Mayo

Oajsik se tiempo ijkuak tlaltikpakchanejkej akin onenkej ipan kachtopa siglo xkipiayaj tlen kikuaskej. Niman tokniuan noijki xkipiayaj tlen kikuaskej. Kanaj tatajtin melak najmanayaj pampa xkimatiyaj kenon kinmakaskej inchanejkauan tlen kikuaskej. Niman telpokamej akin kinemilijtoyaj más chikauak tenojnotsaskej kanaj notlajtoltiayaj tla nonekiya nochiaskiaj hasta nochi manoyektlali. Maski san kenon, tokniuan okichiujkej tlen ouelkej. Onokojtilijkej tenojnotsaskej niman ika inyojlo okinmakakej tlen kipiayaj tokniuan akin chantiyaj Judea (Hech. 11:​29, 30). Tokniuan akin okinpaleuijkej kuajli okitakej kenon Jehová kintlajpixtoya (Mat. 6:​31-33). Niman kanaj más okintlasojtlakej tokniuan akin okichiujkej tlen ouelkej para tepaleuiskej. Noijki, akin otepaleuijkej ika intomintsin noso ika okse itlaj, melak oyolpakej (Hech. 20:35). w23.04 16 párrs. 12, 13

Kemantika, Jehová kintekitiltia akin xkiueyichiuaj para makinpaleuikan itekipanojkauan niman ijkon kinnankilia inteoyouan itekipanojkauan. Ken ijkuak Jehová okichiuj ika tekiuaj Artajerjes makikauili Nehemías manokuepa Jerusalén niman ijkon matlapaleuiti kampa kinyektlalijtoyaj itepanuan (Neh. 2:​3-6). Niman aman Jehová noijki uelis kichiuas ika akin xkitekichiuiliaj matechpaleuikan ijkuak nonekis. Miyekpa, Jehová xkichiua itlaj tlen melak temojkatlachialti ijkuak kinnankilia toteoyouan. San ika, ken technankilia techpaleuiya itech matimelajkanemikan. Kuakon, noneki melak kuajli tikitaskej kenon technankilia Jehová. Melak kuajli tla tikxelouaj tiempo niman ijkon tiknemiliskej kenon Jehová kinnankilijtika toteoyouan (Sal. 66:​19, 20). Xsan noneki titlaneltokaskej para tiknotsaskej Jehová, noijki noneki titlaneltokaskej para tikseliskej ken technankilis (Heb. 11:6). w23.05 11 párr. 13; 12 párrs. 15, 16

Ijkuak otosentemakakej itech Jehová, otikijlikej ika san yejua tikueyichiuaskej niman tikchiuaskej tlen kineki. Noneki tikchiuaskej tlen yotikijlikej. Yejuin yeskia kentla itlaj tlamamajli tlen xyetik. ¿Tleka ijkon tikijtouaj? Pampa Jehová otexchijchiuj para matikchiuakan tlen kineki (Apoc. 4:11). Okichiuj matiknekikan matikixmatikan niman matikueyichiuakan. Noijki, okichiuj matiuelikan matikchiuakan ijkon ken yejua. Yejua ika, ueli tiknisiuiyaj niman tiyolpakij ijkuak tikchiuaj tlen kineki. San ika, xsan yejon, ijkuak tikchiuaj tlen Jehová kineki niman tikchiuaj ijkon ken iKoneuj, tiyolseuij (Mat. 11:​28-30). Kuakon, xmokojtili más xtlasojtla Jehová. Tla titlanemilia itech nochi tlen yokichiuj mopampa niman kenon mitsteochiuas ika tlayekapan, más tiktlasojtlas. Niman tla más tiktlasojtla toTajtsin, más xouijtika tikitas tiktlakamatis (1 Juan 5:3). Jesús ouel okichiuj tlen toTajtsin kineki pampa nochipa kitlajtlaniliaya makipaleui niman tlanemiliaya itech tlen kiseliskia (Heb. 5:7; 12:2). Ijkon ken Jesús, xtlajtlanili Jehová mamitspaleui niman maka xkilkaua ika yejua mitsmakas nemilistli tlen xkeman tlamis. w23.08 27, 28 párrs. 4, 5

Tinochimej tikuelitaj touikaskej imiuan akin teijyouiyaj niman xnosiaujkauaj. ¿Tleka? Pampa melak tikintlakaitaj akin ueli tlamachiaj. Niman tikinpatiojkaitaj akin techijyouiyaj maski miyekpa topopolouaj. Noijki, melak tiktlasojkamachiliaj akin otechmachti itech Biblia pampa xonosiaujkauj ijkuak ouijtika tikitayaj itlaj tikasikamatiskej noso ijkuak xnimantsin tikchiuayaj tlen tiueltiayaj. Niman más tiktlasojkamachiliaj Jehová pampa melak techijyouiya. Tinochimej tiktlasojkamatij ika oksekimej matechijyouikan. San ika, ouijtika tikitaj ijkuak tejuamej noneki titeijyouiskej. San matikonteneuakan yejuin: kanaj ouijtika tikitaj titlamachiaskej tla tinemij ipan se ueyak fila, niman más tla xok tikpiyaj tiempo. Kanaj titlauelmikij ijkuak yakaj techkualania. Niman kemantika kanaj uelis tiknemiliskej ika Jehová youejkauj ika xtlayektlalia ipan tlaltikpaktli. Tejuamej noneki tikteititiskej ika titeijyouiyaj niman titlaxikouaj ipan nochi yejuin. w23.08 20 párrs. 1, 2

