Agosto

Ipan yejuin tlaxelojli noijtoua ome tlemach tlen ueyi kijtosneki: 1) akin yolmelajkej kixnamikiskej tlen ouijtika niman 2) Jehová kinpaleuis. ¿Kenon? Jehová techpaleuiya matitlanemilikan ken kinamiki ijkuak tikixnamikij tlen ouijtika. Tikmatstokej ika Jehová yotechijli ika tiyolpakiskej tla tiktekichiuiliaj, san ika, yejon xkijtosneki ika xtikpiyaskej tlauejli ipan yejuin tonaltin (Is. 66:14). ToTajtsin kineki matitlanemilikan itech kenon melak kualtsin tichantiskej ika tlayekapan (2 Cor. 4:​16-18). Niman chika xiyejko yejon tonajli, techpaleuiya matitlaxikokan (Lam. 3:​22-24). ¿Tlenon tiuelij intech sekimej itekipanojkauan Jehová akin Biblia kinteneua niman intech oksekimej akin onenkej ipan yejuin tonaltin? Ika maski tikixnamikiskej itlaj tlen xtikchiayaj, tla titlaneltokaj itech Jehová, yejua nochipa techpaleuis (Sal. 55:22). w23.04 14, 15 párrs. 3, 4

Miyek tlen techmachtia tlen okichiujkej José niman María. Yejuamej kinektoyaj tetlakamatiskej maski tlen kintlajtlaniliayaj ouijtika katka (Luc. 2:​1-6). Ijkuak María kipiaya 9 metstli ika koneuaj katka, yejua iuan José ononek kiteititiskej tla tetlakamatiyaj. José niman María nonekiya yaskiaj hasta Belén pampa César Augusto otlanauati ika nochimej manoijkuilokan kampa otlakatkaj. Kuakon, yejuamej nonekiya nejnemiskiaj 150 kilómetros kampa melak tepeyoj, yejon melak ouijtika yeskia, más para María. Niman kanaj José kajmanaya tlen ueliskia ipan nochiuas María niman yejon konetsintli. ¿Tlenon panoskia tla ipan ojtli uajnemiskia? ¡María kinemitiskia akin yeskia Mesías! Maski yejuin ouijtika katka, ¿kijtosnekiya ika xnonekiya tetlakamatiskej? Tlen kinmajmanaya José niman María xokichiuj maka makitlakamatikan tlanauatijli. Niman Jehová okinteochiuj pampa otetlakamatkej. María kuajli oajsik Belén, okitlakatili se konetsintli akin xkualouaya niman hasta otlapaleuijkej manochiua se teotlajtojli (Miq. 5:2). w23.10 8 párr. 9; 9 párrs. 11, 12

Tla tejua timomojtia, ¿tlenon uelis tikchiuas? Uelis kuajli timomachtis tlen nopanoltis ipan tlanechikojli (Prov. 21:5). Tla kuajli yotimomachti tlen nopanoltis ipan tlanechikojli, xouijtika tikitas timomateketsas. ¿Tlenon okse uelis techpaleuis? Maka miyek matikijtokan ijkuak titlanankiliskej (Prov. 15:23; 17:27). Tla xmiyek tikijtoua, xmás timomojtis. Tla xmás tiuejkaui ijkuak titlanankilia niman tlen tikijtoua kisa ipan moyojlo, oksekimej kitaskej ika kuajli otimomachti niman ika tikasikamati tlen noitstika. ¿Tlenon uelis tikchiuas tla maski yotikchiuj tlen kemach yotikonteneujkej ok timomojtia niman san sejpa noso okpa ueli titlanankilia? Xkilnamiki ika Jehová melak kipatiojkaita ika tejua timokojtilia titlanankilis (Luc. 21:​1-4). Noijki, Jehová kimati tlenon kema ueli tikchiua niman tlenon ka (Filip. 4:5). Kuakon, xnemili tlenon kema uelis tikchiuas, xyejyeko ijkon xchiua niman xtlajtlanili Jehová mamitspaleui. Kachtopa, uelis tipeuas titlanankilis ika achijtsin tlajtoltin. w23.04 21 párrs. 6-8

Apóstol Pablo okijto ika tejuamej tiyeskiaj kentla soldados akin tlatlachixtokej niman kipiyaj nochi tlen ika tlaixnamikiskej. Ijkuak onka se guerra, se soldado noneki kuajli noyektlalis niman ijkon uelis tlaixnamikis. Ijkon ken yejon soldado, tejuamej noijki tikteititiaj ika yotoyektlalijkej para itonal Jehová tla totlaliliaj toteposchaleco: kijtosneki tla más tikchikauaj totlaneltok niman más titetlasojtlaj. Noijki tla totlaliliaj tocasco: kijtosneki tla más titlaneltokaj itech tlen toTajtsin yokijto kichiuas. Ijkon ken se teposchaleco kitlajpiaya iyojlo se soldado, totlaneltok niman tlasojtlalistli kipaleuiya tlen tikpiyaj ipan toyojlo. Totlaneltok niman totlasojtlalis techpaleuiya matiktekichiuilikan Jehová niman matikchiuakan ken Jesús. Totlaneltok techpaleuiya matikneltokakan ika Jehová “kintiochiuas on yejuan melauak kitejtemouaj” (Heb. 11:6). Noijki, techpaleuiya matiyolmelajkanemikan itech Jesús maski tikixnamikij miyek tlen ouijtika. Tla tiknekij tikchikauaskej totlaneltok niman tikxikoskej tlen tikixnamikij, noneki tikitaskej kenon oksekimej tokniuan yoyolmelajkanenkej, maski kintlaueltokaj noso xkipiyaj tlen ika nopanoltiskej. Tla xtiknekij peuas tikileuiskej miyek tomin noso tiknekiskej totomintiskej, noneki tikchiuaskej ijkon ken tokniuan akin san ika achijtsin nemij niman nokojtiliaj chikauak kitekichiuiliskej toTajtsin. w23.06 10 párrs. 8, 9

