SECCIÓN 14
ToTajtsin tlajtoua ika iteotlajtokauan
Jehová kintlalia teotlajtokej, akin teijliskiaj tlen panoskia itech kenon kiueyichiuaj toTajtsin niman tlajtoskiaj itech Mesías
IJKUAK onenkej tekiuajkej ipan Israel niman Judá, noijki onenkej seki tlakamej akin okijtokej tlen toTajtsin kichiuas: okimixmatkej kentla teotlajtokej. Nonekiya ika yejuamej makipiyakan ueyi tlaneltokilistli niman mayolchikaujkej, pampa ijkon ueliskiaj teijliskej tlen toTajtsin kichiuaskia. Matikitakan naui tlen okijtokej panoskia:
1. Popoliuiskia Jerusalén. Iteotlajtokauan toTajtsin —ken Isaías niman Jeremías—, miyek xiuitl poliuiya ijkuak okijtokej ika Jerusalén kipopoloskiaj niman nokuepaskia kentla se tlaluaktli. Noijki kuajli okijtokej tleka okikualanijkej toTajtsin. Maski kijtouayaj ika kitekichiuiliayaj Jehová, ika tlen kichiuayaj xnesiya pampa kinueyichiuayaj tajtsitsintin, tekajkayauayaj niman kichiuayaj tlen xkuajli (2 Reyes 21:10-15; Isaías 3:1-8, 16-26; Jeremías 2:1–3:13).
2. Oksejpa kuajli noueyichiuaskia toTajtsin. Ijkuak panoskia setenta xiujtin ipan ueyikalpan Babilonia, judíos oksejpa nokuepaskiaj iminchan, niman kiyektlaliskiaj teopan ipan Jerusalén niman oksejpa kuajli kiueyichiuaskiaj toTajtsin (Jeremías 46:27; Amós 9:13-15). Docientos xiujtin ijkuak xinochiuaya, Isaías okijto ika se tlakatl itoka Ciro kiminmakixtiskia judíos niman kixoxotoniskia Babilonia niman noijki okijto kenon Ciro kichiuaskia (Isaías 44:24–45:3).
3. Yejkoskia Mesías niman tlen ipan nochiuaskia. Mesías uajnemiskia ipan se ueyikalpan itoka Belén (Miqueas 5:2). Yeskia yolyemanki pampa ijkuak kalakiskia Jerusalén san yaskia ipan se poloko (Zacarías 9:9). Maski kintlajsotlaskia tlaltikpakchanejkej miyekej xkikakisnekiskiaj (Isaías 42:1-3; 53:1, 3). Niman ijkuak mikiskia melak tlajyouiskia. ¿Ompa tlamiskia inemilis Mesías? Ka, pampa ika imikilis, toTajtsin ueli kintlapopoluiya imintlajtlakol nochimej tlaltikpakchanejkej (Isaías 53:4, 5, 9-12).
4. Itekiuajyo Mesías. Tlaltikpakchanejkej tlajtlakolejkej xuelij tlayekanaj niman Jesucristo kema. Yejua kixmatiskiaj kentla Tekiuaj akin kuajkuiskia yolseuilistli (Isaías 9:6, 7; Jeremías 10:23). Ijkuak tlanauatis ipan yejuin tlaltikpaktli, onias yolseuilistli nochiuiyan, niman tlaltikpakchanejkej kuajli nemiskej iuan yolkamej (Isaías 11:3-7). Xok onias nion se kokolistli (Isaías 33:24). Noijki xok onias mikilistli (Isaías 25:8). Niman melak miyekej tlaltikpakchanejkej oksejpa yoliuiskej (Daniel 12:13).
(Onokixti itech amoxtin Isaías, Jeremías, Daniel, Amós, Miqueas niman Zacarías.)