¿UELIS MAKISAS TLALTIKPAKTLI?
AUELIK
TLA xoniaskia atl, xoniaskia nemilistli ipan tlaltikpaktli, niman más tla xoniaskia auelik pampa nochi tlen yoltika tlachijchiujtli ika atl. Tla xoniaskiaj lagos, atentin, ameyaltin niman chaujtin noso kampa tlaapachtik, xtikpiyaskiaj atl tlen ika titlaatekiskiaj, niman tejuamej niman yolkamej xtikpiyaskiaj tlen tikoniskej.
Tlen kijtlakoua auelik
Maski yejuin tlaltikpaktli tentok ika atl, Organización Meteorológica Mundial ijkin okijto: “Onka san 0.5% de atl tlen uelik niman tlen uelis notekitiltis”. Yejuin melak achijtsin atl, maski ijkon, kajxilia para nochi tlen yoltika ipan tlaltikpaktli. San ika, atl mojmostla más tsokuiliujtiuj niman xok miyek onka, ijkin panoua pampa yotikijtlakojkej tlaltikpaktli niman pampa xtiktlajpiyaj atl. Ixtlamatkej kijtouaj ika kanaj ipan 30 xiuitl, 5,000 millones de tlaltikpakchanejkej xkipiyaskej atl tlen koniskej.
Tlaltikpaktli okichijchiujkej para nochipa ompa manemilo
Ipampa ken tlachijchiujtli tlaltikpaktli uelis nochipa kipiyas atl. Tlajli, yolkamej akin nemij ijtik atl niman hasta tonaltsintli kipaleuiyaj atsintli san noyejua manochipaua. Matikitakan seki tlen techititia ika yejuin tlaltikpaktli onochijchiuj para nochipa ompa manemilo:
Yonoitak ika tlajli ueli kichipaua atl. Niman noijki yonoitak ika kampa tlaapachtik kisaj seki xiujtin tlen kichichinaj nitrógeno, fósforo niman pajtin, ijkon chipaui atl.
Ixtlamatkej yokitakej ika seki tlemach tlen kipiya tlaltikpaktli ueli kichipaua atl. Ijkuak atl notlaloua, nonelojtiuj iuan yejuin tlen kipiya tlaltikpaktli, niman ijkon, seki yolkatsitsintin tlen xueli tikimitaj kipopolouaj on tlen tsokuiltik.
Almejas niman mejillones tlen chantij ijtik auelik uelij kikixtiliaj atl nochi tlen tsokuiltik niman tlen teijtlakoua san ipan seki tonaltin niman más kuajli kichipauaj xijkon ken kichiuaj seki máquinas.
Ipan tlaltikpaktli nochipa onka atl pampa maski atl nokuepa moxtli sakin oksejpa uajtoyaui. Ipampa ken tlachijchiujtli tlaltikpaktli, atl nokaua ipan tlaltikpaktli niman xsan ijkon popoliui.
Notejtemoua kenon noyektlalis
Tla kuajli tikitaj ika tocarro maka makitoyaua nion achijtsin aceite niman tla xsan kanon tikxiniaj nochi tlen teijtlakoua, uelis titlapaleuiskej maka matsokuiliui atl.
Ixtlamatkej miyekpa technauatiaj maka sajnoye matiatoyauakan. Niman kijtouaj ika para xsanoyej tiktsokuilotiskej atl, xnoneki tikinxiniskej medicamentos ijtik baño, xnoneki tiktoyauaskej pajtin ipan coladeras niman noneki kuajli tikitaskej ika tocarro maka makitoyaua nion achijtsin aceite.
Sekimej ingenieros youelkej kenon uelis kikixtiliskej istatl atl tlen onka ipan mar, ijkon yokichiujkej pampa kinekij ika nochimej makipiyakan atl tlen uelis koniskej.
Maski atl tlen onka ipan mar ueli kikixtiliaj istatl, xmás tepaleuiya, pampa melak patioj kisa niman miyek luz kikui. Ipan 2021, Naciones Unidas okijto: “Maski melak tokojtilijtokej niman ijkon tiktlajpiyaskej atl noneki más tokojtiliskej”.
¿Tlenon kijtoua Biblia itech yejuin?
“Dios kichiua para on atl ma ijpotokisa, niman kemaj kuepa kiautli. On kiautli ualeua ipan on moxtli, niman ijkuak kiaui, miyek atl toyaui imimpan on tlaltikpaktlakamej” (Job 36:26-28).
ToTajtsin okichiuj ika tlaltikpaktli makitlajpiya atl (Eclesiastés 1:7).
ToTajtsin okichijchiuj tlen kipaleuiya atl manochipaua, ika yejon, uelis kuajli tikmatstoskej ika toTajtsin uelis niman kinektos kichipauas atl. Xkita tlamachtijli “ToTajtsin kijtoua ika tlaltikpaktli makisas” ipan página 15 itech yejuin revista.