SECCIÓN 13
Tekiuajkej kuakualtin niman tekiuajkej xkuakualtin
Israel notlajkoxeloua niman nochiua ome tekiuajyotl niman miyekej tekiuajkej kitlalkauiyaj Jehová. Babilonios kixoxotoniaj Jerusalén
SAKIN ijkuak Salomón okitlalkaui Jehová, Israel onotlajkoxelo niman onochiujkej ome tekiuajyotl ijkon ken yokijtoka Jehová. Rehoboam akin otetekipatlak, melak okintlajyouilti israelitas ika yejon majtlaktli uejueyimej familias akin chantiyaj ika tlakpak, onoxelojkej. Omemej uejueyimej familias akin xonoxelojkej itech itekiuajyo David ipan Jerusalén onochantijkej tlatsintlan niman onochiujkej tekiuajyotl Judá.
Pampa tekiuajkej xok kipiayaj tlaneltokilistli niman xtetlakamatiyaj, nion se tekiuajyotl xkuajli onen niman xokipixkej pakilistli. San ika, tekiuajyotl tlen ika tlakpak onkatka itech israel, melak xkuajli tlen okichiujkej pampa tekiuajkej okichiujkej makimineltokakan tajtsitsintin. Niman maski toTajtsin okintitlanili teotlajtokej ken Elías iuan Eliseo —akin okinyolitijkej sekimej tlaltikpakchanejkej— xokiminkakisnejkej. Kuakon toTajtsin okinkauili asirios makixoxotonikan Israel.
Ijkuak yopanoka cien xiujtin, tekiuajyotl Judá akin tlatsintlan onokauj, toTajtsin noijki okitlajyouilti. Iteotlajtokauan toTajtsin okimijlitoj tekiuajkej tlenon uelis iminpan nochiuas tla xtetlakamatij, san ika, san sekimej okichiujkej tlen okimijlikej niman okinpaleuijkej akin ompa chantiyaj oksejpa makiueyichiuakan Jehová. Ken tekiuaj Josías akin otlanauati makinxoxotonikan tajtsitsintin niman oksejpa okiyektlali iteopan Jehová. Ijkuak tlayektlalijtoyaj, okinextijkej se amatl kampa okixkopinkaj iTlanauatiluan toTajtsin tlen okimakaka Moisés. Kuakon Josías ika yolchikaualistli opeuj kinxoxotonia tajtsitsintin.
Teyolkoko tikijtoskej ika akin okitekipatlakej Josías, xokichiujkej ken yejua. Kuakon Jehová okinkauili babilonios makalakikan ipan kalpan Judá niman makiminmiktikan noijki makixoxotonikan Jerusalén iuan iteopan. Akin omakiskej okinuikakej Babilonia niman toTajtsin okijto ika oksejpa uajnokuepaskiaj tla yopanok setenta xiujtin. Ipan nochi yejon xiujtin Judá nokauaskia kentla tlaluaktli.
Nion se ichanejkauj David xtekiuajtiskia hasta ijkuak yejkoskia Tekiuaj akin yonoijtoka uajlas: Mesías. Tekiuajkej tlen oualeujkej itech David miyekej okiteititijkej ika tlaltikpakchanejkej xkinmelaua tlayekanaskej. San Mesías kema uelis kichiuas. Ika yejon, tekiuaj tlen sa otlamito otekiuajtik, Jehová okijli: “Corona [...] xakaj kinotlalilis, itlatki yes akin uajlas pampa kimelaua kipiyas niman kuakon yejua nikmakas” (Ezequiel 21:26, 27).
(Onokixti itech amoxtin 1 Reyes, 2 Reyes, 2 Crónicas itlaxeloluan uejueyimej 10 ontlami 36 niman Jeremías 25:8-11.)