Wunnuwiha Mavyakelo ahu mu Orummwa—Okhala Nthamwene Ookhaviherya
Ntakhara Heeni ti Yoochuneya: Yesu aanasuwela ochuneya waya olaleerya ni nthamwene. Mwawiihiiha vaavaa aaruminheiye oohuserya awe 70 wi eye yalaleerye, owo aaruminhe eeli eeli. (Luka 10:1) Nthamwene onanwerya ovaha nikhaviheryo wakhala wi mulaleeryi mukina ookumana ni mukhalelo woovila naari wakhala wi hanasuwela omwaakhula namakhala. (Ekle. 4:9, 10) Owo poti wuuka osuwela wawe nari ikwaha ikina ovaha sooleeliherya inahaala omukhaviherya yoowo onalapeiyeno vamoha okhala namalaleya oovyaka. (Masi. 27:17) Owo tho onanwerya omulipiha moorweela wa ovaanela woolipiha vaavaa anayaaya empa ekina.—Afil. 4:8.
Moota wa Weerano Yeela:
• Nwiriyane phaama vaavaa nthamwene anyu onavaheiye onamoona. (Yak. 1:19) Vaavaa onaalakhanyeiye yoorepa, mucharihe Mpiipiliyani mwanyu. Ela enahaala oweerihaani ovaha nikhaviheryo wakhala woochuneya.
• Mpharihele muupuwelo waphaama wi musuwele elukuluku munaphwanelaanyu okhaviherya variyari va ovaanela. (Masi. 25:11) Wakhala wi munamuhoola mulaleeryi mukina mu yoohuserya ya Piipiliya, sooloca sanyu sawaakuveya inahaala othamaleliwa. Nyenya, vaavaa munalaleeryaanyu empa ni empa, nthamwene anyu onahaala ochuna wi mmuhiye wi aloce wakhala wi ekwaha awe. Mwawiihiiha, wakhala wi mulaleeryi muvyaani naari hasuwenle moota wa waakhula nikoho naari waakaaha, owo onahaala othamalela nikhaviheryo nanyu. Moohipwacha waakhala wi munamuhoola mulaleeryi mmuteko wa empa ni empa, ekwaha yookookela, naari yoohuserya ya Piipiliya, muhimukwatelele, muhimwaakhe masu, naari okumiha mwaha mukina.
• Muuke osuwela wanyu. Wakhala wi, mookhalano ekari ya omvaha sooleeliherya mulaleeryi onalapa ni nyuwaano wi akhale oovyaka, muhoovelele. (Masi. 3:27) Mu elukuluku yoophwanelela, nyuwaano poti opacerya muriki: “Munoona hai yeele?” naari “Kinachuna woovaha yooleeliherya.” naari “Echu kineereryaaka weera ti ela.” Mukhaleno mmuupuweloni wi vaavaa akina anathamalelaaya waakhela sooleeliherya mu elukuluku yeeyo, awo anahaala okhala oohica wakhala wi mu soohesa sawe soothene onnavahiwa yooleeliherya.
Mweererye ela Variyari va Mweeri:
• Mwamala olapa mu orummwa ni nthamwene anyu a muteko wa mmacani, mmuleele yeeyo olonceiye naari enreiye yeeyo emweerinhe owo okhala nthamwene ookhaviherya.