Septiembre

ToTajtsin yokimakak Jesús kojtilistli niman ijkon makinpopolo nochi tlaueltin tlen kipiyaj tlaltikpakchanejkej. Onka seki tlaueltin tlen tejuamej xkeman ueliskia tikinpopoloskej. San ika, ijkuak Jesús okinchiuj milagros, otechititi ika yejua kema uelis kinpopolos. Yejua kipiya kojtilistli para kipopolos tlen kichiua matitlajyouikan: tlajtlakojli tlen otechpanoltili Adán, tlen kichiua matikualokan niman matimikikan (Mat. 9:​1-6; Rom. 5:​12, 18, 19). Milagros tlen okinchiuj Jesús techititiaj ika yejua uelis kipajtis “nochi tlajtlamach kualolistli niman kokolistli” niman ika uelis kinyolitis akin yomijkej (Mat. 4:23; Juan 11:​43, 44). Noijki kipiya kojtilistli para kinteltis ajakakiyaujtin niman para kintlanis xkuajkualtin espíritus (Mar. 4:​37-39; Luc. 8:2). Jehová okimakak Jesús miyek kojtilistli. ¿Xmelak ika yejon techyolseuiya? Uelis kuajli tikmatstoskej ika melak kualtsin tichantiskej ijkuak Jesús tekiuajtitos ipan iTekiuajyo toTajtsin. Milagros tlen okinchiuj Jesús ijkuak nemiya ipan tlaltikpaktli techititiaj ika más kichiuas milagros ijkuak tekiuajtis ipan iTekiuajyo toTajtsin. w23.04 3 párrs. 5-7

Tla ipan motlanechikol miyekej nosentlaliaj niman kemantika nion sejpa xueli titlanankilia, kanaj otiknemili xok timomateketsas. San ika, maka xmosiaujkaua. Xmomachti miyekan kampa uelis titlanankilis. Ijkon, tla xtitlanankilia ipan párrafos kampa peua tlamachtijli, uelis titlanankilis sakin ipan okseki párrafos. Ijkuak timomachtis itech tlen noitas ipan Amatl Tekakistilijketl, xnemili kenon nochi párrafos notlajtolnamikij ika tlen tlajtoua tlamachtijli. Ijkon tejua nochipa tikmatstos tlen uelis tikijtos. Noijki, uelis más timomachtis ipan párrafos kampa ouijtika tikasikamatis niman ijkon uelis ompa titlanankilis. Ipan yejon párrafos kampa ouijtika tikasikamatis xmiyekej nomateketsaj. San ika ¿tlenon uelis tikchiuas tla maski yotikchiuj tlen yotikontakej ok xueli titlanankilia? Achto ika peuas tlanechikojli, xtlajto iuan tokniuj akin kiyekana tlamachtijli niman xkijli kanon tikuelitaskia titlanankilis. w23.04 21, 22 párrs. 9, 10

José katka se kuajli teueuentsin pampa nochipa kichiuaya tlen Jehová kinauatiaya. Kanaj yexpa, toTajtsin okijli tlenon nonekiya kichiuas niman ijkon kintlajpiyas ichanejkauan. Niman maski ouijtika katka, yejua otetlakamat (Mat. 1:20; 2:​13-15, 19-21). Pampa nochipa okitlakamat Jehová, José okipaleui niman okitlajpix María. Yejuin okichiuj ika María más makitlasojtla niman makitlakaita. Teueuentsitsinuan, nemejuamej uelis nenkichiuaskej ijkon ken José tla nenkitejtemouaj ipan Biblia tlen mechpaleuis xkintlajpiyakan nemochanejkauan. Tla ijkon nenkichiuaj, maski nonekis itlaj nenkipatlaskej, nenkiteititiskej ika nenkitlasojtlaj nemosiuatsin. Niman yejon mechpaleuis más kuajli xmouikakan. Se tokniuj siuatl akin chanti Vanuatu, niman ikipiya ipantsin 20 xiuitl ika ononamikti, kijtoua: “Ijkuak nikita ika noueuentsin kichiua ijkon ken Jehová kijtoua, más niktlakaita, más kuajli ninomachilia niman nikmatstika ika kuajli onkisas tlen yokitlapejpeni”. w23.05 21 párr. 5

Judíos akin nokuepaskiaj nonekiya chipaujkanemiskej ixpan toTajtsin (Deut. 7:6). Kijtosnekiya ika sekimej nonekiya nopatlaskej niman ijkon kiyolpaktiskej Jehová. Miyekej judíos otlakatkej Babilonia niman yopeujkaj kichiuayaj niman tlanemiliayaj ijkon ken babilonios. Ijkuak judíos akin kachtopa onokuepkej Israel ikuikayaj 69 xiuitl ika ompa chantiyaj, tekiuaj Nehemías okimojkatlachialti ijkuak okitak ika inkoneuan yejon judíos xtlajtouayaj hebreo (Deut. 6:​6, 7; Neh. 13:​23, 24). Matikilnamikikan ika iTlajtol toTajtsin ijkuiliujtoya ika hebreo, kuakon, ¿kenon yejuin kokonej ueliskia kitlasojtlaskiaj niman kiueyichiuaskiaj Jehová tla nion xtlajtouayaj hebreo? (Esd. 10:​3, 44). Judíos melak nonekiya kipatlaskej miyek tlemach ipan innemilis niman xouijtika kitaskiaj tla nemiyaj Israel, pampa ompa ipeujtoyaj kiueyichiuaj Jehová ken kinamiki (Neh. 8:​8, 9). w23.05 15 párrs. 6, 7

