Abril

Sekimej itekipanojkauan Jehová akin Biblia kinteneua okixnamijkej tlen xkichiayaj. Matitlanemilikan itech Jacob. Itaj okinauati manonamikti iuan se ichpoch Labán pampa yejua kitekichiuiliaya Jehová. Niman okijli ika Jehová melak kiteochiuaskia (Gén. 28:​1-4). Kuakon, Jacob okichiuj tlen kuajli: oyaj de Canaán niman oajsik hasta kampa chantiya Labán, akin kipiaya ome ichpoch, Lea niman Raquel. Jacob okuelitak Raquel, akin más pitentsin katka. Para uelis iuan nonamiktis, Jacob okinek kitekichiuilis Labán chikome xiuitl (Gén. 29:18). San ika, xonochiuj ijkon ken Jacob kichiaya. Labán okikajkayauj niman okimakak okse ichpoch akin más iueyi katka para iuan manonamikti, Lea. Se semana sakin, okikauili manonamikti iuan Raquel, san ika, okijli ika nonekiya itech tekitis okseki chikome xiuitl (Gén. 29:​26, 27). Niman xsan yejon tlen okichiuili. Labán melak okitekitilti Jacob niman ijkon sa no yejua nopaleuis. ¡20 xiuitl ijkon okichiuili! (Gén. 31:​41, 42). w23.04 15 párr. 5

¿Akinon uelis tiktlajtlaniliskej matechyolseui niman matechyekana? Tejuamej kuajli tikmatstokej ika san Jehová uelis tiknotsaskej. Yejua hasta techijlia ika kineki miyekpa matiknotsakan, pampa kijtoua: “Nochipa xchiuakan oración” (1 Tes. 5:17). Uelis tikijliskej nochi tlen tikmachiliaj niman tiktlajtlaniliskej matechyekana ipan tonemilis (Prov. 3:​5, 6). Niman, pampa Jehová melak yolkuajli, techkauilia matiknotsakan nochipa ijkuak tejuamej tiknekiskej. Jesús kimatstoya ika Jehová melak kinpatiojkaita toteoyouan. Ijkuak xiuajlaya ipan tlaltikpaktli, yejua okitak kenon iTaj kinnankiliaya inteoyouan itekipanojkauan. Pampa iuan nemiya, okitak ijkuak okinnankili iteoyouan Ana, David, Elías niman oksekimej itekipanojkauan (1 Sam. 1:​10, 11, 20; 1 Rey. 19:​4-6; Sal. 32:5). Ika yejon, Jesús okimijli inomachtijkauan ika miyekpa makinotsakan toTajtsin niman ika kuajli makimatstokan ika yejua kinnankilis (Mat. 7:​7-11). w23.05 2 párrs. 1, 3

Ueyi teopixki Jehoiadá kimojkaitaya Jehová. Ijkuak Atalía, ichpoch Jezabel, opeuj tekiuajti maski xkinamikiya, Jehoiadá okiteititi ika melak kimojkaitaya toTajtsin. Atalía melak tlauele katka niman pampa melak kinekiya tekiuajtis okinmikti nochimej akin ueliskia kitekipatlaskiaj, ¡hasta okinmikti ixuiuan! (2 Crón. 22:​10, 11). San ika, Jehosabeat, isiuauj Jehoiadá okimakixti Jehoás, akin katka se ixuitsin Atalía. Jehosabeat niman iueuentsin okiyankej niman okitlajpixkej. Melak otepaleui tlen yejuamej okichiujkej, pampa ijkon ok nemiskiaj tekiuajkej akin ualeuaskiaj itech ichanejkauan David. Jehoiadá melajkanemiya itech Jehová, ika yejon, xsan ijkon ouajnokauj san pampa kimakasiya Atalía. Ijkuak Jehoás kipiaya 7 xiuitl, Jehoiadá oksejpa okiteititi ika yolmelajkanemiya itech Jehová. Yejua okipaleui Jehoás para manochiua tekiuaj maski kimatstoya ika tla xkuajli kisaya tlen kichiuaskia, ueliskia kimiktiskiaj. Pampa Jehová okinpaleui, nochi kuajli okisato. w23.06 17 párrs. 12, 13

Tekiuaj Nabucodonosor ueliskia kinemilis ika Daniel yopeuj kixnamiki niman ueliskia tlanauatiskia makimiktikan, maski ijkon, Daniel nochi okijli. ¿Tlenon okipaleui Daniel mayolchikauak? Kuajli tikmatstokej ika melak miyek ouel itech itaj niman inan (Deut. 6:​6-9). Daniel xsan kimatstoya tlen kijtouayaj majtlaktli tlanauatiltin, noijki kimatstoya tlenon nonekiya kikuaskej niman tlenon xnonekiya kikuaskej israelitas (Lev. 11:​4-8; Dan. 1:​8, 11-13). Noijki kimatiya tlenon ipan yonochiujka ikalpan toTajtsin niman kimatstoya kenon onkisayaj ijkuak xkitlakamatiyaj Jehová (Dan. 9:​10, 11). Nochi tlen okixnamik okititi ika Jehová niman iiluikaktekitkauan nochipa kipaleuiskiaj (Dan. 2:​19-24; 10:​12, 18, 19). w23.08 3 párrs. 5, 6