Jehová okijli Gedeón makintitlani inchan casi nochimej isoldados. Kanaj yejua okinemili: “¿Noneki nikchiuas yejuin? ¿Uelis titetlaniskej?”. Maski ijkon, Gedeón otetlakamat. ¿Kenon tlayekankej uelis kichiuaskej ijkon ken yejua? Tla tetlakamatij maski ikalpan Jehová itlaj kipatla (Heb. 13:17). Gedeón okitlakamat Jehová maski kixnamikiskia tlen ouijtika niman nomojtiaya (Juec. 9:17). Ijkuak Jehová okijli Gedeón ika iuan nemiskia, yejua más okineltokak ika kipaleuiskia makitlajpiya ikalpan. Tlayekankej akin chantij kampa xtechkauiliaj titenojnotsaskej noso tonechikoskej, kichiuaj ken Gedeón. Yejuamej kitaj kenon tokniuan uelis kipiyaskej intlanechikoluan niman kenon tenojnotsaskej maski uelis kintsakuaskej, kinkixtiskej itech intekiyo noso kintlaueltokaskej. Ijkuak panotos ueyi tlajyouilistli, tlayekankej nonekis yolchikaujkej yeskej para kichiuaskej tlen kintlajtlaniliskej maski uelis itlaj inpan panos. w23.06 5, 6 párrs. 12, 13

Jehová okichiuj ika itoka Jehoiadá niman nochi tlen kuajli okichiuj manoijkuilo ipan iTlajtol. Nochi yejon techpaleuiya aman (Rom. 15:4). Niman, ijkuak Jehoiadá omik okitokakej ipan “iueyikalpan David iuan on reyes pampa kuajli otekit para Israel, para Dios niman ipan on ueyitiopan”, ijkon okiteititijkej ika kitlakaitayaj (2 Crón. 24:​15, 16). Tlen ipan onochiuj Jehoiadá tinochimej techpaleuiya más matikmojkaitakan Jehová. Tlayekankej uelis kichiuaskej ijkon ken Jehoiadá tla nochipa nokojtiliaj kuajli kintlajpiyaskej iborreguitos toTajtsin (Hech. 20:28). Tokniuan akin iuejueyimej kimititia ika tla kimojkaitaj Jehová niman itech melajkanemij, yejua uelis kintekitiltis niman ijkon kichiuas tlen yejua kineki. Akin telpokamej uelis kitaskej kenon Jehová okipaleui Jehoiadá niman ijkon yejuamej noijki uelis kinpaleuiskej niman kintlakaitaskej akin iuejueyimej, niman más akin youejkaujkej ika kitekichiuiliaj Jehová (Prov. 16:31). Noneki nochipa tikinpaleuiskej niman tikintlakamatiskej akin techyekanaj (Heb. 13:17). w23.06 17 párrs. 14, 15

Ipan tlanechikoltin noneki tiknemiliskej kechpa tomateketsaskej para titlanankiliskej. Tla nochipa tomateketstokej, kanaj tokniuj akin kiyekana tlamachtijli miyekpa kinekis techmakas kampa titlanankiliskej maski oksekimej xitlanankiliaj. Noijki, oksekimej uelis kinemiliskej ika xok noneki nomateketsaskej (Ecl. 3:7). Ijkuak miyekej tokniuan nomateketsaj, kanaj xuelis miyekpa titlanankiliskej ken tikuelitaskiaj. Hasta uelis tlamis tlanechikojli niman nion sejpa xtitlanankiliskej. Kanaj yejon uelis kichiuas matajmanakan, san ika, xnoneki tikualaniskej (Ecl. 7:9). Maski xuelis miyekpa titlanankilis ken tikuelitaskia, nochipa uelis tijkakis kenon tlanankiliaj tokniuan niman sakin tla yotlan tlanechikojli, uelis tikimijlis ika melak kuajli ken otlanankilijkej. Kanaj tlen kualtsin tikimijlis tokniuan melak kinyolchikauas ijkon ken tikinyolchikauaskiaj tla titlanankiliskia. w23.04 23, 24 párrs. 14-16

Matomachtikan iTlajtol toTajtsin niman itech matitlanemilikan. Se kojtli noneki uejkatlan kinpiyas ineluayouan niman ijkon xuetsis. Noijki ijkon, tejuamej noneki chikauak titlaneltokaskej itech iTlajtol toTajtsin niman ijkon xtiuetsiskej niman timelajkanemiskej. Ijkuak se kojtli noskaltijtiuj, ineluayouan noijki noskaltijtiuej niman más tlalkalaktiuej. Ijkuak tomachtiaj Biblia niman itech titlanemiliaj, chikaui totlaneltok niman más tikneltokaj ika tlen toTajtsin temachtia yejon tlen techpaleuis (Col. 2:​6, 7). Matitlanemilikan itech kenon itekipanojkauan Jehová, akin yeuejkaui onenkej, okinpaleui tlen yejua okimijli makichiuakan. Matitlajtokan itech Ezequiel, yejua melak ochikauj itlaneltok ijkuak okitak ipan se tlatlachalistli kenon se ángel kitemachiujtoya templo. Tlen okitak Ezequiel xsan yejua okichikauili itlaneltok, tejuamej noijki miyek tlen techmachtia itech kenon tikintlakaitaskej itlanauatiluan Jehová niman tikueyichiuaskej ken yejua kuelita (Ezeq. 40:​1-4; 43:​10-12). Tejuamej noijki techpaleuiya tla tikxelouaj tiempo niman ijkon tomachtiskej tlen más ouijtika itech iTlajtol toTajtsin niman itech titlanemiliaj. Tejuamej noijki uelis tiyolmelajkanemiskej niman nochipa titlaneltokaskej itech Jehová (Sal. 112:7). w23.07 18 párrs. 15, 16