Melak teajman ika maski tiknekiskiaj tikchiuaskej tlen yotiknemilijkej kemantika itlaj uelis techtsakuilis. Biblia kijtoua ika nochimej “kiseliaj tlen kuajli noso xkuajli”. Ijkuak ijkon panoua, techkuilia tiempo (Ecl. 9:11). Noijki, uelis tikixnamikiskej itlaj tlen techajmanas niman tlen kichiuas maka sa matokojtilikan. Niman pampa titlajtlakolejkej topopolouaj niman xueli tikchiuaj tlen yotikijtokej (Rom. 7:23). Noso kanaj san tisiaujtokej (Mat. 26:43). ¿Tlenon uelis techpaleuis maka matosiaujkauakan maski tikixnamiktokej tlen ouijtika? Xkilnamiki ika maski itlaj mitsteltia xkijtosneki tla xok uelis tikchiuas tlen yotikijtoka. Biblia kijtoua ika uelis tikixnamikiskej tlen ouijtika. San ika, maka matosiaujkauakan niman matikchiuakan tlen yotiknemilijkaj. Kema, ijkuak tikchiuaj tlen yotikijtokej maski tikixnamikij tlen ouijtika, tikititiaj Jehová ika tiknekij tikyolpaktiskej. w23.05 30 párrs. 14, 15

Tla tejua timochiua precursor, timomajmachtis titekitis imiuan tlatlamantikej tokniuan niman tiuelis kuajli tiktekitiltis motomin (Filip. 4:​11-13). ¿Tleka xtimochiua precursor auxiliar? Yejon yokinpaleui miyekej sakin manochiuakan precursores regulares. Niman yejon uelis kichiuas más chikauak xtekichiuili toTajtsin: uelis titlapaleuis kampa nochijchiuaj kaltin kampa tikueyichiuaj Jehová noso tontlapaleuis Betel. Nochimej tokniuan tlakamej noneki nokojtiliskej niman ijkon nochiuaskej tlayekankej ipan tlanechikojli. Biblia kijtoua ika “sanoyej kuajli [ . . . ] kichiuas” akin ijkon tlapaleuiya (1 Tim. 3:1). Kachtopa noneki timochiuas tlapaleuijketl. Tokniuan tlapaleuijkej melak kinpaleuiyaj tlayekankej ipan intekiyo. Tlayekankej niman tlapaleuijkej akin yolyemankej, kinpaleuiyaj imikniuan niman chikauak tenojnotsaj. w23.12 28 párrs. 14-16

Ijkuak san telpochtli katka, tekiuaj Josías opeuj kita kenon kinisiuis Jehová. Kinekiya más kixmatis iTajtsin niman kichiuas tlen yejua kineki. San ika, Josías ouijtika okitak tekiuajtis ipan yejon tonaltin. ¿Tleka? Pampa ipan yejon tonaltin miyekej kinueyichiuayaj tajtsitsintin tlen xmelajkej. Kuakon, ononek yolchikauak yes niman ijkon kinpaleuis oksekimej oksejpa makiueyichiuakan Jehová. ¡Niman melak kuajli okichiuj! Xkipiaya nion 20 xiuitl ijkuak opeuj kikixtia ipan país nochi tlen ijkuakon kiueyichiuayaj (2 Crón. 34:​1, 2). Maski tla melak titelpochtli noso tiichpochtli, uelis tikchiuas ijkon ken Josías. ¿Kenon? Tla tiknisiuiya Jehová niman tla timomachtia itech tlen kualtsin kichiua. Tla tikchiua yejuin, mitspaleuis xmosentemaka itech Jehová. ¿Niman kenon mitspaleuis ipan monemilis tla timosentemaka itech Jehová? Luke, akin onoapolakti ijkuak kipiaya 14 xiuitl, okijto: “Aman ika tlayekapan ninokojtilis niktekichiuilis Jehová niman nikyolpaktis” (Mar. 12:30). Tla tejua noijki ijkon tikchiua, toTajtsin noijki melak mitsteochiuas. w23.09 11 párrs. 12, 13