Rebeca tlamachilise katka niman kimatstoya kemanon kichiuas itlaj niman kenon nonekiya kichiuas (Gén. 24:58; 27:​5-17). San ika, noijki tetlakaitaya niman tetlakamatiya (Gén. 24:​17, 18, 65). Tla tejua tiyolyemanki ijkon ken Rebeca niman tiktlakamati tlen Jehová tlanauatia, tikinpaleuis mochanejkauan niman noijki tlanechikojli. Itekipanojkauan toTajtsin akin chikauak kipiyaj intlaneltokil xnoneki noueyimatiskej. Ijkuak Ester okitlalijkej ken tekiuaj, xopeuj noueyimati. Yejua ok kikakiya tlen kijliaya iprimo, Mardoqueo (Est. 2:​10, 20, 22). Tejua noijki uelis tikchiuas ijkon ken yejua tla tikintlajtlanilia oksekimej mamitsijlikan tlenon uelis tikchiuas niman tla tikchiua tlen mitsijliaj (Tito 2:​3-5). Matikitakan kenon más okiteititi Ester ika xonoueyimat. Maski yejua “sanoyej ixkualtetsin katka niman no kualtetsin katka nochi itlalnakayo”, xkeman okinek kichiuas ika oksekimej makinemilikan ika yejua ueyixtoya (Est. 2:​7, 15). w23.12 19, 20 párrs. 6-8

Maka sajnoye matotlajtlakoltikan pampa yejon kentla itlaj tlen melak yetik. Tla yotikteijlikej tlen xkuajli otikchiujkej, yotoyolkuepkej niman tokojtilijtokej xok ijkon tikchiuaskej, uelis kuajli tikmatstoskej ika Jehová yotechtlapopolui (Hech. 3:19). Tla tikchiuaj tlen yonoteneuj, Jehová xok kineki sa matotlajtlakoltijtokan pampa kimatstok ika tla ijkon tikchiuaj uelis melak techijtlakos (Sal. 31:10). Tla melak tajmanaj, uelis tosiaujkauaskej niman xok totlaloskej ipan ojtli tlen teuika kampa onka nemilistli (2 Cor. 2:7). Tla melak timajmana ipampa itlaj tlen xkuajli otikchiuj, xtlanemili itech kenon toTajtsin tetlapopoluiya (Sal. 130:4). Ijkuak yakaj noyolkuepa ika nochi iyojlo, Jehová kichiua tlen kijtoua ipan Jeremías 31:34: “Xok kaman nikelnamikis imintlajtlakoluan”. Yejuin kijtosneki ika ijkuak Jehová mitstlapopoluiya xkilnamiktok tlen otikchiuj. Maka melak xmajmana tla otikpolo se tekitl tlen tikpiaya ipan tlanechikojli. Jehová xsan kilnamiktok tlen xkuajli otikchiuj, ¿tleka tejua noijki xijkon tikchiua? w23.08 30 párrs. 14, 15

Ijkuak panotoya kokolistli COVID-19, tokniuan akin okitlakamatkej tlen ikalpan toTajtsin okimijli, xinpan onochiuj tlen okixnamijkej akin okineltokakej tlen xmelauak (Mat. 24:45). Maka matikilkauakan ika noneki tiktlapejpeniskej “on tlen más kuajli” (Filip. 1:​9, 10). Tla san nochipa titlakuajtokej, titlaonitokej, toyolpaktijtokej niman titekititokej, uelis techkuilis miyek tiempo niman xok uelis tikchiuaskej tlen más techpaleuis (Luc. 21:​34, 35). Mojmostla tijkakij kenon políticos xnotlajtolnamikij niman kenon oksekimej kichiuaj marchas. Maka matijkauilikan ika yejon matechijtlako. Noijki, xnoneki tikitaskej noso tijkakiskej kenon políticos xnotlajtolnamikij. Pampa, tla ijkon tikchiuaj, uelis tikinpaleuiskej maski san ipan toyojlo. Satanás kikui miyek tlemach niman ijkon kichiuas maka matimelajkanemikan. w23.07 16, 17 párrs. 12, 13