Akin ueli iselti noteltia ueli kiteltia tlen kimachilia niman tlen kichiua. Yejuin techpaleuiya para matikchiuakan tlen yotikijtokej maski ouijtika tikitaj noso xmás tiknekij. Matikilnamikikan ika san tla tikpiyaj iespíritu santo toTajtsin uelis toselti toteltiskej. Kuakon, nochipa matiktlajtlanikan espíritu santo (Luc. 11:13; Gál. 5:​22, 23). Maka xnemili tikchiuas itlaj hasta ijkuak nochi yonoyektlali. Ipan yejuin tlaltikpaktli melak ouijtika ijkon mapano. Tla san ijkon tokauaj, xkeman tikchiuaskej tlen yotiknemilijkej Kemantika, xmás tiknekij tikchiuaskej tlen yotiknemilijkej pampa kanaj tikitaj ika melak ouijtika. Tla ijkon tikmachilia, uelis mitspaleuis tla ika yolik peua tikchiua. Tla tikneki más tikchiuas ken toTajtsin, xchiua seki tlemach tlen kiteititis ika timokojtilijtika ijkon tikchiuas. Noso tla tiknekij más tikamapouaskej Biblia, uelis tikamapoujtiaskej san achijtsitsintin textos. w23.05 29 párrs. 11-13

Ipan yejuin itlamiyan tonaltin, Jehová ok kitekitiltijtika ikalpan para techmachtis itech iTlajtol, niman ijkon nochipa matinejnentiakan ipan “yekojtli” (Is. 35:8; 48:17; 60:17). Uelis tikijtoskej ika ijkuak yakaj kiselia makimachtikan Biblia, yeskia kentla peuaskia nejnemiskia ipan “yekojtli”. Sekimej san achijtsin ompa nejnemij niman sakin kikajkauaj. San ika, oksekimej yokijtokej ika ompa nejnemiskej hasta ajsiskej kampa ontlami yejon ojtli. San ika, ¿kanon ontlami yejon ojtli? Inojui akin tlapejpeniltin ontlami ne iluikak (Apoc. 2:7). Niman, para akin kichiaj nemiskej ipan tlaltikpaktli, inojui tlami ijkuak iTekiuajyo Cristo xok tlayekanas, kijtosneki ijkuak xok yakaj kipiyas tlajtlakojli. Tla tejua ompa tinejnentiuj, maka xontlachia mokuitlapan, xnejnemi hasta tajsis ipan yenkuik tlaltikpaktli. w23.05 17 párr. 15; 19 párrs. 16-18

Tla titlanemilia itech nochi tlen Jehová yokichiuj mopampa, melak tiktlasojkamatis, niman yejon kichiuas xneki itech xmosentemaka (Sal. 116:​12-14). Biblia kijtoua ika “nochi on tetlayokolijli ualeua itech toTajtsin” (Sant. 1:17). Jehová otechtlayokoli itlaj tlen melak patioj: iKoneuj Jesús. Jesús omik mopampa, ika yejon, aman tejua ueli timouika iuan toTajtsin niman uelis nochipa tinemis (1 Juan 4:​9, 10). Tla tikneki tiktlasojkamachilis Jehová nochi tlen yokichiuj mopampa niman pampa melak mitstlasojtla, uelis itech timosentemakas (Deut. 16:17; 2 Cor. 5:15). w24.03 5 párr. 8

Ijkuak tikitaj ika miyekej xnoyekanaj ika itlanauatiluan Jehová, tomachiliaj ken Lot, se tlakatl akin yeuejkaui onen niman omelajkanen itech toTajtsin. “Yejua noyolkokouaya ijkuak kintaya ken xkuajli kipiyaj innemilis on xkuajkualtin tlakamej” pampa kimatstoya ika toTajtsin xkuelita ijkon makichiuakan (2 Ped. 2:​7, 8). Lot melak kitlasojtlaya Jehová niman kitlakaitaya, ika yejon, noijki xkuelitaya ika tlaltikpakchanejkej akin ompa nemiyaj maauilnemikan. Aman noijki ijkon panoua. Tichantij kampa miyekej nion achijtsin xkintlakaitaj itlanauatiluan toTajtsin. Maski ijkon, tla tiktlasojtlaj toTajtsin niman tiktlakaitaj, uelis itech timelajkanemiskej. Jehová techpaleuiya itech matimelajkanemikan ika tlen techijlia ipan Proverbios. Nochimej akin kichiuaj ken Cristo, tlakamej niman siuamej, telpokamej niman akin iuejueyimej uelis miyek nomachtiskej itech tlen kijtoua Proverbios. Akin kitlakaitaj Jehová xkinemiliaj ika xkijtlakos tla nouika imiuan akin xkitekichiuiliaj Jehová. w23.06 20 párrs. 1, 2; 21 párr. 5

