Noviembre

Tla tejua tikinpiya mokoneuan pipitikej, xkinpaleui makiyektlalikan kampa tlanankiliskej niman ijkon makijtokan san tlen kinamiki. Kemantika, ipan tlanechikojli tomachtiaj itech tlen kixnamikij akin yononamiktijkej noso itech kenon tichipaujkanemiskej. Maski ijkon, kanaj onias se noso ome párrafo kampa kokonej ueliskej tlanankiliskej. Noijki uelis tikinpaleuis mokoneuan makasikamatikan tleka xnochipa uelis tlanankiliskej ijkuak nomateketsaskej. Tla tikimijlia yejuin mokoneuan, xnajmanaskej ijkuak xkintlapejpeniskej yejuamej matlanankilikan (1 Tim. 6:18). Tinochimej uelis kuajli tikyektlaliskej ken titlanankiliskej niman ijkon tikueyichiuaskej Jehová niman tikinyolchikauaskej tokniuan (Prov. 25:11). Maski kemantika uelis achijtsin titlajtoskej itech tlen topan onochiuj, xnoneki sanoyej totech titlajtoskej (Prov. 27:2; 2 Cor. 10:18). Yej noneki más titlajtoskej itech Jehová, itech iTlajtol niman itech ikalpan (Apoc. 4:11). w23.04 24, 25 párrs. 17, 18

Noneki titetlasojtlaskej tla tiknekij titlatlachixtoskej niman kuajli titlanemiliskej (Mat. 22:​37-39). Tla tiktlasojtlaj toTajtsin tiknekiskej tikinnojnotsaskej oksekimej maski tikixnamikiskej tlen ouijtika (2 Tim. 1:​7, 8). Niman pampa noijki tikintlasojtlaj akin xtokniuan, tokojtiliaj tikinnojnotsaskej, maski ipan teléfono noso ika carta. Xtiknemiliaj tla xok uelis makisaskej. Tejuamej tikchiaj manopatlakan niman makichiuakan tlen kuajli (Ezeq. 18:​27, 28). Pampa tikintlasojtlaj tokniuan tokojtiliaj tikinyolchikauaskej niman tikinchikauiliskej intlaneltok (1 Tes. 5:11). Ijkon ken soldados akin san sekan tlaixnamikij nopaleuiyaj, tejuamej xkeman tikinyolkokoskiaj noso tikinchiuiliskiaj tlen xkuajli tokniuan san pampa tiknekij (1 Tes. 5:​13, 15). Noijki, uelis tikimititiskej tokniuan ika tikintlasojtlaj tla tikintlakaitaj akin tlayekanaj ipan tlanechikojli (1 Tes. 5:12). w23.06 10 párr. 6; 11 párrs. 10, 11

Uelis tikchikauaskej totlaneltok tla titlanemiliaj itech tlen Jesús okichiuj topampa. Jesucristo omikiko topampa, yejon techititia ika nochi tlen toTajtsin yokijto, nochiuas. Noneki tikxeloskej tiempo niman ijkon titlanemiliskej itech nochi tlen opanok ijkuak Jesús omik topampa niman itech tleka Jehová okitekauili makimiktikan. Tla ijkon tikchiuaj, más tikneltokaskej ika Jehová kikuepas tlaltikpaktli se xochitlalpan kampa uelis nochipa tichantiskej. ¿Tleka ijkon tikijtouaj? Matitlanemilikan itech nochi tlen Jehová niman Jesucristo okichiujkej topampa. Jehová okinek kuajtitlanis isenteKonetsin, akin melak kuajli iuan nouikaya, para manemiki nikan ipan tlaltikpaktli ken se tlakatl akin xtlajtlakole. Ijkuak Jesús onen ipan tlaltikpaktli, melak otlajyoui, okixnamik miyek tlen ouijtika niman melak xkuajli ken omik. Melak ueyi tlen Jehová okitlaxtlauj. Jehová melak tetlasojtla, ika yejon, xkitekauiliskia ika iKoneuj melak matlajyoui tla xuejkauiskia kualtsin tinemiskiaj (Juan 3:16; 1 Ped. 1:​18, 19). Pampa Jehová melak ueyi tlen okitlaxtlauj, kichiuas ika nochipa matinemikan ipan se xochitlalpan. w23.04 27 párrs. 8, 9