Akin tiktekichiuiliaj Jehová, tikitaj ika melak ueyi kijtosneki tonajli ijkuak tikilnamikij imikilis Cristo. San yejon tonajli otechnauati Jesús matikilnamikikan (Luc. 22:​19, TNM; Luc. 22:20). Techilnamiktia seki tlemach tlen noneki tikchiuaskej niman ijkon tikteititiskej ika tiktlasojkamatij pampa Jesús onotemakak topampa (2 Cor. 5:​14, 15). Niman kichiua matinemikan imiuan tokniuan niman san sekan matoyolchikauakan (Rom. 1:12). Noijki, miyekej tlaltikpakchanejkej mojkatlachiaj ipampa tlen kitaj niman kikakij ipan Conmemoración niman peuaj nomachtiaj Biblia. Noijki, tiknekij mayejko Conmemoración pampa tikitaj kenon akin kitekichiuiliaj Jehová kuajli nouikaj. Ipampa nochi yejuin, melak tikpatiojkaitaj Conmemoración. w24.01 8 párrs. 1-3

Ijkuak más titlanemiliaj itech tlen Jehová niman Jesús okichiujkej topampa, más tikasikamatij kenon melak techtlasojtlaj (Gál. 2:20). Jehová okitemakak tlen más patioj kipiaya, iKoneuj, niman okitekauili makitlajyouiltikan niman makimiktikan pampa melak techtlasojtla. Jehová xsan kimachilia ika techtlasojtla, yejua noijki techititia (Jer. 31:3). Yejua otechuajuikak ipan ikalpan pampa techtlasojtla (noijki xkita Deuteronomio 7:​7, 8). Niman xakaj uelis techxelos itech itetlasojtlalis tlen techpilia (Rom. 8:​38, 39). ¿Tejua kenon timomachilia ijkuak titlanemilia itech yejuin? w24.01 28 párrs. 10, 11

Tokniuan akin tlapejpeniltin melak kipatiojkaitaj tlen kichiaj kiseliskej. Ipan 1991, tokniuj Frederick Franz, okijto yejuin: “Tlen tikchiaj tikseliskej yemelak nochiuas. Akin titeuamej itech 144,000, sa tikchiatokej tikseliskej tlen toTajtsin yokijto techmakas. Xitlaj onka ijkon ken tlen yejua kineki techmakas”. Noijki okijto: “Tejuamej ok xtosiaujkauaj niman más tikpatiojkaitaj tlen tikseliskej. [ . . . ] Tiknektokej tikchiatoskej”. Tinochimej tikchiaj tikseliskej tlen melak techyolpaktis, maski tla tinemiskej para nochipa ne iluikak noso nikan ipan tlaltikpaktli. Uelis más tikneltokaskej ika tikseliskej tlen tikchiaj. w23.12 9 párr. 6; 10 párr. 8

Ikiyauatenko tabernáculo onkatka se tlaixpan de cobre kampa kiuentlaliliayaj Jehová ika yolkamej (Éx. 27:​1, 2; 40:29). San ika, yejon uentin xkinpaleuiskia israelitas niman ijkon makintlapopoluilikan nochi intlajtlakoluan (Heb. 10:​1-3). Uentin tlen mojmostla nouentlaliayaj ipan tabernáculo, okineskayoti uentli tlen ika ueliskia techintlapopoluiliskiaj nochi totlajtlakoluan. Jesús kimatstoya ika Jehová okuajtitlan ipan tlaltikpaktli para makitemakaki inemilis ken tlaxtlauijli niman ijkon kinmakixtis tlaltikpakchanejkej (Mat. 20:28). Ika yejon, ijkuak onoapolakti, Jesús onotemakak niman ijkon kichiuas tlen Jehová kineki (Juan 6:38; Gál. 1:4). Jesús okitemakak inemilis “san sejpa niman para nochipa” niman ijkon kintlapopoluiliskej intlajtlakoluan akin kiteititiaj ika itech tlaneltokaj (Heb. 10:​5-7, 10). w23.10 26, 27 párrs. 10, 11

San toselti xkeman ueliskia tomakixtiskiaj itech tlajtlakojli niman mikilistli (Salmo 49:​7, 8). Jehová okinek ika iKoneuj makitemaka inemilis topampa, niman melak ueyi kijtosneki tlen yejuamej okichiujkej. Ijkuak más titlanemiliaj itech tlen Jehová niman Jesús okichiujkej topampa, más tikpatiojkaitaj tlaxtlauijli. Ijkuak Adán otlajtlako, okipolo nemilistli para nochipa niman noijki okichiuj ika ikoneuan maka makipiyakan yejon tetlayokolijli. Jesús okitemakak inemilis tlen xkipiya tlajtlakojli niman ijkon oksejpa matikpiyakan tlen Adán yokipolojka. Ijkuak nemiya ipan tlaltikpaktli, Jesús “nion se tlajtlakojli xokichiu, nion okajkayau yakaj” (1 Ped. 2:22). Ijkuak Jesús omik, xkipiaya tlajtlakojli, kuakon inemilis tlen okitemakak san noijki katka ken inemilis Adán tlen xkipiaya tlajtlakojli (1 Cor. 15:45; 1 Tim. 2:6). w24.01 10 párrs. 5, 6