Kanaj mochanejkauan omitstlauelitakej noso kanaj otijkauj seki tlemach pampa otiknek más tiktekichiuilis Jehová (Mat. 6:33). Tla ijkon otikchiuj, xmatsto ika Jehová kuajli kilnamiktok nochi tlen otikchiuj ipampa (Heb. 6:10). Tejua kanaj yotikitak ika melauak nochiua yejuin tlajtoltin tlen Jesús okimijto: “San akinon yejuan kikauas ichan, ikniuan, itataj, inanaj, isiuau, ikoneuan, noso itlaluan, san nopampa niman ipampa on kuajli tlajtojli yejuan kiteijlia ken Dios temakixtia, kiselis aman ipan in tlaltikpaktli se ciento más de on tlen kikaua. Kiselis se ciento más kaltin, ikniuan, inanajuan, ikoneuan niman itlaluan. Pero no kiselis tlauejli niman tlajtlamach ika kitlajyouiltiskej. Niman ipan on okse nemilistli yejuan uajlau, kiselis nemilistli yejuan para nochipa” (Mar. 10:​29, 30). Tikmatij ika miyek yotijkauj para más tiktekichiuilis Jehová, san ika, noijki tikmatstokej ika yejua más yomitsteochiuj (Sal. 37:4). w24.03 9 párr. 5

Ijkuak tokniuan de Judea melak otlajyouijkej pampa xok kipiayaj tlen kikuaskej, tokniuan de Antioquía okichiujkej yejuin: “Cada se okitlalij ipan iyojlo para tlapaleuis san kech uelis niman kintitlaniliskej on tokniuan yejuan chantij Judea” (Hech. 11:​27-30). Maski tokniuan de Judea melak uejka chantiyaj, tokniuan de Antioquía kinekiyaj kinpaleuiskej (1 Juan 3:​17, 18). Tejuamej noijki uelis tikteititiskej ika tikimikneliaj tokniuan akin kixnamikij tlen ouijtika. Yejuin uelis tikchiuaskej: matikintlajtoltikan tlayekankej kenon uelis titlapaleuiskej, matiktemakakan todonaciones niman matikchiuakan teoyotl inpampa akin tlajyouijtokej. Ijkon tikinpaleuiskej tokniuan makipiyakan tlen ika nopanoltiskej. Tejuamej tiknekij ika ijkuak toTekiuaj Jesucristo uajtetlajtlakolmakas, makita ika titeikneliaj. Tla ijkon tikchiuaj, yejua techijlis: “Xkalakikan kampa nitlamandaroua ken Rey” (Mat. 25:​34-40). w23.07 4 párrs. 9, 10; 6 párr. 12

Ijkuak Jesús nemiya nikan ipan tlaltikpaktli, okiteititi ika noijki teasikamati ijkon ken Jehová. Sejpatipan, se siuatl akin xisraelita katka, okitlajtlanili Jesús makipaleui maski yejua san yokuajtitlankaj para makinpaleui akin israelitas katkaj. Yejon siuatl okitlajtlanili makipajti ichpoch akin kipiaya “sen xkuajli espíritu niman sanoyej temojtij” kitlajyouiltiaya, Jesús okikneli yejon siuatl niman okipajti ichpoch (Mat. 15:​21-28). Noijki matitlanemilikan itech tlen Jesús okijto sakin ika yopeujka tenojnotsa, yejua okijto: “On yejuan nechnenekiskej imixpan on tlakamej, nejua no nikinnenekis” (Mat. 10:33). San ika ¿kanaj Jesús xok okiseli Pedro san pampa yexpa okijto ika xkixmatiya? Ka. Yejua kimatstoya ika Pedro yonoyolkuepka niman ika yolmelajkanemiya. Sakin ika oyoliuj, Jesús okinojtiti Pedro niman kanaj okititi ika yokitlapopoluijka niman kitlasojtla (Luc. 24:​33, 34). Jehová niman Jesús kiteititiaj ika teasikamatij. ¿Niman tejuamej? Jehová kichia ika noijki matiteasikamatikan. w23.07 21, 22 párrs. 6, 7

