Mutitelele Oya Vahoolo Ntoko Murummwa
1. Sootakiherya taani sa nsana noopacerya inooniherya wi nnaphwanela oya vahoolo ntoko arummwa?
1 Akiristu anaphwanela oya vahoolo ntoko arummwa. Ti nthowa nene Yesu aavyakinheiye oomuchara awe mmuteko wa olaleerya. (Luka 9:1-5; 10:1-11) Ti nthowa nene tho Akula ni Priskila yaamukunxaaya Apolo “emuthoriherya ephiro ya Muluku mothokororyasha.” (Saw. 18:24-26) Ni nthowa nimohamoha, Paulo aamuceenyerya mulipa oolaleerya oosuwela Timoteo wi atitelele othokororya waalakhanya ni mahusiheryo wi oya wawe vahoolo okhale “wawoneya wa othene.” (1 Tim. 4:13-15) Moohipwacha elukuluku nimalinhaahu naarumeelaka Apwiya ntoko alaleeryi a michaka yaphaama, ti woochuneya onola moohihiyererya mavyakelo ahu a orummwa.
2. Nnii nihuserye hai orweela wa akina?
2 Muhuserye Orweela wa Akina: Mukhalelo mmoha wa onola mavyakelo ahu ori ohuserya orweela wa akina. (Masi. 27:17) Mwawiihiiha, muwiriyaneke phaama vaavaa alaleeryi akina analaleeryaaya. Mwaaveke nikhaviheryo alaleeryi oovyaka, nave muwiriyane phaama yeeyo analocaaya. (Masi. 1:5) Apwanne hamunasuwela mukhalelo wa opaka ekwaha yooxekurya, opaceryiha yoohuserya ya Piipiliya, naari weerano mukhalelo mukina wa orummwa? Mweerevo echu, nave mveke nikhaviheryo na ooweherya a nikhuuru nanyu naari mulaleeryi oovyaka. Muupuwele tho wi munepa waweela wa Muluku onanwerya wunnuwiha mavyakelo anyu, mwawiihiiha moohihiyererya mveke munepa yoowo mu nivekelo.—Luka 11:13.
3. Nnaphwanela waakhulela hai wakhala wi noovahiwa ekano, akhweya nihivenkaahu?
3 Wakhala wi moovahiwa ekano wi muye vahoolo, muhikhale oonyeenyeya naamwi muhivenke ekano eyo. (Ekle. 7:9) Ntoko Apolo, mweemererye nikhaviherye mwawiiyeviha ni othamalela. Weerano yeeyo enooniherya miruku.—Masi. 12:15.
4. Nthowa taani ntokweene Yesu aalonceiye na oya vahoolo ntoko alaleeryi?
4 Oya Vahoolo Onnamucicimiha Muluku: Moorweela wa niphwanaphwaniho, Yesu aahaaceenyerya oomuchara awe oya vahoolo ntoko arummwa. Owo aahiilikanyiha ni mpesa nave oomuchara awe aahaalikanyiha ni mirai. Owo aaloca wi Tiithi aanarehererya murai wi “wime sawima sawacha.” (Yoh. 15:2) Hiiha ntoko mwaneene a emaca ya mpesa onachuneiye wi mirai sivahe sawiima sawaaca, Yehova onachuna wi ntitelele wunnuwa mmavyakelo ahu a wiimiha “yawima ya minuphi.” (Ahe. 13:15) Teevi eri yookhumelela ya oya vahoolo ntoko alaleeryi? Yesu onnanivaha naakhulo: “Annachichimihiwa Atithaka, wi mwime sawima sinchipale.”—Yoh. 15:8.