Itlajtolkaualis Jefté

Israelitas oksejpa okikaujkej Jehová niman opeuj kinueyichiuaj tajtsitsintin. Yejon tajtsitsintin xkinpaleuiayaj ijkuak ammonitas kimixnamikiyaj. Israelitas otlajyouijkej miyek xiuitl. Sakin okijlikej Jehová: “Yotitlajtlakojkej. Timitstlajtlaniliaj xtechmakixti itech totlauelikniuan”. Israelitas okinxoxotonijkej tajtsitsintin niman oksejpa okiueyichiujkej Jehová. Kuakon yejua xok okixiko kitas kenon kintlajyouiltiayaj.

Israelitas okitlapejpenijkej se soldado itoka katka Jefté makinyekana ijkuak kimixnamikiskiaj ammonitas. Jefté okijli Jehová: “Tla titetlanij ijkuak titlaixnamikiskej, mouan ninotlajtolkaua, nimitsmakas akin kachtopa nechuajnamikis ijkuak ninokuepas nochan”. Jehová okikak iteoyouj Jefté niman okipaleui matetlani.

Ijkuak Jefté onokuep ichan, isentekonetsin akin kachtopa ouajkis okinamikito. Yejua nijtotitiaya niman kitsotsontiaya pandereta. ¿Tlenon kichiuaskia Jefté? Okilnamik tlajtolkaualistli niman okijto: “¡Ay nokoneuj! Yotikchiuj matlapani noyoltsin. Oninotlajtolkauj iuan Jehová niman aman kipiya ika nikchiuas, noneki nimitstitlanis tontekitis ipan tabernáculo tlen nokaua Siló”. Ichpoch okinankili: “Notaj, tla tejua otimotlajtolkauj iuan Jehová noneki xchiua. San nimitstlajtlanilia xnechkauili maniuiya ome metstin ipan tepemej inuan ichpokamej akin imiuan ninouika. Sakin nias”. Ichpoch Jefté okitekichiuili Jehová ipan nochi inemilis ipan tabernáculo. Nochi xiujtin ichpokamej akin imiuan nouikaya yayaj Siló kampa kontlajpalouayaj.