Wunnuwiha Mavyakelo Ahu Mmuteko Wa Olaleerya—Mwaakhaviherye Yaale “Yaalakhanyeriwe” Okhala Oohuserya

NTAKHARA HEENI TI YOOCHUNEYA: Yehova onneeriha wi mmiso wa eparipari wunnuwe mmurimani wa “yaale yaalakhanyeriwe waakhela okumi woohimala.” (Saw 13:48; 1Kor 3:7) Ninnalapa vamoha ni Yehova moorweela wa wiilipixerya mmuteko woolaleerya wi naakhaviherye yaale anaakhulela phaama yeele anahuseryaaya. (1Kor 9:26) Oohuserya a Piipiliya anaphwanela wiiwexexa wi opatiso Weekristu ti woochuneya wi muchu avuluxiwe. (1Ped 3:21) Hiyaano ninnaakhaviherya awo okhala oomuchara a Kristu moorweela wa waahusiha opaka matorokelo mu okumi aya, olaleerya, ohusiha, ni oveleela ekumi aya wa Yehova.—Mat 28:19, 20.

MUKHALELO WA WEERANO:

• Nwuupuxerye oohuserya a Piipiliya wi yoolakelela ya yoohuserya aya, ori waakhaviherya wi ‘emusuwele’ Yehova ni omuhakalaliha.—Yoh 17:3.

• Mwaakhaviherye awo oya vahoolo omunepani moorweela wa ovootha saweeha, ntoko sookhovelela soonanara ni onthamwene woonanara.

• Mwaalipihe ni waaceenyerya ehaakumve ni emanle opatisiwa.—Saw 14:22.

MOONE EXILEMA YEHOVA MULUKU ONAMOOKHAVIHERYAANI, NAVE VOOCHARELA MWAAKHULE MAKOHO ALA:

• Ichu taani akhweya inahaala omweeriha muchu woova wiiveleela ni opatisiwa?

• Atokweene eni emukhaviherye hai oohuserya a Piipiliya oya vahoolo omunepani?

• Tiheeni yoorepa ya Isaiya 41:10 enanihusihaaya vooloca sa Yehova?

• Mikhalelo taani inahaala oneeriha omurumeela Yehova mmukhalelo waweemereryeya naamwi nri oohiphaameya?