¿Tlenon uelis tikimijliskej oksekimej para más makineltokakan ika toTajtsin yemelak kichiuas tlen yokijto? Kachtopa, ika Jehová akin yokijto ijkon kichiuas. Apocalipsis kijtoua: “Kemaj on yejuan yeuatikatka ipan on ueyixtikaj trono okijtoj: ‘Xkita, nejua nikyenkuilia nochi on tlajtlamach’”. Yejua uelis kichiuas tlen yokijto pampa kineki, pampa tlamachilise niman pampa melak kojtik. Ika ome, ijkuak Jehová tlajtoua itech tlen kichiuas, kiteneua kentla inochiujtika pampa kimatstika ika xtlaj uelis kiteltis. Ika yejon, ijkin kijtoua: “In tlajtoltin [ . . . ] yejua tlen melauak niman kuajli para nochimej kineltokaskej”. Noijki kijtoua: “Ijki yonochiu”. Ika yeyi, ijkuak Jehová itlaj kipeualtia, kitlamiltia. Pampa yejua kijtoua: “Nejua niachtoj niman nisa ika nochi” (Apoc. 21:6). Jehová kiteititis ika Satanás san tlakajkayaua niman ika xuelis kiteltis makichiua tlen yokijto. Kuakon, tla yakaj mitsijlia: “Melak kualtsin kakisti, san ika, xkeman uelis nochiuas”, uelis tikamapouilis niman tiktomilis tlen kijtoua Apocalipsis 21:​5, 6. Xkititi akin tiknojnotstika ika Jehová kuajli yokiteititi ika yemelak kichiuas tlen yokijto. Yeskia kentla yokitlali ifirma ipan se amatl (Is. 65:​16, TNM). w23.11 7 párrs. 18, 19

Jehová yejuin okijli Abrahán ijkuak kipiaya 75 xiuitl niman xkipiaya nion se ikoneuj. ¿Abrahán ouel okitak kenon onochiuj nochi tlen Jehová okijli? Ka, san seki okitak. Sakin ika okipanaui atentli Éufrates ononek tlamachias 25 xiuitl para kitas seki tlen Jehová yokijlika. Kuakon, Jehová okichiuj ika yejua niman isiuauj makipiyakan se inkoneuj, akin okitokayotijkej Isaac. Niman 60 xiuitl sakin onenkej ixuiuan, Esaú niman Jacob (Heb. 6:15). San ika, Abrahán xokitak tla ichanejkauan omiyekiyakej niman tla Jehová okinmakak yejon Tlajli tlen yokijtoka kinmakas. Maski ijkon, yejua kuajli onouikak iuan toTajtsin (Sant. 2:23). Xkonnemili kenon melak yolpakis Abrahán ijkuak yoliuis. Kitas ika pampa otlaneltokak niman xonosiaujkauj, nochimej otikselijkej tlen melak kualtsin (Gén. 22:18). ¿Tlenon tiuelij? Ika kanaj aman xuelis tikitaskej kenon nochiua nochi tlen Jehová yotechijli. San ika, tla xtosiaujkauaj, ijkon ken Abrahán, uelis tikmatstoskej ika Jehová techteochiuas aman niman más techteochiuas ipan yenkuik tlaltikpaktli (Mar. 10:​29, 30). w23.08 24 párr. 14

Ijkuak telpochtli, tekiuaj Uzías yolyemanki katka niman “okitekichiuilij Dios”. Onen 68 xiuitl niman Jehová miyekpa okiteochiuj (2 Crón. 26:​1-4). Uzías okintlan itlauelikniuan niman okiyektlali Jerusalén para maka yakaj kalakiskia (2 Crón. 26:​6-15). Tikmatstokej ika Uzías melak yolpakiya ipampa nochi tlen kichiujtoya ika itlapaleuilis Jehová (Ecl. 3:​12, 13). Tekiuaj Uzías nochipa san tenauatijtoya niman kanaj yejon okichiuj makinemili ika ueliskia kichiuas nochi tlen yejua kinekiya. Se tonajli, okalak ipan ikal Jehová niman okitlati kopajli ipan on tlaixpan. Yejon itlaj tlen tekiuajkej xnonekiya kichiuaskej (2 Crón. 26:​16-18). Ueyiteopixki Azarías okijli ika xkuajli tlen okichiuj niman Uzías melak okualan. Melak teajman ika maski Uzías kuajli kitekichiuiliaya Jehová, sakin xok itech omelajkanen niman Jehová okichiuj makasi lepra (2 Crón. 26:​19-21). ¡Tla yejua nochipa kiteititiskia ika yolyemanki, xijkon ontlamiskia! w23.09 10 párrs. 9, 10

Maski apóstol Pedro okiseli espíritu santo, ok nopopolouaya. Ipan xiuitl 36 Pedro okitak ika Cornelio, se tlakatl akin xjudío katka, okiseli espíritu santo. Yejuin kuajli okiteititi ika toTajtsin xtechikoita niman ika akin xjudíos noijki ueliskia nemiskiaj ipan tlanechikojli (Hech. 10:​34, 44, 45). Ijkuakon, Pedro opeuj tlakua imiuan akin xjudíos, yejuin itlaj tlen yeuejkaui xkeman kichiuaskia. Sekimej tokniuan kinemiliayaj ika akin judíos xnonekiya tlakuaskej imiuan akin xjudíos. Ijkuak sekimej akin ijkon tlanemiliayaj oajsikej Antioquía, Pedro xok otlakua imiuan akin xjudíos. Kanaj yejua ijkon okichiuj pampa xkinekiya kinyolkokos tokniuan akin judíos katkaj. Ijkuak apóstol Pablo okitak yejuin, okajuak Pedro imixpan nochimej (Gál. 2:​13, 14). Maski Pedro onopopolo, xonosiaujkauj. w23.09 22 párr. 8

