Octubre

¿Ouijtika tikita titetlakamatis? Kemantika, tekiuaj David ijkon okimachili. Ika yejon, okitlajtlanili toTajtsin: “Xnechmaka notlamachilis yejuan nechpaleuis para nochipa nimitstlakamatis” (Sal. 51:12). Maski David kitlasojtlaya Jehová, kemantika ouijtika okitak tetlakamatis, niman tejuamej noijki ijkon topan nochiua. ¿Tleka? Kachtopa, pampa titlajtlakolejkej. Ika ome, pampa Satanás nochipa texchiualtijtika matiteixnamikikan ijkon ken yejua okichiuj (2 Cor. 11:3). Niman, ika yeyi, pampa ipan yejuin tonaltin miyekej tlaltikpakchanejkej melak teixnamikij (Efes. 2:2). Kuakon, pampa titlajtlakolejkej noneki tokojtiliskej niman ijkon xtikchiuaskej ken oksekimej akin kinyekana Satanás. Noijki, noneki tikchiuaskej nochi tlen noneki niman ijkon tiktlakamatiskej Jehová niman akin yokintekitlali para matechyekanakan. w23.10 6 párr. 1

¿Tlenon techmachtia yejuin milagro tlen Jesús okichiuj? Techmachtia ika noneki tiyolyemankej yeskej. Jesús xokiteijlitinen ika okichijchiuj vino ika se milagro. Yejua xkeman kimijlitinemiya oksekimej nochi tlen kuajli kichiuaya, ka, yejua yolyemanki katka niman nochipa kiueyiteneuaya iTajtsin (Juan 5:​19, 30; 8:28). Tla tikchiuaj ijkon ken Jesús, tiyolyemankej yeskej niman xtikteijlitinemiskej tlen kuajli yotikchiujkej. Maka matoueyimatikan, yej nochipa matikueyiteneuakan toueyiTajtsin akin tiktekichiuiliaj (Jer. 9:​23, 24). Matikilnamikikan ika xueliskia tikchiuaskiaj itlaj tlen kuajli tla Jehová xtechpaleuiskia, ika yejon, noneki nochipa matikueyiteneuakan (1 Cor. 1:​26-31). Yakaj akin yolyemanki xkichia ika oksekimej makiueyiteneuakan ijkuak kinpaleuiya oksekimej. Yejua kuajli nomachilia pampa kimatstok ika Jehová kita niman kipatiojkaita tlen kichiua (uelis tikitas Mateo 6:​2-4; Hebreos 13:16). Jehová melak yolpaki ijkuak kita ika tiknekij tiyolyemankej yeskej ijkon ken Jesús (1 Ped. 5:6). w23.04 4 párr. 9; 5 párrs. 11, 12

Ika iespíritu santo, Jehová okichiuj ika apóstol Pablo makimijli akin kichiuayaj ken Cristo ika noneki tlanemiliskej intech oksekimej. ¿Kenon uelis tikchiuaskej tlen okijto apóstol Pablo ijkuak tiaskej ipan totlanechikol? Matikilnamikikan ika oksekimej noijki kuelitaskiaj tlanankiliskej. Matitlanemilikan itech yejuin, ¿xmelak ika ijkuak timonojnotsa iuan moamigos tikinkauilia matlajtokan niman xsan nochipa tejua titlajtoua? Noijki ijkon panoua ipan totlanechikoluan, tiknekij ika miyekej tokniuan matlanankilikan. Niman uelis más tikinyolchikauaskej tokniuan tla tikinkauiliaj matlanankilikan (1 Cor. 10:24). Kuakon, xnoneki tiuejkauiskej ijkuak tejuamej titlanankiliskej. Niman xsan noneki xtiuejkauiskej, noijki noneki xnochi tikijtoskej tlen uajlauj ipan párrafo. Tla tejua nochi tikijtoua tlen onka ipan párrafo, oksekimej xok kimatiskej tlenon kijtoskej. w23.04 22, 23 párrs. 11-13

Matikilnamiktokan ika melak noneki tikinpaleuiskej oksekimej niman más ijkon tikchiuaj ijkuak titenojnotsaj. Tejuamej titlajtouaj imiuan akin tlamantik tlaneltokaj niman imiuan akin oksekan ualeuaj, ika yejon, melak noneki matikpapatlatiakan ken titenojnotsaj. ¿Tleka techpaleuis tla tikitaj tlen okichiuj apóstol Pablo? Pampa yejua kipapatlatiaya ken tenojnotsaya. Jesús okitlali ken apóstol para miyekan matenojnotsa (Rom. 11:13). Yejua ika, Pablo okinnojnots judíos, griegos, akin tlamachilisejkej, akin xmás onomachtijkej, akin uejueyixtokej niman tekiuajkej. Pablo okipapatlatiaj tlen kimijliaya akin kinnojnotsaya pampa kinekiya ajsis ipan inyojlo (1 Cor. 9:​19-22). Ijkuak kinnojnotsaya, tlanemiliaya itech kanon ualeuayaj niman tlenon kineltokayaj. ¿Tlenon techmachtia yejuin? Ika tla kachtopa kuajli tiknemiliaj tlenon tikimijliskej akin tikinnojnotsaskej, yejuamej más kuajli techkakiskej. w23.07 23 párrs. 11, 12