Ijkuak apóstol Pablo okintlajkuilouili tokniuan de Tesalónica, tlanechikojli xiuejkauiya, kemach kipiaya kanaj se xiuitl. Kanaj tlayekankej xmás kimatiyaj kenon kichiuaskej intekiyo niman nopopolouayaj, san ika, nonekiya kintlakaitaskej. Aman, más noneki matopaleuikan intech akin kiyekanaj tlanechikojli pampa iyejkos ueyi tlajyouilistli, niman ijkuakon kanaj xuelis tikmatiskej tlen techijliskej tokniuan de sucursal niman de oficina kampa noyekanaj nochi sucursales. Yejua ika, melak noneki ika desde aman matikintlakaitakan niman matikintlasojtlakan tokniuan akin tlayekanaj ipan tlanechikojli. Maski san tlenon mapano, kuajli matitlanemilikan niman maka san matikitakan kenon nopopolouaj. Matikilnamikikan ika Jehová kitekitiltijtika Jesús niman ijkon kinyekanas yejuin yolmelajkej tlakamej. Ijkon ken se casco kipaleuiaya itsontekon se soldado, totlamachialis techpaleuiya kuajli matitlanemilikan. Tikitaj ika tlen techmakasneki yejuin tlaltikpaktli xtlaj ika tepaleui (Filip. 3:8). Totlamachialis noijki techyolseuiya niman techpaleuiya kuajli matitlanemilikan. w23.06 11, 12 párrs. 11, 12

Nochimej akin kikakij itlajtol yejuin siuatl akin xtlamatki noneki kitlapejpeniskej tla kalakiskej ichan, noso ka. Melak techpaleuis tla xtiauilnemij. Proverbios techijlia ika yejon siuatl akin xtlamatki kijtoua: “On atl yejuan san tikichtekis más uelik” (Prov. 9:17). ¿Tlenon kineskayotia yejon atl tlen san kichtekij? Biblia kijtoua ika ijkuak akin yononamiktijkej san sekan notekaj yeskia kentla atl tlen teseselia (Prov. 5:​15-18). Se tlakatl niman se siuatl akin yononamiktijkej uelis ijkon noyolpaktiskej. San ika, atl tlen san kichtekij xteyolseselia. Yejuin kanaj kijtosneki ijkuak yakaj noteka iuan akin xixnamik. ToTajtsin xkuelita ijkuak ijkon kichiuaj. Miyekpa, akin auilnemij san ichtaka kichiuaj, ijkon ken yakaj akin tlachteki. Akin ijkon kichiuaj kanaj kimachiliaj ika yejuin atl melak tsopelik pampa kinemiliaj xakaj kimita. San ika, san yejuamej nokajkayauaj pampa Jehová, akin kita nochi, xuelis kikajkayauaskej. Tla yakaj auilnemi, xok uelis nouikas iuan toTajtsin niman yejon yeskia ken itlaj tlen melak chichik (1 Cor. 6:​9, 10). w23.06 22 párrs. 7-9

Ijkuak tikchiua teoyotl, ¿xok tikijtoua tlen kisa ipan moyojlo? ¿Xok mitsyolpaktia titenojnotsas? Tla ijkin mopan nochiujtok, maka xnemili ika Jehová xok mitsmakatika iespíritu santo. Kemantika uelis ijkon topan nochiuas pampa titlajtlakolejkej. San ika, uelis titlanemilis itech tlen okichiuj apóstol Pablo. Yejua melak nokojtiliaya kichiuas ijkon ken Jesús maski kemantika kitekiyomakaya kichiuas tlen kuajli. Pablo nochipa onokojtili tenojnotsas maski kemantika xkuajli nomachiliaya. Maka xkauili mamitsyekana tlen tikmachilia. Xmokojtili nochipa xchiua tlen kuajli maski kemantika xmás tiknekis. Tla nochipa ijkon tikchiua, melak kuajli timomachilis (1 Cor. 9:16). w24.03 11, 12 párrs. 12, 13

Uelis tikimititiskej tokniuan tlakamej niman siuamej ika tikintlasojtlaj tla imiuan touikaj (2 Cor. 6:​11-13). Ipan miyekej tlanechikoltin, nemij tokniuan tlakamej niman siuamej akin xsan noijki ken tlanemiliaj niman xsan noijki ken okinmiskaltijkej. ¿Tlenon techpaleuis más matikintlasojtlakan nochimej? Tla tikitaj tlen kuajli kichiuaj. Ijkuak tikimitaj tokniuan ken Jehová kimita, uelis tikimititiskej ika tikintlasojtlaj. Ijkuak panotos ueyi tlajyouilistli, melak nonekis matikintlasojtlakan tokniuan. ¿Kenon Jehová techtlajpiyas ijkuak peuas ueyi tlajyouilistli? Matitlanemilikan itech tlen Jehová okijli ikalpan ijkuak kixoxotoniskia Babilonia: “Xuiya, nokalpan, xkalaki tlaijtik ipan mocuartos, niman xkintsakua mopuertas tla yotikalak. Xmiyana san se achijtsin hasta ijkuak mapano kualankayotl” (Is. 26:​20, TNM). Kanaj tejuamej noijki nonekis ijkon tikchiuaskej ijkuak panotos ueyi tlajyouilistli. w23.07 6, 7 párrs. 14-16

