Febrero

Ijkuak tekiuaj Ezequías melak okualok, okitlajtlanili Jehová makipajti, niman yejua ijkon okichiuj (2 Rey. 20:​1-6). San ika, ijkuak apóstol Pablo okitlajtlanili makikixtili se kokolistli tlen katka “ken itlaj uitstli”, Jehová xokichiuj (2 Cor. 12:​7-9). Apóstoles Santiago niman Pedro kinekiya kinmiktis tekiuaj Herodes. Santiago okimiktijkej, san ika, Pedro omakis ipampa se milagro tlen Jehová okichiuj (Hech. 12:​1-11). ¿Tleka Jehová okimakixti Pedro niman xokimakixti Santiago? Maski Biblia xkijtoua, uelis kuajli tikmatstoskej ika Jehová “xkaman kichiua itlaj yejuan xmelajki” (Deut. 32:4). Maski kemantika Jehová xkinankilis toteoyouj ijkon ken tejuamej tikchiayaj, xtiknemiliaj tla xkuajli tlen kichiua pampa tikmatstokej ika techtlasojtla niman nochipa kichiua tlen melajki (Job 33:13). w23.11 21 párr. 6

Santiago okijto ika akin tlamachilisejkej tetlakamatij “ikan nochi inyojlo”. ¿Tlenon kijtosneki yejon? Ika noneki tiknektoskej tikintlakamatiskej akin Jehová yokintekitlali para matlanauatikan niman titetlakamatiskej ika nochi toyojlo. San ika, Jehová xkineki matiktlakamatikan yakaj akin techijlis matikchiuakan itlaj tlen yejua xkuelita (Hech. 4:​18-20). Jehová xtlajtlakole niman nochi tlen technauatia techpaleuiya, ika yejon, xouijtika tikitaj tiktlakamatiskej (Sal. 19:7). San ika, kema ouijtika tikitaj tikintlakamatiskej tlaltikpakchanejkej pampa yejuamej tlajtlakolejkej, maski ijkon, toTajtsin yokintekitlali tajtin, tekiuajkej niman tlayekankej para matechpaleuikan (Prov. 6:20; 1 Tes. 5:12; 1 Ped. 2:​13, 14). Ijkuak tikintlakamatij akin yejua yokintekitlali, noijki tiktlakamatstokej Jehová. w23.10 6 párrs. 2, 3

Uelis tikchikauaskej totlaneltok tla titlanemiliaj itech ikojtilis Jehová. Yejua kipiya kojtilistli para kichiuas nochi tlen yokijto. Ijkon tikijtouaj pampa Jehová nochi ueli kichiua (Job 42:2; Mar. 10:27; Efes. 3:20). Jehová okimijli Abrahán niman Sara ika kipiyaskiaj se inkoneuj maski iuejueyimej katkaj (Gén. 17:​15-17). Noijki kuajli okijli Abrahán ika iuejkachanejkauan kinoyaxkatiskiaj Canaán. San ika, miyek xiuitl iuejkachanejkauan Abrahán, noso israelitas, onenkej ken tlakeualtin ne Egipto. Ika yejon, kanaj okinemilijkej ika xkeman nochiuaskia tlen Jehová okijlika Abrahán. San ika, kema onochiuj. Jehová okijli María, se ichpochtli akin xinonamiktiaya, ika kinemitiskia iKoneuj. Ijkon nochiuaskia se teotlajtojli tlen Jehová okijtojka miyek xiuitl ika tlakuitlapan ipan xochitlalpan Edén (Gén. 3:15). Ijkuak titlanemiliaj itech kenon onochiuj nochi tlen Jehová okijto, tikitaj ika yejua melak kojtik. Yejon kichiua más matikneltokakan ika kema kikuepas tlaltikpaktli se xochitlalpan (Jos. 23:14; Is. 55:​10, 11). w23.04 28 párrs. 10-12

Jehová okinankili David ijkuak okitlajtlanili makipaleui (1 Sam. 19:​10, 18-20; 2 Sam. 5:​17-25). Tejuamej noijki uelis kuajli tikmatstoskej ika Jehová technankilis (Sal. 145:18). San ika, kanaj Jehová xkinnankilis toteoyouan ken tejuamej tikchiaj. Yejon tlen ipan onochiuj apóstol Pablo. Yejua kipiaya “sen tlajyouilistli yejuan ken itlaj uitstli”, niman yexpa okitlajtlanili toTajtsin makikixtili yejon tlajyouilistli. ¿Jehová okinnankili iteoyouan Pablo? Kema, san ika, xokinnankili ijkon ken kichiaya. Jehová xokikixtili tlen kitlajyouiltijtoya, yej okipaleui matlaxiko niman ijkon ok ueliskia kitekichiuilis (2 Cor. 12:​7-10). Jehová noijki uelis kinnankilis toteoyouan ijkon ken xtikchiayaj. San ika, kuajli matikmatstokan ika Jehová kimati tlenon más techpaleuis. Niman hasta “uelis kichiuas miyek más de on yejuan tejuamej tiktlajtlaniaj noso on yejuan tiknemiliaj” (Efes. 3:20). Ika yejon, kanaj Jehová technankilis ijkuak tejuamej xtikchiayaj noso technankilis ijkon ken xkeman tiknemiliskiaj. w23.05 8, 9 párrs. 4-6