Se akin yolyemanki xkijtosneki tla xkojtik. Noneki melak timokojtilis niman ijkon xtikualanis ijkuak tikixnamikis tlen ouijtika. Yolyemanilistli ualeua itech itlakilyo espíritu santo (Gál. 5:​22, 23). Ipan Biblia tlajtojli griego “yolyemanilistli” yeuejkaui nokuiya niman ijkon noteititis kenon se caballo akin melak mojki okimajmachtijkej maka nimantsin manotlalojteua. ¡San xkonnemili kenon yejon caballo onopatlak! Kachtopa nimantsin notlalojteuaya niman aman xok ijkon kichiua, san ika, ok kojtik. ¿Niman tejuamej? ¿Kenon uelis tikteititiskej ika tiyolyemankej niman tikojtikej? Noneki tiktlajtlaniliskej toTajtsin espíritu santo niman ijkon uelis tiyolyemankej yeskej pampa san tejuamej xuelis tikchiuaskej. Niman yonoitak ika kema uelis tiyolyemankej yeskej. San matikonteneuakan yejuin, miyekej iteixpantijkauan Jehová kuajli okinnankilijkej akin san kinekiyaj kinkualaniskej, niman yejon yokinpaleui oksekimej kuajli matlanemilikan totech (2 Tim. 2:​24, 25). w23.09 15 párr. 3

Ipan se tlatlachalistli, apóstol Juan okitak ika “24 ueuetkej tlayekankej” kiueyichiujtoyaj Jehová ne iluikak. Niman kijtotoyaj ika san yejua kinamiki kiselis “ueyilistli, tetlakaitalistli, niman poder” (Apoc. 4:​10, 11). Iluikaktekitkej nemij ne iluikak iuan Jehová niman kuajli kixmatij. Kitaj nochi tlen kuajli kichiua. Niman, ika yejon, kiueyichiuaj niman kiueyiteneuaj (Job 38:​4-7). Tejuamej noijki uelis tikueyiteneuaskej Jehová ijkuak iuan titlajtoskej. Niman, ijkon tikchiuaj ijkuak tikijliaj tlenon tikuelitaj itech yejua niman tleka melak tiktlakaitaj. Ijkuak tikpouaskej niman ijkuak tomachtiskej Biblia, matokojtilikan matikitakan tlenon tikuelitaj itech nochi tlen kualtsin kichiua Jehová (Job 37:23; Rom. 11:33). Sakin, ijkuak yotitlanemilijkej itech tlen kualtsin kichiua Jehová, matikijlikan tlenon tikmachiliaj. Noijki uelis tikueyiteneuaskej Jehová ijkuak techpaleuiya noso ijkuak kinpaleuiya oksekimej tokniuan (1 Sam. 2:​1, 2). w23.05 3, 4 párrs. 6, 7

Ipan 1919, tlaneltokiltin tlen xmelajkej, noso Ueyixtika Babilonia, xok okikajkayauj ikalpan toTajtsin. Ijkuakon ouajnes “tekitketl” yolmelauak niman tlamachilise, yejuin okinpaleui akin kipiayaj kuajli inyojlo mauiyan ipan “yekojtli” (Mat. 24:​45-47; Is. 35:8). Pampa oksekimej okiyektlalijkej ojtli, akin opeuj ompa yauej ouel más okixmatkej Jehová niman tlen yejua kichiuas (Prov. 4:18). Noijki ouelkej onopatlakej niman ijkon kiyolpaktiskej Jehová. Yemelak, yejua kimatstoya ika xueliskia nimantsin nochi kikajkauaskej. Yejua ika, ika yolik yokuajchipaujtiaj ikalpan. ¡San matikonnemilikan kenon melak tiyolpakiskej ijkuak iuelis tikchiuaskej nochi tlen toTajtsin kuelita! Se ojtli uelis ijtlakauis tla xkiyektlaliaj. Desde 1919, yokuajyektlalijtiajkej “yekojtli”, niman ijkon uelis más miyekej kisaskej itech Ueyixtika Babilonia. w23.05 17 párr. 15; 19 párr. 16

Tokniuan itech Grupo akin Tlayekana kinmajmachtiaj sekimej tokniuan para makinpaleuikan ipan intekiyo. Kuajli matikmatstokan ika yejuin tokniuan kuajli yokinmachtijkej niman ueliskej kintlajpiyaskej itekipanojkauan toTajtsin akin nikan nokauaskej. Ijkuak nochimej tlapejpeniltin kinuikaskej iluikak, ipan itlamiyan ueyi tlajyouilistli, ikalpan toTajtsin ok kitekichiuilijtos Jehová nikan ipan tlaltikpaktli. Tejuamej xtlaj topan nochiuas pampa Jesucristo yejua akin techyekana. Maski ijkuakon techtlaueltokaskej itlauelikniuan toTajtsin, akin Biblia kintokayotia Gog de Magog, yejuamej xtlaj uelis texchiuiliskej nion xuelis kichiuaskej maka sa matikueyichiuakan Jehová (Ezeq. 38:​18-20). Kuajli matikmatstokan ika Jehová techmakixtis. Ipan se tlatlachalistli, Juan okitak se grupo kampa nemi “sanoyej miyek tlakatl”, ipan yejuin grupo nemij akin xyaskej iluikak, niman noijki okijlijkej ika yejuin grupo ouajkis “ipan on temojtij tlajyouilistli” (Apoc. 7:​9, 14). Kuakon, akin tiktekichiuiliaj toTajtsin xtlaj topan nochiuas. w24.02 5, 6 párrs. 13, 14

