Marzo

Ipan yejuin tonaltin xtikitaj tla ionka se xochitlalpan. San ika, matitlanemilikan itech tlen aman tikitaj. Sitlalimej niman kojtin tlen aman tikimitaj, yeuejkaui xonkatkaj. Yolkamej niman tlaltikpakchanejkej akin aman nemij, yeuejkaui xnemiyaj. San ika, toTajtsin okinchijchiuj niman aman xakaj kijtoskia ika nochi yejuin xmelak onkatij noso xmelak nemij, pampa aman tikimitaj (Gén. 1:​1, 26, 27). Aman tej, toTajtsin yokijto ika kikuepas tlaltikpaktli se xochitlalpan, niman kichiuas ijkon ken yokijto. Nochipa tinemiskej niman xkeman tikualoskej. Ijkuak ijkon panos, xakaj uelis kijtos ika xmelak onka xochitlalpan, pampa tinochimej ompa tichantitoskej (Is. 65:17; Apoc. 21:​3, 4). Chika xiyejko yenkuik tlaltikpaktli, matokojtilikan matikchikauakan totlaneltok. Matitlanemilikan itech tlen Jesús okichiuj topampa, itech ikojtilis Jehová niman matikchiuakan tlen techpaleuis más matiknisiuikan Jehová. Tla tikchiuaj nochi yejuin, techpouaskej imiuan akin “itechkopa intlaneltok niman inijyouilis [kiseliaj] on herencia” (Heb. 6:​11, 12). w23.04 31 párrs. 18, 19

Kuakon, Jesús ajkotlachia niman kichiua se teoyotl ompa teixpan. Kineki makiueyiteneuakan Jehová ipampa tlen amantsin kichiuas. Kuakon, chikauak kijtoua: “¡Lázaro, xuajkisa!” (Juan 11:43). Niman Lázaro uajkisa itech teostotl. Jesús kichiua itlaj tlen sekimej kinemiliayaj ika xkeman ueliskia panoskia. Yejuin tlen opanok techpaleuiya más matikneltokakan ika yoliuiskej akin yomijkej. Matikilnamikikan tlen Jesús okijli Marta: “Mokniu oksejpa yoliuis” (Juan 11:23). Ijkon ken iTaj, Jesús kineki niman uelis kinyolitis akin yomijkej. Pampa ochokak, techititia ika yejua yemelak kineki kipopolos mikilistli niman ijkon maka sa matoyolkokokan. Ijkuak Jesús okiyoliti Lázaro, okiteititi ika kipiya kojtilistli niman ijkon kinyolitis akin yomijkej. Noijki, xkilnamiki tlen Jesús okilnamikti Marta, tlen noteneua ipan tlaxelojli tlen aman tikitstokej. Onka miyek tlen techititia ika toTajtsin kinyolitis akin yomijkej. w23.04 11, 12 párrs. 15, 16

Kanaj nonekis tikpatlaskej tlen tiktlajtlaniliaj Jehová ipan toteoyouan ijkuak peuas tikasikamatiskej tlen kineki matikchiuakan. Noneki tikilnamikiskej ika Jehová yokitlali se tonajli para kichiuas tlen yejua kineki. Ijkuak kuajkuis iTekiuajyo, kipopolos nochi tlen techtlajyouiltia, xok kanaj tlaixpoliuis, xok onias kokolistli nion mikilistli (Dan. 2:44; Apoc. 21:​3, 4). San ika, hasta mayejko on tonajli, Jehová kikauilijtos Satanás yejua matlayekana ipan in tlaltikpaktli (Juan 12:31; Apoc. 12:9). Tla Jehová kipopoloskia nochi tlen techtlajyouiltia, ueliskia nesis ika Satanás melak kuajli tlayekantok. Aman tej, maski noneki tikchiaskej tonajli ijkuak Jehová tlayektlalis, xkijtosneki ika yejua xuelis techpaleuis. Jehová kema techpaleuis. w23.05 8 párr. 4; 9, 10 párrs. 7, 8

¿Tlenon uelis tikchiuaskej niman ijkon oksekimej noijki makinpaleui Conmemoración? Uelis tikimijliskej touan manosentlalikan. Maka san matikintemakakan invitaciones, noijki matikijkuilokan akinon tikuelitaskiaj tikimijliskej mauiyan Conmemoración. Ken tochanejkauan, akin imiuan titekitij, akin imiuan tomachtiaj noso akin tikimixmatij. Tla xok tikinpiyaj invitaciones ika amatl, uelis tikintitlaniliskej tlen ueli noita ipan tableta noso celular. Kanaj techmojkatlachialtis ijkuak tikitaskej kechmej yaskej (Ecl. 11:6). Matikilnamikikan ika ijkuak yakaj tikijliaj touan manosentlali Conmemoración, kanaj uelis notlajtoltis seki tlemach, niman más tla xkeman yauj ipan totlanechikoluan. Ika yejon, kuajli yeskia tla tiknemiliaj tlenon ueliskia techtlajtoltis niman kenon tiknankiliskiaj. Niman kemantika ijkuak yonopanolti Conmemoración, miyekej akin touan onosentlalijkej kinekij okseki kasikamatiskej. Tiknekij tikchiuaskej nochi tlen tiueliskej niman ijkon tikinpaleuiskej akin kipiyaj kuajli inyojlo makinpaleui tlen nopanoltis. ¿Kemanon uelis ijkin tikchiuaskej? Ijkuak xipanoua Conmemoración, ijkuak panotika niman ijkuak yopanok (Hech. 13:48). w24.01 11, 12 párrs. 13, 15, 16