Nochipa ijkuak tiueliskej, melak kuajli tla titlanemiliaj itech yoliuilistli. ¿Tleka? Pampa xtikmatij tlenon uelis panos mostla. Uelis san tiuajkualoskej noso uelis uajnomikilis yakaj akin tiktlasojtlaj (Ecl. 9:11; Sant. 4:​13, 14). Tla yemelak tikneltokaj ika yoliuiskej akin yomijkej, uelis techpaleuis matitlaxikokan (1 Tes. 4:13). Biblia techijlia ika toTajtsin kuajli techixmati niman melak techtlasojtla (Luc. 12:7). Jehová noneki kuajli techixmatis para uelis oksejpa texchijchiuas ijkon ken tikatkaj niman para kichiuas nochi matikilnamiktokan ijkuak techyolitis. Jehová melak techtlasojtla, ika yejon, kichiuas nochipa matinemikan. Niman maski tla timikij, yejua techyolitis. ¿Tleka uelis tikneltokaskej ika yemelak yoliuiskej akin yomijkej? Pampa kuajli tikmatstokej ika yejua kinektika kichiuas tlen kijtoua niman ika uelis kichiuas tlen kijtoua. w23.04 8, 9 párrs. 2-4

José niman María noijki san sekan onopaleuijkej niman ijkon kuajli nouikaskej iuan Jehová. Yejuamej kimatstoyaj ika melak ueyi kijtosnekiya kiueyichiuaskej Jehová imiuan ichanejkauan (Luc. 2:​22-24; 4:16). Tlen okichiujkej José niman María melak kinpaleuis akin yononamiktijkej. Tla nemejuamej noijki nenkinpiyaj nemokoneuan, kanaj ouijtika nenkitaj nenyaskej tlanechikoltin niman nenkiueyichiuaskej toTajtsin ken familia. Noijki kanaj ouijtika nenkitaj san sekan nemomachtiskej niman nenkichiuaskej teoyotl. San ika, xkilnamikikan ika tla san sekan nenkiueyichiuaj Jehová, más kuajli iuan nemouikaskej niman nemejuamej noijki más kuajli nemouikaskej. Kuakon, nochipa xmokojtilikan nenkiueyichiuaskej Jehová. Tla nenkipiyaj tlauejli iuan nenmoixnamik, kanaj nion xnenkinekiskej nenkiueyichiuaskej Jehová ken familia. Tla ijkon panoua, melak mechpaleuis tla nemomachtiaj itlaj tlen xueyak niman tlen nenkuelitaj. Yejuin kichiuas más xmotlasojtlakan niman más xnekikan san sekan nenkichikauaskej nemotlaneltok. w23.05 22 párrs. 7, 8

¿Kenon okipaleui Abdías pampa kitlakaitaya toTajtsin? Abdías melak okixmatkej pampa xtekajkayauaya niman ueliyaj itech tlaneltokayaj. Yejua ika, tekiuaj okitekitlali para matlayekana ichan (uelis tikitas Nehemías 7:2). Noijki, pampa kimojkaitaya toTajtsin okiteititi ika melak yolchikauak. Niman ipan yejon tonaltin nonekiya yolchikauak yes. ¿Tleka ijkon tikijtouaj? Pampa ijkuakon tekiuajtitoya Acab (1 Rey. 16:30). Noijki, Acab yononamiktijka iuan Jezabel, akin kiueyichiuaya Baal niman melak kitlauelitaya Jehová. Jezabel noijki kinekiya kichiuas ika nochimej tribus de Israel maka sa makiueyichiuakan toTajtsin. Hasta okinmikti miyekej iteotlajtokauan Jehová (1 Rey. 18:4). Ijkuak Jezabel opeuj kintlaueltoka iteotlajtokauan Jehová niman ijkon kinmiktis. Abdías kijtoua ika yejuin tlen okichiuj: “Onikinmiyan 100 de yejuamej ipan ome [te]ostotl. 50 tiotlajtojkej onikinkalaktij ipan cada [te]ostotl niman nikinmakaya tlakuajli niman atl” (1 Rey. 18:​13, 14). Tla Jezabel kimatiskia yejuin, kimiktiskia Abdías. Pampa Abdías noijki ijkon katka ken tejuamej, nomojtiaya niman xkinekiya mikis. Maski ijkon, yejua más kitlasojtlaya Jehová niman itekipanojkauan. w23.06 16 párrs. 9, 10

