Julio

Nochi tlen Jesús okichiuj niman tlen okijto techititia kenon tlanemilia Jehová niman kenon nomachilia, ika yejon, milagros tlen Jesús okinchiuj noijki miyek techmachtiaj itech Jehová (Juan 14:9). ¿Tlenon techmachtiaj imilagros Jesús? Jesús niman iTaj melak techtlasojtlaj. Ijkuak Jesús onen ipan tlaltikpaktli, okiteititi ika melak kintlasojtlaya tlaltikpakchanejkej pampa okikuik ikojtilis niman ijkon kinchiuas milagros para kinpaleuis tlaltikpakchanejkej. Sejpa, omemej tlakamej akin xtlachiayaj okitsajtsilijkej Jesús niman okijlikej makinpaleui (Mat. 20:​30-34). Biblia kijtoua ika Jesús sajnoye “okimiknelij” niman sakin okichiuj matlachiakan. Ika tlajtojli griego “okimiknelij”, teasikamachiltia ika Jesús melak onoyolkoko ijkuak okitak ika yejuin tlakamej tlajyouijtoyaj. Jesús melak kintlasojtlaya tlaltikpakchanejkej, ika yejon, okimikneli. Niman pampa oteikneli, okintlakualti akin apismikiyaj niman okipajti se tlakatl akin kipiaya lepra (Mat. 15:32; Mar. 1:41). Kuakon kuajli tikmatstokej ika Jehová, akin “sanoyej teiknelia”, niman iKoneuj melak techtlasojtlaj, niman melak kinyolkokoua ijkuak kitaj ika titlajyouiyaj (Luc. 1:78; 1 Ped. 5:7). Yejuamej yemelak kinekij kipopoloskej nochi tlen aman techtlajyouiltia. w23.04 3 párrs. 4, 5

Matokojtilikan maka toyolpaktiskej ika tlen uelis kijtlakos totlamachilis niman tlen uelis kichiuas matitlanemilikan ken tlanemiliaj tlaltikpakchanejkej akin Satanás kinyekana. Tla tiknekij tiktlajpiyaskej totlamachilis niman tiknemiliskej tlen kuajli, noneki tikpouaskej niman tomachtiskej Biblia, tiaskej tlanechikoltin niman titenojnotsaskej. Niman Jehová techijlia ika xkitekauilis matikixnamikikan tlen xuelis tikxikoskej (1 Cor. 10:​12, 13). Pampa melak ouijtika tlen tikixnamikij ipan yejuin itlamiyan tonaltin, noneki nochipa tikchiuaskej teoyotl tla tiknekij timelajkanemiskej. Jehová kineki matikijlikan nochi tlen techajmana (Sal. 62:8). Ika yejon, mojmostla xxelo tiempo niman ijkon xnotsa Jehová ika nochi moyojlo. Xueyiteneua niman xtlasojkamachili ipampa nochi tlen kichiua. Xtlajtlanili mamitsmaka yolchikaualistli para titenojnotsas niman mamitspaleui ijkuak itlaj tikixnamiktos. Nochipa xnotsa Jehová niman maka xkauili ika itlaj noso yakaj mamitstelti. w23.05 7 párrs. 17, 18

¿Tleka tiauej tlanechikoltin? Pampa tiknekij tikueyichiuaskej Jehová (Sal. 26:12; 111:1). San ika, noijki tiauej pampa tiknekij toyolchikauaskej imiuan tokniuan ipan yejuin tonaltin tlen melak ouijtika (1 Tes. 5:11). Aman tej, ijkuak titlanankiliaj, tikchiuaj yejuin ome tlemach: tikueyichiuaj Jehová niman tikinyolchikauaj tokniuan. San ika, kanaj kemantika ouijtika tikitaj tikchiuaskej yejuin pampa melak tomojtiaj titlanankiliskej, noso pampa xnochipa techmakaj kampa tikuelitaskiaj titlanankiliskej maski miyekpa tomateketsaj. Ipan icarta apóstol Pablo okijto ika ompa melak noneki “ma titoyoleuakan iuan oksekimej”. Tla nochipa tikilnamikij ika uelis titeyolchikauaskej maski achijtsin tikijtoskej ijkuak titlanankiliskej, xok más tomojtiskej ijkuak tomateketsaskej. Niman tla xueli miyekpa titlanankiliaj ken tikuelitaskiaj, tiyolpakiskej ijkuak tikitaskej ika oksekimej kema uelij tlanankiliaj (1 Ped. 3:8). w23.04 20 párrs. 1-3

¡Xtikneltokas tlen tekiuaj yokijtojka! Judíos akin yonenkaj 70 xiuitl ken tlakeualtin ne Babilonia nokuepaskiaj ipan intlal, Israel (Esd. 1:​2-4). San Jehová ouel okichiuj ika ijkon mapano, pampa babilonios xkeman kinmakauayaj intlakeualuan (Is. 14:​4, 17). San ika, se yenkuik tekiuaj okinotlatkiti Babilonia niman okinkauili judíos manokuepakan inchan. Kuakon nochimej judíos, niman más akin kinyekanayaj infamilia, nonekiya kinemiliskej tla nokuepaskiaj Israel noso nokauaskej Babilonia. San ika, para sekimej judíos melak ouijtika okitakej tlenon kichiuaskej. Sekimej judíos youeuentsintiakaj niman xok ueliskia nokuepaskiaj Israel pampa melak uejka katka. Niman, pampa miyekej judíos otlakatkej Babilonia, kimachiliayaj ika ompa inchan katka. Yejuamej xtlaixmatiyaj Israel, san kimatiyaj ika ompa ualeuayaj inuejkachanejkauan. Noijki nesi ika sekimej judíos yonotomintijkaj ne Babilonia. Ika yejon, kanaj ouijtika kitayaj kinkaujteuaskej inkaluan, intekiyo niman onnochantiskej ipan se tlajli tlen xkixmatiyaj. w23.05 14 párrs. 1, 2

