5 Kuajli Xmonojnotsakan

¿TLENON KIJTOSNEKI?

Se tajtli noneki iuan nonojnotsas ikoneuj niman ijkon kimatis kenon nomachilia niman tlenon kinemilia.

¿TLEKA MELAK NONEKI?

Ouijtika imiuan timonojnotsas mokoneuan niman más ijkuak yotelpochtiakej. Amoxtli Tú no me escuchas, yo no te entiendo kijtoua ika ijkuak mokoneuan pipitikej katkaj, xouijtika katka imiuan timonojnotsas pampa nochi mitsijliayaj. San ika, ijkuak noskaltiaj, melak ouijtika pampa xok mitsijliskej tlen kinmajmana noso tlen kimachiliaj, yejuin yeskia kentla nemiskiaj ipan se atentli, nemejuamej ninnemij itempan atl niman mokoneuan nemij okse itempan. San ika, xnoneki ijkon panos, pampa ijkuak telpochtiaj, más noneki imiuan titlajtos.

¿TLENON UELIS TIKCHIUAS?

Xkaki mokoneuj ijkuak yejua kinekis tlajtos. Iuan xtlajto maski san kemanon niman maski melak tlayoua.

“Kemantika tikuelitaskia tikijtos: ‘¡Yotinenkej san sekan nochi tonajli, ¿niman aman tikneki matitlajtokan?!’. San ika, ¿tleka ijkon tikijtos tla mokoneuj kineki mitsijlis tlen kimachilia? ¿Xyejon tlen tinochimej tiknekiskiaj?” (Lisa).

“Nikuelita saniman nonkochis, san ika, noijki nikuelita imiuan nitlajtos nokoneuan maski xnimantsin tikochij noso hasta melak titlayouiliaj” (Herbert).

TLEN BIBLIA KIJTOUA: “Maka yakaj kitejtemo on tlen kuajli san para yejua, yej ma kitejtemo on tlen kuajli para oksekimej” (1 Corintios 10:24).

Kuajli xtlakaki. Se tajtli kijtoua: “Ijkuak nokoneuan nechnojnotstokej, kemantika itlaj okse niknemilijtika niman yejuamej nimantsin kitaj”.

Tla ijkon mopan panoua, kuakon xseui televisión niman xkajkaua mocelular noso motableta. Niman kuajli xkaki tlen mitsijlia mokoneuj niman ijkon tikititis ika noijki mitsajmana tlen yejua kajmana, maski xmás ueyi kijtosneki.

“Melak noneki ika matikimititikan tokoneuan ika techajmana tlen kimachiliaj, pampa tla xijkon tikchiuaj, yejuamej xok techijliskej tlen kinmajmana niman yakaj okse kitejtemoskej akin makinpaleui” (Maranda).

“Maka nimantsin xkualani, maski tla mokoneuj kijtoua itlaj tlen xkuajli” (Anthony).

TLEN BIBLIA KIJTOUA: “Xmotakan sano nemejuamej ken nenkakij” (Lucas 8:18).

Iuan xtlajto mokoneuj maski san kanon ninnemiskej. Kemantika, telpokamej más kuelitaj kijtoskej tlen kimachiliaj ijkuak kichiujtokej itlaj tlen kuelitaj iuan intajuan.

“Tejuamej iuan tonojnotsaj tokoneuan ijkuak tiauej tonpaxalouaj, yejon kichiua ika kuajli matonojnotsakan niman maka matipinauikan, ijkon kuajli tikinmasikamatij” (Nicole).

Noijki uelis nemonojnotsaskej ijkuak nentlakuaskej.

“Ijkuak san sekan titlakuaj, tinochimej tikijtouaj tlenon topan onochiuj ipan yejon tonajli, niman pampa ijkin tikchiuaj, yokichiuj ika san sekan matinemikan niman matopaleuikan” (Robin).

TLEN BIBLIA KIJTOUA: “Cada se de nemejuamej noneki nemis listo para nentlakakiskej” (Santiago 1:19)2.