Ijkon ken okichiuj yeuejkaui, Jehová techyekana itechkopa Biblia niman itechkopa iKoneuj. ¿Niman ok kintekitiltia tokniuan tlakamej para techyekanas? Kema. Matontlanemilikan itech tlen okichiujkej Charles Russell niman akin iuan nomachtiayaj. Ijkuak yopanoka xiuitl 1870, yejuamej okasikamatkej ika iTekiuajyo toTajtsin itlaj kichiuaskia ipan 1914 (Dan. 4:​25, 26). ¿Niman kenon okimatkej yejon? Pampa onomachtijkej teotlajtoltin tlen uajnestiayaj ipan Biblia niman pampa Jehová okinpaleui makimasikamatikan. Ipan 1914, opeuj Kachtopa Guerra ipan nochi tlaltikpaktli, ooniak miyek kokolistin, tlalolinalistin niman apistli. Yejon okiteititi ika iTekiuajyo toTajtsin yopeujka tekiuajti (Luc. 21:​10, 11). Kuajli tikitaj ika Jehová kintekitiltijtoya yejuin tlakamej niman ijkon kipaleuis ikalpan. w24.02 22 párr. 11

Akin tiitekipanojkauan Jehová tikmatstokej ika yejua techtlasojtla niman kineki kuajli matinemikan (Rom. 8:​35-39). Noijki kuajli tikmatstokej ika melak techpaleuiya tiktlakamatiskej tlen kijtoua Biblia (Is. 48:​17, 18). San ika ¿tla tikixnamikij se tlauejli tlen xtikchiayaj? Kanaj se tochanejkauj uelis kichiuas noso kijtos itlaj tlen techyolkokos. Noso kanaj uelis tiuajkualoskej niman xok uelis tiktekichiuiliskej Jehová ken tiknekiskiaj. Kanaj uelis titlajyouiskej pampa kampa tichantij tlaixpoliuis. Noso uelis techtlaueltokaskej ipampa tlen tikneltokaj. Ijkuak tikixnamikiskej yejuin, kanaj uelis totlajtoltiskej: “¿Tleka nopan nochiujtika yejuin? ¿Onikchiuj itlaj tlen xkuajli? ¿Kijtosneki yejuin ika Jehová xnechteochiujtika?”. Tla tejua kemantika ijkon yotimomachilijka, maka xmajmana. Miyekej itekipanojkauan Jehová akin itech melajkanemij noijki ijkon yonomachilijkaj (Sal. 22:​1, 2; Hab. 1:​2, 3). w23.04 14 párrs. 1, 2

Niman ijkuak tikixnamikij se tlatlatalistli, tokojtiliaj xtiknemiliskej noso xtikchiuaskej itlaj tlen uelis kichiuas maka sa matouikakan iuan toTajtsin. Jehová kineki matiktlakamatikan ika nochi toyojlo (Rom. 6:17). Nochi tlen yejua technauatia techpaleuiya, niman xuelis tikinpatlaskej itlanauatiluan (Is. 48:​17, 18; 1 Cor. 6:​9, 10). Pampa Satanás xkineki matimelajkanemikan kichiua matechixnamikikan. Yejua kineki maka sa matouikakan iuan Jehová (1 Ped. 5:8). Tokniuan akin onenkej ipan kachtopa siglo okimijlikej maka sa matenojnotsakan, okinuisojkej niman sekimej hasta okinmiktijkej pampa kitlakamatstoyaj toTajtsin (Hech. 5:​27, 28, 40; 7:​54-60). Aman, Satanás noijki kichiua matechtlaueltokakan. Ijkon tikitaj ipampa tlen kinchiuiliaj tokniuan de Rusia niman okseki países. Niman ipan nochi tlaltikpaktli miyekej tokniuan noijki kimixnamikij. Kemantika xnimantsin nesi tla Satanás texchiualtisneki matikchiuakan itlaj tlen xkuajli (Efes. 6:11). w23.07 15, 16 párrs. 6-9