Tla tikita ika mitspoloua itlaj tikchiuas, maka xmajmana. Xkilnamiki “ika toTEKO melauak kuajli” niman yejua mitspaleuis xchiua tlen mitspoloua (1 Ped. 2:3). Apóstol Pedro kuajli techijlia: “Dios mechkueltlalis, mechmelajkapiyas, mechkojtilis”. Sejpatipan, Pedro okimachili ika xkinamikiya nemis ixpan iKoneuj toTajtsin (Luc. 5:8). San ika, Pedro omelajkanen pampa Jehová niman Jesús okipaleuijkej niman okitlasojtlakej. Yejua ika, ouel okalak kampa tlayekana toTeko, niman “toTemakixtijkau JesuCristo” (2 Ped. 1:11). Okiseli se ueyi tetlayokolijli. Tla tejua xtimosiaujkaua ijkon ken Pedro niman tijkauilia ika Jehová mamitsmajmachti, noijki uelis tikselis se nemilistli tlen xkeman tlamis. Pampa titlaneltoka, tikselis temakixtilistli (1 Ped. 1:9). w23.09 31 párrs. 16, 17

Tabernáculo kipiaya ikiyauak, kampa teopixkej ueliya kichiuayaj intekiyo pampa tlaueyi katka niman tsauktoya. Ipan ikiyauak tabernáculo onkatka se ueyi tlaixpan tlen tlachijchiujtli ika cobre, kampa kitlaliayaj “uentli yejuan nochi tlatla”. Noijki, onkatka se fuente tlachijchiujtli ika cobre kampa teopixkej nomapajpakayaj niman nokxipajpakayaj achto kichiuaskiaj tekitl tlen chipauak (Éx. 30:​17-20; 40:​6-8). Aman, tokniuan tlapejpeniltin akin ok chantij ipan yejuin tlaltikpaktli, kitekichiuiliaj Jehová tlaijtik ipan iteopan. Ueyi fuente tlen kipiaya atl niman onkatka tabernáculo kinmilnamiktia tlapejpeniltin niman nochimej akin kichiuaj ken Cristo, ika nochipa noneki chipaujkanemiskej ika tlen kinemiliaj niman tlen kichiuaj. ¿Niman kanon kitekichiuiliaj toTajtsin on “sanoyej miyek tlakatl” akin kinpaleuiyaj ikniuan Cristo? Apóstol Juan okitak ika yejuamej nemiyaj “ixpan on trono” niman kiueyichiuayaj toTajtsin “ikan tonajli niman yeuajli ipan iueyitiopan”. Yejuin “sanoyej miyek tlakatl” kichiua yejuin ipan tlaltikpaktli, ipan ikiyauak iteopan Jehová (Apoc. 7:​9, 13-15). ¡Melak tiyolpakij ika tinochimej ueli tikueyichiuaj Jehová ipan iteopan! w23.10 28 párrs. 15, 16

Jehová noijki kintekitiltia tlayekankej niman ijkon techkojtilis (Is. 32:​1, 2). Kuakon, imiuan xtlajto ijkuak itlaj mitsajmana niman xmokauili mamitspaleuikan. Jehová kintekitiltia niman ijkon techyolchikauas. Tlen kijtoua Biblia ika panos ika tlayekapan, akin tikchiaj nochipa tinemiskej ipan yejuin tlaltikpaktli noso akin kichiaj yaskej ne iluikak, kichiua matikojtitokan (Rom. 4:​3, 18, 19). Yejuin tlen tikchiaj mapano techpaleuiya matikxikokan tlen xkuajli topan nochiua, matitenojnotsakan niman kuajli matikchiuakan totekiyo ipan tlanechikojli (1 Tes. 1:3). Matikitakan kenon tlen kichiaya apóstol Pablo okipaleui matlaxiko. Yejua Okijto ika yokitlajyouiltijkaj, yokitlaueltokakaj niman ika kemantika xok kimatiya tlenon kichiuas. Noijki okijto ika okpa hasta imikiya (2 Cor. 4:​8-10). Apóstol Pablo otlaxiko pampa tlanemiliaya itech tlen kiseliskia ika tlayekapan (2 Cor. 4:​16-18). Pablo otlanemili itech tlen kiseliskia ijkuak yoliuiskia ne iluikak. Pablo otlanemili itech tlen kiseliskia ika tlayekapan, ika yejon, itlaneltokil más chikaujtiaya. w23.10 15, 16 párrs. 14-17

Ijkuak tikchiuiliskej teoyotl Jehová matiknemilikan tla ikinamiki techmakas tlen tiktlajtlaniliaj. Kanaj tejuamej tiknemiliaj ika noneki nimantsin matechnankilikan toteoyouan. San ika, Jehová akin más kimati kemanon uelis techpaleuis (Heb. 4:16). Ijkuak Jehová xnimantsin kinnankilia toteoyouan, kanaj uelis tiknemiliskej ika yejua “xkineki” techmakas tlen tiktlajtlaniliaj. San ika, kanaj Jehová kita ika “xinoneki” techmakas tlen tiktlajtlanij. Matitlanemilikan itech se telpochtli akin kitlajtlaniliaya toTajtsin makipajti. San ika, xpajti. Tla Jehová kipajtiskia ika se milagro, Satanás ueliskia kijlis ika yejon telpochtli san kitekichiuilia pampa yokipajti (Job 1:​9-11; 2:4). Noijki, tikmatij ika sa achijtsin poliui ijkuak toTajtsin kinpopolos nochi kokolistin (Is. 33:24; Apoc. 21:​3, 4). Yejua ika, ipan yejuin tonaltin xtikchiaj ika Jehová matechpajti ika milagros. ¿Tlenon ueliskia kitlajtlanilis Jehová yejon telpochtli? Ueliskia kitlajtlanilis makikojtili niman makipaleui kuajli matlanemili para kixikos ikokolis niman yolmelajkanemis. w23.11 23 párr. 13

