Junio

Jehová okinteochiuj tokniuan akin onenkej ipan kachtopa siglo pampa maski okixnamijkej tlen ouijtika, nochipa okitekichiuilijkej niman okichiujkej tlen ouelkej. Miyekpa okintlaueltokakej niman kemantika hasta ijkuak xkichiayaj. Matikitakan tlenon inpan opanok Bernabé niman apóstol Pablo ijkuak otenojnotsatoj Listra. Kachtopa, tlaltikpakchanejkej melak kuajli okinselijkej niman kuajli okinkakkej. San ika, sakin sekimej tlaltikpakchanejkej “okinchiualtijkej on tlakamej de Listra para ma kitemojmotlakan Pablo” niman okinemilijkej ika okimiktijkej (Hech. 14:19). San ika, Bernabé niman Pablo oksekan oyajkej niman xokikajkaujkej ika tenojnotsaj. ¿Niman tlenon opanok pampa ijkon okichiujkej? Miyekej okinnojnotskej niman “miyekej otlaneltokakej”. Noijki, tlen okijtokej niman tlen okichiujkej melak okinyolchikauj tokniuan (Hech. 14:​21, 22). Maski Bernabé niman Pablo okintlaueltokakej, yejuamej xokikajkaujkej ika tenojnotsaj. Niman pampa ijkon okichiujkej, melak miyekej okinpaleuijkej. Tla tejuamej titlaxikouaj ijkon ken yejuamej okichiujkej niman xtikajkauaj ika titenojnotsaj, Jehová melak techteochiuas. w23.04 17 párrs. 13, 14

Tekiuaj David miyekpa okixnamijkej itlauelikniuan, niman yejua nochipa kitlajtlaniliaya Jehová makipaleui. David kuajli kimatstoya ika Jehová kinkakiya niman kinnankiliaya iteoyouan. Tejua noijki uelis kuajli tikmatstos yejon. Biblia kuajli techijlia ika Jehová uelis techmakas tlamachilistli niman kojtilistli para matitlaxikokan. Noijki yejua uelis kintekitiltis tokniuan akin yeskiaj kentla tochanejkauan noso hasta uelis kintekitiltis akin xkiueyichiuaj para matechpaleuikan. Maski kanaj Jehová xkinnankilis toteoyouan ken tejuamej tikchiaj, tikmatstokej ika kema kinnankilis. Techmakas tlen techpoloua ijkuak kitas ika noneki. Kuakon, nochipa matiknotsakan Jehová niman kuajli matikmatstokan ika techtlajpiyas aman, niman ipan yenkuik tlaltikpaktli techmakas nochi tlen tiknekiskej (Sal. 145:16). w23.05 8 párr. 4; 13 párrs. 17, 18

Melak kuajli tla tiknemiliaj kenon yotechpaleui pampa yotikchiujkej itlaj. ¿Itech tlenon uelis titlanemiliskej? Tla tikneki tikamapouas Biblia noso tikchiuas teoyotl, xnemili kenon nochi yejon mitspaleuis más xmouika iuan Jehová (Sal. 145:​18, 19). Tla timokojtilijtika tikchiuas ijkon ken toTajtsin, xnemili kenon yejon mitspaleuis kuajli xmouika imiuan oksekimej (Col. 3:14). ¿Tlenon más uelis tikchiuas? Xkijkuilo niman xkilnamiktiuj tleka tikneki tikchiuas itlaj (Prov. 13:20). Tinochimej kemantika xmás tiknekij tikchiuaskej tlen yotiknemilijkej, san ika, maka matosiaujkauakan. Noijki uelis tokojtiliskej tikchiuaskej tlen yotiknemilijkej maski xmás tiknekij. Yejuin achijtsin ouijtika, san ika, melak tepaleui. w23.05 27, 28 párrs. 5-8

Yejuin tlen tikmachiliaj, techpaleuiya pampa techyolmapeua matikijtokan tlen xkuajli otikchiujkej, tikyektlaliaj tlen xkuajli tikchiujtokej niman tokojtiliaj xok ijkon tikchiuaskej. Tla ijkon tikchiuaj, ok totlalojtoskej ipan ojtli tlen teuika kampa nemilistli. Maka san xtlanemilijto itech yejon, maka xmoyolkokojto, maka xkintlajtlakolti oksekimej nion maka xyejyeko tikimijlis oksekimej tleka itlaj otikchiuj. Más kuajli tla tikasikamati ika otimopopolo niman tikyejyekoua tikyektlalis. Tla melak xkuajli timomachilia, xchiuili teoyotl Jehová, xkijli ika otimopopolo niman xtlajtlanili mamitstlapopolui (Sal. 25:11; 51:​3, 4). Tla yakaj otikyolkoko, xkijli mamitstlapopolui niman tla nonekis, xkintlajtlanili tlayekankej mamitspaleuikan (Sant. 5:​14, 15). Itlaj xueli itech tlen otikchiuj niman xmokojtili maka oksejpa ijkon tikchiuas. Xmatsto ika Jehová mitspaleuis niman mitsiknelis (Sal. 103:​8-13). w23.08 28, 29 párrs. 8, 9