Ijkuak más tomachtiaj iTlajtol toTajtsin, más tiktlasojtlaj Jehová. Niman pampa tiktlasojtlaj tikchiuaj tlen tiuelij itech tlen tomachtiaj. Biblia mitspaleuiya kuajli xtlapejpeni tlenon tikchiuas. Noijki, pampa tikneki tikyolpaktis toTajtsin tikpatla ken titlanemilia niman tlen tikchiua. Ijkon ken se konetl kichiua ken itaj, tejua noijki tikchiua ijkon ken moTajtsin akin nemi iluikak (Efes. 5:​1, 2). Uelis totlajtoltiskej: “¿Aman más niktlasojtla Jehová xijkon ken ijkuak oninoapolakti? ¿Aman más nikchiua niman nitlanemilia ijkon ken Jehová ijkuak nikimititia nokniuan ika nikintlasojtla?”. Maka matoyolkokokan tla tikitaj ika xijkon tikchiujtokej. Noijki ijkon inpan onochiuj tokniuan akin onenkej ipan kachtopa siglo. San ika, Jesús xokinemili tla xueliskia nopatlaskej, niman noijki xijkon kinemilis totech (Apoc. 2:​4, 7). Kimatstika ika oksejpa uelis tiktlasojtlaskej toTajtsin ijkon ken ijkuak opeuj tomachtiaj. w23.07 8 párrs. 2, 3

Apóstol Pedro melak onopopolo. Kachtopa, yejua okinemili ika xkeman nopopoloskia niman okijto ika nochipa melajkanemiskia maski sekimej apóstoles kitlalkauiskiaj Jesús (Mar. 14:​27-29). Sakin, miyekpa okoch maski Jesús okimijli matlatlachixtokan (Mar. 14:​32, 37-41). Niman, ijkuak okajsikej Jesús, yejua okitlalkaui (Mar. 14:50). Noijki, yexpa okijto ika xkixmatiya Jesús (Mar. 14:​66-71). ¿Kenijki onomachili Pedro ijkuak okitak ika yokichiujka se ueyi tlajtlakojli? Opeuj melak najmana niman opeuj choka (Mar. 14:72). San ika, Jesús xkeman okijli Pedro tlen xkuajli yokichiujka, yej okijli ika kimakaskia más tekitl (Juan 21:​15-17). Pedro kimatstoya ika yokichiujka se ueyi tlajtlakojli, san ika, xokitlalkaui Jehová. ¿Tleka? Pampa okitak ika Jesús kimatstoya ika ueliskia nopatlas niman okitak ika tokniuan kipaleuiskiaj. ¿Tlenon techmachtia yejuin? Jehová kineki kuajli matikmatstokan ika yejua melak techtlasojtla niman ika kinektika techtlapopoluis (Rom. 8:​38, 39). w24.03 18 párrs. 13-15

Kanaj sekimej akin auilnemij pinauij, xok kuajli nomachiliaj, xok nouikaj imiuan inchanejkauan noso siuamej nokoneuajtiaj. Kuajli nesi ika xtlaj ika techpaleuis tla tijkakij yejon siuatl akin xtlamatki. Miyekej akin auilnemij xok nouikaj iuan toTajtsin niman noijki peua kimajsi kokolistli tlen kichiua mamikikan (Prov. 7:23). Proverbios capítulo 9 ijkin ontlami: “On tlakamej yejuan onkalakij ipan ichan, onxinij miktlan”. Kuakon, tla xkuajli ontlamij, ¿tleka miyekej yauej itech yejuin siuatl? (Prov. 9:​13-18). Satanás noijki tekajkayaua ika pornografía. Sekimej kinemiliaj ika xtlaj panoua tla tikitaj. San ika, yejon xmelauak. Pornografía melak teijtlakoua. Kichiua maka sa xtetlakaita niman maka xkintlakaita oksekimej. Niman ouijtika tijkajkauas. Tlaixkopinaltin itech auilnemilistli xnimantsin uelis tikimilkauas. Noijki, pornografía kichiua más xneki tiauilnemis (Col. 3:5; Sant. 1:​14, 15). Niman miyekej akin kitaj pornografía, sakin auilnemij. w23.06 23 párrs. 10, 11

Maski sekimej países kixnamikisnekiskej, xueliskej kitekipatlaskej. Ijkon tikasikamatij pampa teotlajtojli kijtoua ika iTekiuajyo toTajtsin, tlen yeskia kentla se “ueyi tetl”, kixoxotonis ikxiuan tlamachijchiuajli (Dan. 2:​34, 35, 44, 45). ¿Yemelak tikneltoka ika melauak tlen okijto Daniel itech ikxiuan tlamachijchiuajli? Tla kema, nimantsin nesis ipampa tlen tikchiua. Xtiknekis timotomintis ipan yejuin tlaltikpaktli tlen ikipopoloskej (Luc. 12:​16-21; 1 Juan 2:​15-17). Noijki, tla tikasikamati yejuin teotlajtojli, mitspaleuis más xtenojnotsa niman más xkinpaleui oksekimej manochiuakan inomachtijkauan Cristo (Mat. 6:33; 28:​18-20). Kuakon, aman ika yotikitakej yejuin teotlajtojli, kuajli tla totlajtoltiaj: “¿Tlen nikchiua kiteititia ika kuajli nikmatstok ika iTekiuajyo toTajtsin kinpopolos nochi gobiernos?”. w23.08 11 párrs. 13, 14