Biblia kinteneua chikueyi tlaltikpakchanejkej akin oyoliujkej para chantiskej ipan tlaltikpaktli. ¿Tleka xmás kuajli tomachtiaj itech akin oyoliujkej? Ijkuak ijkon tikchiuaskej, matikitakan tlenon techmachtiaj niman matiknemilikan kenon tlen inpan onochiuj techititia ika Jehová kineki niman ueli kinyolitia akin yomijkej. Niman tlen más ueyi kijtosneki, matitlanemilikan itech tlen opanok ijkuak Jesús oyoliuj. Miyekej okitakej Jesús sakin ika oyoliuj, yejon kijtosneki ika kema uelis tikneltokaskej ika yemelak yoliuiskej akin yomijkej (1 Cor. 15:​3-6, 20-22). Melak tiktlasojkamachiliaj Jehová pampa yokijto ika kinyolitis akin yomijkej. Kuajli tikmatstokej ika yejua kineki ijkon kichiuas niman uelis ijkon kichiuas. Kentla yejua toseselti techijliskia: “Akin tikintlasojtla nokuiteuaskej” (Juan 11:23). Más matikneltokakan ika toTajtsin kinyolitis akin yomijkej. Tla ijkon tikchiuaj, más tonisiuiskej itech Jehová, akin yotechmakak yejuin kualtsin tlamachialistli. w23.04 8 párr. 2; 12 párr. 17; 13 párr. 20

Akin kasikamati ika xnochi ueli kichiua kuajli noixmati niman akin yolyemanki kintlakaita oksekimej niman kimita ika uejueyixtokej (Filip. 2:3). Akin kasikamati ika xnochi ueli kichiua noijki yolyemanki. Gedeón kasikamatiya ika xnochi ueliya kichiuaya niman yolyemanki katka. Ijkuak se iluikaktekitketl okijli ika Jehová yokitlapejpenijka para makinmakixti israelitas pampa madianitas kintlajyouiltijtoyaj, yejua ijkin otlanankili: “Noueyifamilia yejua más xkojtik yejuan kisaj itech itribu Manasés. Niman nejua xmás niueyixtikaj itech nofamilia” (Juec. 6:15). Yejua kinemiliaya ika xkimelauaya kichiuas yejon tekitl. San ika, Jehová kimatstoya ika yejua ueliskia kichiuas niman, pampa okipaleui, Gedeón ouel okichiuj yejon tekitl. Tlayekankej nokojtiliaj kasikamatiskej ika xnochi ueli kichiuaj niman nokojtiliaj yolyemankej yeskej (Hech. 20:​18, 19). Xnoueyimatij ipampa tlen kichiuaj niman xajmankamikij ijkuak nopopolouaj. w23.06 3 párrs. 4, 5

Ok poliui más de 1,000 xiuitl para manochiua tlen kijtoua itlamiyan yejuin teotlajtojli niman makipaxouilikan itsontekon Satanás (Apoc. 20:​7-10). Achto ika panos yejon, Biblia kijtoua tlenon nochiuas. Kachtopa, kalpamej kijtoskej: “Onkaj yolseuilistli niman xakaj nion itlaj uelis techmiktis” (1 Tes. 5:​2, 3). Ueyi tlajyouilistli san isiujkan peuas ijkuak kalpamej kimixnamikiskej tlaneltokiltin tlen xmelajkej (Apoc. 17:16). Sakin, Jesús kintlajtlakolmakas nochimej tlaltikpakchanejkej niman kinxelos akin okichiujkej ken borreguitos niman akin okichiujkej ken chivos (Mat. 25:​31-33, 46). San ika, Satanás noijki itlaj kichiuas. Yejua melak kualantos niman kichiuas ika miyekej kalpamej, akin Biblia kintokayotia ken Gog de Magog, makixnamikikan ikalpan Jehová (Ezeq. 38:​2, 10, 11). Sakin, ne iluikak kinsentlaliskej tlapejpeniltin akin ok nemiskej nikan ipan tlaltikpaktli. Ompa, yejuamej nosentlaliskej iuan Cristo niman iiluikaktekitkauan para tlaixnamikiskej ipan Armagedón, tlen kichiuas matlami ueyi tlajyouilistli (Mat. 24:31; Apoc. 16:​14, 16). Sa ika tlami, Cristo peuas tekiuajtis Mil Xiuitl ipan nochi tlaltikpaktli (Apoc. 20:6). w23.10 20, 21 párrs. 9, 10