¿Tlenon uelis tikchiuaskej para Jehová matechmaka espíritu santo? Noneki tiktlajtlaniliskej. Noijki noneki tomachtiskej iTlajtol niman nochipa tinemiskej ipan ikalpan. Tla ijkon tikchiuaj, tikteititiskej ika toyekanaj ika espíritu santo (Gál. 5:​22, 23). Tla tiknekij ika Jehová matechmaka iespíritu santo, noneki tikchiuaskej tlen kuajli niman chipaujtos totlamachilis. Tla peua tiknemiliaj tlen xkuajli niman tikchiuaj, tikpoloskej iespíritu santo toTajtsin (1 Tes. 4:​7, 8). ¿Tlenon más noneki tikilnamikiskej? Pablo okijto: “Maka xchichiuakan [noso xkauilmatikan] on tiotlajtojli” (1 Tes. 5:20). Ijkuak ipan yejuin tlaxelojli kijtoua “tiotlajtojli”, kiteneujtika tlen toTajtsin kiteijlia itechkopa iespíritu. Kijtosneki ika onotekitilti iespíritu santo ijkuak onoteneuj tlenon nochiuas ipan itonal Jehová niman ika melak inisiuj. Tejuamej xtiknemiliaj ika ok uejkauis yejuin tonajli noso ika xtikitaskej ijkuak peuas Armagedón. Kuajli tikasikamatij ika sa achijtsin poliui para yejkos. Yejua ika, tokojtiliaj tinemiskej ika “yolchipaualistli niman yolkuajlilistli” (2 Ped. 3:​11, 12). w23.06 12 párrs. 13, 14

¿Tlenon nonekiskia kichiuas se tokniuj tla ijkuak kikuitika icelular noso itableta uajnesi se tlaixkopinajli kampa auilnemij? Noneki nimantsin oksekan ontlachias. Uelis techpaleuis tla tikilnamikij ika para tejuamej melak ueyi kijtosneki touikaskej iuan Jehová. Maski seki tlaixkopinaltin xkipiyaj pornografía, xnoneki tikimitaskej pampa ueliskia kichiuas matiknemilikan tlen tsokuiltik. Niman, ijkon tikchiuaj pampa xtiknekij nion achijtsin tiauilnemiskej ipan toyojlo (Mat. 5:​28, 29). David, se tlayekanketl akin ualeua Tailandia, kijtoua: “Nejua nikuelita ninotlajtoltis: ‘¿Kuelitas Jehová manikimitsto yejuin tlaixkopinaltin maski xkipiyaj pornografía?’. Yejuin nechpaleuiya kuajli maniktlapejpeni tlen nikchiuas”. Tla tiktlakaitaj Jehová niman xtiknekij tikyolkokoskej, xouijtika tikitaskej tiktlapejpeniskej tlen kuajli. w23.06 23 párrs. 12, 13

Ijkuak nikan kijtoua “tlaijtik ipan mocuartos”, kanaj kinteneujtika tlanechikoltin. Tla ijkuakon topaleuiyaj imiuan tokniuan, Jehová techtlajpiyas ijkon ken yokijto. Kuakon, xsan noneki tikinxikoskej tokniuan; noneki yemelak tikintlasojtlaskej. Tla xijkon tikchiuaj, kanaj xuelis timakisaskej. Nochimej melak tlajyouiskej ijkuak yejkos “iueyi tonal Jehová” (Sof. 1:​14, 15, TNM). Akin tiktekichiuiliaj Jehová noijki tikixnamikiskej tlen ouijtika. San ika, tla toyektlaliaj desde aman, uelis tiyolseujtoskej niman tikinpaleuiskej oksekimej. Tla titlaxikouaj, uelis tiyolmelajkanemiskej maski san tlenon tikixnamikiskej. Tla titeikneliaj, tiknekiskej tikinpaleuiskej tokniuan tla itlaj kinpoloua. Niman, pampa itikintlasojtlaskej uelis san sekan imiuan topaleuiskej. Jehová techmakas nemilistli tlen xkeman tlamis kampa “xokaman yakaj kelnamikis” nochi tlen xkuajli niman nochi tlen tetlajyouiltia (Is. 65:17). w23.07 7 párrs. 16, 17

Biblia miyekpa kijtoua ika itekipanojkauan toTajtsin melak yolchikaujkej. San ika, xnochipa ijkon onomachilijkej. Matitlajtokan itech tekiuaj David, yejua kemantika nomachiliaya yolchikauak niman melak kojtik ken se tepetl. San ika, kemantika xokimachili tla yolchikauak niman nomojtiaya (Sal. 30:7). Noijki, Sansón melak kojtik katka ijkuak Jehová kimakaya iespíritu. San ika, noijki kasikamatiya ika tla toTajtsin xkimakaya ikojtilis yejua nochiuaya “sano ijki ken oksekimej tlakamej” (Juec. 14:​5, 6; 16:17). ¿Tleka itekipanojkauan toTajtsin yolchikaujkej katkaj? Pampa Jehová kinpaleuiaya. Apóstol Pablo okasikamat ika nonekiya Jehová makipaleui (2 Cor. 12:​9, 10, TNM). Yejua noijki kemantika okualok (Gál. 4:​13, 14). Noijki, kemantika ouijtika kitaya kichiuas tlen kuajli (Rom. 7:​18, 19). Niman kemantika melak najmanaya niman kimachiliaya ika ueliskia kimiktiskej (2 Cor. 1:​8, 9). Maski ijkon, yejua okijto: “Pampa, ijkuak xnikojtik, ijkuakon más nikojtik”. ¿Tlenon okijtosnek? Ika yejua kimachiliaya ika oksejpa kojtik pampa Jehová kipaleuiaya. w23.10 12 párrs. 1, 2