Kanaj aman nonekis tikasikamatis ika xok nochi uelis tikchiuas pampa itiueyi, pampa tikualo niman pampa itlaj yonopatlak. Xchiua ijkon ken Barzilái, maka xseli seki tekitl tla tikita ika xok uelis tikchiuas pampa tikualo (2 Sam. 19:​35, 36). Noso xchiua ijkon ken Moisés, xmokauili mamitspaleuikan niman xkinkauili oksekimej makichiuakan motekiyo ijkuak nonekis (Éx. 18:​21, 22). Ijkon, xtikchias tlen xkeman nochiuas niman titlaxikos. Maka matotlajtlakoltikan ipampa tlen xkuajli kitlapejpeniaj oksekimej. Xuelis tikinchiualtiskej oksekimej makitlapejpenikan tlen kuajli niman ijkon xtlajyouiskej. Tajtin melak najmanaj ijkuak kitaj ika se inkoneuj kikaua Jehová. San ika, tajtin akin notlajtlakoltiaj ipampa tlen inkoneuj okichiuj, kentla kinomamaltiskiaj itlaj tlen melak yetik; itlaj tlen Jehová xkineki makinomamaltikan. w23.08 29 párrs. 11, 12

Sansón noijki tlajtlakole katka ken tejuamej, yejua ika, kemantika nopopolouaya ijkuak itlaj kitlapejpeniaya. Sejpatipan okitlapejpeni itlaj tlen okichiuj melak matlajyoui, pampa xotlanemili itech tlen Jehová yokinauatijka. Ijkuak achijtsin youejkaujka ika kinyekantoya israelitas, “Sansón okinek sen siuatl yejuan itoka katka Dalila, yejuan chantiya ipan on ixtlauatl Sorec”. Achto kixmatiskia Dalila, kinekiya nonamiktis iuan se siuatl filistea. San ika, Biblia kijtoua ika “toTEKO yejua ijki kinekiya ma nochiua, pampa kitejtemouaya kenijki peuas kinuijsokis on filisteos”. Sejpatipan, Sansón oyaj Gaza, se kalpan filistea, niman ompa onokauj ichan se “siuaauilnenki”. Pampa Jehová okipaleui, Sansón “okiteuiuitlak itsakuijlou on ueyikalpan san se ueyi iuan nochi ikojyouan yejuan ipan salijtikatka” (Juec. 14:​1-4; 16:​1-3). San ika, tlen onochiuj iuan Dalila xsan noijki katka ken tlen onochiuj iuan yejon omemej siuamej filisteas. ¿Tleka? Pampa Dalila kanaj israelita katka niman tla Sansón iuan nonamiktiaya xkipaleuiskia makimixnamiki filisteos. Filisteos kinekiyaj ika Dalila makikajkayaua Sansón. Okijlikej ika kimakaskiaj miyek plata, niman yejua okinek. w23.09 5 párrs. 12, 13

Tla kuajli titlanemiliaj, techpaleuis matikteititikan ika tiyolyemankej. Se akin kuajli tlanemilia ueli noteltia ijkuak yakaj kitlajtoltia itech tlen kineltoka. Pampa tlen yakaj kinemilia yeskia ken atl tlen melak uejkatlan, kemantika uelis itlaj techtlajtoltiskej, san ika, xtikmatiskej tleka techtlajtoltia yejon. Achto tiknankiliskej, techpaleuis tla tikilnamikij ika kanaj xtikmatij tleka kineki tlajtos itech yejon (Prov. 16:23). Matitlanemilikan itech Gedeón. Sejpatipan, tlakamej akin ualeuayaj itech itribu Efraín okixkoijlitoj Gedeón tleka xokiminots imiuan makimixnamikitij intlauelikniuan. ¿Tleka ijkon okichiujkej? ¿Kanaj xkuajli onomachilijkej pampa xokinnotskej? Maski san kenon, Gedeón kuajli otlanemili, okimasikamat niman kuajli okinnankili. ¿Tlenon opanok pampa ijkon okichiuj? “Ijkuak itribu Efraín okakkej on tlen okijto Gedeón, xok okualankej” (Juec. 8:​1-3). w23.09 16 párrs. 8, 9