Biblia kijtoua ika noneki más titlaxikoskej, más titeikneliskej niman más titetlasojtlaskej. Lucas 21:19 kijtoua: “Tla nochipa nemelajkanemij ikan nemotlaneltok, nenkiseliskej on nemilistli yejuan para nochipa”. Colosenses 3:12 noijki kijtoua: “Xmouikakan ikan teiknelilistli”. Niman 1 Tesalonicenses 4:​9, 10 kijtoua: “Dios kuajli yomechmachtij. Niman melauak nenkintlajsojtlaj nochimej on tokniuan. [ . . . ] Pero sanoyej temechtlajtlaniliaj nokniuan, ika nemotetlajsojtlalis más ma miyekiya”. Nochi yejuin kimijlitoyaj akin itlaxikojtoyaj, iteikneliayaj niman itetlasojtlayaj. San ika, nonekiya más ijkon kichiuaskej. ¿Tlenon techpaleuis tejuamej noijki ijkon matikchiuakan? Tla tikitaj tlenon okichiujkej akin onenkej ipan kachtopa siglo para teijyouiskej, teikneliskej niman tetlasojtlaskej. Tla ijkon tikchiuaj, tikitaskej kenon uelis tikchiuaskej ijkon ken yejuamej para uelis timakisaskej ipan ueyi tlajyouilistli. Kuakon, ijkuak peuas ueyi tlajyouilistli, tejua tikmatis kenon titlaxikos niman kenon nochipa timelajkanemis. w23.07 3 párrs. 4, 8

Yejuin ojtli techpaleuiya matikueyichiuakan Jehová ipan ikalpan, niman noijki techpaleuis matikueyichiuakan ijkuak tekiuajtitos ipan tlaltikpaktli. Ika yejon, akin yaskej iluikak niman akin nokauaskej ipan tlaltikpaktli nochipa noneki nemiskej ipan yejon “yekojtli” (Juan 10:16). Desde 1919, melak miyekej tlakamej, siuamej niman kokonej youajkiskej itech Ueyixtika Babilonia, noso tlaneltokiltin tlen xmelajkej, niman yopeuj yauej ipan yejon “yekojtli”. Ijkuak judíos onokuepkej Israel, Jehová okiteijli makiyektlalikan ojtli (Is. 57:14). Ipan yejuin tonaltin, ¿Jehová noijki yokichiuj makichipauakan “yekojtli”? Kema. Achto ajsis xiuitl 1919, Jehová okintekitilti sekimej tlakamej yolmelajkej para makiyektlalikan ojtli (uelis tikitas Isaías 40:3). Uelis tikijtoskej ika yejuamej okichipaujkej tlaneltokijli tlen melauak, niman ijkon akin uajkisaskiaj itech tlaneltokiltin tlen xmelajkej kiueyichiuaskiaj toTajtsin ijkon ken nonekiya. w23.05 16 párrs. 8, 9

Jehová kineki matiktekichiuilikan ika nochi toyojlo (2 Cor. 9:7). Kuakon, ¿tleka noneki tokojtiliskej itlaj tikchiuaskej maski xmás tiknekij? Matitlanemilikan itech apóstol Pablo. Yejua okijto: “Notlalnakayo nicastigaroua ken noneki para nechtlakamati” (1 Cor. 9:​25-27). Pablo onokojtili kichiuas tlen Jehová kitlajtlaniliaya maski xmás kinekiya. ¿Kiyolpaktiaya Jehová tlen kichiuaya Pablo? Kema. Niman melak okiteochiuj ipampa nochi tlen okichiuj (2 Tim. 4:​7, 8). Jehová noijki yolpaki ijkuak kita ika tokojtiliaj tikchiuaskej tlen yotikijtokej maski xmás tiknekij. Yejua kimatstika ika maski xmás tikuelitaj tlen yotiktlapejpenijkej tikchiuaskej, tikchiuaj pampa tiktlasojtlaj. Jehová okiteochiuj Pablo, niman noijki techteochiuas tla tokojtiliaj (Sal. 126:5). Niman ijkuak tikitaskej kenon Jehová techteochiua kanaj más tiknekiskej tokojtiliskej. w23.05 29 párrs. 9, 10

Apóstol Pablo okijto ika akin xmakisaskej ipan itonal Jehová yeskiaj kentla akin kochtokej. Yakaj akin kochtika xueli kita tlenon panoua iyeualiujyan niman xkita kenon panoua tiempo. Nion xkita tla tlen panotika uelis kipaleuis noso kijtlakos, niman xueli itlaj kichiua. Aman miyekej xkuajli kipiyaj intlaneltokil pampa kentla kochtoskiaj (Rom. 11:8). Xkasikamatij ika tinemij ipan “itlamiyan tonaltin” niman ika iyejkos ueyi tlajyouilistli (2 Ped. 3:​3, 4). San ika, tejuamej tikmatij ika aman más noneki matitlatlachixtokan (1 Tes. 5:6). Kuakon, matimelajkanemikan niman maka matomojtikan. ¿Tleka? Pampa tla xtotlajpiyaj uelis peuas tokalaktiskej ipan política niman tikchiuaskej ijkon ken akin xnomachtiaj Biblia. Niman pampa inisiuj itonal Jehová, tikmatstokej ika onias más miyek tlemach tlen uelis kichiuas maka matiyolmelajkanemikan. San ika, xnoneki melak tajmanaskej pampa iespíritu santo toTajtsin techyolseuis niman techpaleuis matiktlapejpenikan tlenon tikchiuaskej (Luc. 12:​11, 12). w23.06 10 párrs. 6, 7