Sakin ika Jesús oyoliuj, okalak ipan Santísimo tlen onka ipan iteopan Jehová. Jehová okitemakak isenteKonetsin niman okitlali ken Ueyi Teopixki niman ijkon techititis kenon kineki matikueyichiuakan. Ipan Santísimo, akin san tlakamej okichijchiujkej, ueyi teopixki kalakiya ika inyesyo yolkamej. San ika, Jesús okalak kampa más tlachipaujkan: “ne iluikak”, ixpan Jehová. Ompa okitemakak itlalnakayo tlen xkipiaya tlajtlakojli “ken sen uentli para okitekixtilij tlajtlakojli” (Heb. 9:​24-26). Matikueyichiuakan Jehová ipan iteopan maski tla tinemiskej ipan tlaltikpaktli noso tiaskej iluikak. w23.10 28 párrs. 13, 14

Matitlanemilikan itech tlen Jesús kichiujtika ne iluikak ken Tekiuaj niman Ueyi Teopixki. Itechkopa yejua ueli tiknisiuiyaj toTajtsin ika teoyotl niman tiktlajtlaniliaj matechikneli niman matechpaleui “ijkuak itlaj techpolos” (Heb. 4:​14, 15). Nochipa matitlanemilikan itech tlen Jehová niman Jesús yokichiujkej niman tlen kichiujtokej. Tla tejuamej tikitaj ika melak techtlasojtlaj, techpaleuis matiktekichiuilikan Jehová ika nochi toyojlo (2 Cor. 5:​14, 15). Uelis tikteititiskej ika tiktlasojkamatij tlen yokichiujkej topampa tla tikinpaleuiyaj oksekimej manochiuakan iteixpantijkauan Jehová niman makichiuakan ken Cristo (Mat. 28:​19, 20). Yejon tlen apóstol Pablo okichiuj. Yejua kimatstoya ika Jehová “kineki nochi tlakatl ma makisa niman ma kimati on tlen melauak” (1 Tim. 2:​3, 4). w23.10 22, 23 párrs. 13, 14

Miyekpa tiktekitiltiaj yejuin tlaxelojli niman ijkon tikimijliskej akin tikinnojnotsaj kenon tinemiskej ipan xochitlalpan. ¿Kenon uelis tikinpaleuiskej oksekimej makineltokakan tlen kijtoua Apocalipsis 21:3 niman 4? ¿Niman kenon uelis más titlaneltokaskej itech Jehová niman itech tlen yokijto kichiuas? Jehová xsan yotechijli tlen kichiuas ika tlayekapan, noijki yotechijli tleka uelis tikmatstoskej ika yemelak nochiuas. Tlaxeloltin tlen sakin tikinnextiaj, techititiaj ika Jehová yemelak kikuepas yejuin tlaltikpaktli se xochitlalpan. Ompa kijtoua: “On yejuan yeuatikatka ipan on ueyixtikaj trono okijtoj: ‘Xkita, nejua nikyenkuilia nochi on tlajtlamach’. No ijki okijtoj: ‘Xkijkuilo in tlajtoltin pampa in tlen nimitsijlijtikaj yejua tlen melauak niman kuajli para nochimej kineltokaskej’. Kemaj onechijlij: ‘Ijki yonochiu. Nejua niachtoj niman nisa ika nochi de nochi on tlajtlamach’” (Apoc. 21:​5, 6a). w23.11 3 párrs. 3-5

Se tokniuj telpochtli uelis kiteititis ika tlanemilia ken Jehová tla kuajli kita kenon notlakentis niman kenon nopetsos. Miyekej akin kinchijchiuaj tlakentin xkitlakaitaj Jehová niman auilnemij. Ika yejon, tlakentin tlen kinchijchiuaj melak pitstikej noso kichiuaj ika tlakamej manesikan ken siuamej. Se telpochtli akin nokojtilijtika kichikauas itlaneltok, noneki kitas tlen kijtoua Biblia niman tlenon kichiuaj tokniuan ipan tlanechikojli ijkuak kitlapejpenis kenon notlakentis niman kenon noyektlalis. Kanaj uelis notlajtoltis: “¿Tlen niktlapejpenia kiteititia ika kuajli nitlanemilia niman ika nikintlakaita oksekimej? ¿Ken ninotlakentia kiteititia ika niktekichiuilia toTajtsin?” (1 Cor. 10:​31-33). Telpokamej akin kuajli tlanemiliaj xsan kichiuaj makintlakaitakan oksekimej tokniuan, noijki kichiuaj ika Jehová makintlakaita. w23.12 26 párr. 7