Ipan yejuin tonaltin, miyekej itekipanojkauan Jehová chantij kampa xkinkauiliaj matenojnotsakan. Tokniuan kintlakaitaj tekiuajkej, san ika, ijkon ken Abdías, yejuamej san kiueyichiuaj Jehová (Mat. 22:21). Kiteititiaj ika kimojkaitaj toTajtsin ijkuak san yejua kitlakamatij (Hech. 5:29). Ika yejon, san ichtaka nochipa nosentlaliaj niman tenojnotsaj itech iTekiuajyo toTajtsin (Mat. 10:​16, 28). Noijki, yejuamej kitaj ika tokniuan makipiyakan tlen ika kichikauaskej intlaneltok. Matikitakan tlenon okichiuj tokniuj Henri, akin chanti África, kampa xtechkauiliayaj matitenojnotsakan. Ipan yejon tonaltin, tokniuj Henri, okinek kimitkilis iamatlajkuiloluan sekimej tokniuan. Yejua okijkuilo: “Nejua nikmachilia ika xniyolchikauak. San ika, Jehová onechpaleui maniyolchikaui”. Tejua noijki uelis tiyolchikauak yes, ijkon ken Henri, tla tiktlakaita toTajtsin. w23.06 16 párrs. 9, 11

Ijkuak Adán niman Eva xotetlakamatkej, ueliskia nesis ika yejuin kichiuaskia maka manochiua ken toTajtsin kinekiya: ika tlaltikpakchanejkej akin tetlakamatij niman xtlajtlakolejkej makitemiltikan yejuin tlaltikpaktli. Diablo okinemili ika Jehová xmás itlaj ueliskia kichiuas. Yejua okinemili ika ueliskia kipopolos Adán niman Eva niman kichijchiuas okse tlakatl niman okse siuatl akin kitemiltiskiaj yejuin tlaltikpaktli. San ika, tla Jehová ijkon kichiuaskia, Diablo kijtoskia ika Jehová tlakajkayaua. ¿Tleka? Pampa Génesis 1:28 kijtoua ika Jehová okimijli Adán niman Eva ika inkoneuan kitemiltiskiaj tlaltikpaktli. Noso kanaj Satanás okinemili ika Jehová kinkauiliskia Adán niman Eva makinpiyakan inkoneuan, san ika, yejuamej nochipa nemiskiaj ika tlajtlakojli (Ecl. 7:20; Rom. 3:23). Tla ijkon panoskia, Diablo kijliskia Jehová ika xok ouel okichiuj tlen kinekiya. ¿Tleka? Pampa toTajtsin kineki ika yejuin tlaltikpaktli matemi ika tlaltikpakchanejkej akin xkipiyaj tlajtlakojli. w23.11 5, 6 párrs. 15, 16

San ika, Jehová, ika iTlajtol niman ikalpan kuajli techijlia tlenon tikchiuaskej. Xnoneki itlaj okse tiktlaliliskej (Prov. 3:​5-7). Ika yejon, xsan tikuajnemiliaj tikintlaliskej okseki tlanauatiltin ipan Biblia niman noijki xtikimijliaj tokniuan tlenon noneki kichiuaskej tla yejon san no yejuamej noneki kitlapejpeniskej. Satanás kitekitiltia “temachtilistli tlen xmelauak” niman “intemachtil niman incostumbre on tlaltikpaktlakamej” para tekajkayauas niman texelos (Col. 2:8). Ijkon okichiuj ipan kachtopa siglo. Okichiuj ika sekimej judíos matemachtikan tlen xuajlaya ipan Biblia. Niman noijki okichiuj ika oksekimej makineltokakan ika ok nonekiya noyekanaskej ika iTlanauatil Moisés. Nochi yejuin katka “temachtilistli tlen xmelauak” pampa xkichiuaya makiueyichiuakan Jehová, akin itech ualeua tlamachilistli. Aman, Satanás kitekitiltia miyek tlemach niman ijkon kichiuas manosemoyaua tlen xmelauak temachtiaj akin tlayekanaj ipan política. w23.07 16 párrs. 11, 12

Jehová okiyektlali tlen Adán niman Eva yokichiujkaj. ¡Ken okichiuj melak okimojkatlachialti Satanás! Ijkuak Jehová okinkauili Adán niman Eva makinpiyakan inkoneuan, okiteititi ika yejua xtlakajkayaua niman ika nochipa nochiua tlen kijtoua. Noijki okiteititi ika yejua nochipa tetlani. ¿Kenon okiteititi yejuin? Okichiuj ijkuak okuajtitlan yakaj niman ijkon makinmakixtiki ikoneuan Adán niman Eva, akin tetlakamatiskiaj. Ijkon, ok nochiuaskia tlen toTajtsin kineki (Gén. 3:15; 22:18). Satanás xkeman kinemiliskia ika Jehová yakaj kuajtitlaniskia para matemakixtiki. ¿Tleka? Pampa ijkuak Jehová okuajtitlan yakaj okiteititi ika melak tetlasojtla (Mat. 20:28; Juan 3:16). Satanás san itech tlanemilia niman xkeman ijkon kichiuaskia. Kuakon, ¿tlenon uelis nochiuas ipampa tlen Jehová okichiuj? Ipan itlamiyan mil xiuitl ikoneuan Adán niman Eva, akin otetlakamatkej niman xok kipiyaskej tlajtlakojli, nemiskej nikan ipan tlaltikpaktli tlen nokuepas se xochitlalpan, ijkon ken Jehová yokijtojka desde yeuejkaui. w23.11 6 párr. 17