Makitakan oksekimej ika titeasikamati. Uelis timotlajtoltis: “¿Oksekimej kinemiliaj ika niteasikamati niman xnimantsin nikualani? ¿Nikuelita nikinkakis oksekimej niman ijkuak niueli, nikchiua ijkon ken nechijliaj?”. Tla más tokojtiliaj titeasikamatiskej, más tikchiuaskej ijkon ken Jehová niman Jesús. Ijkuak itlaj nopatlas ipan tonemilis, noneki tikasikamatiskej ika noijki nonekis tikpatlaskej seki tlen tikchiuayaj. Tinochimej uelis san nimantsin tikualoskej, xok tikpiyaskej tlen ika topanoltiskej noso políticos kichiuaskej itlaj tlen kipatlas ken tinemij. Niman nochi yejuin uelis kichiuas matikixnamikikan itlaj tlen xtikchiayaj (Ecl. 9:11). Noijki, uelis ouijtika tikitaskej ijkuak techpatiliaj totekiyo ipan ikalpan Jehová. Maski ijkon, uelis titlaxikoskej tla tikchiuaj yejuin: 1) tla tikasikamatij ika yonopatlak tonemilis, 2) tla xtitlanemiliaj itech tlen yeuejkaui otikchiujkej, 3) tla titlanemiliaj itech tlen kuajli niman 4) tla tikinpaleuiyaj oksekimej. w23.07 22 párrs. 7, 8

Ijkuak Daniel telpochtli katka, babilonios okajsikej niman okuikakej Babilonia. Maski san telpochtli katka, miyekej melak omojkatlachixkej ijkuak okitakej Daniel. Babilonios okitakej ika kualtsin tlachiaya, xitlaj kipolouaya ipan itlalnakayo niman ika ualeuaya ipan se familia akin melak ueyixtoyaj (1 Sam. 16:7). Ika yejon, okinejkej kimachtiskej niman ijkon teuan maueyixto ne Babilonia (Dan. 1:​3, 4, 6). Jehová kitlasojtlaya Daniel pampa itech yolmelajkanemiya. Ijkon tikijtouaj pampa ijkuak Daniel kipiaya kanaj 20 xiuitl, Jehová okiteneuj imiuan sekimej itekipanojkauan akin youejkauj yoyolmelajkanenkaj niman yokitekichiuilijkaj, ken Noé niman Job (Gén. 5:32; 6:​9, 10; Job 42:​16, 17; Ezeq. 14:14). Niman Jehová nochipa okitlasojtlak Daniel, akin melak ouejkauj onen niman melak kualtsin tlen ipan onochiuj (Dan. 10:​11, 19). w23.08 2 párrs. 1, 2

Ijkuak tikneki tikmokouilis se motocicleta tikita tla nochi kuajli kipiya niman kuajli tikmatstokej ika tikonitaskia yejon motocicleta achto tijkouas. Noijki uelis ijkon tikchiuaskej ijkuak tikamapouaskej niman tomachtiskej Biblia. Tla tejuamej san isiujkan tikamapouaj, san tiueliskej “on tlen semi xouijtikaj de itemachtiluan Dios” (Heb. 5:12). Niman, ijkon ken tikonitaskiaj tla motocicleta tlen tijkouaskej nochi kuajli kipiya, noijki noneki kuajli tomachtiskej nochi Biblia niman ijkon tikasikamatiskej. Tla tiknekij kuajli tomachtiskej Biblia, noneki tikitaskej kenon notlajtolnamiki nochi tlen kijtoua. Xsan noneki tikmatiskej tlenon tikneltokaj, noijki noneki tikmatiskej tleka tikneltokaj. Tla tiknekij kuajli tikasikamatiskej nochi tlen temachtia Biblia, noneki tomachtiskej hasta tlen más ouijtika. Apóstol Pablo okimijli nochimej tokniuan manokojtilikan kuajli nomachtiskej iTlajtol toTajtsin niman ijkon ueliskia kasikamatiskej “kech sanoyej patlauak, niman ueyak, niman uejkatlan, niman tlakpak” tlen temachtia iTlajtol toTajtsin. Yejuin kinpaleuiskia machikaujto intlaneltokil (Efes. 3:​14-19). Tejuamej noijki noneki ijkon tikchiuaskej. w23.10 18 párrs. 1-3

Biblia kinteneua miyekej akin xonosiaujkaujkej. ¿Tleka xtimomachtia intech yejuamej? Matikonteneuakan David. Yejua melak telpochtli katka ijkuak okitlapejpenijkej para tekiuajtis Israel. San ika, ononek kichias miyek xiujtin para uelis tekiuajtis. Simeón niman Ana chikauak okitekichiuilijkej Jehová niman kichiatoyaj Mesías (Luc. 2:​25, 36-38). Ijkuak timomachtis intech yejuamej, xmotlajtolti: “¿Tlenon okipaleui maka manosiaujkaua? ¿Kenon okipaleui pampa ijkon okichiuj? ¿Kenon noijki uelis ijkon nikchiuas?”. Noijki uelis miyek tomachtiskej intech akin onosiaujkaujkej (1 Sam. 13:​8-14). Uelis totlajtoltiskej: “¿Tleka onosiaujkaujkej? ¿Kenon okimijtlako pampa ijkon okichiujkej?”. w23.08 25 párr. 15