Tekiuaj akin tlayekana sur noijki okixnamik ikalpan Jehová (Dan. 11:40). Ijkon tikijtouaj pampa ijkuak panotoya Kachtopa Guerra ipan nochi tlaltikpaktli niman ika Okpa Guerra ipan nochi tlaltikpaktli, miyekej tokniuan okintsajkej, niman sekimej kokonej akin noijki iteixpantijkauan Jehová, okinkixtijkej ipan escuelas pampa omelajkanenkej itech toTajtsin. San ika, maski xnimantsin nesi, aman itekipanojkauan Jehová kintlaueltokaj pampa kipaleuiyaj iTekiuajyo toTajtsin. San matikonteneuakan yejuin: ijkuak kintlapejpeniaj tekiuajkej, kanaj se tokniuj kinekis kipaleuis se partido noso se candidato. Maski kanaj xyas kontlalis ivoto, kanaj ipan itlamachilis niman ipan iyojlo kineki yakaj matetlani. San ika, tla tiknekij yemelak timelajkanemiskej itech Jehová xsan noneki totlajpiyaskej ika tlen tikchiuaj, noijki noneki totlajpiyaskej ika tlen tiknemiliaj niman ika tlen tikmachiliaj (Juan 15:​18, 19). w23.08 12 párr. 17

Tla tiknekij tikseliskej nemilistli tlen xkeman tlamis, noneki tikchiuaskej yejuin: “Xmotlalokan para nenkitlaniskej on premio yejuan Dios kineki mechmakas” (1 Cor. 9:24). Jesús okijto yejuin: “Maka xmoyoltechikauakan ika on tlen xkuajli, nion maka xtlauantinemikan, nion itlaj xkomatstiakan on tlen ika nemotekipanoskej” (Luc. 21:34). Yejuin niman okseki tlaxeloltin techpaleuiskej matikitakan tlenon noneki tikpatlaskej para ok totlalojtoskej ipan ojtli tlen teuika kampa onka nemilistli. Tejuamej ok totlalojtokej ipan ojtli tlen teuika kampa onka nemilistli niman tikmatstokej ika titetlaniskej pampa Jehová techpaleuis (Is. 40:​29-31). Kuakon, maka xmosiaujkaua. Xchiua ken apóstol Pablo, akin onokojtili para tetlanis (Filip. 3:​13, 14). Melauak, xakaj uelis notlalos mopampa, san ika, Jehová nochipa mouan nemis. Mitspaleuis xkitki tlen tikmamajtiuj niman xmokixtili tlen xnoneki tikitkis. Pampa Jehová mitspaleuis, ¡xtimosiaujkauas niman uelis titetlanis! w23.08 31 párrs. 16, 17

Ijkuak kipiaya 12 xiuitl, Jesús oyaj Jerusalén imiuan ichanejkauan niman ijkon konpanoltiskej se itech iluimej tlen nochiuayaj cada xiuitl (Luc. 2:​46-52). Ijkuak José niman María ouajnokuepkej inchan, okitakej ika Jesús ximiuan nemiya. Itajuan Jesús yejuamej akin nonekiya kitaskej tla yejua niman nochimej ikniuan ompa nemiyaj. Niman ijkuak okinextijkej, ¡María okitlajtlakolti Jesús ipampa tlen okichiujka! Jesús ueliskia kijtoskia ika xkinamikiya ijkon makichiuakan, san ika, xijkon okichiuj. Yejua okinnankili ika tlakaitalistli, “pero yejuamej xokajsikamatkej tlinonon yejua okinmijlij”. Maski ijkon, Jesús nochipa kintlakamatiya. Telpochtli niman ichpochtli, kanaj mitstekiyomakas tikintlakamatis motajuan ijkuak tikitas ika itlaj xkuajli kichiuaj noso xmitsasikamatij, ¿tlenon mitspaleuis xkintlakamati? Xnemili kenon Jehová nomachilia. Biblia kijtoua ika tla tekoneuan kintlakamatij intajuan, “kipaktia toTEKO” (Col. 3:20). Tla tikmachilia ika motajuan xmitsasikamatij noso itlaj mitsnauatiaj tlen xmás kinamiki, Jehová kuajli kimatstika. San ika, más kuajli tla tikintlakamati pampa yejon melak kiyolpaktis. w23.10 7 párrs. 5, 6