¿Kinektika Jehová kinyolitis akin yomijkej? Kema. Jehová okichiuj ika akin okijkuilojkej Biblia makijtokan ika yejua kinyolitis akin yomijkej (Is. 26:19; Apoc. 20:​11-13). Niman, ijkuak Jehová itlaj kijtoua, kichiua (Jos. 23:14). Jehová ijkon kichiuas pampa melak kineki oksejpa manemikan akin yomijkej. Matitlanemilikan itech tlen okijto Job. Yejua kuajli kimatstoya ika maski tla mikiskia, Jehová melak kinekiskia oksejpa kitas (Job 14:​14, 15). Jehová noijki kinektika oksejpa kimitas itekipanojkauan akin yomijkej. Sa kichiatika tonajli ijkuak kinyolitis niman ijkon mayolpakikan niman maka sa makualokan. ¿Niman tlenon kimachilia Jehová inpampa tlaltikpakchanejkej akin xouel okixmatkej? ToTajtsin, akin melak tetlasojtla, noijki kineki kinyolitis (Hech. 24:15). Kineki iuan manouikakan niman nochipa manemikan ipan tlaltikpaktli (Juan 3:16). w23.04 9 párrs. 5, 6

¿Tlenon uelis tikchiuas niman ijkon más tikneltokas ika yemelak nochiuas tlen tikchia? Tla tikchia nochipa tinemis ipan tlaltikpaktli, xpoua kampa Biblia tlajtoua itech xochitlalpan niman xnemili ika iompa tinemi (Is. 25:8; 32:​16-18). Xkonnemili kenon tinemiskej ipan yenkuik tlaltikpaktli. ¿Ompa timoita? Uelis tikxikoskej nochi tlen tikixnamikij tla nochipa tikilnamikij kenon tinemiskej ipan yenkuik tlaltikpaktli (2 Cor. 4:17). Tlen Jehová yokijto kichiuas topampa ika tlayekapan techkojtilis. Yejua yotechmakak nochi tlen noneki niman ijkon matikojtitokan. Ika yejon, ijkuak ouijtika tikitaskej tikchiuaskej se tekitl, tikxikoskej itlaj tlen ouijtika noso tiktekichiuilijtoskej toTajtsin ika pakilistli, matiknotsakan ika nochi toyojlo niman matomachtikan iTlajtol niman ijkon matechyekana. Noijki, matijkauilikan ika oksekimej tokniuan matechpaleuikan niman matitlanemilijtokan itech tlen tikseliskej ika tlayekapan. Ijkon Jehová “ikan nochi iueyi poder” techpaleuis matikxikokan “nochi tlajtlamach ikan miyek ijyouilistli niman pakilistli” (Col. 1:11). w23.10 17 párrs. 19, 20

Ijkuak tikchiuaskej teoyotl, uelis tiktlasojkamachiliskej Jehová ipampa nochi tlen kualtsin tikpiyaj. Tikmatstokej ika nochi tlen kualtsin tikpiyaj yejua yotechmakak (Sant. 1:17). Uelis tiktlasojkamachiliskej pampa yotechmakak se kualtsin tlaltikpaktli, melak kualtsin nochi tlen okichijchiuj, otechmakak tonemilis, tochanejkauan, toamigos niman se tlamachialistli. Noijki tiknekij tiktlasojkamachiliskej pampa techkauilia iuan matouikakan. Tichantij kampa miyekej xok tetlasojkamachiliaj. Ika yejon, melak noneki tikitaskej tlen kualtsin tikpiyaj niman ijkon tiktlasojkamachiliskej Jehová. Tlaltikpakchanejkej más kitaj tlen kinekij kipiyaskej niman xkitaj tlen ikipiyaj niman ijkon kitlasojkamachiliskej toTajtsin. Tla tejuamej noijki ijkon tikchiuaskiaj, ijkuak tiknotsaskiaj Jehová san tikijliskiaj nochi tlen tiknekij. Tla xtiknekij ijkon topan manochiua, noneki tokojtiliskej niman ijkon tiktlasojkamachiliskej Jehová nochi tlen techmaka (Luc. 6:45). w23.05 4 párrs. 8, 9