Apóstol Pedro xkeman onosiaujkauj pampa kinekiya yolmelajkanemis itech Jesús. Sejpatipan, ijkon okiteititi ijkuak Jesús okijto itlaj tlen inomachtijkauan xokasikamatkej (Juan 6:68). Miyekej okikaujkej Jesús niman xokichiakej makintomili tlenon kijtosnekiya tlen okimijlika. San ika, Pedro xokikauj. Yejua, ijkin okijli Jesús imixpan nochimej: “San motlajtoltsin yejuan tikijtoua yejua kitemaka nemilistli yejuan para nochipa”. Jesús yejua kimatstoya ika Pedro niman oksekimej iapóstoles kitlalkauiskiaj. Maski ijkon, okiteititi ika kineltokaya ika Pedro itech melajkanemiskia (Luc. 22:​31, 32). Jesús kimasikamatiya inomachtijkauan, ika yejon, okijto: “Nemoespíritu kineki kichiuas kuajli, pero nemonakayo xkojtik” (Mar. 14:38). Yejua ika, maski Pedro okijto ika xkixmatiya Jesús, xkeman okinemili tla Pedro xueliskia nopatlas. Sakin ika oyoliuj, Jesús ouajnonexti ixpan Pedro. Yejua ijkon okichiuj kanaj ijkuak Pedro san iselti nemiya (Mar. 16:7; Luc. 24:34; 1 Cor. 15:5). Kuajli tikmatstokej ika yejuin okipaleui apóstol Pedro maka melak manajmana. w23.09 22 párrs. 9, 10

ToTajtsin kintlapopoluiya intlajtlakoluan akin itech tlaneltokaj niman kimita ika yolmelajkej ipampa intlaneltok (Sal. 32:​1, 2). Maski toTajtsin okijto ika Abrahán, David niman oksekimej itekipanojkauan yolmelajkej katkaj, yejuamej ok nopopolouayaj niman tlajtlakolejkej katkaj. San ika, ijkuak toTajtsin kitaya tlen kichiuayaj akin xkitekichiuiliayaj, okijto ika itekipanojkauan kentla xkipiyaskiaj tlajtlakojli pampa itech tlaneltokayaj (Efes. 2:12). Ipan carta tlen apóstol Pablo okimijkuilouili romanos, kuajli kijtoua ika tla tiknekij touikaskej iuan Jehová noneki itech titlaneltokaskej. Abrahán niman David ijkon okichiujkej, niman tejuamej noijki uelis ijkon tikchiuaskej. w23.12 3 párrs. 6, 7

Techyolpaktia ika tinochimej akin tikchiuaj ken Cristo uelis tikmakaskej Jehová se uentli. ¿Kenon uelis tikchiuaskej yejuin? Tla kuajli tijkuij totiempo, tokojtilis niman tlen tikpiyaj para tikpaleuiskej iTekiuajyo toTajtsin. Tla tikmakaj Jehová tlen más kuajli tikpiyaj, tikteititiskej ika tiktlasojkaitaj pampa ueli tiktekichiuiliaj. Apóstol Pablo kiteneua seki tlemach tlen noneki tikchiuaskej niman ijkon nochipa tiktekichiuiliskej toTajtsin (Heb. 10:​22-25). Yejua okijto ika noneki nochipa matiknotsakan Jehová, matikimijlikan oksekimej itech tlen tikseliskej ika tlayekapan niman matosentlalikan imiuan tokniuan, “niman más ma toyoleuakan pampa tikmatij ika ye nisiu uajlas toTEKO”. Ipan itlamiyan Apocalipsis, iiluikaktekitkauj Jehová kijtoua: “San Dios xmauistili”. Yejua okpatipan okijto niman ijkon techititis ika yejuin melak ueyi kijtosneki (Apoc. 19:10; 22:9). Maka keman matikilkauakan tlen yotiuelkej itech iteopan Jehová niman nochipa matiktlasojkaitakan pampa ueli tikueyichiuaj toueyiTajtsin. w23.10 29 párrs. 17, 18

Tinochimej tiknekij tikchiuaskej yejuin: “Matitotlajsojtlakan inuan oksekimej”. San ika, xnoneki tikilkauaskej tlen Jesús okijto: “Miyekej xok notlajsojtlaskej inuan oksekimej” (Mat. 24:12). Ika yejuin tlajtoltin Jesús xkijtotoya tla inomachtijkauan xok notlasojtlaskiaj. Ipan yejuin tonaltin miyekej xok notlasojtlaj, ika yejon, melak noneki totlajpiyaskej niman ijkon xtechmauaskej. Aman, matiknankilikan yejuin: ¿kenon uelis tikmatiskej tla yemelak tikintlasojtlatokej tokniuan? Tla tiknekij tikmatiskej tla ok tikintlasojtlaj tokniuan, noneki tikitaskej tlen tikchiuaj ijkuak itlaj panoua (2 Cor. 8:8). Apóstol Pedro okijto: “In yejua más ueyi kijtosneki. Sanoyej xmotlajsojtlakan iuan oksekimej pampa tla melauak nentetlajsojtlaj nenkitlapojpoluiskej yejuan mechchiuilia tlen xkuajli [noso ika nemotlasojtlalis nenkintlapachoskej intlajtlakoluan oksekimej, TNM]” (1 Ped. 4:8). Kuakon, ijkuak tokniuan nopopolouaj noso techyolkokouaj, ijkuakon uelis tikimititiskej tla melauak tikintlasojtlaj. w23.11 10 párrs. 12, 13