Desde pitentsin, tekiuaj Jehoás onokojtili kiyolpaktis Jehová pampa Jehoiadá okipaleui. San ika, ijkuak Jehoiadá omik, Jehoás opeuj kinkaki on “uejueyitlayekankej de Judá” akin xok kiueyichiuayaj Jehová (2 Crón. 24:​4, 17, 18). Maski Jehová melak okiyolkoko yejuin, yejua xkikajkauaya ika kintitlaniliaya teotlajtokej para makimijlitij “ma nokuepakan itech, pero xokinekej okakkej”. Nion xokikakkej Zacarías, ikoneuj Jehoiadá, akin katka teotlajtoketl, teopixki niman katka iprimo Jehoás. Noijki, Jehoás otlanauati makimiktikan Zacarías (2 Crón. 22:11; 24:​19-22). Jehová ijkin yokijtoka: “On yejuan noka uetskaskej, nikimpijpinajtis” (1 Sam. 2:30). Yejua ika, Jehoás xok okimojkaitak Jehová. Seki xiujtin sakin, sekimej soldados sirios okintlankej isoldados Jehoás, maski xmiyekej katkaj, niman Jehoás sajnoye okikokojkej (2 Crón. 24:​24, 25). Ijkuak sirios yoyajkaj, san no yejuamej itekipanojkauan Jehoás okimiktijkej pampa okimikti Zacarías. w23.06 18 párrs. 16, 17

Apóstol Pablo otenojnots niman otemachti Éfeso (Hech. 19:​1, 8-10; 20:​20, 21). Yejua melak kintlasojtlaya tokniuan niman melak kinekiya kinpaleuis para mamelajkanemikan itech Jehová. Ijkuak akin chantiyaj Éfeso xkixmatiyaj Jehová, nemiyaj ipan tlaneltokijli tlen xmelauak niman san tlemach kineltokayaj. Akin chantiyaj Éfeso melak auilnemiyaj niman xok pinauiyaj. Ken tetlamauisoltiayaj niman ken nouentiayaj nochi katka itech sexo (Efes. 5:3). Pablo okijto ika akin ompa chantiyaj xok kimatiyaj “tla itlaj tepinajtij”, yejuin tlajtoltin ueliskia notlajtolkuepas ken “xok itlaj kinkokoua”. Noijki kijtosneki ika xok kinpasolouaya intlamachilis niman xok kinemiliayaj tla Jehová kintlajtlakolmakaskia (Efes. 4:​17-19). Yejuamej xok kimatiyaj tlenon kuajli niman tlenon xkuajli. Ika yejon, Pablo ijkin okijto: “Kipiyaj intlamachilis yejuan xueli kuajli tlanemilia. Yejuamej xkipiyaj on nemilistli yejuan ualeua itech Dios”. San ika, sekimej efesios yokiskaj itech tlayoualyotl. w24.03 20 párr. 2; 21 párrs. 4-6

Gedeón melak chikauak otekit niman ijkon kinyekanas israelitas. Ijkuak madianitas ocholojkej ika tlayoua pampa ikintlantoyaj, Gedeón niman isoldados okintotokakej desde Jezreel hasta ipan atentli Jordán (Juec. 7:22). ¿Kuakon tlenon okichiujkej Gedeón niman isoldados? ¿Kanaj onoteltijkej? Tikmatstokej ika ka. Maski yejuamej melak siaujtoyaj, okipanauijkej atentli niman okintotokakej madianitas, okimajsitoj niman okintlankej (Juec. 8:​4-12). Yejon tlen okichiuj Gedeón, niman Jehová nochipa okipaleui (Juec. 6:​14, 34). Sejpatipan, Gedeón niman isoldados okintotokakej omemej tekiuajkej madianitas, akin nesi ika yayaj ipan incamellos (Juec. 8:​12, 21). San ika, Jehová okinpaleui. Yejua ika israelitas ouelkej okimajsitoj niman okintlankej. Aman tlayekankej noijki uelis tlaneltokaskej itech Jehová, toTajtsin akin “xkaman siaui”. Yejua nochipa kinkojtilis ijkuak nonekis (Is. 40:​28, 29). w23.06 6 párrs. 14, 16

Uelis timelajkanemiskej maski tikixnamikiskej tlen ouijtika. Kuakon, matitlaneltokakan itech Jehová. Matitlanemilikan itech juez Barac, niman kenon melak kuajli okisato pampa okichiuj tlen Jehová okijli. Ijkuakon, israelitas xkipiayaj nochi tlen nonekiya para tlaixnamikiskiaj, xkipiayaj nion se escudo niman nion se lanza. Maski ijkon, Jehová okijli Barac makixnamikiti Sísara niman isoldados cananeos maski yejuamej miyek kipiayaj tlen ika tlaixnamikiskej (Juec. 5:8). Siuateotlajtoketl Débora okijli Barac mauajtemo ipan tepetl Tabor niman mauiya ipan tlalmantli para kixnamikis Sísara, akin yaya ika 900 carros. Maski nesiya ika ipan tlalmantli tetlaniskiaj akin kinuikayaj incarros, Barac otetlakamat. Ijkuak soldados uajtemotoyaj itech tepetl, Jehová okichiuj chikauak makiyaui. Carros opeujkej sokikalakij niman Jehová okichiuj ika Barac matetlani (Juec. 4:​1-7, 10, 13-16). Jehová noijki uelis techpaleuis. Yejua kichiuas nochi kuajli makisati tla itech titlaneltokaj niman tla tikchiuaj tlen techijlia ikalpan. w23.07 19 párrs. 17, 18