Uelis tikchiuas ijkon ken miyekej tlakamej akin Biblia kinteneua: akin omelajkanenkej, melak okitlasojtlakej toTajtsin niman noijki kuajli okiyekankej ikalpan Jehová. Tla ipan mofamilia noso motlanechikol nemij akin chikauak kipiyaj intlaneltok, xchiua ken yejuamej (Heb. 13:7). Noijki, mitspaleuis tla tikita tlen okichiuj Jesucristo, akin xkipiaya tlajtlakojli (1 Ped. 2:21). Sakin ika yotikitak tlen yokichiujkej, xnemili tlenon más otikuelitak itech yejuamej (Heb. 12:​1, 2). Niman xkita tlenon uelis tikpatlas para noijki ijkon tikchiuas. Tlakamej akin kinekij ijkon kichiuaskej kixelouaj tiempo achto itlaj kitlapejpeniskej. Ika yejon, xmokojtili kuajli xtlanemili niman nochipa ijkon xchiua. Kachtopa, noneki timomachtis tlanauatiltin tlen uajlauej ipan Biblia niman tiknemilis tleka tlen kijtoua Jehová melak mitspaleuis. Sakin, ika tlen yotimomachti, xtlapejpeni tlen makiyolpakti Jehová (Sal. 119:9). Yejon itlaj tlen mitspaleuis xchikaua motlaneltok (Prov. 2:​11, 12; Heb. 5:14). w23.12 25 párrs. 4, 5

Tajtin uelis kinmachtiskej inkoneuan kualtsin matenankilikan ijkuak yakaj itlaj kintlajtoltis (Sant. 3:13). Sekimej tajtin san sekan nomajmachtiaj ijkuak kiueyichiuaj toTajtsin imiuan inchanejkauan. Kitaj tlenon ueliskia kintlajtoltiskej inkoneuan ipan escuela niman nomajmachtiaj kenon tlanankiliskej. Noijki, kinmachtiaj inkoneuan matenankilikan ika yolyemanilistli niman makichiuakan ika akin kinkakij okseki makinekikan kimatiskej. Tla san sekan nemomajmachtiaj, xsan kinpaleuis nemokoneuan kualtsin matenankilikan itech tlen kintlajtoltiaj, noijki kinpaleuis makitakan ika melauak tlen kineltokaj. Tlamachtiltin “Tlen notlajtoltiaj telpokamej”, tlen onka ipan jw.org, kinpaleuiya telpokamej makichikauakan intlaneltok niman kuajli makiteijlikan tlen kineltokaj. Tla san sekan tomachtiaj yejuin imiuan tochanejkauan, tinochimej techpaleuis matikteijlikan tlen tikneltokaj ika yolyemanilistli. ¡Hasta itlaj okse uelis techtlajtoltiskej! w23.09 17 párr. 10; 18 párrs. 15, 16

¿Kemantika ouijtika yotikitak tikchiuas tlen tikneki? Tla ijkon mopan yonochiuj maka xmajmana, miyekej noijki ijkon inpan yonochiuj. Matikitakan tlen yokixnamijkej sekimej tokniuan. Tokniuj Philip kinekiya más miyekpa niman más kuajli kinotsas toTajtsin, san ika, xkeman kinextiaya tiempo para ijkon kichiuas. Erika kinekiya más nimantsin ajsis ijkuak nosentlaliayaj niman ijkon ontenojnotsaskej, san ika, miyekpa xsaniman ajsiya. Maka xmajmana tla tikita ika xueli tikchiua itlaj tlen tikneki. Noneki tiempo niman noneki timokojtilis tla tikneki tikchiuas tlen yotiknemili, maski xmás ueyi. Kuajli nesi ika tikneki timouikas iuan Jehová niman ika tikneki más chikauak tiktekichiuilis, yejua ika, hasta aman timokojtilijtika tikchiuas tlen yotikijto. Jehová kita tlen tikchiua niman yejua xmitstlajtlanilis itlaj tlen xuelis tikchiuas (Sal. 103:14; Miq. 6:8). Tejua noneki tikitas tla yemelak uelis tikchiuas tlen yotiknemili. w23.05 26 párrs. 1, 2