Maski Sansón onopopolo, xonosiaujkauj. Yejua ok kinekiya kimixnamikis filisteos, ijkon ken Jehová yokinauatijka (Juec. 16:​28-30). Yejua ika, Sansón okitlajtlanili Jehová: “Xnechmaka mopoder para nikintlakuepiltis in filisteos”. ToTajtsin okikak niman oksejpa okichiuj makojtik. Ijkuakon, Sansón okinmikti más filisteos xijkon ken akin okinmikti ipan nochi inemilis. Maski Sansón otlajyoui ipampa tlen okitlapejpeni, nochipa onokojtili kichiuas tlen Jehová kineki. Kuakon, tejuamej noijki xnoneki tosiaujkauaskej tla topopolouaj, tla noneki techyektlaliskej noso tla tikpolouaj se tekitl ipan tlanechikojli. Matikilnamikikan ika Jehová xkinemilia tla xok keman uelis toyektlaliskej (Sal. 103:​8, 9). Maski tla topopolouaj, yejua ok uelis techtekitiltis ijkon ken okichiuj iuan Sansón. w23.09 6 párrs. 15, 16

ToTajtsin paki ken tikxikouaj on tlen topan nochiua. Yejon xkijtosneki tla Jehová yolpaki ijkuak titlajyouiyaj, yej yolpaki ijkuak kita ika titlaxikouaj niman timelajkanemij. ¿Xmelak ika yejon techyolchikaua? (Sal. 5:12). Matitlanemilikan itech Abrahán, yejua okiyolpakti toTajtsin pampa otlaxiko ijkuak okixnamik tlen ouijtika. Jehová okitak ken iamigo niman okitak ken yakaj akin yolmelajki (Gén. 15:6; Rom. 4:​13, 22). Yemelak ika uelis tikyolpaktiskej toTajtsin ika tlen tikchiuaj para tiktekichiuiliskej niman tla kuajli tikchiuaj totekiyo ipan tlanechikojli. San ika, noijki uelis tikyolpaktiskej tla itech timelajkanemij niman titlaxikouaj. Yejon itlaj tlen nochimej uelis tikchiuaskej, maski tla tiuejueyimej noso tla tipipitikej, tla miyek tikpiyaj noso ka noso tla miyek tiuelij noso ka. ¿Tikixnamiktika itlaj tlen ouijtika ipan yejuin tonaltin? Tla kema, kuajli xmatsto ika tikyolpaktis toTajtsin tla itech timelajkanemi. Pampa tikmatij ika tikyolpaktiaj Jehová, kichiua más matikneltokakan ika uelis tikseliskej tlen tikchiatokej. w23.12 11 párrs. 13, 14

Yejuin melak noneki makichiuakan tokniuan tlakamej. Noneki kuajli tekakiskej niman kasikamatiskej tlen kinemiliaj niman kimachiliaj oksekimej (Prov. 20:5). Uelis tikmatis kenon yakaj nomachilia tla tijkaki kenon tlajtoua niman tla tikita kenon nesi ixayak ijkuak itlaj mitsijlia. San uelis ijkon tikchiuas tla tinemi imiuan tokniuan. Tla san nochipa tikinnotsa ipan teléfono, correos electrónicos niman mensajes, ouijtika tikitas titlajtos imiuan ijkuak tinemis imixpan. Kuakon, nochipa xkita kenon uelis titlajtos niman tinemis imiuan oksekimej (2 Juan 12). Se tokniuj akin chikauak itlaneltok kita ken nopanoltis niman kinpaleuiya ichanejkauan makipiyakan tlen kimpoloua (1 Tim. 5:8). Yejuin melak kinpaleuis makipiyakan tlen ika nopanoltiskej (Hech. 18:​2, 3; 20:34; Efes. 4:28). Chikauak xtekiti niman xtlamilti motekiyo. Tla ijkon tikchiua, kuajli tlajtoskej motech niman nochipa tikpiyas se tekitl. w23.12 27 párrs. 12, 13

Ijkuak Biblia kijtoua “itonal Jehová”, tlajtotika itech on tiempo ijkuak toTajtsin kinpopolos itlauelikniuan niman kimakixtis ikalpan. Yeuejkaui Jehová okintlajtlakolmakak sekimej kalpamej (Is. 13:​1, 6; Ezeq. 13:5; Sof. 1:8). Itonal Jehová tlen iyejkos, peuas ijkuak kixnamikiskej Ueyixtika Babilonia niman tlamis ipan Armagedón. Tla tiknekij timakisaskej, noneki toyektlaliskej desde aman. Jesús otemachti ika noneki titlatlachixtoskej ijkuak yejkos ueyi tlajyouilistli, ijkon okiteititi ika yejuin itlaj tlen noneki nochipa tikchiujtoskej (Mat. 24:21; Luc. 12:40). Ipan 1 Tesalonicenses, apóstol Pablo okinteneuj miyek neskayomej para kinpaleuis tokniuan makasikamatikan tlenon nonekiya kichiuaskej achto yejkos itonal Jehová. Pablo kimatstoya ika ok uejkauiskia para mayejko itonal Jehová (2 Tes. 2:​1-3). San ika, okimijli ika melak nonekiya manoyektlalikan, kentla tla yejon tonajli iyejkoskia. Tejuamej noijki uelis ijkon tikchiuaskej. w23.06 8 párrs. 1, 2