Tla tiknekij timakisaskej, melak noneki matiteijyouikan niman maka matosiaujkauakan. Ijkon ken itekipanojkauan toTajtsin akin yeuejkaui onenkej, noneki titlamachiaskej ika yolseuilistli hasta mayejko tonajli ijkuak toTajtsin kichiuas tlen yokijto (Heb. 6:​11, 12). Biblia kijtoua ika tejuamej tiyeskiaj kentla yakaj akin toka (Sant. 5:​7, 8). Akin toka, chikauak tekiti niman katekiya tlen okitokak maski xkimati kemanon tlakis. Kuakon, yejua tlamachia hasta ijkuak kipixkas tlen yokitokak. Noijki ijkon kichiuaj akin kitekichiuiliaj toTajtsin: chikauak tekitij maski xkimatij kemanon yejkos inTeko (Mat. 24:42). Kema, titlamachiaj ika yolseuilistli pampa tikmatij ika ajsis tonajli ijkuak Jehová kichiuas nochi tlen yokijto. Tla tosiaujkauaskiaj, peuaskia tiktlalkauiskiaj tlen melauak. Noijki, kanaj peuas tikchiuaskej tlen san aman uelis techyolpaktis. San ika, tla xtosiaujkauaj, titlaxikoskej hasta ijkuak toTajtsin tlayektlalis niman techmakixtis (Miq. 7:7). w23.08 22 párr. 7

Ijkuak tikimitaj teotlajtoltin tlen uajlauej ipan Daniel 2:​41-43 niman Apocalipsis, tikasikamatij ika ikxiuan tlamachijchiuajli kineskayotiaj Estados Unidos niman Reino Unido, akin aman tikimitaj ika uejueyixtokej. Ijkuak Daniel okijli Nabucodonosor tlenon kijtosneki yejon tlamachijchiuajli tlen okitemik, noijki okijto: “On reino kojtik yes pero no xkojtik yes”. ¿Tleka okijto ika noijki xkojtik yeskia? Pampa tlaltikpakchanejkej tlen Estados Unidos niman Reino Unido kinyekanaj, tlen yeskiaj kentla “tlalajmojli” noso sokitl, xkinkauiliaj nochi makiyekanakan. Tlen techijlia Daniel itech tlamachijchiuajli techpaleuiya miyek matikasikamatikan. Kachtopa, ika Estados Unidos niman Reino Unido yokiteititijkej ika kojtikej. Ijkon tikijtouaj pampa melak otepaleuijkej ijkuak onochiuj Kachtopa niman ika Okpa Guerra ipan nochi tlaltikpaktli. San ika, tikmatij ika xok kojtik niman más xok kojtik yes, pampa akin ompa chantij kimixnamikij akin tlayekanaj. Ika ome, tikmatij ika yejuin ueyixtika tekiuaj sa ika tlami niman xok onias okse. ¿Tleka? Pampa iTekiuajyo toTajtsin kinpopolos nochimej gobiernos. w23.08 11 párrs. 12, 13

David miyek kixnamiktoya tlen kichiuaya maajmankamiki (Sal. 18:​4, 5). San ika, pampa kitaya kenon Jehová melak kitlasojtlaya, okipaleui oksejpa mayolchikaui. David okimachili ika Jehová kuikaya “kampa tlaselistok ikan sakatl” niman “kampa on atl notlaloua yemanki”. Yejon okipaleui oksejpa mayolchikaui niman makitekichiuili Jehová ika nochi iyojlo (Sal. 18:​28-32; 23:2). Ijkuak tikixnamikiskej tlen ouijtika, uelis ijkin tikijtoskej: “Itetlajsojtlalis toTEKO niman iteiknelilis xkaman tlamiskej” (Lam. 3:22; Col. 1:11). Miyekej kitlauelitayaj David niman kinekiyaj kimiktiskej. San ika, yejua kimatstoya ika Jehová kitlasojtlaya niman ika kitlajpiyaskia. Kimachiliaya kentla tla Jehová inakastlan nemiskia. Ika yejon, ijkin onokuikati: “Onechmanauij de nochi nonemojtil” (Sal. 34:4). Maski kemantika David melak nomojtiaya, yejua ouel otlaxiko pampa kimatstoya ika Jehová melak kitlasojtlaya. w24.01 30 párrs. 15-17