Ken tikmatij, Jehová niman Jesús melak kuajli nouikaj. Tikmatstokej ika Jehová melak noyolkokouaya ijkuak kitaya kenon miyekej melak kitlauelitayaj niman kitlajyouiltiayaj iKoneuj. Tajtin akin yomik se inkoneuj kuajli kimatstokej ika yejon melak teyolkoko. Yemelak, tinochimej kuajli tikmatstokej ika oksejpa yoliuiskej akin yomijkej, san ika, yejon xkichiua ika maka sa matoyolkokokan ijkuak miki yakaj akin tiktlasojtlaj. Yejuin techpaleuiya matikasikamatikan kenon onomachili Jehová ipan xiuitl 33, ijkuak okitak kenon okitlajyouiltijkej niman okimiktijkej iKoneuj (Mat. 3:17). Achto ika panos Conmemoración matomachtikan itech tlen Jesús okichiuj topampa. ¿Kenon uelis tikchiuaskej yejuin? Ijkuak toselti tomachtiskej noso ijkuak tomachtiskej ken familia. Niman maka tikilkauas tikitas video tlen itoka “Tikueyichiuaj toTajtsin ika kualkan ijkuak tikpanoltiaj Conmemoración”. Tla tikyektlaliaj toyojlo ijkuak xiajsi yejon tonajli, uelis tikchiuaskej ika oksekimej noijki makinpaleui (Esd. 7:10). w24.01 11 párrs. 10-12

Tejuamej uelis tikojtitoskej tla tikchiuiliaj teoyotl toTajtsin. Yejua kinnankilia toteoyouan ijkuak techmaka “on ueyi poder yejuan [ . . . ] ualeua itech Dios” (2 Cor. 4:7). Noijki, melak techpaleuis tla tikamapouaj iTlajtol niman itech titlanemiliaj (Sal. 86:11). Tlen Jehová techijlia ipan Biblia “kipiya poder” (Heb. 4:12). Yejua ika, tla tiknotsa Jehová niman tikamapoua iTlajtol, mitspaleuis xtlaxiko, xtekichiuili ika nochi moyojlo noso xchiua se tekitl tlen ouijtika tikita. Matikitakan kenon Jehová okikojtili teotlajtoketl Jonás. Jehová yokimakaka se tekitl. San ika, pampa melak nomojtiaya, yejua ocholojteuj niman okajsik se barco tlen oksekan okuikak. Pampa ijkon okichiuj, Jonás niman nochimej akin yayaj ipan barco hasta imikiyaj ipampa se ueyi ajakakiyaujtli. Ijkuak akin yayaj ipan barco okontlajkalkej ijtik mar, se ueyi michin okitolo. ¿Tlenon okichiuj Jonás niman ijkon tlaxikos ijkuak san iselti nemiya ijtik se ueyi michin? Okichiuili teoyotl Jehová (Jon. 2:​1, 2, 7). w23.10 13 párrs. 4-6

Maski yejuin cartas apóstol Pedro okimijkuilouili tokniuan akin nemiyaj ipan kachtopa siglo, Jehová okichiuj manoijkuilokan ipan Biblia niman ijkon tinochimej uelis techpaleuis tlen ompa kijtoua (Rom. 15:4). Miyekej xkineltokaj tlen kijtoua Biblia ijkuak tlajtoua itech tlen panos ika tlayekapan. Tejuamej youejkauj tikteijliaj ika iyejkos tonajli ijkuak Jehová kinpopolos akin xkuajkualtin. Kanaj miyekej akin techtlauelitaj techpijpinaujtiaj niman kijtouaj ika yejon tonajli xkeman yejkos (2 Ped. 3:​3, 4). Tla ijkuak tiknojnotsaj se akin iuan titekitij noso se tochanejkauj techijlia yejuin, kanaj uelis kichiuas maka sa matitlaneltokakan. San ika, tlen okijkuilo Pedro uelis techpaleuis matitlaxikokan. Sekimej kinemiliaj ika toTajtsin melak youejkauj ika xkinpopoloua akin xkuajkualtin. San ika, Pedro okijto itlaj tlen melak techtlanemililtia. Otechilnamikti ika Jehová xsan noijki kita tiempo ijkon ken tejuamej tikitaj (2 Ped. 3:​8, 9). Jehová kita mil xiuitl kentla yeskia se tonajli, yejua melak teijyouiya niman xkineki yakaj makipopolokan. San ika, itonal kema yejkos. . . , niman akin xkuajkualtin popoliuiskej. w23.09 26, 27 párrs. 2-5