Tla kemantika tikmachiliaj ika xmás titepaleuiyaj, matikilnamikikan ika Jehová yejua akin otechuajuikak ipan ikalpan (Juan 6:44). Yejua kuajli techixmatstok niman kita tlen kuajli tikchiuaj maski tejuamej xtikitaj (2 Crón. 6:30). Kuakon, ijkuak yejua techijlis ika melak titepaleuijkej, matikneltokakan (1 Juan 3:​19, 20). Kanaj sekimej ok totlajtlakolmakaj ipampa tlen xkuajli otikchiujkej ijkuak xitikixmatiyaj Jehová (1 Ped. 4:3). Oksekimej kanaj youejkaujkej ika kitekichiuiliaj Jehová, san ika, ok noxijxikouaj iuan tlen xkuajli kichiuasnekij. ¿Niman tejua? ¿Noijki timotlajtlakolmaka? Tla kema, maka melak xmajmana pampa sekimej itekipanojkauan Jehová noijki ijkon onomachilijkej, ken apóstol Pablo. Yejua melak noyolkokouaya pampa tlajtlakole katka (Rom. 7:24). Maski yonoyolkuepka itech nochi itlajtlakoluan niman yonoapolaktijka, yejua ijkin kijtouaya: “Xniueyixtikaj ken on oksekimej apóstoles”. Noijki okijto: “Nejua tej, más niueyi tlajtlakolej xken nochimej tlajtlakolejkej” (1 Cor. 15:9; 1 Tim. 1:15). w24.03 27 párrs. 5, 6

¿Tlenon techmachtia tlen xkuajli okichiuj tekiuaj Jehoás? Ika noneki tikintlapejpeniskej amigos akin matechpaleuikan, kijtosneki akin makitlasojtlakan Jehová niman makinekikan kiyolpaktiskej. Niman kema uelis tikinpiyaskej amigos akin iuejueyimej noso akin telpokamej niman ichpokamej. Xkilnamiki ika Jehoás más telpochtli katka xijkon ken Jehoiadá. Xtlanemili intech moamigos niman xmotlajtolti: “¿Nechpaleuiyaj más manitlaneltoka itech Jehová? ¿Nechpaleuiyaj manikintlakamati itlanauatiluan? ¿Kuelitaj tlajtoskej itech Jehová niman itech tlen nomachtiaj itech Biblia? ¿Kintlakaitaj itlanauatiluan? ¿Nexchikaujkanotsaj ijkuak ninopopoloua noso san nechijliaj tlen nikneki nijkakis?” (Prov. 27:​5, 6, 17). Tla moamigos xkitlasojtlaj Jehová, xtlaj ika mitspaleuiskej. San ika, tla moamigos kitlasojtlaj Jehová, xkinpatiojkaita pampa melak mitspaleuiskej (Prov. 13:20). w23.09 9 párrs. 6, 7

Yeuejkaui ipan alfabeto griego kachtopa letra itoka katka Alfa niman sa ika tlami letra itoka katka Omega. Kuakon, ijkuak Jehová kijtoua “nejua niachtoj niman nisa ika nochi” noso ika yejua Alfa niman Omega, techasikamachiltia ika ijkuak toTajtsin itlaj kipeualtia noijki kitlamiltia. Sakin ika Jehová okichijchiuj Adán niman Eva, okimijli: “Xtlaxinachokan niman xkimpiyakan miyekej nemokoneuan. Xtemiltikan in tlaltikpaktli, niman xkinmomaktikan [ . . . ] on yolkej” (Gén. 1:28). Ijkuak Jehová okijto tlenon kinekiya kichiuas, yeskia kentla okijto letra Alfa. Ajsiskia se tonajli ijkuak ikoneuan Adán niman Eva, akin tetlakamatiskiaj niman xok kipiyaskiaj tlajtlakojli, kitemiltiskiaj tlaltikpaktli niman kikuepaskiaj se xochitlalpan. Ipan yejon tonajli, Jehová kentla kijtos letra Omega. Ijkuak yejua otlan kichijchiua “on cielo niman on tlaltikpaktli niman nochi on tlajtlamach yejuan imimpan onkaj”, okichiuj itlaj tlen kiteititia ika yemelak kichiua tlen kijtoua. Nochi tlen toTajtsin yokijto kichiuas ipampa tlaltikpakchanejkej niman tlaltikpaktli, yemelak nochiuas. Ijkon panos ipan itlamiyan chikome tonajli (Gén. 2:​1-3). w23.11 4, 5 párrs. 13, 14