Akin yolchikaujkej noijki nomojtiaj, san ika, xkikauiliaj ika yejon makintelti para kichiuaskej tlen kuajli. Daniel se telpochtli akin melak yolchikauak katka. Yejua nochipa nomachtiaya tlen okijkuilojkej teotlajtokej, ken Jeremías. Yejon okipaleui makita ika, judíos akin nemiyaj Babilonia, oksejpa inokuepaskiaj Jerusalén (Dan. 9:2). Kuajli tikmatstokej ika, ijkuak kitaya kenon nochiuayaj teotlajtoltin, más tlaneltokaya itech Jehová. Niman ijkuak yakaj tlaneltoka itech Jehová, melak yolchikauak (uelis tikitas Romanos 8:​32, 37-39). Daniel yolchikauak katka pampa nochipa kinotsaya iTajtsin (Dan. 6:10). Kijliaya tlen xkuajli yokichiujka, nochi tlen kimachiliaya niman kitlajtlaniliaya makipaleui (Dan. 9:​4, 5, 19). Ijkon ken tinochimej, Daniel xyolchikauak katka ijkuak ouajtlakat. Yejua onomachti, okichiuj teoyotl niman otlaneltokak itech Jehová para uelis yolchikauak yes. w23.08 3 párr. 4; 4 párr. 7

Ijkuak tikintlakamatij tekiuajkej, techpaleuiya niman kinpaleuiya oksekimej. ¿Kenon? Kachtopa, xtikixnamikij tlen tekiuajkej kinchiuiliaj akin xkintlakamatij tlanauatiltin (Rom. 13:​1, 4). Tla titetlakamatij, uelis kinpaleuis tekiuajkej makitakan ika iteixpantijkauan Jehová kinektokej tetlakamatiskej. Yejon tlen opanok yeuejkaui ne Nigeria. Ijkuak tokniuan nemiyaj ipan intlanechikol, sekimej soldados ompa okalakitoj. Kintejtemojtoyaj akin tlaixnamikiyaj pampa xkinekiyaj kitlaxtlauaskej tlen kitlajtlanij tekiuajkej. San ika, akin kinyekanaya oksekimej soldados okimijli mauiyan. Okimijli: “Iteixpantijkauan Jehová xtlaixnamiktinemij san pampa xkinekij kitlaxtlauaskej tlen kitlajtlanij tekiuajkej”. Tla tejua tikintlakamati tlanauatiltin tlen kintlaliaj tekiuajkej, tikchiuas kuajli matlajtokan itech ikalpan toTajtsin, niman yejon uelis kinpaleuis oksekimej tokniuan. w23.10 9 párr. 13

Sekimej itekipanojkauan Jehová melak youejkaujkej kichiatokej mayejko tonajli ijkuak Jehová tlapopolos, niman sekimej kinemiliaj ika melak youejkauj. Jehová kasikamati tlen kimachiliaj itekipanojkauan. Ika yejon, teotlajtoketl Habacuc okijto: “Tlatlachalistli ok poliui ijkuak panos, niman isiujkan nejnentika hasta ijkuak nochiuas, niman xtechkajkayauas. Maski tla uejkauiskia, ¡xtlatlachixtia! Pampa melauak yejkos. ¡Xuejkauis ika yejkos!” (Hab. 2:​3, TNM). Yejuin tlajtoltin xsan okiyolchikauj Habacuc, tejuamej noijki techyolchikaua ipan yejuin tonaltin. Jehová okichiuj ika apóstol Pablo makimijkuilouili yejuin tlajtoltin akin kichiatokej yenkuik tlaltikpaktli (Heb. 10:37). Maski tikmachiliaj ika Jehová uejkaui, matikilnamikikan ika tlen kijtoua melauak nochiuas. “¡Xuejkauis ika yejkos!”. w23.04 30 párr. 16

Jehová kuajli okimititi israelitas ika yokitlapejpenijka Moisés para yejua makinyekana, san ika, miyekej israelitas xkuelitayaj makinyekana Moisés (Núm. 14:​10, 11). Ika yejon, Jehová xokinkauili makalakikan ipan Tlajli tlen yokimijlika kinmakas (Núm. 14:30). Onenkej sekimej israelitas akin kema okinokauilijkej makinyekana Jehová, ken Caleb. Jehová ijkin okijto: “Caleb, […] kipiya oksekneka iyojlo niman yejua onechtlakamat” (Núm. 14:24). Jehová okiteochiuj Caleb niman hasta okikauili makitlapejpeni kanon kinekiya chantis ne Canaán (Jos. 14:​12-14). Israelitas akin okalajkej ipan Tlajli tlen okimijlikej kinmakaskej noijki okinokauilijkej makinyekana Jehová. Yejuamej nochipa okitlakaitakej Josué pampa Jehová yejua okitlapejpeni para makinyekana israelitas sakin ika omik Moisés (Jos. 4:14). Ika yejon, Jehová okinteochiuj niman okinkauili machantikan ipan Tlajli tlen yokimijlika kinmakas (Jos. 21:​43, 44). w24.02 21 párrs. 6, 7