Ipan 1978, ne Tokio (Japón), opeuj kichijchiuaj se ueyi kajli tlen kipiya 60 pisos. Akin ompa panouayaj notlajtoltiayaj tla yejon kajli tlaxikoskia ijkuak chikauak tlaloliniskia, niman kema otlaxiko. ¿Tleka? Pampa akin okichijchiujkej yejuin ueyi kajli okichiujkej ika machikauak niman noijki maueli achijtsin manoolini para uelis tlaxikos niman xtlapanis ijkuak tlalolinis. Akin tikchiuaj ken Cristo noijki tiijkomej ken yejon ueyi kajli. ¿Tleka ijkon tikijtouaj? Ijkon ken yejon kajli melak chikauak, akin kitekichiuilia Jehová noijki noneki yolchikauak yes ijkuak kintlakamatis itlanauatiluan Jehová. San ika, noijki noneki teasikamatis. Noneki nochipa kinektos kintlakamatis itlanauatiluan toTajtsin. Yejua noijki kichiua ijkon ken yejon kajli tlen achijtsin ueli noolinia. ¿Kenon? Ijkuak kiteititia ika kimasikamati oksekimej niman kinektika ika itlaj achijtsin manopatla (Sant. 3:17). Tla ijkon tikchiuaj, titeasikamatiskej ijkuak tikitaskej ika noneki, san ika, xtiknemiliskej ika uelis tikchiuaskej nochi tlen tiknekij. w23.07 14 párrs. 1, 2

Jesús ononek kixikos ijkuak Satanás okitlatlatak pampa yejua xkinekiya mamelajkanemi itech Jehová (Mat. 4:​1-11). Satanás kinekiya ika Jesús matlajtlako niman ijkon maka manotemaka topampa. Jesús okixiko miyek tlen xkuajli ijkuak otenojnots. Itlauelikniuan okitlaueltokakej niman okijlikej ika kimiktiskiaj (Luc. 4:​28, 29; 13:31). Ononek kixikos ken nopopolouayaj inomachtijkauan (Mar. 9:​33, 34). Ijkuak okitlajtlakolmakakej, okijlikej ika kimiktiskiaj, okitlajyouiltijkej niman okipijpinaujtikej. Sakin okipilojkej ijkon ken kinpilouayaj akin kichiuayaj tlen xkuajli (Heb. 12:​1-3). Niman ijkuak imikiskia, ononek san yejua tlaxikos pampa Jehová xok okitlajpix (Mat. 27:46). Kuajli nesi kenon Jesús melak ueyi otlatlaxtlauj niman ijkon techmakixtis. Ijkuak titlanemiliaj itech nochi tlen Jesús okinek kichiuas topampa, más tiktlasojtlaj. w24.01 10, 11 párrs. 7-9

Tla titeijyouiyaj, kuajli touikaskej imiuan oksekimej niman kuajli tikinkakiskej ijkuak tlajtouaj (Sant. 1:19). Noijki, titlapaleuiskej maonia yolseuilistli, kuajli tiknemiliskej tlenon tikchiuaskej niman xtikijtoskej itlaj tlen uelis teyolkokos. Tla yakaj techyolkokoua, xnimantsin tikualantiuetsiskej nion xtikchiuiliskej tlen yejua otexchiuili. Yej tokojtiliskej tikimijyouiskej oksekimej niman ika nochi toyojlo tikintlapopoluiskej (Col. 3:12; Col. 3:​13, TNM). Tla xtosiaujkauaj, techpaleuis matiktlapejpenikan tlen kuajli. Xnoneki nimantsin tikchiujtiuetsiskej itlaj, noneki tikxeloskej tiempo niman ijkon tikitaskej tla techpaleuis noso techijtlakos tlen tiktlapejpeniskej. San matikonnemilikan tlenon tikchiuaskiaj tla tiktejtemojtokej se tekitl. Kanaj tiknekiskej tikselijtiuetsiskej san katlejua tekitl. San ika, tla xtosiaujkauaj, kuajli tiknemiliskej tla kijtlakos tofamilia niman tla kijtlakos ken touikaj iuan Jehová. Tla xtosiaujkauaj, xtitlajyouiskej ipampa tlen tiktlapejpeniskej. w23.08 22 párrs. 8, 9