¿Tlenon tiknemilia ijkuak tikaki itoka Sansón? Kanaj tikilnamiki ika melak kojtik katka. Yejon melauak; san ika, Sansón okitlapejpeni itlaj tlen melak okitlajyouilti. Maski ijkon, Jehová okitak kenon kipiaya chikauak itlaneltok, niman okichiuj manoijkuilo ipan Biblia tlen ipan onochiuj niman ijkon itlaj matiuelikan. Jehová okitekitilti Sansón niman ijkon kipaleuis ikalpan, Israel. Maski yopanokaj miyek xiujtin ika yomijka, Jehová okichiuj ika apóstol Pablo makijkuilo itoka Sansón ipan se lista kampa nestokej akin chikauak okipixkej intlaneltok (Heb. 11:​32-34). Yejua nochipa okitlajtlanili Jehová makipaleui, hasta ijkuak kixnamiktoya tlen melak ouijtika. Tla tomachtiaj itech Sansón, melak techyolchikauas niman miyek tlen techmachtis. w23.09 2 párrs. 1, 2

Titlaxikoskej tla nochipa tikijliaj Jehová tlen tikmachiliaj (1 Tes. 5:17). Kanaj amantsin tejua xtikixnamiktika itlaj tlen melak ouijtika. San ika ¿tlenon tikchiua ijkuak itlaj mitskualania, tiajmankamiki noso xtikmati tlenon tikchiuas? ¿Tiktlajtlanilia Jehová mamitspaleui? Tla desde aman tikijlia Jehová nochi tlen mojmostla tikixnamiki, ika tlayekapan ijkuak tikixnamikis itlaj tlen más ouijtika, noijki ijkon tikchiuas. Kuajli tikmatstos ika yejua mitspaleuis (Sal. 27:​1, 3). Tla aman tikxikouaj tlen tikixnamikij, kanaj noijki uelis tikxikoskej tlen tikixnamikiskej ipan ueyi tlajyouilistli (Rom. 5:3). ¿Tleka ijkon tikijtouaj? Pampa miyekej tokniuan kimachiliaj, ika ijkuak kixikouaj itlaj tlen kixnamiktokej, más yolchikauij para kixikoskej tlen sakin kixnamikiskej. Ijkuak kitaj ika Jehová kinpaleuiya, más kineltokaj ika yemelak kineki kinpaleuis. Niman yejon kinpaleuiya makixikokan tlen sakin kixnamikij (Sant. 1:​2-4). w23.07 3 párrs. 7, 8

Jehová kiteititia ika teasikamati pampa yolyemanki niman teiknelia. Yejua okiteititi ika yolyemanki ijkuak ikinpopoloskia akin chantiyaj Sodoma. Jehová okintekitilti sekimej iluikaktekitkej niman ijkon makijlitij Lot mauiya kampa tepeyoj, san ika, Lot nomojtiaya ompa yas. Yejua ika, okitlajtlanili makinkauili yejua niman ifamilia mauiyan ne Zóar, se kalpantsin tlen Jehová noijki kinemilijtoya kipopolos. Jehová ueliskia kichiualtis Lot makichiua ijkon ken yokinauatijka, san ika, xijkon okichiuj. Yejua okikak Lot, maski yejon kijtosnekiya ika xok kipopoloskia Zóar (Gén. 19:​18-22). Miyek xiuitl sakin, Jehová okiteititi ika okimikneli ninivitas. Yejua okontitlan teotlajtoketl Jonás niman ijkon kimijlis ika kinpopoloskiaj yejuamej niman inueyikalpan pampa kichiujtoyaj tlen xkuajli. San ika, ijkuak ninivitas onoyolkuepkej, Jehová okimikneli niman okintlapopolui (Jon. 3:​1, 10; 4:​10, 11). w23.07 21 párr. 5

¿Tlenon techmachtia tlen ipan onochiuj Jehoás? Yejua katka ken se kojtli tlen xuejkatlan tlalpachiujtoyaj ineluayouan niman nonekiya itlaj makipaleuijto. Niman ueyi teopixki Jehoiadá nochipa kipaleuijtoya Jehoás. San ika, ijkuak Jehoiadá omik niman opeuj kijliaj miyek tlen xmelauak, yejua okikauj Jehová. Uelis tikijtoskej ika kentla ouets pampa xchikauak katka itlaneltok. Yejuin techmachtia itlaj tlen melak ueyi kijtosneki: xnoneki tikmojkaitaskej Jehová san pampa oksekimej tokniuan noso tochanejkauan ijkon kichiuaj niman techpaleuiyaj noijki ijkon matikchiuakan. Tla tiknekij chikauak tikpiyaskej totlaneltok, noneki tomachtiskej Biblia, itech titlanemiliskej niman nochipa tiknotsaskej Jehová, ijkon uelis más tiktlasojtlaskej niman tiktlakaitaskej (Jer. 17:​7, 8; Col. 2:​6, 7). Jehová xtechtlajtlanilia matikchiuakan itlaj tlen xtiuelij. Yejua techijlia ipan Eclesiastés 12:13: “Xtlakaita Dios niman xchiua on tlen mitsnauatia, pampa on san yejua kitocaroua kichiuas sen tlakatl”. Tla tikmojkaitaj Jehová, uelis tikxikoskej nochi tlen ouijtika niman uelis timelajkanemiskej. Niman uelis nochipa touikaskej iuan Jehová. w23.06 18, 19 párrs. 17-19

