OKUMI WEEKRISTU

Nni Nimpharihele Hai Liivuru​—Tiheeni Piipiliya Onanihusiheiye?

Liivuru Piipiliya Onanihusiheiye ni Piipiliya Onahusiha toolikana. Oopiili ala ikaruma sahu sa ohusihano, nave analoca mahusiheryo mamoha yaawo mmukhalelo woolikana. Nyenya liivuru Piipiliya Onanihusiheiye orempwale mmukhalelo wookhweya. Ola opakeliwe yaale arino makacamiho a omwiiwexexa phaama liivuru Piipiliya Onahusiha. Ohiya okhalano masu awaaceererya wookuchulani, owo orino sooleeliherya seiho sinathariha masu naari mahusiheryo anaphwanyeya mu miyaha. Woopaceryani wa mwaha ori woothene, haawo makoho naari ekaaxa yawuuluulela wookuchulani. Wookuchulani, oriwo mukwasu wa iparipari sa Piipiliya itharihiwe variyari va mwaha woothene. Hiiha ntoko nneeraahu ni liivuru Piipiliya Onahusiha, liivuru tho yoola musyaani nnahaala omvahaka elukuluku eri yoothene, naamwi ehirivo yoolokoha ya mweeri. Nni nipharihele hai makupa mavyaani avameekhaaya a liivuru yoola vaavaa nneecihaahu yoohuserya ya Piipiliya?

MUKWASU: Wa achu ancipale, mukhalelo nneecihaahu yoohuserya moorweela wa waalakhanya eparakrafo mu liivuru Piipiliya Onahusiha ni opaka nikoho, onnaakhweela. Nyenya, naanyiherye wi oohuserya hasuwenle phaama elocelo ya mulaleeryi naari hanaalakhanya phaama. Mmukhalelo yoowo, munaphwanela ompharihela liivuru Piipiliya Onanihusiheiye. Nave, mpharihele mukwasu wi mmuceenyerye oohuserya waalakhanya soorepa mu elocelo awe. Wi muhusihe eparipari emoha akhweya munahaala waamalihaka aminutu 15. Woona wi mukwasu hiwaano sooleeliherya soothene, muhusiha onaphwanela wiirehereryaka phaama, uupuwelelaka mukhalelo wa omukhaviherya oohuserya. Nyenya, wakhala wi muhusiha oneeciha yoohuserya moorweela wa iparakrafo, mukwasu onahaala okhala ntoko yawuuluulela.

SOOLEELIHERYA: Masu naari mahusiheryo anaphwanyeya makupa yaala arempwale ni manumero anaphwanyeya mu iparakrafo. Muhusiha onaphwanela olakelela waakhanle wi onahaala othokororya sooleeliherya variyari va yoohuserya naari hooye.