Matiknemilikan yejuin, kanaj se akin iuan tomachtiaj ipan escuela techijlia ika xkuajli pampa iteixpantijkauan Jehová xkiseliaj tlen kichiuaj tlakamej akin kinuelitaj tlakamej niman siuamej akin kinuelitaj siuamej. Uelis tikijliskej ika tejuamej tiktlakaitaj tlen kitlapejpeniaj oksekimej (1 Ped. 2:17). Tla ijkon tikchiuaj, kanaj kinekis matikijlikan tleka kuajli tla tikintlakamatij itlanauatiluan Biblia. Tla yakaj akin xkuelita tlen tikneltokaj itlaj techijlia, maka nimantsin matiknemilikan ika itikmatij tlen kinemilia. Matikonnemilikan ika yakaj akin iuan timomachtia ipan escuela mitsijlia ika san akin xtlamachilisejkej tlaneltokaj itech toTajtsin. ¿Tiknemiliskia ika yejua tlaneltoka itech evolución niman ika nochi kimati? Kanaj yejua san kijtoua tlen yokinkakili oksekimej. Kanaj uelis tiktitlanilis itlaj tlen onka ipan jw.org, itlaj tlen matlajto itech tlen okichijchiuj toTajtsin. Ijkon, kanaj sakin kinekis mouan tlajtos itech se tlamachtijli noso se video. Tla tikititia ika tiktlakaita, kanaj sakin kinekis nomachtis itech tlen kijtoua Biblia. w23.09 17 párrs. 12, 13

Uelis kuajli tikmatstoskej ika maski tla topopolouaj, Jehová ok uelis techtekitiltis niman techteochiuas tla toyektlaliaj niman tla itech topaleuiyaj (Prov. 28:13). Maski Sansón okichiuj tlen xkuajli niman onopopolo iuan Dalila, xonosiaujkauj niman ok okitekichiuili Jehová. Niman Jehová xokinemili tla xok ueliskia noyektlalis, yejua okitekitilti para makichiua itlaj tlen melak otepaleui. Yejua nochipa okitak ken se tlakatl akin melak tlaneltoka, ika yejon, noijki okiteneuj ipan Hebreos capítulo 11. Melak techyolchikaua tikmatiskej ika toTajtsin techtlasojtla niman kineki techkojtilis, más ijkuak tikixnamikij tlen ouijtika niman noneki matechpaleui. Yejua ika, ijkon ken Sansón, noijki matiktlajtlanilikan Jehová: “Nimitstlajtlanilia noTeko, xnechelnamiki maski sa sejpatsin. Niman xnechmaka mopoder” (Juec. 16:28). w23.09 7 párrs. 18, 19

Pampa inonisiuiya itonal Jehová tiknekij ika tlaltikpakchanejkej makimatikan itech iTekiuajyo toTajtsin. San ika, kemantika ouijtika tikitaj titenojnotsaskej. ¿Tleka? Pampa techmojtia tlen oksekimej uelis kinemiliskej noso texchiuiliskej. Yejon tlen ipan onochiuj Pedro ijkuak okitlajtlakolmakakej Jesús. Xokiteijli ika katka se inomachtijkauj Cristo niman miyekpa okijto ika xkixmatiya (Mat. 26:​69-75). San ika, sakin xok onomojti niman okijto yejuin: “Maka xmomojtikan ika on tlen kijtouaj niman kichiuaj, nion maka xkomatstiakan” (1 Ped. 3:14). Itlajtoluan techititiaj ika xnoneki techmojtis tlen uelis kijtoskej noso texchiuiliskej oksekimej. ¿Tlenon techpaleuis niman ijkon maka matechmojti tlen uelis kijtoskej noso texchiuiliskej oksekimej? Pedro okijto: “Ipan nemoyojlo xtlakaitakan Cristo yejuan nemoTEKO” (1 Ped. 3:15). Yejuin kijtosneki ika noneki titlanemiliskej itech kenon melak kojtik Jesucristo, akin toTeko niman toTekiuaj. w23.09 27, 28 párrs. 6-8

Tejuamej noneki tikchiuaskej tlen okimijlijkej efesios: “Maka xchiuakan tlen xkuajli yejuan kichiuaj on tlajtlakolejkej” (Efes. 5:11). Yonoitak ika yakaj ueliskia auilnemis tla kita noso kikaki tlen tsokuiltik noso tlen kipiya auilnemilistli niman tla san itech yejon tlajtojtika (Gén. 3:6; Sant. 1:​14, 15). Satanás melak kimati kenon tekajkayauas pampa kichiua ika tlaltikpakchanejkej maka makimatikan tlenon kuajli noso tlenon xkuajli (Is. 5:20; 2 Cor. 4:4). Ika yejon, tlaltikpakchanejkej techtlaneltokiltisnekij ika xteijtlakoua tlen Jehová kijtoua ika tsokuiltik noso tlen kipiya auilnemilistli (2 Ped. 2:19). Aman ipan películas, ipan televisión niman ipan internet nesi tlen Jehová kitlauelita. Diablo kineki matiknemilikan ika melak kuajli kenon nemij tlaltikpakchanejkej maski auilnemij. Noijki kineki matiknemilikan ika auilnemilistli xteijtlakoua (Efes. 5:6). w24.03 22 párrs. 8-10

