Tla tikixmatij toTajtsin uelis itech tonisiuiskej
Akin otexchijchiuj yemelak nemi niman melak miyek tlen kualtsin kichiua. Pampa toTajtsin kineki matikixmatikan niman iuan matouikakan techijlia kenon yejua (Juan 17:3; Santiago 4:8).
ToTajtsin kipiya itoka
“Makimatikan tlaltikpakchanejkej ika tejua, akin motoka Jehová, san tejua tiUeyiktika ipan nochi tlaltikpaktli” (SALMO 83:18, TNM).
Biblia kijtoua ika Jehová yejua toTajtsin akin melauak niman ika yejua okichijchiuj nochi tlen onka. Ika yejon, san yejua noneki tikueyichiuaskej (Apocalipsis 4:11).
ToTajtsin Jehová melak tetlasojtla
“Dios yejua tetlajsojtlalistli” (1 JUAN 4:8).
Ika Biblia niman ika nochi tlen yokichijchiuj, Jehová techmachtia kenon yejua. Yejua melak tetlasojtla, niman ika nochi tlen kichiua techititia ika techtlasojtla. Ijkuak más tikixmatij Jehová, más tiktlasojtlaj.
Jehová techtlapopoluiya
“Tejua tisen Dios yejuan titetlapojpoluiya” (NEHEMÍAS 9:17).
Jehová kimatstika ika titlajtlakolejkej, ika yejon, kinektika techtlapopoluis. Tla tiktlajtlaniliaj matechtlapopolui niman xok tikchiuaj tlen yejua xkuelita, yejua techtlapopoluis niman xkeman techtlajyouiltis ipampa tlen xkuajli yotikchiujkej (Salmo 103:12, 13).
Jehová kineki matiknotsakan
“Jehová nisiuj nemi itech nochimej akin kinotsaj, [...] yejua kinkaki akin kitlatlaujtiaj makinpaleui” (SALMO 145:18, 19, TNM).
Jehová xkineki matijkuikan miyek tlemach ijkuak tikueyichiuaskej. Yejua techkaki ijkuak tiknotsaj ijkon ken se tajtli kikaki ikoneuj pampa melak kitlasojtla.