ToTajtsin, Jehová, melak techtlasojtla niman xkuelita matitlajyouikan (Is. 63:9). San ika, yejua xtechkixtilia nochi tlen techtlajyouiltia, tlen Biblia kiteneua ika yeskia ken atentin noso tlitl (Is. 43:2). Yejua techijlia ika techpaleuis matikxikokan maski san tlenon tikixnamikiskej niman xkikauilis topan manochiua itlaj tlen xtikxikoskej, noijki Jehová techmaka iespíritu niman ijkon matitlaxikokan (Luc. 11:13; Filip. 4:13). Ika yejon, kuajli tikmatstokej ika nochipa tikpiyaskej nochi tlen noneki niman ijkon titlaxikoskej niman timelajkanemiskej. Jehová kichia itech matitlaneltokakan (Heb. 11:6). Kanaj kemantika tikixnamikij itlaj tlen melak ouijtika niman hasta tiknemiliaj ika Jehová xtechpaleuis. San ika, Biblia kuajli techijlia ika toTajtsin techmakas ikojtilis niman ijkon kentla matitlejkokan ipan se tepantli (Sal. 18:29). Kuakon, maka matiometlamatikan. Matikchiuilikan teoyotl toTajtsin ika nochi toyojlo niman kuajli matikmatstokan ika yejua technankilis (Sant. 1:​6, 7). w23.11 22 párrs. 8, 9

¡Melak kualtsin yejon tlajtoltin! Techititiaj ika akin yononamiktijkej uelis nochipa notlasojtlaskej. Teueuentsin niman tesiuatsin noneki nokojtiliskej niman ijkon nochipa notlasojtlaskej. San matontlanemilikan itech yejuin: ijkuak yakaj tlatlatia, noneki nochipa kitlalilijtos kojtli itliuj tla xkineki maseui. Noijki ijkon panoua imiuan akin yononamiktijkej. Tla kinekij nochipa notlasojtlaskej, noneki kuajli nouikaskej. San ika, kemantika kanaj xok más notlasojtlaskej pampa xkipiyaj tomin, kualoj niman xuelij kimiskaltiaj inkoneuan. Kuakon, tla akin yononamiktijkej kinekij nochipa notlasojtlaskej, noneki nokojtiliskej kuajli nouikaskej iuan Jehová. w23.05 20, 21 párrs. 1-3

Yolchikaualistli xueli notepanoltilia ijkon ken se herencia, kuakon tejuamej xuelis tiyolchikaujkej yeskej san pampa totajuan yolchikaujkej niman techijliaj noijki ijkon matikchiuakan. Noneki san no tejuamej tomachtiskej kenon tiyolchikaujkej yeskej. Tla tikneki itlaj tiuelis, noneki kuajli tikitas kenon kichiua akin mitsmachtia niman noijki ijkon tikchiuas. Noijki ijkon, para tiyolchikaujkej yeskej noneki tikitaskej tlenon kichiuaj akin yolchikaujkej niman tikchiuaskej ijkon ken yejuamej. Ijkon ken Daniel, noneki kuajli tomachtiskej Biblia, tikchiuaskej teoyotl niman tikijliskej Jehová tlen onka ipan toyojlo para iuan touikaskej, niman noijki noneki tikneltokaskej ika yejua nochipa techpaleuis. Tla ijkon tikchiuaj, tiyolchikaujkej yeskej ijkuak tikixnamikiskej tlen ouijtika. Tla tiyolchikaujkej, uelis tikchiuaskej ika oksekimej matechtlakaitakan niman noijki uelis kichiuas ika oksekimej makinekikan kimatiskej itech Jehová. Melak tepaleui tla timokojtilia tiyolchikauak yes. w23.08 2 párr. 2; 4 párrs. 8, 9

Tlajtojli “xkixtlalokan”, tlen nikan notekitiltia, ualeua itech se tlajtojli ika griego tlen kijtosneki kuajli tikitas tla se tepostli oro noso plata. Tejuamej noijki noneki kuajli tikitaskej tla melauak tlen tijkakij noso tlen tikpouaj. Aman, noijki noneki ijkon matikchiuakan pampa más inisiuj ueyi tlajyouilistli. Tejuamej xtikneltokaj nochi tlen techijliaj, yej tiktekitiltiaj totlamachilis niman tikitaj tla tlen tikamapouaj noso tlen tijkakij uajlauj ipan Biblia noso tla ijkon kijtoua ikalpan Jehová. Ijkon, xkuajkualtin espíritus xtechkajkayauaskej (Prov. 14:15; 1 Tim. 4:1). Tikmatstokej ika Jehová kipaleuis ikalpan ijkuak panotos ueyi tlajyouilistli, san ika, xtikmatij tlenon nochiuas ipan cada se de tejuamej (Sant. 4:14). Maski tla timakisaj ipan ueyi tlajyouilistli noso tla timikij, Jehová techmakas nemilistli tlen xkeman tlamis tla itech tiyolmelajkanemij. Chika yejko yejon tonajli, nochipa matitlanemilikan itech tlen Jehová techmakas niman matoyektlalikan para itonal Jehová. w23.06 13 párrs. 15, 16