Tla tikintlasojtlaj san sekimej tokniuan ipan totlanechikol, xtiktlakamatstoskiaj Jesús. Yemelak, kanaj uelis más kuajli touikaskej imiuan sekimej tokniuan ipan totlanechikol, ijkon ken Jesús más kuajli onouikak san iuan sekimej inomachtijkauan (Juan 13:23; 20:2). San ika, apóstol Pedro otechilnamikti ika noneki tikimititiskej nochimej tokniuan kenon sajnoye tikintlasojtlaj. Yejuin kijtosneki ika tikintlasojtlaskej ijkon ken tikintlasojtlaskiaj tochanejkauan (1 Ped. 2:17). Pedro okijto: “Sanoyej xmotlajsojtlakan inuan oksekimej ikan nochi nemoyojlo” (1 Ped. 1:22). Ijkuak nikan noijtoua “sanoyej”, kijtosneki ika noneki tiktlasojtlas akin ouijtika tikitas tiktlasojtlas. San matontlanemilikan itech yejuin. ¿Tlenon kichiuaskia yakaj tla itlaj kichiuiliaj noso kikualaniaj? Kanaj kinekiskia notlakuepiltis niman xkiteititiskia ika tetlasojtla. San ika, yejon xkiyolpaktiskia Jehová, ijkon ken Jesús okimachti Pedro (Juan 18:​10, 11). Apóstol Pedro okijkuilo: “Tla yakaj itlaj mechchiuilis tlen xkuajli, maka no ijki nenkuepiltiskej, noso tla yakaj mechteneuilia on tlen xkuajli, maka no nenkiteneuiliskej on tlen xkuajli. Yej xkuepiltikan ikan tlatiochiualistli” (1 Ped. 3:9). Tla tejua sajnoye titetlasojtla, kualtsin titenotsas niman titetlakaitas. w23.09 29 párrs. 9-11

Melak temojkatlachialti kenon nimantsin noskaltia se konetsintli maski xitlaj kichiua. San ika, akin tikchiuaj ken Cristo noneki itlaj tikchiuaskej niman ijkon chikaujtos totlaneltokil (1 Cor. 13:11; Heb. 6:1). Tla tiknekij machikaujto totlaneltokil, noneki kuajli touikaskej iuan Jehová. Noijki noneki ika iespíritu santo matechpaleui matikchiuakan tlen kuajli, matikitakan kenon kuajli tikchiuaskej se tekitl niman matikchiuakan tlen techpaleuis ika tlayekapan (Prov. 1:5). Ijkuak Jehová okichijchiuj nochi tlen onka, yejua okichijchiuj se tlakatl niman se siuatl (Gén. 1:27). Tikmatij ika tlakamej niman siuamej tlamantik ken tlachijchiujtin, san ika, xsan yejon. Jehová yokinmakak tlamantik tekitl, niman para kuajli kitlakamatiskej tlen kinnauatia noijki noneki tlamantik tlemach kichiuaskej (Gén. 2:18). w23.12 18 párrs. 1, 2

Jesús kinekiya ika oksekimej makitekitiltikan itoka iTaj. Sekimej tlayekankej ipan tlaneltokiltin kinemiliayaj ika xnonekiya tikijtos itoka toTajtsin pampa melak chipauak. San ika, Jesús kimatstoya ika tlen kineltokayaj yejuin tlayekankej xnesiya ipan Biblia, ika yejon, yejua nochipa okitekitilti itoka iTaj niman okiueyiteneuj. Matontlanemilikan itech tlen okichiuj Jesús kampa chantiyaj gerasenos. Yejua okipajti se tlakatl akin kinpiaya demonios. Akin ompa chantiyaj melak onomojtijkej niman okitlajtlanilijkej Jesús mauiya (Mar. 5:​16, 17). San ika, Jesús kinekiya nochimej makixmatikan itoka Jehová. Ika yejon, okijli yejon tlakatl makiteijli ika Jehová okipajti, niman ika xyejua akin okichiujka yejon milagro (Mar. 5:19). ToTekiuaj, Jesús, kineki matikchiuakan ijkon ken yejua. Kineki nochimej matikinmachtikan kenon itoka iTaj (Mat. 24:14; 28: 20). Ijkuak ijkon tikchiuaj, melak tikyolpaktiaj Jesús. w24.02 10 párr. 10