Ipan nochi tlatlachalistin tlen apóstol Juan okimitak, Jehová yexpa otlajto. Niman ijkuak ika okpa otlajto, okijto yejuin: “On yejuan yeuatikatka ipan on ueyixtikaj trono okijtoj” (Apoc. 21:5a). Yejuin tlajtoltin melak ueyi kijtosnekij pampa Jehová yejua akin otlajto, xotlajto se ángel nion xotlajto Jesús. Yejuin melak techpaleuiya pampa kichiua más matitlaneltokakan itech tlen kijtoua Tito 1:​2, ompa kijtoua ika toTajtsin “xueli tekajkayaua”. Ken tikitaj, melak uelis titlaneltokaskej itech tlen kijtoua Apocalipsis 21:5 niman 6. Matitlajtokan itech tlajtojli “xkita”. Tlajtojli griego “xkita” melak miyekpa uajnestiuj ipan Apocalipsis. ¿Niman tlenon noijtoua iyekapan Apocalipsis 21:5? ToTajtsin kijtoua: “Nejua nikyenkuilia nochi on tlajtlamach”. Maski Jehová nikan kiteneujtika tlen kichiuas ika tlayekapan, kijtoua kentla tla ikichiujtoskia pampa kuajli kimatstok ika ijkon kichiuas (Is. 46:10). w23.11 3 párrs. 7, 8

Apóstol Pedro miyekpa onopopolo. Ijkuak Jesús okijto ika nonekiya tlajyouis niman mikis niman ijkon nochiuas tlen kijtoua Biblia, Pedro okajuak (Mar. 8:​31-33). Miyekpa, Pedro niman oksekimej apóstoles onokualanijkej itech akinon más ueyixtoya (Mar. 9:​33, 34). Ipan yeuajli ijkuak imikiskia Jesús, Pedro melak okualan niman okitekili inakas se tlakatl (Juan 18:10). Noijki, ipan yejon yeuajli melak onomojti niman yexpa okijto ika xkixmatiya Jesús (Mar. 14:​66-72). Sakin, melak ochokak. Pedro melak najmantoya, san ika, Jesús xokinemili tla xok keman ueliskia nopatlas. Sakin ika oyoliuj, okikauili Pedro makititi ika kitlasojtla. Okijli kuajli makinyekana iborreguitos (Juan 21:​15-17). Niman Pedro okinek ijkon kichiuas. Yejua ika, nemiya ne Jerusalén ipan iluitl Pentecostés niman ompa noijki okitlapejpenijkej ika espíritu santo. w23.09 22 párrs. 6, 7

Apóstol Pedro okimijli oksekimej tokniuan tlayekankej: “Xkincuidarokan ikoneuan Dios” (1 Ped. 5:​1-4). Tikmatstokej ika tlayekankej kintlasojtlaj imikniuan niman kinekij kintlajpiyaskej. San ika, kanaj kemantika kimachiliaj ika xueli kichiuaj nochi yejon pampa kipiyaj miyek tekitl noso siaujtokej. ¿Tlenon uelis tikchiuas tla ijkon mitspanoua? Xkijli Jehová kenon timomachilia. Pedro okijkuilo: “Ijkuak yakaj kintekichiuilia oksekimej, ma kichiua ikan on chikaualistli yejuan Dios kimaka” (1 Ped. 4:11). Kanaj mokniuan kixnamiktokej itlaj tlen aman xuelis noyektlalis. San ika, xkilnamiki ika Jesucristo, akin nochimej techyekana, más uelis kinpaleuis aman niman ipan yenkuik tlaltikpaktli. Jehová kichia ika tlayekankej makintlasojtlakan imikniuan, makintlajpiyakan niman makimititikan kenon kuajli kitekichiuiliskej. w23.09 30 párrs. 13, 14

Maka matitlanemilikan ken tlanemiliaj akin xkitekichiuiliaj Jehová. Tla peua titlanemiliaj ijkon ken akin xkitekichiuiliaj Jehová, ueliskia tijkauaskej toTajtsin niman xok tikintlakamatiskej itlanauatiluan (1 Cor. 3:19). “Tlamatkilistli yejuan kisa ipan in tlaltikpaktli” san kichiua matiknekikan matikchiuakan tlen tejuamej tikileuiyaj. Matikitakan tlenon opanok ipan tlanechikoltin tlen onkatkaj Pérgamo niman Tiatira. Sekimej tokniuan opeuj tlanemiliaj ijkon ken akin xkitekichiuiliayaj Jehová, akin auilnemiyaj niman akin kinueyichiuayaj tajtsitsintin. Jesús okinchikajkanots yejuin ome tlanechikoltin pampa xtlaj kimijliayaj akin auilnemiyaj (Apoc. 2:​14, 20). Ipan yejuin tonaltin, akin xkitekichiuiliaj toTajtsin noijki kinekij matitlanemilikan ijkon ken yejuamej. Kanaj sekimej tochanejkauan noso akin tikimixmatij techijliaj matoyekanakan ika tlen tikmachiliaj niman maka matikintlakamatikan itlanauatiluan Jehová. Kanaj techijliskej ika xtlaj panoua tla tikchiuaj tlen tikileuiyaj niman ika tlen kijtoua Biblia xok techpaleuiya. Kemantika uelis tiknemiliskej ika Jehová noneki más kuajli techimasikamachiltis itlanauatiluan. Kanaj hasta tiknekiskej tikchiuaskej “okseki tlemach tlen xok ijkuiliujtok” (1 Cor. 4:​6, TNM). w23.07 16 párrs. 10, 11