Xtikmatij kenon nochiuaskej seki teotlajtoltin tlen uajlauej ipan Biblia (Dan. 12:​8, 9). San ika, maski xmás tikasikamatij kenon nochiuas se teotlajtojli, xkijtosneki tla xnochiuas. Kuajli tikmatstokej ika Jehová techijlis tlen noneki tikmatiskej ijkuak kitas ika noneki, ijkon ken yeuejkaui okichiuj. Kalpamej kijtoskej: “Onkaj yolseuilistli niman xakaj nion itlaj uelis techmiktis” (1 Tes. 5:3). Ijkuak ijkon panos, gobiernos kimixnamikiskej tlaneltokiltin tlen xmelajkej niman kinpopoloskej (Apoc. 17:​16, 17). Sakin, kixnamikiskej ikalpan toTajtsin (Ezeq. 38:​18, 19). Niman sakin, peuas Armagedón (Apoc. 16:​14, 16). Kuajli tikmatstokej ika sa achijtsin poliui para nochiuas yejuin. Aman ika xiyejko yejon tonajli, kuajli matikitakan kenon nochiuaj teotlajtoltin niman matikinpaleuikan oksekimej noijki ijkon makichiuakan. Tla ijkon tikchiuaj, tikititiskej toTajtsin Jehová ika tiktlasojkamatij nochi tlen kichiua topampa. w23.08 13 párrs. 19, 20

Sakin ika apóstol Pablo otlajto itech “tlaneltokalistli, tlamachalistli niman tetlajsojtlalistli”, ijkuak otlamito okijto: “On tetlajsojtlalistli yejua más ueyi kijtosneki” (1 Cor. 13:13). ¿Tleka ijkon okijto? Pampa ika tlayekapan xok nonekis tikneltokaskej tla toTajtsin kikuepas tlaltikpaktli se xochitlalpan, pampa ijkuakon yonochiuj tlen tikchiayaj. San ika, nochipa nonekis tiktlasojtlaskej Jehová niman tlaltikpakchanejkej. Niman yejon tlasojtlalistli más ueyixtias. Noijki, tla titetlasojtlaj tikteititiaj ika melauak tikchiuaj ken Cristo. Jesús okimijli iapóstoles: “Tla nemotlajsojtlaj inuan oksekimej, nochi tlakatl kitas ika nennotemachtijkauan” (Juan 13:35). Noijki, tla totlasojtlaj techpaleuiya san sekan matinemikan. Ika yejon, Pablo okijto: “On tetlajsojtlalistli yejua más kuajli kichiua para melauak notlajsojtlalo” (Col. 3:14). Apóstol Juan okimijkuilouili tokniuan: “On tetlajsojtlalistli yejua más kuajli kichiua para melauak notlajsojtlalo” (1 Juan 4:21). Kuakon, ijkuak tikimititiaj tokniuan ika tikintlasojtlaj, noijki tikteititiaj ika tiktlasojtlaj Jehová. w23.11 8 párrs. 1, 3

Biblia kijtoua ika nochimej akin tiktekichiuiliaj toTajtsin kentla yopeuj totlalouaj ipan se ojtli. Akin ajsij kampa tlami yejuin ojtli kiseliaj nemilistli tlen xkeman tlamis (2 Tim. 4:​7, 8). Aman ika itinemij más nisiuj kampa ontlami yejuin ojtli, noneki más matotlalokan. Apóstol Pablo techijlia tlenon uelis techpaleuis para xtosiaujkauaskej. Okijto: “Okse lado ma tikontlalikan on tlen techteltia […] chika titotlalouaj ipan on ojtli yejuan tikpiyaj toyakapan”. Pablo xkijtotoya tla xtlaj noneki tikitkiskej chika totlalouaj, kijtojtoya maka matikitkikan tlen xok noneki. Pampa tla melak totlamamaltiaj yolik tiaskej niman tisiauiskej. Tla tiknekij ok totlalojtoskej ipan yejuin ojtli, noneki tikitaskej tla tikitkij itlaj tlen xnoneki niman tokixtiliskej. San ika, onka okseki tlemach tlen noneki tikmamajtiaskej niman xnoneki tokixtiliskej. Pampa tla tokixtiliaj, techkixtiskej ipan ojtli kampa totlalojtokej (2 Tim. 2:5). w23.08 26 párrs. 1, 2