Matikpatiojkaitakan nemilistli niman yestli. ¿Tleka? Pampa Jehová kijtoua ika toyesyo kijtosneki tonemilis niman yejua akin otechtlayokoli tonemilis (Lev. 17:14). Ijkuak Jehová kemach okimijli tlaltikpakchanejkej ika ueliskia kikuaskej nakatl, okimijli maka makikuakan yestli (Gén. 9:4). Niman noijki ijkon okinnauati israelitas itechkopa Tlanauatijli tlen okimakak Moisés (Lev. 17:10). Niman, ipan kachtopa siglo okichiuj ika Grupo akin Tlayekana makimijli tokniuan ika xnonekiya kikuaskej yestli (Hech. 15:​28, 29). Ijkuak tejuamej kuajli tiktlapejpeniaj kenon topajtiskej, tikteititiaj ika noijki tikpatiojkaitaj yestli. Noijki matokojtilikan niman ijkon xtiauilnemiskej. Apóstol Pablo ijkin okijto: “Xpopolokan nochi tlen xkuajli nemotech onkaj”. Ika yejuin tlajtoltin, yejua techijlitika ika noneki tikinpopoloskej nochi xkuajli ileuilistin. Ika yejon, xtikchiuaj noso xtikitaj itlaj tlen uelis kichiuas matiauilnemikan (Col. 3:5; Job 31:1). w23.07 15 párrs. 5, 6

San ika ¿tleka Sansón xkitaya ika Dalila kinekiya kikajkayauas? ¿Kanaj Sansón kentla yoixtlapachiujka pampa melak kitlasojtlaya Dalila? Maski san kenon, Dalila miyekpa okijli Sansón makijli tleka kojtik katka, niman yejua okijli. Yejuin okitlajyouilti Sansón, pampa okichiuj ika ipan se tiempo makipolo ikojtilis niman maka sa manouika iuan Jehová (Juec. 16:​16-20). Sansón melak xkuajli okisato pampa otlaneltokak itech Dalila niman xotlaneltokak itech Jehová. Filisteos okajsikej, okinkixtilijkej ixtololojuan niman okitsakuatoj Gaza, niman ompa okitlalijkej ken tlakeuajli para matekiti ipan molino. Sakin, filisteos okichiujkej se iluitl niman okiuentlalilijkej intajtsin Dagón pampa kinemiliayaj ika yejua okinpaleui makajsikan Sansón. “Otlanauatijkej ma kuajuikakan Sansón para ika nauiltiskej niman kipijpinauiskej” (Juec. 16:​21-25). w23.09 5, 6 párrs. 13, 14

Kanaj yakaj akin iuan titekitij noso akin iuan tomachtiaj ipan escuela techtlajtoltis tleka tikintlakamatij itlanauatiluan Biblia. Maski tiknekij tikteijliskej tleka tikintlakamatij, noneki tiktlakaitaskej tlen kinemilia akin touan tlajtojtika (1 Ped. 3:15). Ijkuak itlaj techtlajtoltiskej, maka matiknemilikan ika san kinekij techixnamikiskej noso techtejteneuaskej. Matikitakan ika tlen techtlajtoltiaj techpaleuis matikmatikan tlenon kajmana akin iuan titlajtotokej. Maski xtikmatij tleka itlaj techtlajtoltiaj, kuajli tla tejuamej kualtsin titlanankiliaj niman xtikualanij. Tla ijkon tikchiuaj, akin touan nonojnotstok kanaj san no yejua kitas ika xkuajli ken tlanemilia. Matikonnemilikan ika yakaj akin iuan titekitij techtlajtoltia tleka xtikinpanoltiaj cumpleaños. ¿Itech tlenon uelis titlanemiliskej achto titenankiliskej? ¿Kanaj yejua kinemilia ika xtechkauiliaj matoyolpaktikan? Uelis tikijliskej ika melak kuajli ika najmana inpampa akin imiuan tekiti. Tla ijkon tikchiuaj, kanaj xkualanis niman sakin kinekis matikijlikan tlen kijtoua Biblia itech cumpleaños. w23.09 17 párrs. 10, 11

¿Xmelak ika tikpatiojkaitaj ika ok ueli titenojnotsaj? Apóstol Pedro techijlia ika noneki titlatlachixtoskej “chika tikchaj ma yejko” itonal Jehová (2 Ped. 3:​11, 12). ¿Kenon uelis tikchiuaskej yejuin? Tla titlanemiliaj itech kenon kualtsin tinemiskej ipan yenkuik tlaltikpaktli. San xkonnemili kenon kualtsin tinemiskej kampa tlachipaujtok, kenon tikuaskej tlen melak uelik, kenon tikinseliskej tochanejkauan akin yomijkej niman kenon tikimititiskej akin onenkej yeuejkaui ika onochiujkej teotlajtoltin. Tla titlanemiliaj itech nochi yejuin, techpaleuis matikmatstokan ika itonal Jehová iyejkotika. Pampa itikmatij tlenon panos ika tlayekapan, xtijkauiliaj ika akin temachtiaj tlen xmelauak matechkajkayauakan. w23.09 27 párrs. 5, 6