Judíos uejkauiskiaj kanaj naui metstli ika ajsiskiaj Israel, niman melak ouijtika kitaskiaj yaskiaj ipan yejon ojtli. San ika, Jehová okimijli ika yejua kiyektlaliskia ojtli kampa nojuitiskiaj. Judíos akin melajkanemiyaj itech Jehová kimatstoyaj ika más kinpaleuiskia tla nokuepayaj Israel, maski nonekiya kikauaskiaj tlen kipiayaj Babilonia. ¿Tleka? Pampa más kuajli kiueyichiuaskiaj Jehová. Ne Babilonia xonkatka se teopan kampa ueliskiaj kiueyichiuaskej Jehová. Israelitas xueliyaj tlauentlaliayaj ken kijtouaya Tlanauatijli tlen okimakajkej Moisés pampa xonkatka se tlaixpan niman xnemiyaj teopixkej akin ueliskiaj kichiuaskej yejon tekitl. Noijki, ne Babilonia más miyekej nemiyaj akin kinueyichiuayaj tajtsitsintin tlen xmelajkej niman akin kitlakamatiyaj Jehová niman itlanauatiluan san achijtsitsintin katkaj. Ika yejon, judíos akin kinekiyaj kiyolpaktiskej Jehová sa kinektoyaj oksejpa nokuepaskej Israel niman kiueyichiuaskej Jehová ijkon ken nonekiya. w23.05 14, 15 párrs. 3, 4

Tla tiknekij tinemiskej ipan tlauijli, noneki matechpaleui iespíritu santo toTajtsin. ¿Tleka? Pampa kemantika ouijtika tikitaskej tikchiuaskej tlen kuajli ipan yejuin tlaltikpaktli, kampa nochiua tlen melak tsokuiltik (1 Tes. 4:​3-5, 7, 8). Espíritu santo techpaleuis maka matitlanemilikan ken tlaltikpakchanejkej, akin tlanemiliaj ken Jehová xkuelita. Noijki techpaleuis matikijtokan tlen melauak, matikchiuakan tlen kuajli niman matiyolmelajkej (Efes. 5:9). Jesús okijto ika Jehová “kiminmakas Espíritu Santo on yejuan kitlajtlaniliskej” (Luc. 11:13). Kuakon, uelis tikseliskej espíritu santo tla tiktlajtlaniliaj Jehová. Noijki uelis tikseliskej tla tikonueyiteneuaj Jehová ipan tlanechikoltin imiuan tokniuan (Efes. 5:​19, 20). Tla tejuamej tikpiyaj espíritu santo, uelis tikchiuaskej tlen Jehová kuelita. w24.03 23, 24 párrs. 13-15

¿Noneki más titeijyouis niman xtimosiaujkauas? Tla kema, xtlajtlanili Jehová mamitspaleui. San akin kipiyaj iespíritu santo toTajtsin uelis teijyouiskej niman xnosiaujkauaskej (Gál. 5:​22, 23). Kuakon, matiktlajtlanilikan Jehová matechmaka iespíritu santo niman ijkon uelis titeijyouiskej niman xtosiaujkauaskej. Tla tikixnamiktokej itlaj kampa noneki tikteititiskej ika titeijyouiyaj niman xtosiaujkauaj, matiktlajtlanilikan Jehová más matechmaka iespíritu santo (Luc. 11:13). Noijki uelis tiktlajtlaniliskej Jehová matechpaleui matikitakan nochi ijkon ken yejua kita. Niman tla yotikchiujkej teoyotl, mojmostla matokojtilikan tikteititiskej ika titeijyouiyaj niman xtosiaujkauaj. Tla nochipa tiktlajtlaniliaj Jehová matechpaleui niman tla tokojtiliaj tikchiuaskej ijkon ken tiktlajtlaniliaj ipan toteoyouj, tikitaskej ika más titeijyouiskej niman xtosiaujkauaskej. Noijki techpaleuis tla titlanemiliaj intech akin Biblia kinteneua. Ipan Biblia tikinnextiaj miyekej akin okiteititijkej ika teijyouiyaj niman xnosiaujkauaj. Tla titlanemiliaj itech tlen okichiujkej, noijki uelis tikchiuaskej ijkon ken yejuamej. w23.08 22, 23 párrs. 10, 11

Jesús kuajli okititi apóstol Pedro ika Jehová kitlajpiyaskia. Ijkuak oyoliuj, Jesús okichiuj ika Pedro niman oksekimej apóstoles oksejpa makimasikan miyekej michimej (Juan 21:​4-6). Kuajli tikmatstokej ika yejuin milagro okititi Pedro ika Jehová ueliskia kimakas nochi tlen kipolouaya. Kanaj ijkuakon Pedro okilnamik ika Jesús okijto ika Jehová kintlajpiyaskia akin chikauak kitekichiuiliaj (Mat. 6:33). Yejua ika, Pedro chikauak otenojnots niman xsajnoye otekit. Ipan Pentecostés itech xiuitl 33 melak miyekej okinpaleui makasikamatikan iTlajtol toTajtsin (Hech. 2:​14, 37-41). Niman sakin okinpaleui miyekej samaritanos niman akin xjudíos manochiuakan inomachtijkauan Cristo (Hech. 8:​14-17; 10:​44-48). Kuajli nesi ika Jehová okitekitilti Pedro niman ijkon kichiuas ika oksekimej mauajlakan ipan ikalpan. w23.09 20 párr. 1; 23 párr. 11