Tla tejua kemantika titlauelmiki pampa noneki timoxijxikos iuan on tlen xkuajli tikileuiya, tikilnamikis tlen otikijli Jehová ijkuak otimosentemakak, mitspaleuis xxiko tlatlatalistin. ¿Tleka ijkon tikijtouaj? Ijkuak yakaj nosentemaka itech Jehová, kikaua nochi on tlen más kitlasojtla. Yejuin kijtosneki ika xok kichiua tlen kileuiya itlalnakayo noso okseki tlen toTajtsin xkuelita (Mat. 16:24). Kuakon, ijkuak itlaj tikixnamikiskej, xok yolik tiknemilijtoskej tlenon tikchiuaskej pampa tejuamej itikmatstokej ika noneki timelajkanemiskej itech Jehová. Ijkuak otoapolaktijkej, otikijtojkej ika xtikchiuaskej okseki tlemach tlen Jehová xkuelita. Ijkon ken Job, maski matikixnamikikan tlen ouijtika, matikijtokan: “Nejua xitlaj nikchiua tlen xkuajli” (Job 27:5). w24.03 9 párrs. 6, 7

Jehová yejua “tetlajsojtlalistli” (2 Cor. 13:11). Jehová najmana topampa. Niman kuajli tikmatstokej ika yejua techmaka “itetlajsojtlalis” (Sal. 32:10). Ijkuak tiknemiliaj kenon yejua melak techtlasojtla, más itech titlaneltokaj niman más itech tonisiuiyaj. Ika yejon, matiknotsakan niman matikijlikan ika tiknekij nochipa matechtlasojtla. Uelis tikijliskej nochi tlen techajmana, niman kuajli matikmatstokan ika yejua techasikamatis niman techpaleuis (Sal. 145:19). Itlasojtlalis Jehová yeskia ken se tlitl tlen techtotonia ijkuak seua, pampa kichiua kuajli matomachilikan. Itlasojtlalis Jehová sajnoye kojtik niman teiknelia. ¡Sanoyej tiyolpakij pampa Jehová melak techtlasojtla! Nochipa ijkin matikijtokan: “Niktlasojtla Jehová” (Sal. 116:1). w24.01 31 párrs. 19, 20

Jesús xsan otemachti kenon itoka toTajtsin pampa judíos ikimatstoyaj yejon. Yejua otemachti kenon Jehová (Juan 1:​17, 18). Matikteneuakan kenon sejpatsin otemachti. Ipan Tlajkuiloltin ika Hebreo ikijtouaya ika Jehová tetlasojtla niman teiknelia (Éx. 34:​5-7). Jesús okitekitilti se neskayotl para más kuajli temachtis kenon Jehová. Yejua otlajto itech se tekoneuj akin yopoliujka. Ijkuak yejuin tekoneuj onokuep ichan, itaj okontak ijkuak “sanken uejka uajlaya”. Tajtli nimantsin okinamikito, okinapalo niman okitlapopolui (Luc. 15:​11-32). Yejuin neskayotl melak okinpaleui tlaltikpakchanejkej más kuajli makasikamatikan kenon melak tetlasojtla Jehová niman kenon melak teiknelia. w24.02 10 párrs. 8, 9

Jehová techpaleuiya ijkuak kita ika titlajyouijtokej. Amantsin tikitaskej tlenon uelis techpaleuis niman ijkon titeikneliskej niman titeyoltlaliskej, ijkon ken Jehová kichiua. ¿Tlenon techpaleuis nochipa matotlasojtlatokan niman matoyoltlalikan? (1 Tes. 4:18). Tla tikyejyekoua tikimasikamatiskej tokniuan, tla totlasojtlaj ken ikniujtin niman tla tikchiuaj tlen kuajli (Col. 3:12; 1 Ped. 3:8). Tla titeikneliaj niman tikchiuaj okseki tlen kuajli, tikinpaleuiskej tokniuan akin kixnamiktokej tlen ouijtika. Jesús okijto: “Tlen kisa ipan tekamak ualeua ne ipan teyojlo kampa yejua ika tlatentok. On yejuan kuajli tlakatl kijtoua tlajtlamach tlen kuajli pampa ipan iyojlo kipiya on tlen kuajli” (Mat. 12:​34, 35). Kuakon, tikimititiskej tokniuan ika tikintlasojtlaj tla tikinyoltlaliaj. w23.11 10 párrs. 10, 11

Noneki yakaj matechpaleui tla tiknekij tikinmasikamatiskej teotlajtoltin tlen uajlauej ipan Biblia. Xnemili ika tiauj kampa xtitlaixmati, san ika, mouan yauj se moamigo akin kema tlaixmati. Moamigo kuajli kimati kanon ninnemij niman kimati kanon teuikaj ojtin. ¡Melak kuajli ika moamigo mouan oyaj! Ijkon ken yejon toamigo kuajli kimati kanon tinemij, Jehová noijki kuajli kimatstok tlenon nochiujtok niman tlenon nochiuas ika tlayekapan. Kuakon, tla tiknekij tikinmasikamatiskej teotlajtoltin tlen uajlauej ipan Biblia, noneki tiktlajtlaniliskej Jehová matechpaleui (Dan. 2:28; 2 Ped. 1:​19, 20). Ijkon ken nochimej tajtin, Jehová kineki ika ikoneuan kuajli manemikan ika tlayekapan (Jer. 29:11). San ika, Jehová ueli kijtoua tlenon panos ika tlayekapan, xijkon ken tajtin. Okichiuj ika ipan iTlajtol manoijkuilokan teotlajtoltin niman ijkon matikmatikan tlenon panos ika tlayekapan (Is. 46:10). w23.08 8, 9 párrs. 3, 4