¡Melak kualtsin ika tinemij ipan ikalpan Jehová! Ipan yejuin tonaltin panoua miyek tlen xkuajli, san ika, Jehová yotechinmakak tokniuan akin melak techpaleuiyaj (Sal. 133:1). Jehová noijki techijlia tlenon uelis tikchiuaskej niman ijkon uelis tiyolpakiskej imiuan tofamilia (Efes. 5:​33–6:1). Niman noijki techmaka tlamachilistli tlen techpaleuiya maka san matiknemilijtokan tlen xkuajli niman matiyolpakikan. Maski ijkon, melak noneki matokojtilijtokan para nochipa tiktekichiuiliskej Jehová. ¿Tleka? Pampa kemantika sekimej kichiuaj itlaj noso kijtouaj itlaj tlen techyolkokoua. Noijki, kemantika topopolouaj niman yejon noijki techajmana, niman más tajmanaj tla miyekpa ijkon topopolouaj. Noneki matiktekichiuilijtokan Jehová ijkuak panos yejuin: 1) ijkuak se tokniuj techyolkokos, 2) ijkuak toueuentsin noso tosiuauj kichiuas tlen xtikuelitaj niman 3) ijkuak tajmanaskej pampa otopopolojkej. w24.03 14 párrs. 1, 2

Kemantika tijkakis kenon sekimej tokniuan más chikauak kitekichiuiliaj Jehová. Sekimej yoyajkej ipan Tlamachtijli tlen kiseliaj Akin Tenojnotsaj itech iTekiuajyo toTajtsin noso sekimej yotlapaleuitoj kampa xmás nemij tokniuan. ¿Tejua noijki uelis ijkon tikchiuas? Tla kema, ¡ijkon xchiua! Itekipanojkauan toTajtsin nochipa kitejtemouiliaj kenon más chikauak tenojnotsaskej (Hech. 16:9). San ika, tla amantsin tejua xtiueli ijkon tikchiua, maka xnemili ika xtlaj tikchiujtika. Xkilnamiki ika más noneki matitlaxikokan, niman tejua ijkon tikchiujtika (Mat. 10:22). Noijki, maka xkilkaua ika Jehová melak yolpaki ika tikchiua tlen tiueli para tiktekichiuilis, niman yejuin mitspaleuis xchiua ijkon ken Jesús sakin ika yotimoapolakti (Sal. 26:1). w24.03 10 párr. 11

ToTajtsin iluikakchane techijlia ika techtlapopoluis tla toyolkuepaj (Sal. 86:5). Ika yejon, tla yotoyolkuepkej, kuajli matikmatstokan ika Jehová yokichiuj tlen yokijto: yejua yotechtlapopolui. Matikilnamikikan ika yejua techasikamati niman xkeman techtlajtlaniliskia tlen xuelis tikchiuaskej. Maski tla ueli chikauak tiktekichiuiliaj noso xmás tiuelij, matikilnamikikan ika Jehová melak kipatiojkaita tla tiktekichiuiliaj ika nochi toyojlo. Matitlanemilikan intech itekipanojkauan Jehová akin okitekichiuilijkej ika nochi inyojlo. Oksejpa matikteneuakan apóstol Pablo. Yejua uejka yaya para tenojnotsas niman otlapaleui manochijchiuakan tlanechikoltin, niman miyek xiuitl ijkon okichiuj. San ika, sakin, xok ouel otenojnots ken kichiuaya. ¿Kijtosneki yejon ika Jehová xok okiyolpakti tlen kichiuaya? Ka, Pablo ok kitekichiuilijtoya ika nochi iyojlo niman Jehová ok kiteochiujtoya (Hech. 28:​30, 31). Tla ijkin topan nochiua niman xok tiuelij chikauak tiktekichiuiliaj Jehová, matikilnamikikan ika yejua kita tla tiktekichiuilijtokej ika nochi toyojlo. w24.03 27 párrs. 7, 9

Jesús okimititi inomachtijkauan ika nonekiya miyekpa kichiuaskej teoyotl. Ijkuak yejua otenojnotstinen, miyekpa okichiuj teoyotl. Nonekiya kixelos tiempo para kichiuas teoyotl pampa nochipa kipiaya miyek tekitl niman miyekej konitayaj (Mar. 6:​31, 45, 46). Saniman nokuiteuaya niman ijkon tlajtos iuan iTajtsin. Sejpatipan, nochi yeuajli okinots iTajtsin pampa nonekiya kitlapejpenis itlaj tlen ueyi kijtosnekiya (Luc. 6:​12, 13). Niman ipan yeuajli ijkuak Jesús mikiskia, yejua miyekpa okinots Jehová pampa kimatstoya ika kixnamikiskia tlen melak ouijtika (Mat. 26:​39, 42, 44). Tlen Jesús okichiuj techmachtia ika maski tikpiyaskej miyek tekitl, noneki tikxeloskej tiempo para tiknotsaskej Jehová. Ijkon ken Jesús, kanaj noneki tikitaskej kemanon tikchiuaskej teoyotl: kanaj uelis más saniman tokuiteuaskej, xnimantsin tikochiskej ika tlayoua niman ijkon tiknotsaskej Jehová. Tla ijkon tikchiuaj, tikititiskej Jehová ika melak tikpatiojkaitaj ika techkauilia matiknotsakan. w23.05 3 párrs. 4, 5