Ijkon ken se doctor ueli kimati kenon onka iyojlo yakaj ijkuak kipachouilia ima para kitas tla isiujkan noso san yolik notlaloua iyesyo, tejuamej noijki uelis tikmatiskej tla totlasojtlalis itech Jehová chikaujtok, tla tikitaj kenon tikintlasojtlatokej tokniuan. Tla tikitaj ika xmás tikintlasojtlaj, kanaj noijki xmás tiktlasojtlaj Jehová. San ika, tla nochipa tikimititiaj tokniuan ika tikintlasojtlaj, kijtosneki ika kema chikaujtok totlasojtlalis itech Jehová. ¿Noneki techajmanas tla tikitaj ika xok más tikintlasojtlaj tokniuan? Kema. Pampa yejon kijtosnekiskia ika xok más kuajli touikaj iuan Jehová. Yejon tlen kiteititiaj itlajtoluan apóstol Juan ijkuak okijto: “Tla se xkitlajsojtla ikniu yejuan kita, no xkitlajsojtla Dios yejuan xkita” (1 Juan 4:20). ¿Tlenon techititia yejon? Ika san uelis tikyolpaktiskej Jehová tla totlasojtlaj (1 Juan 4:​7-9, 11). w23.11 8 párr. 3; 9 párrs. 5, 6

Ijkuak Jehoás pitentsin katka, itaj omik niman ueyiteopixki Jehoiadá okiskalti kentla ikoneuj niman miyek okimachti itech Jehová. Jehoiadá melak okipaleui Jehoás. Niman kuajli tlen okichiuj Jehoás, pampa okikak Jehoiadá. Ipampa yejon, Jehoás okitekichiuili Jehová niman okipaleui ikalpan noijki ijkon makichiua. Noijki, okichiuj makiyektlalikan iteopan Jehová (2 Crón. 24:​1, 2, 4, 13, 14). Tla motajuan noso yakaj okse mitsmachtijtokej xtlasojtla Jehová niman xkimixmati itlanauatiluan, mitsmakatokej se kualtsin tetlayokolijli (Prov. 2:​1, 10-12). Motajuan miyek ken uelis mitsmachtiskej. Tla tikchiua tlen motajuan mitsijliaj, yejuamej melak yolpakiskej, noijki, melak tikyolpaktis Jehová niman uelis nochipa iuan timouikas (Prov. 22:6; 23:​15, 24). ¿Xmelak ika mitspaleuis tla tikchiua ijkon ken Jehoás? w23.09 8, 9 párrs. 3-5

Jehová kijtoua ika kinkakis toteoyouan. ToTajtsin kintlasojtla itekipanojkauan niman nochipa kikaki tlen kijliaj (Sal. 10:17; 37:28). San ika, yejon xkijtosneki tla techmakas nochi tlen tiktlajtlaniliaj. Kanaj seki tlen tiktlajtlaniliaj yejua techmakas hasta ipan xochitlalpan. Jehová kita tla tlen tiktlajtlaniliaj tlapaleuis manochiua tlen kineki (Is. 55:​8, 9). Yejua kineki ika ipan yejuin tlaltikpaktli manemikan tlakamej niman siuamej akin kinokauiliskej makinyekana, makitekichiuilikan ika nochi inyojlo niman san sekan manemikan. San ika, Satanás okijto ika más kuajli tinemiskiaj tla san no tejuamej toyekanaskiaj (Gén. 3:​1-5). Pampa Jehová kineki kiteititis ika Diablo san tlakajkayaua, okinkauili tlaltikpakchanejkej san no yejuamej manoyekanakan, niman yejon yokichiuj ika aman maonia miyek tlauejli (Ecl. 8:9). Tikmatstokej ika Jehová xkiyektlalis aman nochi tlen xkuajli nochiujtika. w23.11 21 párrs. 4, 5

Jehová okijto ika itechkopa Abrahán, kinteochiuas nochi kech familias nemij ipan tlaltikpaktli. San ika, ijkuak Abrahán kipiaya 100 xiuitl niman Sara kipiaya 90, xkipiayaj nion se inkoneuj. Nesiya ika xnochiuaskia tlen Abrahán kichiaya. Maski ouijtika tlen yejua okixnamik, “Abraham xokipoloj itlaneltok, yej okichix niman okineltokak ika Dios okitlalij tajtli ipan miyek países” (Rom. 4:​18, 19). Niman, sakin onochiuj tlen kichiaya Abrahán niman Sara, okipixkej inkoneuj niman okitokayotijkej Isaac (Rom. 4:​20-22). Ijkon ken Abrahán, tejuamej noijki uelis itlaj tikchiuaskej para toTajtsin matechita ken akin yolmelajkej niman matechseli ken iamigos. Ijkuak Pablo otlajto itech Abrahán, okijto: “On Yektlajkuilojli yejuan kijtoua ika Dios okiselij ken se yejuan xok kipiya tlajtlakojli, xonijkuiloj san para Abraham. Yej no onijkuiloj para tejuamej yejuan Dios no techselia ken yejuan xok tikpiyaj tlajtlakojli. Ijkin techselia pampa tikneltokaj yejua, akin okiyoliuitij niman okuiteu ipan itlalkon toTEKO JesuCristo” (Rom. 4:​23, 24). Tejuamej noneki titlaneltokaskej, tikchiuaskej tlen kuajli niman titlamachiaskej ijkon ken Abrahán. w23.12 7 párrs. 16, 17