Ipan yejuin tabernáculo, israelitas nosentlaliayaj niman ijkon kiueyichiuaskej toTajtsin niman kiuentlaliliskej (Éx. 29:​43-46). Ijkuak israelitas nejkuaniayaj, noijki kitkiyaj tabernáculo (Éx. 25:​8, 9; Núm. 9:22). Okitekitiltijkej kanaj 500 xiuitl hasta ijkuak okichijchiujkej teopan ne Jerusalén. Sakin, tabernáculo noijki okineskayoti itlaj tlen más ueyi kijtosneki. Tabernáculo katka “on tiopan yejuan onkaj ne iluikak” niman kineskayotiaya iueyi teopan Jehová. Apóstol Pablo okijto ika tabernáculo “ken ejemplo para tejuamej yejuan tinemij ipan in tiempo” (Heb. 9:9). Kuakon, ijkuak Pablo okintlajkuilouili hebreos, iteopan Jehová ionkatka pampa onesiko ipan xiuitl 29. Ipan yejon xiuitl Jesús onoapolakti niman Jehová okitlali ken Ueyi Teopixki ipan iteopan (Heb. 4:14; Hech. 10:​37, 38). w23.10 26 párrs. 6, 7

Tla tiknekij nochipa machikaujto totlaneltok, noneki tonoloskej, kijtosneki, ika noneki tikimasikamatiskej oksekimej. ¿Kenon uelis ijkon tikchiuaskej? Tla tikpatlaj tlen tikchiuayaj ijkuak nopatla itlaj ipan tonemilis niman tla tiktlakaitaj tlen kinemiliaj niman tlen kitlapejpeniaj oksekimej. Nochimej akin tiktekichiuiliaj Jehová tiknekij tikteititiskej ika titeasikamatij. Niman noijki tiknekij tiyolyemankej yeskej niman titeikneliskej. Miyekan, Biblia kijtoua ika Jehová yeskia ken se ueyi Tetl, kijtosneki ika xkipatla tlen yokijto (Deut. 32:4). San ika, noijki kiteititia ika teasikamati. ¿Kenon tikmatij yejon? Pampa maski miyek tlemach youajnopatlatiaj, Jehová yokuajchiujtia nochi tlen noneki para kichiuas tlen desde yeuejkaui kinekiya kichiuas. Niman tejuamej noijki ueli ijkon tikchiuaj pampa Jehová otexchijchiuj niman ijkon matitlanemilikan ken yejua. Jehová yotechmakak iTlajtol niman ijkon tikmatiskej tlenon tiktlapejpeniskej maski san tlenon tikixnamikij. Tlen kichiua niman tlen yotechnauati ipan iTlajtol kiteititia ika maski xkipatla tlen yokijto, kema teasikamati. w23.07 20 párrs. 1-3

Biblia kijtoua ika Jehová ken se nantli akin melak tetlasojtla (Is. 66:​12, 13). Matontlanemilikan itech se nantli akin kitlajpiya, kiknelia ikonetsin niman kitlakaualtia. Noijki ijkon, Jehová nochipa touan nemis ijkuak tajmantoskej. Yejua nochipa techtlasojtla maski topopolouaj (Sal. 103:8). Israelitas miyekpa kiyolkokouayaj Jehová, san ika, ijkuak noyolkuepayaj, yejua kimititiaya ika ok kintlasojtlaya. Sejpatipan okijli ikalpan: “Sanoyej nemechpatiojkaita, nemechtlajsojkaita niman nemechtlajsojtla” (Is. 43:​4, 5). Niman Jehová xnopatla. Maski tla tikchiuaj se ueyi tlajtlakojli, tla toyolkuepaj niman itech topaleuiyaj, yejua techtlapopoluis niman ok techtlasojtlas (Is. 55:7). Biblia kijtoua ika ijkuak Jehová techtlapopoluiya, noijki kichiua matiyolseujtokan (Hech. 3:19). w24.01 27 párrs. 4, 5