María nonekiya makipaleuikan niman ijkon ueliskia kichiuas tlen Jehová kineki, ika yejua koneuajtiskia maski xinonamiktiaya. Niman maski María xkeman kiskaltiaya se konetsintli, aman kiskaltiskia akin yeskia Mesías. María noijki xkeman notekaya iuan se tlakatl, niman aman nonekiya kijlis José, akin iuan nonamiktiskia, ika ikoneuaj katka (Luc. 1:​26-33). María onopaleui intech oksekimej niman ijkon kichiuas tlen toTajtsin yokijlika. Kachtopa, okitlajtlanili ángel Gabriel okseki makijli itech tlen Jehová yokinauatijka (Luc. 1:34). Sakin, uejka oyaj “ipan on tepemej” niman ijkon kontlajpalos ichanejkauj, Elisabet. Elisabet melak oyolpak ipampa tlen okijli María, niman ika iespíritu toTajtsin, okijto se kualtsin teotlajtojli itech konetsintli tlen kipiyaskia María (Luc. 1:​39-45). Ika yejon, María okijto ika Jehová “okiteititij ipoder ikan on tlen okichiu” (Luc. 1:​46-51). Jehová okitekitilti ángel Gabriel niman Elisabet niman ijkon makiyolchikauakan María. w23.10 14, 15 párrs. 10-12

Nemij 144,000 tokniuan akin yokintlapejpenijkej ika espíritu santo niman akin yolpakij pampa ueli kuajli nouikaj iuan Jehová. Yejuamej nemiskej ken teopixkej iuan Jesús ne iluikak (Apoc. 14:1). Chika ok nemij ipan yejuin tlaltikpaktli, toTajtsin kintlapejpenia ika iespíritu niman kinselia ken ikoneuan. Santo tlen onkatka tabernáculo kineskayotia ika yejuamej ueli kuajli nouikaj iuan toTajtsin (Rom. 8:​15-17). Santísimo tlen onkatka tabernáculo kineskayotia iluikak, kampa nemi Jehová. Cortina tlen kixelouaya Santo itech Santísimo kineskayotia itlalnakayo Jesús. Itlalnakayo xkikauiliaya makalaki iluikak ken Ueyi Teopixki ipan iteopan Jehová. San ika, ijkuak okitemakak inemilis ken uentli inpampa tlaltikpakchanejkej, Jesús okichiuj ika nochimej tlapejpeniltin mauelikan makiselikan nemilistli ne iluikak. Niman tla tlapejpeniltin kinekij kiseliskej intetlayokolil ne iluikak noijki noneki kikauaskej intlalnakayo (Heb. 10:​19, 20; 1 Cor. 15:50). w23.10 28 párr. 13

Gedeón xokualan ijkuak efraimitas opeujkej kitejteneuaj (Juec. 8:​1-3). Pampa yolyemanki katka, kuajli okinkak niman yejon okichiuj mayolseuikan. Tlayekankej akin tlamachilisejkej kichiuaj ijkon ken Gedeón. Ijkuak yakaj kintejteneua, kuajli kikakij niman kuajli kinankiliaj (Sant. 3:13). Ijkon tlapaleuiyaj para maka maonia tlauejli ipan tlanechikojli. Ijkuak israelitas opeujkej kiueyiteneuaj Gedeón pampa okintlan madianitas, yejua okichiuj ika makiueyiteneuakan Jehová (Juec. 8:​22, 23). ¿Kenon tlayekankej uelis kichiuaskej ijkon ken Gedeón? Tla kiueyiteneuaj Jehová ijkuak kuajli kisa intekiyo (1 Cor. 4:​6, 7). Tla se tlayekanketl kijliaj ika melak kuajli ken temachtia, yejua uelis kijtos ika nochi okikixti ipan iTlajtol toTajtsin niman ika tinochimej miyek tiuelij pampa Jehová techmachtia itechkopa ikalpan. Tlayekankej noneki kitaskej tla ken temachtiaj kiueyiteneua Jehová noso san kichiua ika yejuamej makinueyiteneuakan. w23.06 4 párrs. 7, 8