¿Tlenon mitsmachtia tlen xkuajli okichiuj Jehoás? Sakin ika omik ueyiteopixki Jehoiadá, Jehoás xkuajli okintlapejpeni akin inuan nouikas (2 Crón. 24:​17, 18). Okinkak akin uejueyixtoyaj Judá niman xkitlasojtlayaj Jehová. ¿Xmelak ika xnonekiya kinkakis? San ika, xkuajli tlen okichiuj pampa okinkak yejon iamigos akin xkuajkualtin. Niman ijkuak iprimo, Zacarías, okinek kipaleuis, Jehoás otlanauati makimiktikan (2 Crón. 24:​20, 21; Mat. 23:35). ¡Jehoás melak tonto! Kachtopa kuajli tlen kichiuaya, san ika, opeuj kixnamiki Jehová niman otemikti. Sakin, itekitkauan okimiktijkej (2 Crón. 24:​22-25). Tla kikakiskia Jehová niman akin kitlasojtlayaj, xijkon ipan nochiuaskia. w23.09 9 párr. 6

Jesús kimatstoya ika apóstol Pedro ueliskia itech melajkanemis. Kuakon, okiyemankaijli: “Maka xmomojti”. Pampa Pedro okitak ika Jesús itech tlaneltokaya melak okipaleui. Sakin, yejua niman ikniuj, Andrés, okikaujkej intekiyo niman ijkon más tenojnotsaskej iuan Jesús. Pampa ijkon okichiujkej, melak okinteochiujkej (Mar. 1:​16-18). Pampa Pedro onochiuj inomachtijkauj Cristo, okitak miyek tlen kualtsin. Okitak kenon Jesús otepajti, okintekixtili demonios niman hasta oteyoliti (Mat. 8:​14-17; Mar. 5:​37, 41, 42). Noijki, ipan se tlatlachalistli okitak kenon Jesús ueyixtoskia ijkuak tekiuajtiskia. Yejua xkeman okilkauj yejuin tlen okitak (Mar. 9:​1-8; 2 Ped. 1:​16-18). Pedro okitak tlen xkeman kinemiliaya. Tla yejua nosiaujkauaskia, xkitaskia kenon toTajtsin kiteochiuaskia. w23.09 21 párrs. 4, 5

Ipan kachtopa carta tlen apóstol Pedro okijkuilo, okijto ika tla sajnoye titetlasojtlaj techpaleuis tiktlapopoluiskej se tokniuj maski miyekpa nopopolos (1 Ped. 4:8). Ijkuak Pedro okijkuilo yejuin, kanaj okilnamik tlen yeuejkaui Jesús okimachtijka itech kenon nonekiya tetlapopoluis. Ijkuak Pedro okijli ika ueliskia tetlapopoluis “hasta chikomepa”, kanaj okinemili ika melak kuajli iyojlo kipiaya. San ika, Jesús okimachti ika nonekiya tetlapopoluis “hasta kampa xok uelis” kipouas. Niman yejuin itlaj tlen tejuamej noijki noneki tikchiuaskej (Mat. 18:21). ¿Ouijtika tikita titetlapopoluis? Maka xmosiaujkaua. Pampa titlajtlakolejkej, nochimej itekipanojkauan Jehová kemantika yotikitakej ouijtika titetlapopoluiskej. Kuakon, ¿tlenon uelis tikchiuas? Xmokojtili xtlapopolui mokniuj niman oksejpa iuan kuajli xmouika. w23.09 29 párr. 12

Ijkuak nemiya ijtik on ueyi michin, Jonás kimatstoya ika Jehová kikakiskia iteoyouj pampa yonoyolkuepka niman kuajli okasikamat ika Jehová kipaleuiskia. Sakin, ijkuak michin okikauato ipan tlajli, oksejpa ouel okichiuj yejon tekitl tlen toTajtsin yokimakaka (Jon. 2:10–3:4). Ijkuak itlaj tikixnamiki, ¿melak timajmana niman ouijtika tikita tiknotsas toTajtsin? ¿Ouijtika tikita timomachtis? Xkilnamiki ika Jehová mitsasikamati niman kuajli kimatstika tlenon tikixnamiktok. Ika yejon, ijkuak tiknotsas niman xmiyek tikijtos kuajli xmatsto ika yejua mitsmakas tlen mitspoloua (Efes. 3:20). Tla tikualo noso melak timajmana niman ouijtika tikita timomachtis, melak kuajli tla tikinkaki grabaciones itech Biblia noso itech toamatlajkuiloluan. Noijki uelis mitspaleuis tla tijkaki se tlakuikajli noso tikita se video tlen onka ipan jw.org. Ijkuak tiknotsa Jehová niman tikita kenon mitsnankilia ipan Biblia noso itech itlaj okse tlen yejua techmaka, kentla tikijlitoskia: “Nimitstlajtlanilia xnechpaleui”. w23.10 13 párr. 6; 14 párr. 9