Sejpa Daniel okiteititi ika yolchikauak katka ijkuak yopanoka kanaj ome xiuitl ika yokipopolojkaj Jerusalén. Tekiuaj Nabucodonosor okitemik se ueyi tlamachijchiuajli niman okimijli nochimej tlamachilisejkej akin nemiyaj Babilonia, noijki Daniel, ika makijlikan tlenon okitemik niman tlenon kijtosnekiya. Tla xkichiuayaj, nochimej kinmiktiskiaj (Dan. 2:​3-5). Daniel nonekiya nimantsin itlaj kichiuas; yejua “oyaj okitato on rey niman okiknotlajtlanilij ma kicha achijtsin para kipannextilis tlinon kijtosneki itemik” (Dan. 2:16). Para kichiuas yejuin nonekiya tlaneltokas niman yolchikauak yes. ¿Tleka ijkon tikijtouaj? Pampa Biblia xkijtoua tla Daniel kemantika yokiteijlika tlen kijtosneki tlen yakaj yokitemik. Yejua okintlajtlanili Sadrac, Mesac niman Abednego “para ma kitlajtlanilikan Dios iluikakchanej, para ma kimpaleui niman ma kinmachisti tlinon kijtosneki on tlen iyantikaj niman ichtaka onkaj de on temiktli” (Dan. 2:18). Jehová okinnankili niman okipaleui Daniel para makijli Nabucodonosor tlenon kijtosnekiya tlen okitemik. ¡Daniel niman iamigos omakiskej! w23.08 3 párr. 4

Matiknemilikan kenon techpaleuis tla titeijyouiyaj niman xtosiaujkauaj. Tla ijkon tikchiuaj, más tiyolpakiskej niman tiyolseujtoskej. Kuakon, tla titeijyouiyaj niman xtosiaujkauaj, techpaleuis maka matikualokan niman kuajli matomachilikan. Noijki techpaleuiya kuajli matouikakan imiuan oksekimej niman maka maonia tlauejli ipan tlanechikojli. Tla xnimantsin tikualanij ijkuak yakaj kichiua itlaj tlen xtikuelitaj, xueyiyas tlauejli (Sal. 37:8; Prov. 14:29). San ika, más techpaleuis pampa tikchiujtoskej ijkon ken toTajtsin niman itech tonisiuiskej. Ken yotikitakej, melak tepaleui tla titeijyouiyaj niman xtosiaujkauaj. Maski kemantika ouijtika ijkon tikchiuaskej, Jehová nochipa techpaleuis. Aman ika xiyejko itonal toTajtsin, uelis kuajli tikmatstoskej ika “toTEKO nochipa kincuidaroua yejuan kitlakaitaj niman yejuan kitlaliaj inyojlo ipan itetlajsojtlalis” (Sal. 33:18). Kuakon, tinochimej matokojtilikan titeijyouiskej niman xtosiaujkauaskej. w23.08 22 párr. 7; 25 párrs. 16, 17

Santiago okijto ika yejon tlakatl kiteititijtoskia ika tlen kichiua ika xtlaneltoka, maski yejua kijtoskia ika kema (Sant. 2:​1-5, 9). Santiago noijki otlajto itech yakaj akin kita ika se ikniuj xkipiya tlen ika notlakentis noso xkipiya tlenon kikuas, niman xtlaj kichiua para kipaleuis. Maski yejua kijtoskia ika tlaneltoka, ika tlen kichiua kiteititijtoskia ika itlaneltok xtlaj ika kipaleuiya (Sant. 2:​14-16). Santiago otlajto itech Rahab, niman ijkon kiteititis ika xsan noneki titlaneltokaskej, yej, noneki itlaj okse tikchiuaskej (Sant. 2:​17, 25). Yejuin siuatl yokitekakilijka tlen kijtouayaj itech Jehová niman kimatstoya ika kinpaleuijtoya israelitas (Jos. 2:​9-11). ¿Tlenon okichiuj niman ijkon kiteititis ika tlaneltoka itech Jehová? Yejua okinpaleui yejon omemej ichtakatlachixkej israelitas niman ijkon maka makinmiktikan. Yejua ika, ijkon ken Abrahán, toTajtsin okitak ika yejuin siuatl yolmelajki maski tlajtlakole niman xisraelita katka. Tlen Rahab okichiuj techititia ika melak noneki itlaj matikchiuakan niman ijkon tikteititiskej ika titlaneltokaj. w23.12 5 párrs. 12, 13

Akin tikchiuaj ken Cristo noneki tokojtiliskej kuajli tikasikamatiskej “hasta on tlajtlamach yejuan más ueyi kijtosnekij itech Dios”. Niman espíritu santo techpaleuis ijkon matikchiuakan (1 Cor. 2:​9, 10). ¿Tleka xtikchiua itlaj tlen más mamitsnisiui itech Jehová ijkuak moselti timomachtis? Miyek tlen uelis tikchiuas. Uelis tiktejtemos kenon Jehová yeuejkaui okimititi itekipanojkauan ika kintlasojtla niman kenon yejon kiteititia ika noijki techtlasojtla. Noijki, uelis timomachtis itech kenon okinnauati israelitas ika nonekiya kiueyichiuaskej niman kenon aman tejuamej tikueyichiuaj. Noso uelis timomachtis teotlajtoltin tlen tlajtouaj itech tlen okichiuj Jesús niman itech kenon otenojnots ijkuak nemiya nikan ipan tlaltikpaktli. Tikmatstokej ika melak tikuelitas timomachtis yejuin ika Índice de las publicaciones Watch Tower niman amatlajkuilojli Tlen kinpaleuiya ika nomachtiaj iteixpantijkauan Jehová. Yejuin tlen timomachtis mitspaleuis machikaujto motlaneltokil “niman tikmatis kenijki tikixmatis Dios” (Prov. 2:​4, 5). w23.10 18, 19 párrs. 3-5