Tla xtikseliaj itlaj tlen yotiktlajtlanilijkej Jehová, matotlajtoltikan “¿Kuajli tlen oniktlajtlanili?”. Kemantika tejuamej tiknemiliaj ika tikmatij tlenon más techpaleuis. San ika, kemantika tlen tiktlajtlanij sakin xok techpaleuiya. Kanaj tiktlajtlanilijtokej Jehová makiyektlali itlaj ijkon ken tejuamej tiknekij, san ika, sejneka ken uelis noyektlalis itlaj. Niman kanaj seki tlen tiktlajtlanij xtepaleuiya manochiua tlen toTajtsin kineki (1 Juan 5:14). Matontlanemilikan itech seki tajtin akin kitlajtlaniliaj Jehová makipaleui inkoneuj niman ijkon nochipa makitekichiuili. Nesi ika kuajli tlen okitlajtlanilijkej. San ika, matikilnamikikan ika Jehová xakaj kichiualtia makitekichiuili. Yejua kineki ika, hasta tokoneuan, matiktekichiuilikan pampa ijkon tiktlapejpeniaj (Deut. 10:​12, 13; 30:​19, 20). Kuakon, ¿tlenon uelis kitlajtlaniliskej Jehová yejuin tajtin? Uelis kitlajtlaniliskej toTajtsin makinpaleui yejuamej niman ijkon kipaleuiskej inkoneuj makitlasojtla niman makineki nochipa iuan nouikas (Prov. 22:6; Efes. 6:4). w23.11 21 párr. 5; 23 párr. 12

Se libro tlen tlajtoua itech Biblia kijtoua ika tlajtojli griego “xmoyoltlalikan” kijtosneki “inakastlan tinentos yakaj niman ijkon tikyolchikauas ijkuak kixnamikis tlen ouijtika”. Kuakon, ijkuak tikyoltlaliaj se tokniuj akin tlajyouijtika, tikpaleuijtokej niman ijkon maka makisa itech ojtli tlen teuika ipan nemilistli. Nochipa ijkuak tikpaleuiyaj niman iuan tinemij se tokniuj, kentla tikijlitokej ika tiktlasojtlaj (2 Cor. 7:​6, 7, 13). Yakaj akin teiknelia noijki teyoltlalia niman tepaleuiya. Kuakon, kachtopa titeikneliaj niman sakin titepaleuiyaj. Jehová noijki ijkon kichiua. Apóstol Pablo okijto ika yejua “techiknelijtikaj niman nochipa techyoltlalijtikaj” (2 Cor. 1:3). w23.11 9, 10 párrs. 8-10

Apóstol Pablo okijto ika ijkuak tikixnamikij tlen ouijtika, uelis más titlaneltokaskej itech tlen tikchiaj tikseliskej. Kuajli tikmatstokej ika tinochimej akin tikchiuaj ken Cristo tikixnamikiskej tlen ouijtika. Matitlanemilikan itech tlen Pablo okimijli tokniuan de Tesalónica. Yejua okijto: “Ijkuak sanken nemouan tinemiyaj, otemechijlijkej ika tikpiyaskej miyek tlajyouilistli, niman ijki onochiu ken nenkimatstokej” (1 Tes. 3:4). Niman tokniuan corintios okimijkuilouili: “Tiknekij xmatikan on tlen temojtij tlajyouilistli otikpixkej. [ . . . ] Hasta xok ueliya tikxikouaj niman hasta tiknemiliayaj ompa timikiskej” (2 Cor. 1:8; 11:​23-27). Ipan yejuin tonaltin, akin tikchiuaj ken Cristo kuajli tikmatstokej ika tikixnamikiskej tlen ouijtika (2 Tim. 3:12). Ijkuak opeuj titlaneltoka itech Jesús niman opeuj tikchiua ken yejua, kanaj moamigos noso mochanejkauan omitschiuilijkej tlen xkuajli. ¿Kampa titekiti mitstlauelitaj pampa tejua xtitlakajkayaua? (Heb. 13:18). ¿Gobierno mitstlaueltoka pampa tikimijlia oksekimej tlen tikneltoka? Maski san tlenon tikixnamikiskej, Pablo kijtoua ika noneki tiyolpakiskej. w23.12 10, 11 párrs. 9, 10

Jacob okixnamik miyek tlaueltin. Omemej ikoneuan Jacob, Simeón niman Leví, okichiujkej itlaj tlen melak xkuajli. Niman yejon okichiuj maka kuajli matlajtokan itech ichanejkauan Jacob niman itech Jehová. Noijki, isiuatsin akin melak kitlasojtlaya, Raquel, omik ijkuak okinemiti ika ome ikoneuj. Niman pampa xok kipiayaj tlen kikuaskej, Jacob ononek onchantis Egipto ijkuak melak iueyi katka (Gén. 35:​16-19; 37:28; 45:​9-11, 28). Maski Jacob okixnamik nochi yejon, yejua nochipa otlaneltokak itech Jehová niman itech tlen yokijlika kichiuas. Niman Jehová okititi Jacob ika kuelitaya tlen yejua kichiujtoya. ¿Tleka ijkon tikijtouaj? Pampa Jehová okipaleui Jacob makipiya miyek tlemach. Niman tikmatstokej ika Jacob melak okitlasojkamachili toTajtsin ijkuak miyek xiuitl sakin oksejpa okitak José, akin okinemilijka ika yomijka. Jacob ouel okixiko nochi tlen okixnamik pampa kuajli nouikaya iuan Jehová (Gén. 30:43; 32:​9, 10; 46:​28-30). Tejuamej noijki uelis tikxikoskej tlen tikixnamikiskej tla kuajli touikaj iuan Jehová. w23.04 15 párrs. 6, 7