Itlaijtik tabernáculo, san noijki katka ken teopantin tlen sakin okinchijchiujkej Jerusalén. Onkatka se cortina tlen kixelouaya Santo itech Santísimo (Heb. 9:​2-5; Éx. 26:​31-33). Ipan Santo, onkatka se candelabro tlachijchiujtli ika oro, se tlaixpan kampa kitlatiayaj tlen ajuiyak niman se mesa kampa kitlaliayaj pan tlen noteixpantilia. San teopixkej akin “okinkuatekijkej ikan aceite” ueliskiaj ompa kalakiskiaj niman ijkon kichiuaskiaj tekitl tlen chipauak (Núm. 3:​3, 7, 10). Ipan Santísimo onkatka se caja de oro tlen tetlalnamiktia tlajtolkaualistli tlen kineskayotiaya kentla tla ompa nemiskia Jehová (Éx. 25:​21, 22). Niman san ueyi teopixki ueliskia kalakis ipan Santísimo. Ipan Tonajli ijkuak Notlapachouayaj Tlajtlakoltin, ueyi teopixki kalakiya ika inyesyo yolkamej niman ijkon makitlapopoluilikan itlajtlakoluan niman noijki intlajtlakoluan israelitas (Lev. 16:​2, 17). Sakin, Jehová okiteititi tlenon kineskayotiaya nochi tlen notekitiltiaya ipan tabernáculo (Heb. 9:​6, 7). w23.10 27 párr. 12

Biblia miyekpa kiteneua yejuin: “Xmotlajsojtlakan iuan oksekimej” (Juan 15:12; Rom. 13:8; 1 Tes. 4:9; 1 Ped. 1:22; 1 Juan 4:11). Tlasojtlalistli ualeua ipan toyojlo niman xakaj ueli kita. Kuakon, ¿kenon uelis tikteititiskej ika titetlasojtlaj niman ijkon oksekimej makitakan tlen onka ipan toyojlo? Ika tlen tikijtouaj niman tikchiuaj. Biblia kijtoua ika onka miyek ken uelis tikimititiskej tokniuan ika tikintlasojtlaj. Yejuin san seki: “Xmoijlikan tlen melauak imiuan oksekimej” (Zac. 8:​16, TNM). “Xchantikan inuan oksekimej ikan yolseuilistli” (Mar. 9:50). “Xkintlakaitakan oksekimej” (Rom. 12:10). “Xmoselikan cada se iuan oksekimej” (Rom. 15:7). “Xtlapojpoluikan tla yakaj xkuajli itlaj mechchiuilia” (Col. 3:13). “Xmopaleuikan inuan oksekimej ijkuak nenkipiyaj pasolouilistli” (Gál. 6:2). “Xmoyoltlalikan cada se inuan oksekimej” (1 Tes. 4:18). “Xmoyolchikauakan ikan tlaneltoktli iuan oksekimej” (1 Tes. 5:11). “Xchiuakan oración impampa oksekimej” (Sant. 5:16). w23.11 9 párrs. 7, 8

Mojmostla noneki tiktlapejpeniskej tlen tikchiuaskej, ika yejon, noneki chikaujtos totlaneltok. Noneki tiktlapejpeniskej iuan akinon touikaskej, kenon toyolpaktiskej, tlenon tomachtiskej ipan escuela, iuan akinon tonamiktiskej, tla tikinpiyaskej tokoneuan niman kanon titekitiskej. Melak kuajli tla totlajtoltiaj: “¿Tlenon kiteititia tlen niktlapejpenia? ¿Nikteititia ika nikneltoka ika tlen onka ipan tlaltikpaktli san panos niman ika sa achijtsin poliui ijkuak toTajtsin kikuepas tlaltikpaktli se xochitlalpan? ¿Noso tlen niktlapejpenia kiteititia ika nikchiua ijkon ken akin kinemiliaj ika xuelis nochipa tinemiskej?” (Mat. 6:​19, 20; Luc. 12:​16-21). Tla más tikneltokaj ika sa achijtsin poliui ijkuak toTajtsin kikuepas tlaltikpaktli se xochitlalpan, tiktlapejpeniskej tlen kuajli. Noijki noneki chikaujtos totlaneltok pampa kanaj uelis techtlaueltokaskej, uelis tikualoskej niman xok tipajtiskej noso uelis tikixnamikiskej okse itlaj tlen kichiuas melak matajmanakan. Kanaj ijkuak peuas tikixnamikiskej itlaj, uelis tiknemiliskej ika kema titlaxikoskej. San ika, miyekpa panouani ika uejkaui tlen tikixnamikij. Ijkuak ijkon panos, noneki chikaujtos totlaneltok niman ijkon titlaxikoskej niman nochipa tiktekichiuiliskej Jehová ika pakilistli (1 Ped. 1:​6, 7). w23.04 27 párrs. 4, 5

