Yohuserya 11
Khoochani Ekeresha Yowoka!
Satana ni masololo awe hanatchuna wii nyuwo mmurumeeleke Muluku. Anatchuna wahuweliha atchu a Muluku othene yawo aniiryaya yaawerye. Mano ti heni aneraaya wii yahuwelihe? Ephiro emoha ti ekeresha yowoka. (2 aKorinto 11:13-15) Ekeresha enakhala yowoka yakhala wii eyo henahusiha eparipari ya Biblia. Ekeresha yowoka enakhala ntoko ikhorowa sopakiwa molikanyiherya—nari soneyaka ntoko ikhorowa tchiri, nyenya hiinaphura etchu. Inahaala wokumiheryani sokachamiha sinchipale.
Owoka wakeresha horwaru omuhakalaliha Yehova, Muluku a eparipari. Vava Yesu ariiye velaponi yavathi, yahikhalavo atchu akeresha yatchuna omwiipha. Atchwene yawo yoona wii ephiro ya mathamalelo aya ti yawookololowa. Yaahi: “N’rino Atithi mmoha ti Muluku.” Mano Yesu aahemereryanano? Hoye! Owo aahi wa yawo: “Nyuwo muri órwela wa atithinyu Musaserya.” (Yohane 8:41, 44) Olelo, anchipale anupuwela wii anamuthamala Muluku, nyenya tchiryene anamurumela Musaserya ni masololo awe.—1 aKorinto 10:20.
Ntoko mummo mwiri wawucha oniimaya sawina soonanara, ekeresha yowoka ennakhalano ni atchu awera itchu soonanara. Elapo yoosareya ni sokachamiha nthowa na itchu soonanara seiyo atchu aneraaya. Wokhalavo makhalelo oonanara, owana, wiiya, sohosha, wiipha ni opharela mararuwo. Anchipale a yawo anera itchu sene seiyo akhalano ekeresha, nyeya eyo henawakuviha werano yeyo eri yaphama. Hanawerya okhala asiinthamwene a Muluku ohiyavo wakhala wii aahiya wera soonanara.—Mateyu 7:17, 18.
Ekeresha yowoka enahusiha atchu ovekela wa sophwaniherya. Muluku onnalamula wii nihivekeleke wa sophwaniherya. Onniiweyavo. Mano nyuwo mwahaala woona hayi mutchu mukina ahilochekeru ni nyuwo, nyenya alocheke pahi ni iruku sanyu? Mano mutchwene yowo ahaala okhala nthamwene anyu eparipari? Hoye, hahaala okhala. Yehova onatchuna wii atchu elochekeno, ohikhala wa yopatchiwa eri yothene yeyo ehikhanle ni okumi.—Eksodo 20:4, 5.
Ekeresha yowoka enahusiha wii onnaweryeya wiiphanaka mu elukuluku yakhocho. Yesu aariye wii asiinthamwene a Muluku yahaala osivelanaka mukina ni mukhwawe. Hiyo hinnawiipha yawo nnasivelahu. (Yohane 13:35) Wahaala okhala wotchekeya nari owiipha atchu yawo ari oonanara. Vava amwiichani a Yesu yakelaaya omphara, owo hemerenrye wii ohuseryawe ewane wii emwakihe.—Mateyu 26:51, 52.
Ekeresha yowoka enahusiha wii atchu otakhala anahaala ohawaka muchukutcha a moro. Nyenya Biblia onahusiha wii yolivela ya yotcheka ti okhwa. (aRoma 6:23) Yehova ti Muluku a osivela. Mano Muluku a osivela aanwerya wahoshaka atchu okhala wokhala? Ononeyavo khuluwi wii hoye! M’Paradaiso munahaala okhalamo ekeresha emoharu pahi, yeyo Yehova onemereryiiye. (Yawupulula 15:4) Ikeresha sothene siithipenle mu wotha wa Satana inahaala orimeela.