Ipan Salmo 23, David okijto ika kineltokaya ika Jehová kitlasojtlaya niman ika kitlajpiaya. Noijki okijto ika Jehová katka ken itlajpixkauj, niman kenon kuajli iuan nouikaya. David kimatstoya ika xueliskia ipan nochiuas tlen xkuajli pampa Jehová kiyekanaya, niman yejua nochipa itech nopaleuiaya. Kimatstoya ika Jehová nochipa kitlasojtlaskia. Matikitakan tleka okijto ika tlaneltokaya itech toTajtsin. David kimatstoya ika Jehová kitlajpiaya pampa nochipa kimakaya tlen kipolouaya. Noijki kimatstoya ika kiyolpaktiaya niman ika iuan nouikaya, ika yejon, David kineltokaya ika maski san tlenon ipan panoskia, Jehová kitaskia maka itlaj makipolo. Kuajli kimatstoya ika itlasojtlalis Jehová más ueyi katka xijkon ken nochi tlen kajmanaya, niman yejon kichiuaya melak mayolpaki (Sal. 16:11). w24.01 29 párrs. 12, 13

Ijkuak otlan ika Okpa Guerra ipan nochi tlaltikpaktli, miyekan okinkauilijkej tokniuan matenojnotsakan. Aman, nochiuiyan notenojnotsa niman melak miyekej yokixmatkej Jehová. Aman Grupo akin Tlayekana kinokauilia makiyekana Cristo. Ijkuak yejuin tokniuan itlaj techijliaj, yejuamej kachtopa kitaj tla yejon tlen kinekij Jehová niman Jesús. Sakin, kintekitiltiaj tokniuan tlayekankej ipan circuito niman tlayekankej ipan tlanechikoltin para techijliskej tlen noneki nochiuas. San ika, kemantika yejuin tokniuan nopopolouaj ijkon ken onopopolojkej Moisés, Josué niman apóstoles pampa tlajtlakolejkej (Núm. 20:12; Jos. 9:​14, 15; Rom. 3:23). San ika, Biblia kijtoua ika Cristo kinpiya ipan “iyekma” nochimej tokniuan akin techyekanaj (Apoc. 2:1). Ika yejon, kuajli matikmatstokan ika Jesús kiyekana “tekitketl” yolmelauak niman kinyekana nochimej tokniuan tlayekankej, niman nochipa ijkon kichiuas. Kuakon, nochipa matitlaneltokakan itech yejuin tokniuan pampa kuajli tikmatstokej ika Jehová niman Jesús kinyekantokej. w24.02 23 párrs. 13, 14

Uelis tikueyiteneuaskej Jehová tla ijkuak itech titlajtouaj tikteititiaj ika melak tiktlasojtlaj niman ika melak tiktlasojkamatij nochi tlen yokichiuj topampa. Tejuamej titenojnotsaj pampa tiknekij ika tlaltikpakchanejkej makinekikan más makixmatikan Jehová niman makitlasojtlakan ijkon ken tejuamej tiktlasojtlaj (Sant. 4:8). Tikuelitaj tikimititiskej ipan Biblia kenon yejua melak tetlasojtla, yolmelajki, tlamachilise niman kojtik. Noijki uelis tikueyiteneuaskej Jehová niman tikyolpaktiskej tla tokojtiliaj tikchiuaskej ijkon ken yejua. Ijkuak ijkon tikchiuaj, oksekimej nimantsin kitaj ika titlamantikej niman kanaj notlajtoltiaj tleka xtikchiuaj ken tlaltikpakchanejkej (Mat. 5:​14-16). Ijkuak imiuan titlajtoskej, uelis tikimijliskej tleka xtikchiuaj ijkon ken oksekimej. Niman akin kipiyaj kuajli inyojlo kinekiskej nonisiuiskej itech toTajtsin. Melak tikyolpaktiaj Jehová ijkuak kita ika ijkin tikueyiteneuaj (1 Tim. 2:​3, 4). w24.02 10 párr. 7

Tla tikneki tikchikauas motlaneltok, noneki timomajmachtis kenon tikchiuas seki tekitl. Yejuin mitspaleuis kuajli xtlapaleui ipan tlanechikojli, xpiya se tekitl niman ijkon uelis tikinmakas mofamilia tlen kimpoloua, niman noijki mitspaleuis kuajli xmouika imiuan oksekimej. kanaj uelis timomachtis kuajli titlaamapouas niman kuajli titlajkuilos. Biblia kijtoua ika, tla se tlakatl kineki yolpaktos niman kuajli onkisas ipan inemilis, noneki mojmostla kiamapouas iTlajtol toTajtsin niman itech tlanemilis (Sal. 1:​1-3). Ijkon, uelis kimatis kenon tlanemilia Jehová, niman yejon kipaleuis kuajli matlanemili (Prov. 1:​3, 4). Nochimej akin nemij ipan tlanechikojli noneki ika tokniuan tlakamej makinmachtikan niman makinpaleuikan makasikamatikan iTlajtol toTajtsin. Tla tejua kuajli titlaamapoua niman kuajli titlajkuiloua, mitspaleuis kualtsin xkinyektlali motlamachtiluan niman kuajli xtlanankili, ijkon tikinyolchikauas oksekimej ika tlen tikijtos. Noijki, uelis tikijkuilos tlen kichikauas motlaneltok niman tlen uelis kinyolchikauas oksekimej tokniuan. w23.12 26, 27 párrs. 9-11