Telpokamej niman ichpokamej kinpiyaj miyekej incompañeros akin xkintlakamatij intajuan (2 Tim. 3:​1, 2). ¿Tleka ijkon kichiuaj? Pampa kinemiliaj ika tlen intajuan kinnauatiaj nion yejuamej xkichiuaj, niman kitaj kentla kipiyaskiaj ome inxayak. Oksekimej kinemiliaj ika tlen intajuan kinnauatiaj xok tepaleuiya noso melak ouijtika. Telpochtli noso ichpochtli, ¿kemantika ijkon yotiknemilijka? Miyekej kanaj ouijtika kitaj kichiuaskej yejuin tlen Jehová technauatia ipan tlaxelojli tlen aman tikitstokej. ¿Tlenon uelis mitspaleuis xchiua yejuin? Tla tiknekij titetlakamatiskej, noneki tikitaskej tlenon okichiuj Jesús (1 Ped. 2:​21-24). Yejua xtlajtlakole katka, san ika, itajuan kema. Maski ijkon, okintlakaitak hasta ijkuak nopopolouayaj noso xkasikamatiyaj (Éx. 20:12). w23.10 7 párrs. 4, 5

Apóstol Pablo okimijli ika uentin tlen tlanauatijli kijtouaya manotemakakan, xkinpaleuiaya niman ijkon kintlapopoluiliskiaj intlajtlakoluan. Tlanauatijli xok kinpaleuiaya. Ika yejon, apóstol okinmachti seki tlanauatiltin tlen más nonekiya itech tlanemiliskej. Okimilnamikti ika pampa Jesús onotemakak inpampa, aman kipiayaj “sen más kuajli tlamachalistli” tlen kema kinpaleuiskia makinisiuikan toTajtsin (Heb. 7:19). Pablo okimijli ikniuan hebreos tleka ken aman kiueyichiuayaj Jehová más kuajli xijkon ken yeuejkaui kiueyichiuayaj. Okijto ika ken judíos kiueyichiuayaj toTajtsin katka san “ken itlaj itlaseuajlo on tlen ye onkatka para uajlas”. Niman noijki okijto: “Pero nochi on tlen melauak sano yejua Cristo” (Col. 2:17). Itlaseuijlo itlaj, san itlaixkopinal, san ika xyejua. Noijki ijkon, ken yeuejkaui judíos kiueyichiuayaj toTajtsin san katka itlaseuijlo itlaj tlen sakin yejkoskia. Melak noneki matikasikamatikan ken Jehová kineki matikueyichiuakan. ¿Tleka? Pampa san ijkon uelis techintlapopoluiliskej totlajtlakoluan niman uelis tikueyichiuaskej toTajtsin ken yejua kineki. w23.10 25 párrs. 4, 5

Daniel capítulo 11 tlajtoua itech omemej tekiuajkej noso gobiernos akin san no yejuamej noixnamikij pampa kinekij tlayekanaskej ipan tlaltikpaktli. Pampa yotikitakej yejuin teotlajtojli niman okseki teotlajtoltin tlen uajlauej ipan Biblia, aman tikmatstokej ika Rusia niman akin kipaleuiyaj yejua tekiuaj akin tlayekana norte. Noijki yotikasikamatkej ika Estados Unidos niman Reino Unido yejua tekiuaj akin tlayekana sur. Tekiuaj akin tlayekana norte kintlaueltokatikaj itekipanojkauan toTajtsin akin chantij kampa yejua tlayekana. Sekimej iteixpantijkauan Jehová yokinuijuisojkej niman yokintsajkej ipampa tlen kineltokaj. San ika, tokniuan xkinmojtia tlen tekiuaj akin tlayekana norte kinchiuilia, yej más yochikauj intlaneltok. ¿Tleka? Pampa kimatstokej ika ipan libro tlen Daniel okijkuilo kijtoua ika kintlaueltokaskiaj (Dan. 11:41). Tla nochipa tikilnamiktokej yejuin teotlajtojli, techpaleuis matitlamachixtokan niman matimelajkanemikan itech Jehová. w23.08 11 párrs. 15, 16

Jehová techita ken ixtololojuan. Toixtololo melak maluijli niman melak tepaleuiya ipan totlalnakayo. Ika yejon, Jehová kentla kijtoskia: “Ijkuak yakaj mexchiuilia tlen xkuajli, yeskia kentla nejua nexchiuilijtoskia”. Pampa Jehová techtlasojtla, kajmana tlen tikmachiliaj, niman kineki techtlajpiyas. Ijkuak titlajyouiyaj, yejua noijki tlajyouiya. Ika yejon, uelis tikijliskej: “Xnechejeua ken itlaj mixtlilijkayotsin [noso moixtololoj]” (Sal. 17:8). Jehová kineki xneltoka ika yejua mitstlasojtla. Yemelak, kanaj ipampa nochi tlen tikixnamiki, uelis tiknemilis ika yejua xmitstlasojtla. Kuakon, ¿tlenon mitspaleuis xneltoka ika yejua mitstlasojtla? Tla tikita kenon Jehová kitlasojtla Jesús, kenon kintlasojtla tlapejpeniltin niman kenon techtlasojtla tejuamej. w24.01 27, 28 párrs. 6, 7