Ika tlajtojli griego, yejuin tlaxelojli teasikamachiltia ika Jehová melak kintlasojtla tlapejpeniltin pampa kijtoua ika itlasojtlalis yeskia ken se atentli kampa chikauak notlalojtika atl. Niman tlapejpeniltin kuajli kimatstokej yejon (Jud. 1). Yejuamej nomachiliaj ijkon ken okijto apóstol Juan: “Xmatikan kenijki sanoyej techtlajsojtla Dios toTajtsin, hasta techtokayotiaj tiikoneuan Dios, niman melauak tiikoneuan” (1 Juan 3:1). San ika ¿Jehová san kintlasojtla tlapejpeniltin? Ka, amantsin tikitaskej kenon Jehová kimititia nochimej itekipanojkauan ika kintlasojtla. Jehová otechititi ika melak techtlasojtla ijkuak okitemakak iKonetsin topampa (Juan 3:16; Rom. 5:8). w24.01 28 párrs. 9, 10

Yejuin tlaxelojli techititia tlenon okichiuj David niman ijkon xnomojtis maski ueliskia kimiktiskiaj: yejua otlanemili itech tlen Jehová kichiuaskia ipampa ika tlayekapan. David kimatstoya ika toTajtsin kimakixtiskia ijkuak nonekiskia. Matikilnamikikan ika Jehová yokijtojka ika David tekiuajtiskia ne Israel (1 Sam. 16:​1, 13). Niman noijki, David kimatstoya ika Jehová yemelak kichiuaskia tlen yokijtojka. ¿Tlenon yokijto toTajtsin kichiuas topampa? Jehová xkijtoua tla aman xtikixnamikiskej tlen ouijtika. San ika, kema kijtoua ika ipan yenkuik tlaltikpaktli kipopolos nochi tlen xkuajli tikixnamiktokej (Is. 25:​7-9). Kuajli tikmatstokej ika toTajtsin melak kojtik niman ika uelis kinyolitis akin yomijkej, uelis techpajtis niman uelis kinpopolos nochimej totlauelikniuan (1 Juan 4:4). w24.01 6 párrs. 12, 13

Matiknemilikan tleka otosentemakakej niman otoapolaktijkej. Otikchiujkej yejuin pampa tiknekiyaj tiktekichiuiliskej Jehová. Xkilnamiki tlenon omitspaleui niman ijkon tikmatis ika timomachtijtoya tlen melauak. Otikixmat Jehová niman otikitak ken moTajtsin akin nemi iluikak, otiktlakaitak niman opeuj más tiktlasojtla. Ochikauj motlaneltok niman yejon okichiuj xmoyolkuepa itech tlen xkuajli yotikchiujka. Tejua otijkauj ika tikchiua tlen Jehová kitlauelita niman opeuj tikchiua tlen yejua kuelita. Otiyolseuj ijkuak otikmat ika toTajtsin yomitstlapopoluijka (Sal. 32:2). Otikijto tias tlanechikoltin niman tikimijlis oksekimej nochi tlen kualtsin yotiuelka. Aman ika yotimosentemakak niman yotimoapolakti tinejnentiuj ipan yejon ojtli tlen teuika kampa nemilistli niman xtikneki tijkauas yejon ojtli (Mat. 7:​13, 14). Timelajkanemi itech Jehová, tikueyichiua niman tikintlakamati itlanauatiluan. w23.07 17 párr. 14; 19 párr. 19

Tla titlanemiliaj itech tlen otikijlijkej Jehová ijkuak otosentemakakej, techpaleuis matikxikokan tlatlatalistin. San matikteneuakan yejuin: ¿tejua tikixuetskiliskia yakaj akin yononamikti? ¡Ka, yejon xtikchiuaskia! Tejua tikmatstika ika yejon xkuajli niman yotikijli Jehová ika xkeman tikchiuas tlen xkuelita. Tla xtijkauilia ika se xkuajli eleuilistli mapeua manoskalti ipan moyojlo, sakin xnonekis iuan timoxijxikos. Xok oksejpa tias ipan “iminojui on xkuajkualtin tlakamej” (Prov. 4:​14, 15). Matikmapeuakan nochi tlen xkuelita Jehová pampa tiknekij tikyolpaktiskej, ijkon ken Jesús okichiuj (Mat. 4:10; Juan 8:29). Tejuamej tikteititiskej ika nochipa tiknektokej tikchiuaskej ijkon ken Jesús tla titlaxikouaj ijkuak itlaj tikixnamikiskej noso ijkuak tikinpiyaskej tlatlatalistin. Niman kuajli tikmatstokej ika Jehová techpaleuis matitlaxikokan. w24.03 9, 10 párrs. 8-10