Jehová kichia itlaj matikchiuakan sakin ika yotikchiuilijkej teoyotl. Matikonnemilikan ika se tokniuj kineki yas ipan se ueyi tlanechikojli niman kitlajtlanilia Jehová makipaleui para tlajtos iuan akin itech tekiti. ¿Kenon Jehová uelis kinankilis yejuin tokniuj? Yejua kanaj kiyolchikauas para matlajto iuan akin itech tekiti. San ika, tokniuj noijki noneki yas iuan ontlajtos, niman kanaj miyekpa noneki ijkon kichiuas. Yejua hasta uelis kijlis akin itech tekiti ika kipatlas iuan okse icompañero yejon tonajli ijkuak tekiti noso maski maka makitlaxtlauilikan ijkuak xontekitis. Jehová kineki ika miyekpa matikijlikan tlen techajmana. Jesús okiteititi ika seki tlen tiktlajtlanij xnimantsin tikseliskej (Luc. 11:9). Ika yejon, xnoneki tosiaujkauaskej. Miyekpa niman ika nochi toyojlo matiknotsakan Jehová (Luc. 18:​1-7). Ijkuak tejuamej ijkon tikchiuaj, tikititijtokej Jehová ika yemelak tiknekij matechmaka tlen tiktlajtlaniliaj niman tikneltokaj ika yejua uelis techpaleuis. w23.11 22 párrs. 10, 11

Jehová okijli iamigo Abrahán ika kipiyaskia se ikoneuj, niman ika ipampa yejua miyekej tlaltikpakchanejkej kinteochiuaskia (Gén. 15:5; 22:18). Pampa Abrahán melak tlaneltokaya itech toTajtsin, kuajli kimatstoya ika tlen yokijlika yemelak nochiuaskia. San ika, ijkuak Abrahán ikipiaya kanaj 100 xiuitl niman Sara 90 xiuitl, yejuin itekipanojkauan toTajtsin ok xkipiayaj nion se inkoneuj (Gén. 21:​1-7). Maski ijkon, Biblia kijtoua ika Abrahán “okichix niman okineltokak ika Dios okitlalij tajtli ipan miyek países [ . . . ] ken okiprometerouilij” (Rom. 4:18). Niman ken tikmatij, yejon tlen kichiatoya, onochiuj. Abrahán niman Sara okipixkej inkoneuj, Isaac, yejon konetsintli akin kichiatoyaj manemi. ¿Tleka Abrahán kuajli kimatstoya ika Jehová kichiuaskia tlen yokijlika? Pampa Abrahán kuajli kixmatstoya Jehová, “ikan nochi iyojlo kimatstikatka” ika kichiuaskia tlen yokijlika (Rom. 4:21). Pampa otlaneltokak, okiyolpakti Jehová niman yejua okitak ken se tlakatl akin yolmelajki (Sant. 2:23). w23.12 8 párrs. 1, 2

Yejon kijtosneki ika noneki tikchiuas nochi tekitl tlen mitsnauatiaj. Xtlanemili itech Jesús, yejua okichiuj nochi tlen Jehová okitlajtlanili maski ouijtika katka. Kintlasojtlaya tlaltikpakchanejkej, más akin inomachtijkauan niman hasta okinek kitemakas inemilis inpampa (Juan 13:1). Ijkon ken Jesús, nochipa xmokojtili tikchiuas tekitl tlen mitsnauatiaj. Niman tla xtikmati kenon tikchiuas, xteititi ika tiyolyemanki niman xkijli yakaj akin ueltok mamitspaleui. Maka san achijtsin xchiua tla tikmati ika uelis más tikchiuas (Rom. 12:11). Xtlami tekitl tlen mitstlajtlaniliaj niman xchiua “para toTEKO niman xpara on tlakamej” (Col. 3:23). Yemelak, xnochi uelis kuajli tikchiuas, ika yejon, xteititi ika tiyolyemanki niman xseli ijkuak timopopolos (Prov. 11:2). w23.12 26 párr. 8

¡Melak tiyolpakij ijkuak se noapolaktia pampa kalaki ipan ikalpan Jehová! Akin noapolaktiaj peuaj más kuajli nouikaj iuan Jehová, niman kitaj ika melauak nochiua tlen okijto salmista David: “Sanoyej kipiyaj paktli on yejuan tejua yotikintlapejpenij para ma chantitij mochan” (Sal. 65:4). Jehová xsan akinon kikauilia makalaki ipan ikalpan. Jehová san nonisiuiya intech akin kinekij iuan nouikaskej (Sant. 4:8). Ijkuak se nosentemaka itech Jehová niman noapolaktia, peua melak kuajli iuan nouika. Niman Jehová ijkin kimijlia: “Nikuajtoyauas nemopan se tlateochiualistli hasta ijkuak xok itlaj tlasojtis” (Mal. 3:​10, TNM; Jer. 17:8). Ijkuak toapolaktiaj, itipeuaj tiktekichiuiliaj Jehová. Tinochimej akin tikchiuaj ken Cristo tiknekij tikchiuaskej tlen otikijtokej ijkuak otosentemakakej, maski kemantika ueliskia tikimixnamikiskej tlatlatalistin noso tlaueltin tlen ueliskia kichiuas maka matimelajkanemikan (Ecl. 5:​4, 5). Noijki noneki tikchiuaskej ijkon ken Jesús niman tiktlakamatiskej tlen otechnauati (Mat. 28:​19, 20; 1 Ped. 2:21). w24.03 8 párrs. 1-3

