Makoho a Alipa Waalakhanya

Esekiyeli ecima 37 ennaloca mapawa meeli yaawo anacopaanyeryana nikhala nipawa nimoha. Ela enataphulela eheeni?

▪ Elukuluku Esekiyeli aareiye mulipa a miririmu, Yehova aaloherya wi achu awe yaahaala okookela mu Elapo ya Nlakano nave wi yaahaala okookela okhala awiiwanana ntoko nloko nimoha. Yooloherya yeeyo yaaloca tho wi alapeli a Muluku a mahiku ookuchula yaahala okhala awiiwanana ntoko muchu mmoha.

Yehova aamuleela Esekiyeli orepa echu va mapawa meeli. Owo aarummwa orepa mu nipawa noopacerya, “Yuta ni mahimo a Isarayele oriyeno,” ni nanaawiili wa, “Yosefe [nipawa na Efraimi] ni mahimo makina othene a Isarayele ari vamoha ni yowo.” Mapawa oomeeli yaahala ocopaanyeryana “wi nikhale nipawa nimoharu” mmatani mwa Esekiyeli.—Ezekiyeli 37:15-17.

Nsu nawi “Efrayimi” nnataphulela eheeni? Nihimo na Efrayimi naari noovuwaxa variyari va mahimo khumi yaawo yaakhala omoko wa Isarayeli. Yeropowamu yoowo aari mwene oopacerya a omwene woomoko, aarwenle mu nihimo na Efrayimi. (Malamulo 33:13, 17; 1 Mamwene 11:26) Nihimo nenla naarwenle wa Efrayimi, mwaana a Yosefe. (Namarepela 1:32, 33, Tradução do Novo Mundo) Yosefe aahaakhela mareeliho a tiithi awe Yakopo. Mwawiihiiha, ti woophwanelela wi nipawa na Efrayimi nneemelela mahimo khumi oomoko. Mu eyaakha ya 740 ehaakumve elukuluku ya Kristu, ehaakumve olociwa yooloherya ya Esekiyeli, Asiriya yaavootha omwene woomoko nave yaahaaphara achu. (2 Mamwene 17:6) Ohoolo waya, Apapulu yaahaavootha Asiriya. Mwawiihiiha, vaavaa Esekiyeli aarempeiye yooloherya awe, Aisarayeli ancipale yiiha emwaramwaxen’ye mweelapo ya Apapulu.

Mu eyaakha ya 607 E.E.K., Apapulu yaavootha mahimo meeli o Yuteya yaawo yakhala ohico nave yaahaaphara achu yaakeriha o Papulu. Awo tho akhweya yaahaaphara yaawo yaahalenle a omwene woomoko. Mamwene a omwene woohico yaarwenle mu nihimo na Yuta. Anamukucho tho yaanakhala o Yuteya ntakhara yaanarumeela mu empa ya Muluku o Yerusalemu. (2 Matharihelo 11:13, 14; 34:30) Mwawiihiiha, ti woophwanelela wi nipawa na “Yuta” nneemelela mahimo meeli a omwene wa ohico.

Vano ti liini mapawa meeli yaacopaanyeryiwaaya? Ela yeeren’ye eyaakha ya 537 E.E.K. vaavaa asitokweene a omwene woomoko ni woohico yaakookenlaaya o Yerusalemu wi eteke wanaawiili empa ya Muluku. Nloko na Isarayeli naakhala nawiiwanana nave yaakookela omulapela Yehova vamoha. (Ezekiyeli 37:21, 22) Wiiwanana yoola waaloheryiwa tho ni alipa a miririmu ntoko Isaiya ni Yeremiya.—Isaiya 11:12, 13; Yeremiya 31:1, 6, 31.

Tiheeni yooloherya ya Esekiyeli yaaloncaaya sa malapelo aweela? Yaaloherya wi Yehova onarwa aweeriha achu awe omulapelaka ntoko nipawa “nimoharu.” (Ezekiyeli 37:18, 19) Apwanne yooloherya yeela ennaakhwanela mmahiku ahu? Aai. Yaapacenrye waakhwanela mu 1919. Khalai, Satana aaneererya waakawanya achu a Muluku. Nyenya mu 1919, yaapacerya oreheryeya ni wiiwanana.

Mweelukuluku yeeyo, achu a Muluku yaakhalano ewehereryo ya okhala mamwene ni anamukucho wirimu vamoha ni Yesu. (Wupulula 20:6) Awo yaari ntoko nipawa na Yuta. Yaakhalavo achu vakhaani yaawo yaarino ewehereryo ya okhala veelaponi ya vathi. Nave moovira wa elukuluku, yaale yaarino yoowehererya yeela yaanaaceereryeya. (Zakariya 8:23) Awo yaari ntoko nipawa na Yosefe.

Olelo, makhuuru oomeeli annamulapela Yehova vamoha. Nave arino Mwene mmoharu, Yesu Kristu. Mu yooloherya ya Esekiyeli, Yesu onalociwa ntoko “mulapeli aka Davide.” (Ezekiyeli 37:24, 25) Yesu aavekela wa Tiithi awe ntakhara oohuserya awe ariki: “Wi othene ekhale amoha ntoko weyano Tithi oryawe mwa miyo ni miyo mwa weyo.”a (Moone masu a vathi.) (Yohani 17:20, 21) Yesu aaloherya tho wi muhuwo awe mukhaani wa oothanliwa waahaala okhala “muhuwo mmoha” ni “iputxeputxhe ikina.” Oothene yaahaala omucharaka “mukukhuli mmoharu.” (Yohani 10:16) Hiiha ntoko Yesu aalonceiye, achu a Muluku olelo tawiiwanana, naamwi erino ewehereryo ya oya wirimu naari okhala veelaponi ya vathi!

[Nsu na vathi]