Tla tejua tikixnamiktika itlaj tlen ouijtika niman timomojtia, xkilnamiki ika Jehová xsan kitstika tlen mopan nochiujtok, noijki kimatstika kenon timomachilia. ¿Kenon tikmatij yejon? Pampa Biblia kijtoua ika ijkuak israelitas nemiyaj ken esclavos ne Egipto, Jehová kimatstoya kenon noyolkokouayaj niman tlajyouiayaj (Éx. 3:7). Tla tikixnamiktokej itlaj tlen ouijtika niman techmojtia, kanaj xueli tikitaj kenon Jehová techpaleuijtika. ¿Tlenon uelis tikchiuaskej? Matikijlikan matechpaleui matikitakan tlenon kichiujtika topampa (2 Rey. 6:​15-17). Sakin, matitlanemilikan itech yejuin: ¿Otechyolchikauj se tlamachtijli noso itlaj tlen onoijto ipan tlanechikojli? ¿Otechyolchikauj se amatlajkuilojli, se video noso se tlakuikajli? ¿Kanaj se tokniuj otechijli se texto noso itlaj tlen otechyolchikauj? Kemantika kanaj uelis tikilkauaskej ika tlen techmaka ikalpan Jehová niman tlen tokniuan kichiuaj topampa, ualeua itech Jehová (Is. 65:13; Mar. 10:​29, 30). Nochi yejuin kiteititia ika toTajtsin najmana topampa niman ika kineki nochipa itech matitlaneltokakan (Is. 49:​14-16). w24.01 4, 5 párrs. 9, 10

Ijkuak Jesús xinokuepaya iluikak, yejua ijkin okimijli inomachtijkauan: “Noka nentenojnotsaskej ne Jerusalén, niman imanian Judea, niman Samaria, niman nochiuiyan ipan in tlaltikpaktli” (Hech. 1:8; Luc. 24:​46-48). Sakin, tekiuajkej judíos okimajsikej Pedro niman Juan, niman on tekiuajkej ipan on Sanedrín okimijlikej maka sa matenojnotsakan pampa tla oksejpa tenojnotsayaj, itlaj kinchiuiliskiaj (Hech. 4:​18, 21). Pedro niman Juan okijtokej: “Xkixtlalokan nemejuamej ixpan Dios. ¿Akinon kitocarouaj tiktlakamatiskej, nemejuamej noso Dios? Tejuamej tej, xuelis tikajkauaskej ika tikijtoskej on tlajtlamach yejuan yotikitakej niman yotikakej” (Hech. 4:​19, 20). Ijkuak tlayekankej judíos okinkauilijkej mauiyan, Pedro niman Juan onosentlalitoj iuan oksekimej inomachtijkauan Jesús. Kuakon, san sekan okinotskej Jehová niman okitlajtlanilijkej makinpaleui makichiuakan tlen yejua kuelita. Jehová okinnankili (Hech. 4:31). w23.05 5 párrs. 11, 12

Jehová melak youejkauj iuan nemi Jesús, ika yejon, yejuamej melak notlasojtlaj. Jehová okijto ika melak kitlasojtla Jesús, ijkon ken tikpouaj ipan texto tlen aman tikitstokej. Jehová ueliskia san kijtos ika Jesús melak kiyolpaktiaya niman ika melak kiyolpaktiskia nochi tlen sakin kichiuaskia, san ika, yejua kinekiya matikmatikan ika melak kitlasojtlaya. Ika yejon, yejua okijto: “Yejua notlajsojkaKoneu” (Efes. 1:7). Jesús miyekpa okijto ika iTaj melak kitlasojtlaya pampa yejua kuajli kimatstoya yejon (Juan 3:35; 10:17; 17:24). w24.01 28 párr. 8

Xkonnemili ika yakaj akin tiktlasojtla melak xkuajli mitstejteneua. Maski tejua tikmatstika ika xmelauak tlen motech okijto, sekimej kineltokiliaj, niman sakin yejuamej noijki peuaj mitstejteneuaj. ¿Kenon timomachiliskia? Melak timajmanaskia pampa aman miyekej xkuajli mitstejteneuaj. Tlen otikonteneujkej techpaleuiya matikasikamatikan kenon onomachili Jehová ijkuak se iángel okijto tlen xmelauak itechkopa niman okitsojkuilo itoka. Eva okineltokak tlen okijto yejon ángel, yejua ika, akin kachtopa totajuan katkaj xok okitlakamatkej Jehová. Ika yejon, aman tinochimej titlajtlakouaj niman timikij (Gén. 3:​1-6; Rom. 5:12). Aman onka mikilistli, guerras niman tlajyouilistli ipan nochi tlaltikpaktli pampa Satanás okijto tlen xmelauak itech toTajtsin. ¿Kenon onomachili Jehová ipampa tlen xkuajli okiteneuilijkej niman ipampa nochi tlen xkuajli opanok? Yejua melak okiyolkoko, san ika, yejon xokichiuj ika san nochipa yejon makinemilijto noso san makualanto. Biblia kijtoua ika yejua se toTajtsin akin yolpaki (1 Tim. 1:11). w24.02 8 párrs. 1, 2