Ijkuak timomojtis, xtlanemili itech tlen Jehová kichiuas ika tlayekapan ijkuak kipopoloskej Satanás. Ipan se ueyi tlanechikojli yeyi tonajli tlen onopanolti ipan 2014, onopanolti se tlamauisojli kampa se tokniuj kimititijtoya ichanejkauan kenon kijtoskia 2 Timoteo 3:​1-5 tla yeskia se teotlajtojli itech ken tinemiskej ipan xochitlalpan. Ijkin okijto: “Ipan yenkuik tlaltikpaktli nochiuas tlen sanoyej kuajli. Pampa nochimej notlasojtlaskej; kinekiskej kichiuaskej tlen toTajtsin kineki, yolyemankej yeskej, kitlakaitaskej toTajtsin, kintlakamatiskej intajuan, tetlasojkamachiliskej niman yolmelajkanemiskej, kintlasojtlaskej inchanejkauan, notlajtolnamikiskej, nochipa kuajli tlajtoskej intech oksekimej, uelis inselti noteltiskej, yolyemankej yeskej, kitlasojtlaskej tlen kuajli, uelis intech titlaneltokaskej niman teasikamatiskej, yejuamej xnoueyimatiskej, kitlasojtlaskej toTajtsin niman xtlen yejuamej kinekij, niman ika nochi inyojlo kiueyichiuaskej toTajtsin. Nochipa imiuan xnemi”. ¿Tokojtiliaj titlajtoskej imiuan tofamilia niman tokniuan itech kenon tinemiskej ipan yenkuik tlaltikpaktli? w24.01 6 párrs. 13, 14

¡Melak tipakij pampa Jehová “sanoyej paki iminuan itlapejpeniluan”! (Sal. 149:4). San ika, kemantika sekimej najmanaj niman kinemiliaj: “Jehová kiyolpaktia tlen kichiua ikalpan, san ika ¿nejua nikyolpaktia?”. Miyekej itekipanojkauan Jehová akin yeuejkaui onenkej kemantika noijki ouijtika okitakej kineltokaskej ika kiyolpaktiayaj Jehová (1 Sam. 1:​6-10; Job 29:​2, 4; Sal. 51:11). Biblia kijtoua ika maski titlajtlakolejkej, uelis tikyolpaktiskej Jehová. ¿Niman tlenon noneki tikchiuaskej? Noneki titlaneltokaskej itech Jesús niman toapolaktiskej (Juan 3:16). Ijkuak toapolaktiaj, nochimej tikimititiaj ika yotoyolkuepkej niman ika yotikijlijkej Jehová ika nochipa tiktlakamatiskej (Hech. 2:38; 3:19). Jehová melak yolpaki ijkuak kita ika tikchiuaj nochi yejuin para iuan touikaskej. Tla tokojtiliaj tikchiuaskej tlen otikijlijkej Jehová ijkuak itech otosentemakakej, Jehová kuelitas tlen tikchiuaskej niman nochipa iuan touikaskej (Sal. 25:14). w24.03 26 párrs. 1, 2

Tla tekiuajkej techijliaj maka sa matitenojnotsakan, uelis tikchiuaskej ken inomachtijkauan Jesús. Uelis tiktlajtlaniliskej Jehová yolchikaualistli niman tlamachilistli niman tikmatstoskej ika yejua techpaleuis nochipa kuajli matitenojnotsakan. Noijki, matiktlajtlanilikan Jehová matechpaleui ijkuak itlaj tikixnamiktoskej. Miyekej titlajyouijtokej pampa tikualoj noso pampa sajnoye tajmanaj, pampa yotomijkatijkej noso onka tlauejli tochan, pampa techtlaueltokaj noso ipampa itlaj okse. Noijki, pandemias niman guerras yokichiujkej más matitlajyouikan. Yejua ika, xkijli Jehová nochi tlen tikmachilia kentla tla tiknojnotsaskia se moamigo. Kuajli xmatsto ika Jehová mitspaleuis (Sal. 37:​3, 5). Tla miyekpa tikchiuaj teoyotl, techpaleuis matitlaxikokan ijkuak itlaj tikixnamikiskej (Rom. 12:12). Jehová kimati nochi tlen itekipanojkauan kixnamikij, niman “ijkuak kitlajtlaniliaj ma kimpaleui, yejua kinkaki” (Sal. 145:​18, 19). w23.05 5, 6 párrs. 12-15

Ijkuak itlaj tiktlapejpeniskej, kachtopa noneki kuajli matikasikamatikan “tlen kineki” Jehová niman sakin ijkon matikchiuakan (Efes. 5:17). Ijkuak itlaj topan panoua niman peua tikitaj tlen kijtoua Biblia, kijtosneki ika tiknekij tikmatiskej tlen Jehová kinemilia. Niman yejon techpaleuis matiktlapejpenikan tlen kuajli. Satanás kuelitaskia matikchiuakan tlen tlaltikpakchanejkej kichiuaj niman ijkon maka matikpiyakan tiempo para tiktekichiuiliskej Jehová (1 Juan 5:19). Yakaj ueliskia más notomintis, más nomachtis noso más tekitis niman xok kitas kenon más kitekichiuilis Jehová. Tla ijkon topan panoua, kijtosneki ika yopeuj titlanemiliaj ijkon ken akin xnomachtiaj. Tikmatstokej ika xse tlajtlakojli tla tikpiyaj tomintsin, tla tomachtiaj noso tla titekitij. San ika, kema xok kuajli yeskia tla kachtopa tikchiuaj yejon niman xok tiknemiliaj kenon más kuajli tiktekichiuiliskej Jehová. w24.03 24 párrs. 16, 17