¿Tleka apóstol Pablo okintlajkuilouili tokniuan akin chantiyaj Judea? Kachtopa, para kinyolchikauas. Miyekej youejkaujkaj nemiyaj ipan religión tlen itoka judaísmo niman kanaj akin ompa tlayekanayaj kinpijpinaujtiayaj pampa yopeujkaj kichiuaj ken Cristo. ¿Tleka kinpijpinaujtiayaj? Pampa akin kichiuayaj ken Cristo xkipiayaj se teopan kampa ueliskiaj kiueyichiuaskej toTajtsin nion xkipiayaj se tlaixpan kampa ueliskiaj tlauentlaliskiaj, noijki xkinpiayaj teopixkej. Ika yejon, kanaj inomachtijkauan Cristo onajmankej niman xok más tlaneltokayaj (Heb. 3:​12, 14). Kanaj sekimej hasta yopeujkaj kinemiliayaj nokuepaskej ipan religión kampa nemiyaj. Ika ome, Pablo okimijli tokniuan hebreos ika xnokojtilijtoyaj kasikamatiskej tlamachtiltin tlen más nonekiya ipan tlanemiliskej, “yetik tlakuajli” tlen onka ipan iTlajtol toTajtsin (Heb. 5:​11-14). Nesi ika sekimej ok kitlakamatiyaj iTlanauatil Moisés. w23.10 24, 25 párrs. 3, 4

Sekimej siuamej kitlapejpeniaj xnonamiktiskej (Mat. 19:​10-12). Tla xitimonamiktia, uelis kuajli tikmatstos ika Jehová niman Jesús melak mitspatiojkaitaj. Ipan nochi tlaltikpaktli, tokniuan siuamej akin xinonamiktiaj melak tlapaleuiyaj ipan tlanechikoltin. Yejuamej kiteititiaj ika tetlasojtlaj niman kinekij kinpaleuiskej oksekimej, niman yejon kichiua ika oksekimej makimitakan kentla imikniuan niman kentla innanuan (Mar. 10:​29, 30). Sekimej más chikauak kitekichiuiliaj Jehová. Ipan nochi tlaltikpaktli más miyekej tokniuan siuamej akin tenojnotsaj (Sal. 68:11). ¿Uelis timokojtilis más chikauak tiktekichiuilis Jehová? Kanaj uelis timochiuas precursora, tontlapaleuis kampa nochijchiuaj kaltin kampa tikueyichiuaj Jehová noso tontlapaleuis Betel. ¿Tlenon mitspaleuis ijkon xchiua? Xnotsa Jehová, xtlajto imiuan akin ichikauak kitekichiuilijtokej niman xkita tlenon noneki tikchiuas. Xkijkuilo tlen tikita ika mitspaleuis más chikauak xtekichiuili Jehová. Tla ijkon tikchiua, tikitas ika melak mitsyolpaktis tla chikauak tiktekichiuilia toTajtsin. w23.12 22 párrs. 16, 17

Tikmatij ika sa achijtsin poliui para yejkos ueyi tlajyouilistli. Yejua ika, melak noneki matikinnojnotsakan oksekimej ijkon ken toTajtsin yotechnauati. San ika, kanaj ouijtika ijkon tikchiuaskej ijkuak xmás tikpiyaj tlen ika topanoltiskej noso ijkuak tekiuajkej xtechkauiliaj matitenojnotsakan. ¿Tlenon techpaleuis chikauak matitenojnotsakan itech iTekiuajyo toTajtsin? Noneki nochipa matikilnamikikan ika “Jehová akin kinyekana akin tlaixnamikij” touan nemi. Yejua techpaleuis tla kachtopa tikchiuaj tlen kineki niman xsan titlanemiliaj itech tlen tejuamej techpoloua. Kuakon, xnoneki tomojtiskej (Ageo 2:​4, TNM). Jehová kineki matikinpaleuikan oksekimej mamakisakan niman manochiuakan inomachtijkauan Cristo. Ageo okinyolchikauj judíos matlamikan makichijchiuakan teopan. Kentla tla kimijliskia oksejpa makipeualtikan makichijchiuakan teopan niman makimilkauakan xiujtin ijkuak xtlaj okichiujkej. Kentla kipopoloskiaj nochi niman oksejpa peuaskiaj. Tla ijkon kichiuayaj, Jehová kinteochiuaskia (Ageo 2:​18, 19). Tejuamej noijki tikmatstokej ika Jehová techteochiuas tla tokojtiliaj tikchiuaskej tlen yejua yotechtlajtlanili. w23.11 16 párr. 8; 17 párr. 11

Ipan carta tlen apóstol Pablo okimijkuilouili romanos okijto ika tinochimej titlajtlakolejkej. Kuakon, ¿kenon uelis tikyolpaktiskej toTajtsin niman kitas ika tiyolmelajkej? Pablo otlajto itech Abrahán niman ijkon kinpaleuis nochimej itekipanojkauan toTajtsin makinankilikan yejuin. Jehová okijto ika Abrahán yolmelajki katka ijkuak chantiya Canaán. San ika, ¿tleka ijkon kitaya? Xpampa tla Abrahán kitlakamatiya nochi tlen kijtouaya Tlanauatijli tlen okimakakej Moisés (Rom. 4:13). ¿Tleka ijkon tikijtouaj? Pampa yejuin Tlanauatiltin okiselijkej israelitas 400 xiujtin sakin. Kuakon, ¿tleka okijto ika Abrahán yolmelajki katka? Pampa Jehová okikneli niman pampa okitak kenon itech tlaneltokaya (Rom. 4:​2-4). w23.12 3 párrs. 4, 5