Esdras yokitaka kenon Jehová kipaleuiaya ikalpan ijkuak kixnamikiyaj tlen ouijtika. Ipan 484 ijkuak xpeuaya xiuitl 1, ijkuak tekiuaj Asuero otlanauati makinmiktikan nochimej judíos akin nemiyaj Persia, kanaj Esdras chantiya ne Babilonia (Est. 3:​7, 13-15). Ueliskia kimiktiskiaj. Niman ijkuak judíos okimatkej tlen tekiuaj Asuero otlanauati nochimej melak onajmankej, “nosauayaj, chokayaj, ajmankatsajtsiyaj” niman kitlajtlaniliayaj Jehová makinmakixti (Est. 4:3). Matiknemilikan kenon onomachilijkej Esdras niman judíos ijkuak okitakej kenon nochi onopatlak: akin kinemilijtoyaj kinmiktiskiaj judíos yejuamej okinmiktijkej (Est. 9:​1, 2). Tlen Esdras ijkuakon okixnamik, kanaj melak kipaleuiskia ika tlen sakin kixnamikiskia, niman yejon okichiuj más makineltoka ika Jehová nochipa kitlajpiya ikalpan. w23.11 17 párrs. 12, 13

Apóstol Pablo tlajtotoya itech on tlanauatijli tlen toTajtsin okinmakak israelitas itechkopa Moisés (Rom. 3:​21, 28). Nesi ika sekimej judíos xkasikamatiyaj ika xok nonekiya kichiuaskej tlen kijtouaya Tlanauatijli tlen okimakakej Moisés. Yejua ika, Pablo otlajto itech Abrahán niman ijkon kimititis ika toTajtsin xkita ika oksekimej yolmelajkej tla kichiuaj tlen kijtoua Tlanauatijli, yej, tla kiteititiaj ika itech tlaneltokaj. Yejuin tlen okijto melak techyolchikaua pampa techititia ika toTajtsin uelis techselis tla itech titlaneltokaj niman noijki tla titlaneltokaj itech Cristo. Ipan capítulo 2 de Santiago xtlajtotika itech Tlanauatijli tlen okimakakej Moisés, tlen okiteneuj apóstol Pablo. Santiago tlajtotoya itech tlen mojmostla kichiuaj akin kitekichiuiliaj Cristo (Sant. 2:24). Yejuin tlen kichiuaj kiteititia tla yemelak tlaneltokaj itech toTajtsin noso ka. w23.12 3 párr. 8; 4 párrs. 10, 11

Tokniuj siuatl, tla tikneki timonamiktis, noneki kuajli tiktlapejpenis iuan akinon. Xkilnamiki ika yejon tlakatl akin iuan timonamiktis yejua mitsyekanas (Rom. 7:2; Efes. 5:33). Kuakon, xmotlajtolti: “¿Kiteititia ika chikauak kipiya itlaneltokil? Ika tlen kichiua, ¿kiteititia ika más ueyi kijtosneki kichiuas tlen toTajtsin kineki? ¿Kuajli tlen kitlapejpenia? ¿Yolyemanki niman kasikamati ika kemantika noijki nopopoloua? ¿Kintlakaita siuamej? ¿Uelis nechpaleuis machikaujto notlaneltokil, nechmakas tlen nechpoloua niman nechpaleuis?”. Tla tikneki tiknextis se kuajli moueuentsin, noijki noneki timokojtilis tiyes se kuajli tesiuauj. Se kuajli tesiuauj kipaleuiya iueuentsin (Gén. 2:18). Noijki, pampa kitlasojtla Jehová, kichiua kuajli matlajtokan itech iueuentsin (Prov. 31:​11, 12; 1 Tim. 3:11). Tla tiknemilijtika timonamiktis, xmokojtili más tiktlasojtlas Jehová niman noijki más titlapaleuis ipan mochan niman ipan tlanechikojli. w23.12 22, 23 párrs. 18, 19

Jehová techijlia ika techmakas tlamachilistli ijkuak nonekis tiktlapejpeniskej tlen tikchiuaskej. Niman más tiknekij matechmaka tlamachilistli ijkuak tiktlapejpeniskej tlen uelis kipatlas tonemilis. Yejua techpaleuis matitlaxikokan ijkuak itlaj tikixnamikiskej, ijkon ken okipaleui apóstol Pablo (Filip. 4:​13, TNM). Techinmaka tokniuan akin yeskiaj kentla tochanejkauan. Ipan on yeuajli achto ika Jesús mikiskia, yejua, ika nochi iyojlo okinots Jehová. Okitlajtlanili maka makitekauili ika oksekimej makinemilikan ika yokiuijuikaltijka. Jehová xokichiuj tlen okitlajtlanili Jesús. San ika, kema okipaleui, okuajtitlan se ángel para makiyolchikauaki (Luc. 22:​42, 43). Noijki ijkon, kanaj Jehová uelis techpaleuis ijkuak se tokniuj techuajnotsas noso techuajtlajpalos para techyolchikauas. Tinochimej uelis tikitaskej kemanon tiktemakaskej “sen kuajli tlajtojli” niman ijkon tikyolchikauaskej se tokniuj (Prov. 12:25). w23.05 10, 11 párrs. 9-11