¿Kenijki uelis timelajkanemiskej ijkon ken José? Tla desde aman tiknemiliaj tlenon tikchiuaskej ijkuak techtlatlataskej. Noneki tiueliskej nimantsin tikijtoskej ika xtikchiuaskej tlen Jehová kitlauelita (Sal. 97:10; 119:165). Tla ijkin tikchiuaj, techpaleuis maka matitlajtlakokan. Kanaj itikmatstok ika yotiknexti tlen melauak niman tikneki nochipa tiktekichiuilis Jehová ika nochi moyojlo. San ika ¿onka itlaj tlen mitsteltia xmosentemaka niman xmoapolakti? Tla kema, xchiua ijkon ken tekiuaj David, yejua ijkin okitlajtlanili Jehová: “Ay Dios, xnechixtlalo niman xkita noyojlo; xnechtlatlata niman xkita notlamachilis. Xkita tla niau ipan on ojtli yejuan xkuajli, niman xnechyekana ipan on kuajli ojtli yejuan nechmakas nemilistli para nochipa” (Sal. 139:​23, 24). Tejua uelis tikteititis ika melauak tiktejtemoua Jehová tla timokojtilia tikchiuas tlen mamitspaleui xmosentemaka niman xmoapolakti. Niman Biblia kijtoua ika Jehová kinteochiua akin ijkon kichiuaj (Heb. 11:6). w24.03 6 párrs. 13-15

Ueyi teopixki tlajtouaya ipampa kalpan Israel ixpan toTajtsin. Ijkuak otlankej kichijchiuaj tabernáculo, Jehová okitlapejpeni Aarón ken ueyi teopixki. San ika, apóstol Pablo okijto: “On oksekimej tiopixkej sanoyej omiyekiyakej. Niman ijkuak se mikiya, kemaj okse uajnemiya” (Heb. 7:​23-26). Noijki, pampa yejon uejueyimej teopixkej tlajtlakolejkej katkaj, nonekiya tlauentlaliskej inpampa itlajtlakoluan. Ken tikitaj, yejon uejueyimej teopixkej de Israel xijkon katkaj ken Ueyi Teopixki, Jesucristo. Toueyi Teopixkauj, Jesucristo, “ueyi tlayekanki tiopixki ipan on melauak yektiopan yejuan xtlakamej okichijchijkej, yej Dios okichijchiu” (Heb. 8:​1, 2). Pablo okijto ika Jesús “xkaman miki, niman ijki itekiu xkaman panoua itech okse tlakatl”. Noijki, okijto ika Jesús “xkipiya itlaj tlajtlakojli. Yejua xnemi ne intsajlan on tlajtlakolejkej” niman yejua xijkon ken “on oksekimej uejueyi tlayekankej tiopixkej”. Xnoneki mojmostla tlauentlalis ipampa itlajtlakoluan. w23.10 26 párrs. 8, 9

“On achtoj cielo” kineskayotia tekiuajkej akin Satanás niman idemonios kinyekanaj (Mat. 4:​8, 9; 1 Juan 5:19). Ipan Biblia, tlajtojli “tlaltikpaktli” kemantika kinneskayotia tlaltikpakchanejkej (Gén. 11:1; Sal. 96:1). Kuakon, “achtoj tlaltikpaktli” kinneskayotia tlaltikpakchanejkej xkuajkualtin akin aman nemij. ToTajtsin xsan kiyektlalis “cielo” niman “tlaltikpaktli”, yej nochi kipopolos niman kipatlas ika “sen yenkuik cielo niman se yenkuik tlaltikpaktli”. Kijtosneki ika kitlalis se yenkuik gobierno niman kinpatlas akin nemij ipan yejuin tlaltikpaktli. Jehová kiyektlalis yejuin tlaltikpaktli niman tlaltikpakchanejkej hasta ijkuak kichiuas maka sa makipiyakan tlajtlakojli. Ijkon ken okijto Isaías, nochi tlaltikpaktli nochiuas se kualtsin xochitlalpan, ijkon ken katka xochitlalpan Edén. Tejuamej noijki techyektlaliskej, Jehová kinpajtis akin xuelij nejnemij, akin xtlachiaj, akin xtlakakij niman hasta kinyolitis akin yomijkej (Is. 25:8; 35:​1-7). w23.11 4 párrs. 9, 10

San nimantsin peuas ijkuak “sanoyej miyek onyas tlajyouilistli” (Mat. 24:21). Ijkuak tlaixpoliui, miyekej kinmojkatlachialtia; san ika, ueyi tlajyouilistli xnochimej kinmojkatlachialtis. Ikipiya kanaj 2,000 xiuitl ika Jesús okimijli inomachtijkauan ika nonekiya noyektlaliskej achto yejkos yejon tonajli. Tla ijkon tikchiuaj, uelis timakisaskej ijkuak panotos ueyi tlajyouilistli niman noijki uelis tikinpaleuiskej oksekimej mamakisakan (Luc. 21:36). Ijkuakon nonekis titlaxikoskej para tiktlakamatiskej Jehová niman tikneltokaskej ika techpaleuis. ¿Tlenon tikchiuaskej tla ijkuakon tokniuan nochi kipolouaj niman xok kipiyaj tlen ika nopanoltiskej? (Hab. 3:​17, 18). Ijkuakon nonekis tikimikneliskej para tikinpaleuiskej niman tikinmakaskej tlen kinpoloua. ¿Niman tlenon tikchiuaskej ijkuak miyekej kalpamej nosentlaliskej para techixnamikiskej niman kanaj nonekis tichantiskej imiuan tokniuan kampa xtlaueyi? (Ezeq. 38:​10-12). Ijkuakon nonekis melak tikintlasojtlaskej tokniuan. w23.07 2 párrs. 2, 3