Ipan yeuajli ijkuak teotlajtoketl Natán otlajtoka iuan David, Jehová okijli Natán ika xDavid kichijchiuaskia ikal (1 Crón. 17:​3, 4, 11, 12). ¿Tlenon okichiuj David ijkuak okikak yejuin? Opeuj kisentlalia tomin niman tlen kitekitiltiskia ikoneuj Salomón para kichijchiuas ikal Jehová (1 Crón. 29:​1-5). Sakin ika tekiuaj David okimat ika xyejua kichijchiuaskia templo, Jehová iuan onotlajtolkauj: okijli ika se iuejkachanejkauj nochipa tekiuajtiskia (2 Sam. 7:16). Ipan yenkuik tlaltikpaktli, ijkuak Jesús Tekiuajtitos Mil Xiuitl, David melak yolpakis ijkuak kimatis ika se iuejkachanejkauj yejua akin tekiuajtitika. Yejuin techmachtia ika maski xueli tiktekichiuiliaj Jehová ijkon ken tikuelitaskiaj, yejua uelis techteochiuas ijkon ken xtikchiayaj. w23.04 15, 16 párrs. 8-10

Ijkuak tikixnamikiskej itlaj tlen ouijtika, tlen noijtoua ipan Biblia uelis melak techpaleuis, ken tlen kijtoua libro de Job, Salmos, Proverbios, niman tlen okijto Jesús ipan Mateo capítulo 6. Tla tejua tiknotsa Jehová niman tikamapoua iTlajtol, tikitas kenon mitsyolseuiya. Nochipa matikmatstokan ika maski san tlenon tikixnamikiskej, Jehová techpaleuis. Yejua xkeman san toselti techkauas (Sal. 23:4). Matikilnamikikan ika yejua yokijto ika techtlajpiyas, techpaleuis kuajli matitlanemilikan, techyolseuis niman xkeman techkauas. Isaías okijli Jehová: “NoTEKO, tejua tikchiua para ma nemikan inyolika on yejuan xmitstlalkauiyaj, pampa yejuamej kitlaliaj inyojlo san tejua motech” (Is. 26:3). Kuakon, xtlaneltoka itech Jehová niman xkauili mamitspaleui. Tla ijkon tikchiua, uelis tikxikos maski san tlenon tikixnamikis. w24.01 25 párrs. 16, 17

Tlen kijtoua tlaxelojli tlen aman tikitstokej inochiujtika. Noijki tlen kijtoua Isaías 54:​13, 14, ompa kijtoua: “Nejua nikinmachtis nochimej on mokoneuan. Nochimej yejuamej sanoyej kuajli nemiskej. On melajkachiualistli niman melajkanemilistli mitsyolchikauaskej, niman on motlauelikniuan xok tikinmakajsis [ . . . ], yej moyolika tinemis”. Nion Satanás, akin nikan tlayekantika, xuelis kichiuas ika itekipanojkauan Jehová maka sa matemachtikan (2 Cor. 4:4). ¡Tlaneltokijli tlen melauak xkeman kijtlakoskej! Nion se arma xuelis kijtlakos. w24.02 4 párr. 10

Akin tikchiuaj ken Cristo tikmatstokej ika noneki tikchiuaskej tlen yotikijlijkej Jehová. San ika, ijkuak itlaj panoua ipan tofamilia, ouijtika tikitaj tikchiuaskej yejuin. Yemelak, noneki tikinpaleuiskej tochanejkauan, san ika, tikmatstokej ika kachtopa noneki tiktlakamatiskej Jehová (Mat. 10:​35, 36; 1 Tim. 5:8). Niman kemantika, pampa tiknekij tikyolpaktiskej Jehová, kanaj xuelis tiyolseujtoskej imiuan tochanejkauan. Yejua okichijchiuj kachtopa familia, niman kineki ika nochi familias nochipa mayolpakikan (Efes. 3:​14, 15). Tla tiknekij tikyolpaktiskej Jehová, noneki tikchiuaskej tlen yejua techijlia. Yejua kipatiojkaita ijkuak kita ika tokojtiliaj tiktekichiuiliskej niman noijki tokojtiliaj tikintlajpiyaskej tochanejkauan, tikintlakaitaskej niman tikintlasojtlaskej (Rom. 12:10). w24.02 17 párr. 11; 18 párr. 13