Tlajtojli tlen okitekitilti apóstol Pedro ika griego “sanoyej” kijtosneki “itlaj tlen patlaui”. Sakin, ipan yejuin tlaxelojli kijtoua ika tla “sanoyej” totlasojtlaj, tikintlapachoskej intlajtlakoluan tokniuan. Kuakon, tlasojtlalistli yeskia ken se tlakentli tlen uelis tikpatlauas niman xsan tiktlapachos se noso ome tlajtlakojli, uelis tikintlapachos miyekej tlajtlakoltin. Ipan 1 Pedro 4:​8, tlajtojli tiktlapachos kijtosneki titetlapopoluis. Ijkon ken se tlakentli pitentsin ueli kitlapachoua itlaj tlen tsokuiltik, tlasojtlalistli uelis kitlapachos tlen xkuajli kichiuaj oksekimej ijkuak nopopolouaj. Tla melak tikintlasojtlaj tokniuan, techpaleuis matikintlapopoluikan maski ouijtika tikitaskej (Efes. 4:32). Ijkuak tikintlapopoluiyaj oksekimej, tikteititiaj ika melak tiktlasojtlaj Jehová niman ika tiknekij tikyolpaktiskej. w23.11 10, 11 párrs. 13-15

Ijkuak tekiuaj Josías kipiaya 26 xiuitl, okichiuj makiyektlalikan ikal toTajtsin. Ijkuak kiyektlalijtoyaj, okinextijkej “on amamoxtli de iley toTEKO yejuan okitemakaka Moisés”. Ijkuak tekiuaj okikak tlen kijtouaya libro, nimantsin okichiuj makitlakamatikan itlanauatil Jehová (2 Crón. 34:​14, 19-21). ¿Tikuelitaskia nochipa tikpouas Biblia? Tla timokojtilijtika ijkon tikchiuas, ¿tikuelita tikamapouas? ¿Tikchiua itlaj niman ijkon xtikimilkauas textos tlen mitspaleuiskej? Ijkuak Josías kipiaya kanaj 39 xiuitl, okichiuj itlaj tlen xkuajli niman omik. Yejua xokitlajtlanili Jehová makiyekana, san itech otlaneltokak (2 Crón. 35:​20-25). ¿Tlenon techmachtia yejuin? Ika maski tla itiuejueyimej noso ka niman tla youejkauj tomachtiaj Biblia, nochipa noneki tiknisiuiskej Jehová. Niman tla tiknekij tiknisiuiskej Jehová noneki tiktlajtlaniliskej nochipa matechyekana, tomachtiskej iTlajtol niman tikinkakiskej tokniuan akin chikauak kipiyaj intlaneltok. Tla ijkon tikchiuaj, techpaleuis maka matikchiuakan tlen xkuajli niman más tiyolpakiskej (Sant. 1:25). w23.09 12 párrs. 15, 16

Biblia kinteneua miyekej siuamej akin chikauak okitekichiuilijkej Jehová niman melak okitlasojtlakej. Yejuamej kuajli noyekanayaj niman nochipa yolmelajkanemiyaj (1 Tim. 3:11). Kuajli tikmatstokej ika ipan motlanechikol noijki nemij miyekej tokniuan siuamej akin chikauak kipiyaj intlaneltokil, niman uelis miyek mitsmachtiskej. Tla tejua tiichpochtli, xtlanemili intech tokniuan akin chikaujtok itlaneltokil niman xmokojtili xchiua ijkon ken yejuamej. Para uelis ijkon tikchiuas, xkita tlen kuajli kichiuaj niman xkita kenon noijki uelis ijkon tikchiuas. Nochimej akin kichiuaj ken Cristo noneki yolyemankej yeskej. Se siuatl akin yolyemanki kuajli nouika iuan Jehová niman noijki imiuan oksekimej. Pampa yolyemanki, kitlasojtla toTajtsin niman kintlakamatij akin Jehová yokintekitlali ipan tlanechikojli niman ipan ifamilia (1 Cor. 11:3). w23.12 18, 19 párrs. 3-5

Jehová kichia ika teueuentsin makitlasojtla isiuatsin, makipaleui ika tlen kipoloua, ika tlen kimachilia niman makipaleui machikaujto itlaneltok. Kuakon, kuajli titlanemilis, tikintlakaitas tokniuan siuamej niman tikchiuas motech matlaneltokakan, nochi yejuin melak mitspaleuis kuajli xchiua motekiyo ken teueuentsin. Tla timonamiktia, kanaj uelis nenkinpiyaskej nemokoneuan. Tlen okichiuj Jehová uelis mitspaleuis kuajli xchiua motekiyo ken tajtli (Efes. 6:4). Jehová xopinauj kijlis ikoneuj, Jesús, ika melak kitlasojtlaya niman ika kiyolpaktiaya (Mat. 3:17). Tla tikinpiya mokoneuan, kuajli tla nochipa tikimijlia ika tikintlasojtla niman tikimijlia ika tiyolpaki ipampa itlaj tlen kuajli okichiujkej. Tajtin akin kichiuaj ijkon ken Jehová, kinpaleuiyaj inkoneuan makichikauakan intlaneltok. ¿Tlenon uelis tikchiuas desde aman niman ijkon tiyes se kuajli tajtli? Uelis timomajmachtis tla kuajli tikinnotsa mochanejkauan niman tokniuan ipan tlanechikojli, noijki tla tikimijlia ika tikintlasojtla niman tikinpatiojkaita (Juan 15:9). w23.12 28, 29 párrs. 17, 18