¿Tlenon uelis nenkichiuaskej tla xnenkuelitaj san sekan ninnemiskej? Xontlanemilikan itech tlitl. Ijkuak kemach tiktlikuiltiaj pitentsin, san ika, tla tiknekij más matlikui noneki ika yolik tiktlalilijtiaskej tlakotl. Noijki ijkon, mojmostla xyejyekokan san sekan ninnemiskej maski san achijtsin tiempo. Xchiuakan itlaj tlen nenomemej nenkuelitaj (Sant. 3:18). Tla ijkon nenkichiuaj, ika yolik más nemotlasojtlatiaskej. Tla akin yononamiktijkej kinekij yolpakiskej, noneki notlakaitaskej. Tlakaitalistli yeskia ken yejon ajakatsintli noso oxígeno tlen kichiua ika tlitl maka maseui. Noijki ijkon, tla akin yononamiktijkej xnotlakaitaj, ika yolik xok notlasojtlaskej. San ika, tla notlakaitaj más notlasojtlaskej. Xkilnamiki ika xsan tejua noneki tiknemilis ika titetlakaita, moixnamik noneki kimachilis ika tiktlakaita. w23.05 22 párr. 9; 24 párrs. 14, 15

Biblia kinteneua sekimej itekipanojkauan toTajtsin akin melak onomojtijkej pampa intlauelikniuan kintlaueltokayaj noso pampa itlaj kixnamiktoyaj (Sal. 18:4; 55:​1, 5). ¿Tejuamej tlenon tikixnamiktokej? ¿Techtlauelitaj akin imiuan tomachtiaj, akin imiuan titekitij, tochanejkauan noso gobiernos? ¿Yotechijlikej ika tikpiyaj se ueyi kokolistli tlen uelis techmiktis? Tla ijkon topan nochiujtok, kanaj tomachiliaj ken se konetl akin san iselti nemi. ¿Tlenon kichiua Jehová niman ijkon techpaleuis? Jehová techyolchikaua niman techyolseuiya. Kuakon, melak techpaleuis tla nochipa tikxelouaj tiempo niman ijkon tiknotsaskej Jehová niman tikamapouaskej iTlajtol (Sal. 77:​1, 12-14). Ijkon, ijkuak tikixnamikiskej itlaj tlen ouijtika, nimantsin tiktlajtlaniliskej matechpaleui toTajtsin akin nemi ne iluikak. Matikijlikan Jehová tlenon techajmana niman tlenon techmojtia niman matijkauilikan matechnankili niman matechyolchikaua ika iTlajtol (Sal. 119:28). w24.01 24, 25 párrs. 14-16

Melak noneki maonia itlaj tlen matechyolmapeua para tikchiuaskej tlen yotiknemilijkej. ¿Tleka? Pampa ijkon más tokojtiliskej tikchiuaskej tlen yotiknemilijkej. Niman tla onka miyek tlen techyolmapeua más nimantsin tikchiuaskej tlen yotikijtokej. Kuakon, ¿tlenon uelis más mitsyolmapeuas? Xtlajtlanili Jehová mamitspaleui, ijkon más tiknekis tikchiuas tlen yotikijto. Jehová uelis kitekitiltis iespíritu santo para mitspaleuis xchiua tlen yotikijto. Kanaj kemantika tikchiuaj itlaj san pampa tikmatij ika noneki ijkon tikchiuaskej, niman yejon kuajli. San ika, kanaj xika toyojlo tikchiuaj. Xtlanemili itech tlen Jehová yokichiuj mopampa (Sal. 143:5). Apóstol Pablo otlanemili itech kenon Jehová okititi ika melak okikneli, niman yejon okichiuj makitekichiuili ika nochi iyojlo (1 Cor. 15:​9, 10; 1 Tim. 1:​12-14). Noijki ijkon, tla titlanemilia itech kenon Jehová yomitspaleui, más tiknekis tikchiuas tlen yotikijto (Sal. 116:12). w23.05 27 párrs. 3-5

Jehová yejua toTaj iluikakchane, niman yejua kuelita matikueyiteneuakan itoka (Sal. 119:108). Kuakon, ¿toTajtsin noijki ijkon ken tlaltikpakchanejkej akin kinekij makinueyiteneuakan para más kuajli nomachiliskej? Ka, yejua xijkon. Ijkuak tikueyiteneuaj Jehová, tikititiaj Satanás ika xmelauak tlen okijto totechkopa. Satanás okijto ika tla peua tikixnamikij tlen xkuajli, tejuamej xuelis timelajkanemiskej niman xuelis titlapaleuiskej machipaui itoka Jehová (Job 1:​9-11; 2:4). San ika, Job okiteititi ika xmelauak tlen okijto Satanás. ¿Niman tejuamej noijki uelis tikteititiskej ika Satanás san tekajkayaua? Kema, uelis ijkon tikchiuaskej tla tikueyiteneuaj Jehová. Melak tiyolpakij ika tinochimej uelis titlapaleuiskej machipaui itoka Jehová niman ika uelis tikyolpaktiskej tla itech timelajkanemij (Prov. 27:11). w24.02 8, 9 párrs. 3-5

