Mphwanye Muhakhu Woomunepani Yoowo Munahaalaanyu Opharihelaka Nihiku ti Nihiku

Vaavaa nnamwaalakhanyaahu Piipiliya nnanwerya ophwanya muhakhu yoowo woomunepani nipakaka otholathola. Ti mwawiihai nneeraahu nikumihevo mphurelo wawaaca mu otholathola yoowo?

Mutholathole mwawiixeela saweereya sa Mpiipiliyani. Ntoko yootakiherya mwiikohe: Taani aari namarepa? Owo aamurepela taani? Elukuluku taani michaka seiya sirempwaaya? Tisivi saari mikhalelo? Tiheeni yeeren’ye woopaceryani? Tiheeni yeeren’ye ohoolo waya?

Muupuwele mahusiheryo yaawo muneeryaanyu muhuserye, ntoko yootakiherya mwiikohe: ‘Ti mwawiihai achu a mu yaweereya yeela yiisoonnaaya? Mikhalelo taani awo yoonihenryaaya? Ntakhara heeni miyaano kinaphwanelaaka otakiherya mikhalelo seiha, naari osepa wunnuwiha seiho?’

Mpharihele mahusiheryo yaawo nyuwaano muhusenryaanyu mmuteko woolaleerya naari mu waakhaliha wanyu akina nihiku ti nihiku. Wakhala wi nyuwaano moheerano yeeyo, munooniherya miruku, hiiha ntoko Piipiliya olonceiye mu Salmu 107:43, PMM:—“Orino miruku, athokororye soothene iha.”

• Yooleeliherya: Moone mukhalelo sooleeliherya seiyo nnaphwanyaahu mmakupa Muhakhu wa Masu a Muluku mmuthukumano wa veeri va esumana, onanikhaviheryaaya otikitheryeya mu opharihela yeeyo nnahuseryaahu Mpiipiliyani. Makupa yaala annakhalamo makoho yaawo nneeraahu niwerye wiipakela, ipontu vooloca wa seiho nneeraahu nuupuwelele, ni sawooniherya seiho nneeraahu nihuserye.