Akin tiktekichiuiliaj Jehová noijki tikualoj niman tikixnamikij tlen ouijtika. Noijki techtlaueltokaj akin kitlauelitaj ikalpan toTajtsin. Yemelak, Jehová xkichiua maka matikixnamikikan tlen xkuajli, san ika, kema yokijto ika techpaleuis (Is. 41:10). Tla yejua touan nemi, uelis tiyolpakiskej, tiktlapejpeniskej tlen kuajli niman itech timelajkanemiskej maski san tlenon matikixnamikikan. Jehová yokijto ika techmakas “yolseuilistli” (Filip. 4:​6, 7). Pampa touikaj iuan Jehová, tikpiyaj yolseuilistli tlen kichiua kuajli matomachilikan. Yejuin “yolseuilistli más ueyi yejuan xakaj uelis kajsikamatis”. ¿Kemantika yotikmachilijka ika sakin ika otiknots toTajtsin hasta otiuajyolseuj? Yejon “yolseuilistli” tlen toTajtsin techmaka. w24.01 20 párr. 2; 21 párr. 4

Akin kitlasojtlaj toTajtsin kinekij kiueyiteneuaskej itoka. Tekiuaj David kimatstoya ika tikueyiteneuas “iyektokatsin” Jehová niman tikueyiteneuas Jehová san noijki. Ijkuak tijkakij itoka Jehová, titlanemiliaj itech kenon yejua, itech ikualneskayouan niman itech nochi tlen kualtsin yokichiuj. David kichipajkaitaya itoka Jehová niman kiueyiteneuaya. Levitas noijki okiueyiteneujkej itoka Jehová. Yejuamej okasikamatkej ika Jehová melak ueyixtika niman ika inueyiteneualis “xkajxilia kech yejuan noneki kiselis ueyiteneualistli” (Neh. 9:5). ¡Jehová melak oyolpak ijkuak okitak kenon yejuamej kiueyiteneuayaj ika nochi inyojlo! w24.02 9 párr. 6

Jehová xkinemilis ika tejua xuelis tikyolpaktis san pampa xouel otikchiuj itlaj tlen yotikijtoka (2 Cor. 8:12). Xueli itech tlen tikixnamiki niman xtlanemili itech tlen youel yotikchiuj. Biblia kijtoua ika “Dios yolmelajki. Yejua xkelkauas nemotekiu” (Heb. 6:10). Kuakon tejua noijki maka xkilkaua. Xtlanemili itech nochi tlen yotikchiuj: tejua youel iuan timouika Jehová, youel titenojnotsa niman yotimoapolakti. Nochi tlen yotikchiuj kiteititia ika tejua kema uelis tikchiuas okseki tlen yotiknemili. Uelis tikchiuas tlen yotikijto pampa Jehová mitspaleuis. San ika, xkilnamiki ika miyekej akin kuikaj barco yolpakij ijkuak yauej kampa noneki ajsiskej. Ijkuak tikchiujtias tlen yotiknemili, uelis tiyolpakis tla tiknemilia kenon Jehová mitspaleuijtika niman mitsteochiujtika (2 Cor. 4:7). Tla xtimosiaujkaua, tikitas kenon Jehová más mitsteochiuas (Gál. 6:9). w23.05 31 párrs. 16-18

Jehová melak kuelita techititis ika melak techtlasojtla niman ika tikyolpaktiaj. Ipan Biblia okpa nesi ika Jehová okijli iKoneuj, Jesús, ika melak kitlasojtlaya niman ika melak kiyolpaktiaya (Mat. 3:17; 17:5). ¿Tikuelitaskia mamitsijli Jehová ika melak tikyolpaktia? Maski Jehová xtechuajnotsas desde iluikak ijkon ken okichiuj iuan Jesús, kema techijlia ipan Biblia ika tikyolpaktiaj. Ijkuak tikamapouaj kenijki Jesús kualtsin kinnotsaya inomachtijkauan, tikmachiliaj kentla tla Jehová ijkon technotstoskia. Jesús kichiuaya ijkon ken iTaj. Ika yejon, ijkuak tikamapouaj ika Jesús okimijli inomachtijkauan ika melak kintlasojtlaya maski nopopolouayaj, uelis tikonnemiliskej ika Jehová yejua akin ijkon techijlitika (Juan 15:​9, 15). Ijkuak tikixnamikiskej tlen xkuajli, maka matiknemilikan ika xok tikyolpaktijtokej Jehová, yej matiknemilikan ika uelis tikititiskej Jehová ika melak tiktlasojtlaj niman ika itech titlaneltokaj maski ouijtika tlen tikixnamiktokej (Sant. 1:12). w24.03 28 párrs. 10, 11