nthowa na onivaha yoolya yeeyo nnachunaahu nave mu elukuluku yoophwanelela. Wiiliwiili kinoona ntoko wi miyaha iha kirepeliwe yoomi pahiru. Mu iyaakha sincipale, kinnawaniha ni nchuno noonanara wa echu yeeyo Yehova oniiceiye. Ikwaha ikina, kinnachuna okookela muculi ni omaala owaniha. Kinnasuwela wi Yehova ta ikharari ni ookhurumuwela, nyenya woona wi kookhalano nchuno nenla noonanara nave nkinawerya wiica, kiniisoona wi nkinaphwanela waakhela nikhaviheryo nawe. Ekhoco yeela yootitelela ennavolowela vancipale okumi aka. . . . Kimanle waalakhanya mwaha Você tem ‘um coração para conhecer’ a Jeová? mu Mulipeleli 15 a Marsu a 2013, kaahoona wi chiryene Yehova onnachuna okikhaviherya.”
14. (a) Paulo oona hai vooloca sa ekhoco awe? (b) Nnii niwerye hai ovootha ekhoco ya sooceecheiha sahu?
14 Mwaalakhanye Aroma 7:21-25. Paulo aanasuwela wi ti woovila owaniha ni soochuna soonanara ni sooceecheiha. Nyenya, owo aanaroromela wi aahaala ovootha ekhoco wakhala wi oovekela wa Yehova, omveka wi amukhaviherye, ni wooniherya nroromelo mu mukucho wa Yesu. Hanka vooloca sa hiyo? Apwanne nnanwerya ovootha ekhoco ya sooceecheiha sahu? Aai, wakhala wi noomutakiherya Paulo ni omuroromela moomalela Yehova, ohiya ikuru sahu, ni okhalano nroromelo mu woopola.
15. Yehova oni awerye hai onikhaviherya wi ntitelele ororomeleya ni ovilela saweeha?
15 Ikwaha ikina Muluku onamweemererya wi nooniherye ophiyerya mweeryo taani nnakhalaahu a wuukhuwa vooloca sa mwaha wammoori. Ntoko yootakiherya, wakhala wi muchu a veemusini vahu ookhalano ereca etokweene naari onniiciwa, tiheeni nnahaalaahu weera? Wakhala wi ninnamuroromela Yehova moomalela, nnahaala omveka wi anivahe ikuru wi ntitelele okhala oororomeleya ni okhapelela ohakalala ni olipiha onthamwene ahu ni yoowo. (Filipi 4:13) Sootakiherya sa Akristu ancipale, akhalai ni ahiihaano, sinnooniherya wi ovekela onamunilipiha ni onivaha olipa murima wi ntitelele ovilela.
MUTITELELE OWANIHA WI MWAAKHELE MAREELIHO A YEHOVA
16, 17. Tiheeni mulakelenlaanyu weera?
16 Musaserya aamusiveliwa owoonaani muri ooceecheya ni okookela muculi ni mata anyu evolonle. Vanonto mukhale oolakelela wi “muhaleno iri saphama.” (1 Tesalónika 5:21) Nyuwaano munanwerya omvootha Satana, elapo awe, ni soochuna vyakala soonanara! Munanwerya ovootha wakhala wi munnaroromela moomalela wi Muluku onamoolipihaani ni wookhaviheryaani.—2 Korinto 4:7-9; Galasya 6:9.
17 Mwawiihiiha, titelelani owana. Titelelani owaniha. Titelelani ovilela. Mweerano hiiha, muroromele wi Yehova onahaala ‘woyeheryani marèliho awàtxa.’—Malakiya 3:10.