Jehová uelis techpaleuis ijkuak techtlatlataskej. Ken ijkuak nonekis tiktlajtlaniliskej akin techtlakeua matechmaka seki tonaltin niman ijkon uelis tiaskej ipan toueyitlanechikol, noso matechkauili matikpatlakan horas ijkuak titekitij niman ijkon xtopolouiliskej nion se tlanechikojli. Ijkuakon, uelis tikitaskej kenon Jehová techpaleuiya. Melak techmojkatlachialtis kenon kichiuas, niman yejon techpaleuis más itech matitlaneltokakan. Esdras melak yolyemanki katka niman nochipa kitlajtlaniliaya Jehová makipaleui. Ijkuak kimatiya ika xueliskia kichiuaskia tlen yokinauatijkaj, yejua nochipa kinotsaya toTajtsin (Esd. 8:​21-23; 9:​3-5). Ijkuak oksekimej okitakej kenon Esdras melak tlaneltokaya itech Jehová, noijki ijkon okichiujkej (Esd. 10:​1-4). Tla kemantika tiajmankamikij pampa xtikmatij kenon uelis tikinmakaskej tofamilia tlen kinpoloua, noijki noneki matiknotsakan toTajtsin niman kuajli matikmatstokan ika yejua techpaleuis. w23.11 18 párrs. 15-17

Ijkuak Jehová kijtoua ika noneki titlaneltokaskej ijkon ken Abrahán otlaneltokak niman ijkon techitas ken yolmelajkej, xkijtotoya tla noneki tikchiuaskej nochi tlen Abrahán okichiuj. Ipan yejuin tonaltin, miyek ken uelis tikteititiskej ika yemelak titlaneltokaj. San matikonteneuakan yejuin: uelis kuajli tikinseliskej akin kemach peuaj yauej ipan tlanechikojli, tikinpaleuiskej tokniuan akin itlaj kinpoloua niman tikchiuaskej tlen kuajli ipampa tochanejkauan, nochi yejuin itlaj tlen Jehová melak kuelita (Rom. 15:7; 1 Tim. 5:​4, 8; 1 Juan 3:18). Noijki uelis tikteititiskej ika titlaneltokaj itech toTajtsin tla ika nochi toyojlo tikinnojnotsaj oksekimej (1 Tim. 4:16). Tinochimej uelis tikchiuaskej itlaj niman ijkon tikteititiskej ika yemelak tikneltokaj ika nochiuas nochi tlen Jehová yokijto niman ika san yejua kinamiki matechyekana. Tla ijkon tikchiuaj, uelis kuajli tikmatstoskej ika toTajtsin techitas ken akin yolmelajkej niman kinekis iuan matouikakan. w23.12 2 párr. 3; 6 párr. 15

Ijkuak imikiskia, tekiuaj David okijli Salomón tlen nesi ipan tlaxelojli tlen aman tikitstokej (1 Rey. 2:​1, 3). Melak kuajli tla tokniuan tlakamej ijkon kichiuaj. Tla kinekij kuajli onkisaskej, noneki kintlakamatiskej itlanauatiluan Jehová niman nochipa kichiuaskej tlen kijtoua Biblia (Luc. 2:52). ¿Tleka melak noneki ika tokniuan telpokamej makiteititikan ika chikauak kipiyaj intlaneltok? Tokniuan tlakamej noneki kichiuaskej miyek tekitl ipampa inchanejkauan niman ipan tlanechikojli. Tla tejua titelpochtli, kanaj yotiknemili tlen tekitl tikneki tikselis ika tlayekapan. Kanaj yotikijto timochiuas precursor, tlapaleuijketl niman sakin tlayekanketl. Noso kanaj tikneki timonamiktis niman tikinpiyas mokoneuan (Efes. 6:4; 1 Tim. 3:1). Tla tikneki tikchiuas yejuin niman kuajli tonkisas, noneki chikauak tikpiyas motlaneltok. w23.12 24 párrs. 1, 2

Jehová yokintekitlali tokniuan tlayekankej para makintlajpiyakan iborreguitos. Yejuamej kipatiojkaitaj kinpaleuiskej imikniuan niman nokojtiliaj kuajli tlayekanaskej (Jer. 23:4; 1 Ped. 5:2). ¡Melak tiyolpakij ika ipan totlanechikoluan nemij tokniuan akin ijkon kichiuaj! Tokniuan tlayekankej uelis miyek nomachtiskej itech tlen okichiuj Gedeón (Heb. 6:12). Yejua kitlajpiaya niman kiyekanaya ikalpan toTajtsin (Juec. 2:16; 1 Crón. 17:6). Ijkon ken Gedeón, tlayekankej noneki kitlajpiyaskej ikalpan toTajtsin aman ika nochiujtika tlen melak ouijtika (Hech. 20:28; 2 Tim. 3:1). Tlayekankej noijki miyek ueliskej itech Gedeón tla kitaj kenon yolyemanki katka, tetlakamatiya niman kasikamatiya ika xnochi ueliya kichiuaya. Noijki, tlen okichiuj Gedeón tinochimej techpaleuis más matikpatiojkaitakan tlen kichiuaj tlayekankej niman techpaleuis matikinpaleuikan ika nochi toyojlo (Heb. 13:17). w23.06 2 párr. 1; 3 párr. 3