Tokniuan akin youejkauj xok touan nosentlaliaj kanaj kinmojtia tla tokniuan xkuajli okinselijkej. Ika yejon, maka matikintlajtoltikan noso matikijtokan itlaj tlen uelis kichiuas maka kuajli manomachilikan. Tejuamej ok tikintlasojtlaj yejuin tokniuan niman melak techyolpaktia ika oksejpa imiuan tikueyichiuaj Jehová (Sal. 119:176; Hech. 20:35). Melak tiktlasojkamachiliaj Jesús pampa otechnauati matikilnamikikan imikilis nochi xiujtin, pampa yejon melak ueyi kijtosneki. Tla ijkon tikchiuaj, melak techpaleuis niman kinpaleuis oksekimej (Is. 48:​17, 18). Noijki techpaleuiya más matiktlasojtlakan Jehová niman Jesús. Techkauilia matikteititikan ika melak tiktlasojkamatij tlen yejuamej yokichiujkej topampa. Noijki, kichiua san sekan matinemikan imiuan tokniuan, niman techkauilia matikinpaleuikan oksekimej makimatikan tlenon noneki kichiuaskej para ijkon kiseliskej nochi tlen Jehová yokijto techmakas ipampa tlen Jesús okichiuj. Ika yejon, matokojtilikan matikchiuakan tlen noneki ipan Conmemoración pampa yejon tonajli melak ueyi kijtosneki. w24.01 13, 14 párrs. 18, 19

Jehová kitekitiltia Biblia niman kintekitiltia tokniuan tlakamej para techyekanas, ken “tekitketl” yolmelauak niman tlamachilise. Yejuin “tekitketl” kuajli techmachtia niman ijkon matiktlapejpenikan tlen kuajli (Mat. 24:45). Jehová noijki kintekitiltia tlayekankej ipan circuito niman tlayekankej ipan tlanechikojli para matechyolchikauakan niman matechpaleuikan ijkuak itlaj tikixnamikiskej. Melak tiktlasojkamachiliaj Jehová ika ipan yejuin itlamiyan tonaltin yejua techyekana pampa yejon techpaleuiya kuajli iuan matouikakan. Noijki techpaleuiya matiyolpakikan aman niman techpaleuis matiyolpakikan ika tlayekapan. Ijkuak Jehová kintekitiltia tokniuan tlakamej para techyekanas, kanaj xmás tikuelitaj tikchiuaskej tlen techijliaj. Ijkuak ijkon titlanemiliskej, ijkuakon más noneki matikneltokakan ika Jehová kiyekantok ikalpan niman ika melak kuajli tla tikchiuaj tlen techijliaj. w24.02 20 párrs. 2, 3

Tla tiknekij más tiktlasojtlaskej toTajtsin, noneki melak kuajli tomachtiskej iTlajtol. Ijkuak tikamapouaskej se tlaxelojli itech Biblia, noneki tikitaskej tlenon techmachtia itech Jehová. Uelis totlajtoltiskej: “¿Kenon yejuin tlaxeloltin nechititiaj ika Jehová nechtlasojtla? ¿Kenon nechpaleuiyaj más maniktlasojtla Jehová?”. Noijki, más tiktlasojtlaskej Jehová tla mojmostla tikijliaj tlen tikmachiliaj (Sal. 25:​4, 5). Jehová kuajli yotechijli ika kinnankilis toteoyouan (1 Juan 3:​21, 22). Noijki noneki más tikintlasojtlaskej oksekimej. Seki xiujtin sakin ika apóstol Pablo opeuj kichiua ken Cristo, yejua okixmat se telpochtli akin itoka katka Timoteo. Yejua kitlasojtlaya Jehová niman kintlasojtlaya oksekimej. Pablo yejuin tlen okimijli filipenses itech Timoteo: “Xnikpiya okse yejuan no ijki kinemilia ken nejua, yejuan melauak notekimakas kichiuas tlen kuajli para nemejuamej” (Filip. 2:20). Kuajli nesi ika Pablo kipatiojkaitaya Timoteo pampa kintlasojtlaya tokniuan. Kuajli tikmatstokej ika tokniuan de tlanechikoltin sa kichiatoyaj ika Timoteo makintlajpaloti (1 Cor. 4:17). w23.07 9 párrs. 7-10

Moisés omik achto kalakiskiaj israelitas ipan Tlajli tlen Jehová yokimijlika kinmakas. ¿Jehová xok kipaleuiskia ikalpan pampa yomijka Moisés? Ka, Jehová xkeman okintlalkaui israelitas ijkuak itech melajkanemiyaj. Matikteneuakan tlen opanok achto mikis Moisés. Jehová okijli Moisés ika Josué yejua akin aman kiyekanaskia ikalpan, ika yejon, Moisés ouejkauj kimajmachtia Josué (Éx. 33:11; Deut. 34:9). Noijki, nemiyaj miyekej tlakamej akin kinyekanayaj 1,000 tlakamej, 100 tlakamej, 50 tlakamej niman 10 tlakamej (Deut. 1:15). Kuajli nesi kenijki Jehová kitlajpixtoya ikalpan. Noijki matikteneuakan tlen opanok ijkuak nemiya Elías. Yejua okinpaleui israelitas makiueyichiuakan Jehová. San ika, sakin Jehová okontitlan Judá (2 Rey. 2:1; 2 Crón. 21:12). ¿Jehová kitlalkauiskia ikalpan pampa xok ompa nemiskia Elías? Ka, pampa Elías ouejkauj kimajmachtia Eliseo. Jehová nochipa okichiuj tlen yejua kineki niman nochipa okintlajpix itekipanojkauan. w24.02 5 párr. 12