Sakin ika Moisés niman Josué omijkej, Jehová okintekitlali jueces niman ijkon makiyekanakan ikalpan. Niman ijkuak nemiyaj tekiuajkej ipan kalpan Israel, Jehová okintekitilti teotlajtokej niman ijkon kiyekanas ikalpan. San sekimej matikinteneuakan. Ijkuak tekiuaj David onopopolo, teotlajtoketl Natán okimelajkatlali (2 Sam. 12:​7, 13; 1 Crón. 17:​3, 4). Ijkuak tekiuajtitoya Jehosafat, yejua okichiuj tlen okijli teotlajtoketl Jahaziel niman okimijli akin chantiyaj Judá matlaneltokakan intech iteotlajtokauan toTajtsin (2 Crón. 20:​14, 15). Niman tekiuaj Ezequías okitlajtlanili teotlajtoketl Isaías makipaleui (Is. 37:​1-6). Ijkuak tekiuajkej kinokauiliayaj makinyekana Jehová, Jehová kinteochiuaya niman kitlajpiaya ikalpan (2 Crón. 20:​29, 30; 32:22). Kuajli nesiya ika Jehová kiyekantoya ikalpan intechkopa teotlajtokej. w24.02 21 párr. 8

Satanás kineki matouikakan imiuan tlaltikpakchanejkej akin xkitlakamatij Jehová. Aman tejuamej noneki más totlajpiyaskej. ¿Tleka? Pampa aman xok ijkon ken yeuejkaui, aman hasta ipan redes sociales uelis touikaskej imiuan akin xkitlakamatij Jehová. Maka matechkajkayauakan akin kijtouaj ika tiauilnemis xmitsijtlakos. Tejuamej tikmatstokej ika yejon xmelauak (Efes. 4:​19, 20). Matotlajtoltikan: “¿Ninokojtilia xninouikas imiuan akin ninomachtia ipan escuela noso akin imiuan nitekiti noso akin xkitlakamatij itlanauatiluan Jehová? ¿Ninoyolchikaua niman nikteijlia ika melak tepaleui tlen kijtoua Biblia maski miyekej manechijlikan ika xtlaj nikuelita nikchiuas?”. Noijki, ijkon ken kijtoua 2 Timoteo 2:​20-22, noneki kuajli tikitaskej iuan akinon touikaskej ipan tlanechikojli. Matikilnamikikan ika xnochimej techpaleuiskej matimelajkanemikan itech Jehová. w24.03 22, 23 párrs. 11, 12

¿Kemantika yotiknemilijka kenon tlachia Jehová? Maski xueli tikitaj, Biblia miyek kijtoua itech kenon yejua. Ompa kitokayotia ken akin “techtlauiluiya niman techmanauiya”. Noijki kitokayotia “tlitl yejuan ueli nochi kitlatia” (Sal. 84:11; Heb. 12:29). Ipan se tlatlachalistli, teotlajtoketl Ezequiel okijto ika Jehová petlaniya ken se tepostli, ika kampa yeuatoya katka ken on tetl zafiro niman ika onkatka se akosamalotl (Ezeq. 1:​26-28). Kanaj xueli tikneltokaj ika Jehová techtlasojtla pampa xueli tikitaj noso pampa yotikixnamijkej miyek tlen xkuajli. San ika, Jehová kasikamati kenon tomachiliaj niman kimatstika ika melak otechijtlako nochi tlen otikixnamijkej. Niman yejua kineki matikasikamatikan ika techtlasojtla, ika yejon, yokitlali ipan iTlajtol nochi tlen kualtsin kichiua. Jehová noixmati ken “tetlajsojtlalistli” (1 Juan 4:8). Nochi tlen yejua kichiua, kichiua pampa tetlasojtla. Xakaj tetlasojtla ijkon ken Jehová pampa yejua hasta kintlasojtla akin xkitlasojtlaj (Mat. 5:​44, 45). w24.01 26, 27 párrs. 1-3

Jehová okitekitlali Moisés para makinyekana israelitas ijkuak okinkixti Egipto. Niman okimititi ika yokitlapejpenijka ijkuak okitlali se moxtli ika tonajli niman se “tlimilinajli” ika yeuajli para kinyekanas (Éx. 13:21). Moisés okinuikak israelitas mar Rojo pampa moxtli niman “tlimilinajli” ompa okiyekankej. Ijkuak israelitas oajsikej mar niman ijkuak egipcios ikominajsitoyaj, melak onomojtijkej. San ika, Jehová yejua akin okiyekan Moisés para ompa makinuika (Éx. 14:2). Niman sakin Jehová okichiuj se milagro para kinmakixtis (Éx. 14:​26-28). Jehová okitekitilti moxtli niman “tlimilinajli” 40 xiuitl niman ijkon Moisés makimati kanon ika kinuikas ikalpan ipan tlaluaktli (Éx. 33:​7, 9, 10). Jehová kinotsaya Moisés ipan yejon moxtli niman sakin Moisés kimijliaya israelitas tlen Jehová yokijlijka. Kuakon, israelitas kuajli kitayaj ika Jehová kitekitiltijtoya Moisés para kinyekanas. w24.02 21 párrs. 4, 5