Muhikhale Nthamwene Oomaala
1. Nni ntakiherye hai moonelo wa murummwa Paulo vaavaa nnalapaahu ni akina mu orummwa?
1 Murummwa Paulo oona elukuluku aamaliheiye ni annawe Eekiristu ntoko ekari ya olipihana mukina ni mukhwaawe. (Arom. 1:12) Vaavaa munalapaanyu ni mulaleeryi mukina mu orummwa, munnapharihela elukuluku yeeyo wi mmulipihe ni mmukhaviherye yoowo? Ohiya okhala nthamwene oomaala, ntakhara heeni muhinuukaanyu yeeyo yookhavihenryeni okhala mulaleeryi oovyaka?
2. Tiheeni nnaphwanelaahu weera wi nlipihe ororomela wa nthamwene ahu a olaleerya, nave nthowa taani eyo ti yoochuneya?
2 Mvahe Ororomela: Alaleeryi akina haanono ororomela, eyo ennooneya mu ethoi aya nari mmasu aya. Nnanwerya waalipiha moorweela wa waavaha masu eeparipari. Tuuvi ori mukhalelo mukina wa ovaha ororomela? Ooweherya a weeceeca aamuleela mulaleeryi mmoha vooloca sa woova wawe ni ti mwawiihai owo aavekenleiye avekaka nikhaviheryo wi avoothe woova wawe. Munna mukina ohoona wi weerano ela ennamukhaviherya okhalano ororomela: “Eyo enapacerya ni otheya. Mu ilukuluku ikina kaanachuna ovekela kivekaka nikhaviheryo wi kiwerye oloca.” Yookhalavo echu yeeyo yookhavihenryeni okhala oororomela mu orummwa? Muuke ni nthamwene anyu a olaleerya.
3. Tiheeni nnaphwanelaahu wuuka ni nthamwene ahu yeeyo enahaala omukhaviherya okhala oovyaka mu orummwa awe?
3 Muuke Meerelo: Moophwanya mapaceryiho ookhweya nari nikoho, akhweya echu ekina vooloca sa saweereya sa vanipuroni, yeeyo enahaala okhala yoophwanelela opaceryano ovaanela? Montoko woona sookhumelela saphaama sa ovaha yooloca anyu? Locani yeeyo ni nthamwene anyu. (Masi. 27:17) Vaavaa munayaanyu opaka erevisita, nyu poti oloca yoolakelela anyu ya opaka erevisita ni marehereryo anyu wi mukhwaaniherye yeeyo. Mmanle opaka yoohuserya ya Piipiliya, nyuwo poti oloca mathowa aweerinheeni othanla eponto ekina, yoorepa, nari meerelo a ohusiha aniiwanana ni soothowa sa oohuserya.
4. Ntakhara heeni ti waphaama waakhaviherya annihu nnalaleeryaahuno?
4 Alaleeryi a nsana noopacerya tahi yaakhaviherya pahiru oohiroromela. Awo tho yaanoona ochuneya waya olipihana mukina ni mukhwaawe. (Saw. 11:23; 15:32) Murummwa Paulo aamuvyakiha mmiravo Timoteo nave aamuceenyerya wuuka ni akina yeeyo aahusenryeiye. (2 Tim. 2:2) Vaavaa nihinahiyaahu weera yeeyo eri yaphaama wa annihu Eekiristu mu orummwa, hiyaano ninnaacererya ohiya pahiru ohakalala ni ovyaka waya, navetho ninnamuhakalaliha Tiithi ahu a wirimu.—Ahe. 13:15, 16.