Tokniuan akin chantiyaj Éfeso yopeujkaj kichiuaj tlen kijtoua iTlajtol toTajtsin, tlen katka ken se tlauijli tlen kinyekanaya (Sal. 119:105). Yejuamej yokiskaj itech tlaneltokijli tlen xmelauak niman xok auilnemiyaj. Noijki yopeujkaj kichiuaj ken toTajtsin niman nokojtiliayaj kiueyichiuaskej niman kiyolpaktiskej (Efes. 5:1). Tejuamej noijki tinemiyaj ipan tlayoualyotl ijkuak xitikixmatiyaj Jehová. Sekimej tiiluipanouayaj ipan tlaneltokijli tlen xmelauak niman sekimej kanaj tiauilnemiyaj. San ika, ijkuak otikixmatkej Jehová, otopatlakej niman opeuj tikchiuaj tlen kuajli. Nochi yejuin melak yotechpaleui (Is. 48:17). Maski ijkon, kemantika ouijtika tikitaj xok tinemiskej ipan tlayoualyotl. w24.03 21, 22 párrs. 6, 7

Kanaj tikmachilia ika mitspoloua para timosentemakas niman timoapolaktis. Kanaj noneki más timopatlas para tiktlakamatis Jehová. Noso kanaj tikneki más tiempo para más tikchikauas motlaneltok (Col. 2:​6, 7). Xkilnamiki ika xnochimej akin nomachtijtokej Biblia xpeuaj san noijki kitlasojtlaj Jehová. Niman ika telpokamej xnoneki san noijki xiuitl kipiyaskej para uelis noapolaktiskej. Kuakon, xchikaujto motlaneltok niman xkita kemanon uelis timosentemakas niman timoapolaktis, niman maka xsan xkitsto tlen oksekimej kichiuaj (Gál. 6:​4, 5). Tla tikita ika ok mitspoloua para timosentemakas itech Jehová, maka xmosiaujkaua. Xtlajtlanili Jehová mamitspaleui xchiua tlen noneki niman ijkon uelis itech timosentemakas (Filip. 2:13). Kuajli xmatsto ika Jehová kinnankilis moteoyouan (1 Juan 5:14). w24.03 5 párrs. 9, 10

Sejpatipan, Sara melak tlauelmikiya, kuakon ipan onotlauelkixtito Abrahán niman okitlajtlakolti ipampa tlen ipan nochiujtoya. San ika, Abrahán xokualan nion xokijli itlaj tlen ika ueliskia kiyolkokos. Yejua kuajli kixmatstoya niman kimatstoya ika Sara kema kitlakaitaya niman nochipa kipaleuiaya. Yejua ika, kuajli okikak niman okiyejyeko kiyektlalis tlen kajmanaya Sara (Gén. 16:​5, 6). ¿Tlenon kinmachtia akin yononamiktijkej? Jehová yokijto ika teueuentsin yejua akin kiyekanas ifamilia (1 Cor. 11:3). San ika, pampa kitlasojtla isiuatsin kitlajtoltia tlenon kinemilia niman kuajli kikaki, niman más tla tlen kitlapejpenis kipaleuis noso kijtlakos (1 Cor. 13:​4, 5). Noijki, sejpatipan Abrahán okinseli sekimej tlakamej maski xkimatiya ika yaskiaj. Yejua ika, okijli Sara makichijchiua miyek pan maski yejua ikichiujtoya okseki tekitl (Gén. 18:6). Sara nimantsin okichiuj tlen iueuentsin okijli. Tesiuauan, nemejuamej uelis nenkichiuaskej ijkon ken Sara niman nenkinpaleuiskej nemoueuentsitsinuan. Tla ijkon nenkichiuaj, más kuajli nemouikaskej (1 Ped. 3:​5, 6). w23.05 24, 25 párrs. 16, 17

Sakin ika Jehová okitlali Gedeón para makinyekana israelitas, okixnamik miyek tlen okichiuj makita ouijtika tetlakamatis niman yolchikauak yes. Okijlikej makixoxotoni tlaixpan tlen itaj yokichijchiuilijka Baal (Juec. 6:​25, 26). Sakin, Gedeón okinsentlali melak miyekej soldados para ontlaixnamikiskej, san ika, Jehová okpa okijli ika xnonekiya melak miyekej yeskej (Juec. 7:​2-7). Niman sa ika tlami, Jehová okijli Gedeón makimixnamiki itlauelikniuan ijkuak melak itlayoua katka (Juec. 7:​9-11). Tlayekankej noneki nochipa tetlakamatiskej. Ijkuak se tlayekanketl tetlakamati, ika nochi iyojlo kichiua tlen kijtoua Biblia niman ikalpan toTajtsin, niman ijkon oksekimej kitaj ika noijki noneki ijkon kichiuaskej. San ika, kemantika kanaj ouijtika kitaj tetlakamatiskej pampa kinseliaj miyek tlanauatiltin niman yejon tlanauatiltin san totoka nopatlatiuetsij. Kemantika hasta uelis notlajtoltiskej tla kema tepaleuis tlen kintlajtlaniliaj makichiuakan. Noso kanaj kimijliskej makichiuakan itlaj tlen uelis kichiuas makintsakuakan. Ijkuak ijkon panos, ¿kenon tlayekankej uelis tetlakamatiskej ijkon ken Gedeón? Kuajli xtlakakikan niman xchiuakan tlen mechijliaj. w23.06 4, 5 párrs. 9-11