Akin yononamiktijkej melak kinpaleuis tla kichiuaj ijkon ken Áquila niman Priscila, sekimej tokniuan akin onenkej ipan kachtopa siglo niman melak kintlasojtlayaj (Rom. 16:​3, 4). Yejuamej san sekan tekitiyaj, san sekan tenojnotsayaj niman san sekan kinpaleuiayaj oksekimej (Hech. 18:​2, 3, 24-26). Nochipa ijkuak Biblia kinteneua Áquila niman Priscila, san sekan nemiyaj. ¿Kenon akin yononamiktijkej uelis kichiuaskej ijkon ken yejuamej? Xontlanemili itech motekiyo niman itekiyo moixnamik, ¿tiknemilia ika uelis san sekan nenkichiuaskej seki tekitl? Biblia kijtoua ika Áquila niman Priscila san sekan tenojnotsayaj. ¿Nemejuamej noijki ijkon nenkichiuaj? Áquila niman Priscila noijki san sekan tekitiyaj. Yemelak, kanaj tejua iuan moixnamik xsan no yejua tekitl nenkipiyaj, san ika ¿tiknemilia ika uelis san sekan nemopaleuiskej nemochan? (Ecl. 4:9). Tla ijkon nenkichiuaj, nemopaleuiskej niman uelis nentlajtlatoskej. w23.05 22, 23 párrs. 10-12

Tinochimej tomojtianij. Matontlanemilikan itech David, se itekipanojkauj toTajtsin akin kemantika noijki onomojti. Ijkuak tekiuaj Saúl kitlaueltokatinemiya pampa kinekiya kimiktis, David oyaj ipan se ueyi kalpan tlen itoka Gat. Ijkuak okijlikej Akís, akin tekiuajtitoya Gat, ika David melak kojtik katka niman ika yokinmiktijka melak miyekej filisteos, David “sanoyej onomojtij” (1 Sam. 21:​10-12). Yejua melak onomojti pampa xkimatiya tlenon ueliskia kichiuilis tekiuaj. ¿Tlenon okichiuj David niman ijkon xok nomojtis? Ipan Salmo 56, David okijto kenon onomachili ijkuak nemiya ipan ueyikalpan Gat. Ipan yejon salmo, David noijki okijto tleka melak nomojtiaya niman kenon pampa otlaneltokak itech Jehová, okipaleui maka manomojti (Sal. 56:​1-3, 11). Niman pampa otlaneltokak itech Jehová, yejua okipaleui makimati tlenon kichiuas. David okinemili kichiuas ken akin yotlamachilispolijkej, niman pampa ijkon okichiuj, tekiuaj Akís xok okinek kimiktis, aman san kinekiya makikixtikan. Yejon okipaleui David oksekan mauiya (1 Sam. 21:​13–22:1). w24.01 2 párrs. 1-3

¿Akinomej noteneuaj ipan tlaxelojli tlen aman tikitstokej? Tlapejpeniltin akin yoliuiskej ne iluikak. Ijkuak yejuamej inemiskej iluikak, kimijliskej matlauisokikan. Tlapejpeniltin tlauisokiskej iuan Cristo niman ángeles niman ijkon kintlaniskej itlauelikniuan toTajtsin. Matiknemilikan yejuin: sekimej tlapejpeniltin akin nikan nemij melak iuejueyimej niman xok kojtikej. San ika, ijkuak yaskej iluikak, nokuepaskej espíritus niman melak kojtikej yeskej niman tlauisokiskej iuan Jesucristo. Tla yopanok Armagedón, kinpaleuiskej tlaltikpakchanejkej maka sa makipiyakan tlajtlakojli. Kuajli tikmatstokej ika tlapejpeniltin más techpaleuiskej ijkuak yaskej iluikak xijkon ken tla nokauaskiaj nikan ipan tlaltikpaktli pampa ok kipiyaskiaj tlajtlakojli. w24.02 6, 7 párrs. 15, 16

Nemij sekimej akin iuelis nosentemakaskej niman noapolaktiskej, san ika, xkichiuaj. ¿Tleka? Kanaj kinmojtia tla okichiujkej se ueyi tlajtlakojli niman makinkixtikan itech tlanechikojli. Tla tejua ijkon timomachilia, xkilnamiki ika Biblia kijtoua ika Jehová mechpaleuis “para nenueliskej nenkitlakaitaskej niman nenkipaktiskej” niman ijkon “nenueliskej nenkichiuaskej nochi tlajtlamach tlen kuajli” (Col. 1:10). Kuajli xmatsto ika Jehová mitspaleuis xchiua tlen kuajli ijkon ken miyekej yokinpaleui (1 Cor. 10:13). Jehová kinpaleuiya itekipanojkauan mamelajkanemikan niman maka makisakan itech ikalpan. Tinochimej tiknekij tikchiuaskej tlen xkuajli pampa titlajtlakolejkej (Sant. 1:14). San ika, san tejua uelis tikijtos tla tikchiuas noso xtikchiuas tlen xkuajli tikileuiya. Miyekej kijtouaj ika xuelis san toselti toteltiskej, san ika, yejon xmelauak. Tejuamej uelis tikmajmachtiskej totlamachilis maka makinemili tlen xkuajli. w24.03 5 párrs. 11, 12