Tla titeasikamatij, xouijtika tikitaskej tiktlakaitaskej ken oksekimej tlanemiliaj. Matitlanemilikan itech yejuin. Sekimej tokniuan siuamej kuelitaj kinotlaliliskej maquillaje, san ika, sekimej ka. Sekimej tokniuan kuelitaj koniskej achijtsin alcohol, san ika, sekimej xkuelitaj nion achijtsin koniskej. Niman, maski tinochimej akin tikchiuaj ken Cristo tiknekij totlajpiyaskej niman xtiknekij tikualoskej, xsan noijki ken totlajpiyaj. Tla tiknemiliaj ika nochipa noneki nochiuas ijkon ken tejuamej tiknekij niman tikchiuaj ika oksekimej noijki ijkon makinemilikan, uelis kichiuas ika tokniuan maka sa manouikakan iuan Jehová niman uelis titexeloskej (1 Cor. 8:9; 10:​23, 24). Jehová xtechinmaka miyek tlanauatiltin itech kenon totlakentiskej. Yejua san techmaka tlen ika uelis toyekanaskej. Ken totlakentiaj noneki kiteititis ika tikimasikamatij oksekimej niman ika tiktlakaitaj toTajtsin (1 Tim. 2:​9, 10). Ika yejon, xtiknekij san makitakan totlaken. Tlen Jehová technauatia ipan iTlajtol noijki uelis kinpaleuis tlayekankej maka makimijlikan oksekimej kenon notlakentiskej niman kenon nopetsoskej. w23.07 23, 24 párrs. 13, 14

Jehová techititia tlen noneki tikchiuaskej tla tiknekij tiyolpakiskej ika tlayekapan. Akin kichiuaj tlen kijtoua yejon siuatl akin “xtlamatki” san kinekij noyolpaktiskej ijkuak auilnemij. Nochimej akin kichiuaj tlen kijtoua yejon siuatl akin “xtlamatki” “onxinij miktlan” (Prov. 9:​13, 17, 18). San ika, melak kuajli onkisaj akin kichiuaj tlen kijtoua yejon siuatl akin kineskayotia tlamatkilistli (Prov. 9:1). Kema, tejuamej tomajmachtijtokej tiktlasojtlaskej tlen Jehová kitlasojtla niman tiktlauelitaskej tlen yejua kitlauelita (Sal. 97:10). Noijki, tiyolpakij tikimijliskej oksekimej manoyekanakan ika melauak “tlamatkilistli”. Tejuamej tiyeskiaj ken on siuamej tekichiuilijkej akin kinteneua Proverbios capítulo 9 niman tsajtsij “kampa más tlakpak de on ueyikalpan”. Ijkon ken yejuamej, tikijtouaj: “¡Xuajlakan nikan, telpokamej yejuan xe nenmixtojtomij!”. Tejuamej niman akin techkakij techpaleuiya tla tikchiuaj tlen kijtoua Proverbios. Niman noijki techpaleuis ika tlayekapan. Tla touikaj “ken yejuan tlamatkej”, uelis nochipa tinemiskej (Prov. 9:​3, 4, 6). w23.06 24 párrs. 17, 18

¿Kenon timomachilia tla akin iuan timomachtia noso iuan titekiti mitstlajtoltia itech tlen tikneltoka? ¿Timomojtia? Miyekej ijkon tomachiliaj. San ika, tlen techtlajtoltiaj techpaleuis matikmatikan tlen kinemiliaj niman tlen kimachiliaj. Noijki, ijkon uelis tikinnojnotsaskej. San ika, kemantika uelis yakaj itlaj techtlajtoltis niman san kinekis techpijpinaujtis noso techkualanis, niman yejon xnoneki techmojkatlachialtis. Kemantika ijkin panoua pampa yejuamej san yokitekakilijkej itech tlen tejuamej tikneltokaj (Hech. 28:22). Niman pampa itinemij ipan itlamiyan tonaltin, miyekej “xteikneliskej” niman noijki “xipanteitaskej” (2 Tim. 3:​1, 3). Kanaj timotlajtoltia, ¿kenon uelis kualtsin nitenankilis niman xnikualanis ijkuak yakaj san nechpijpinaujtis itech tlen nikneltoka? Onka itlaj tlen uelis mitspaleuis: yolyemanilistli. Se akin yolyemanki xnimantsin kualani niman ueli noteltia ijkuak san kikualanisnekij noso ijkuak xkimati kenon tenankilis. w23.09 14 párrs. 1, 2

Miyekpa, ikalpan Jehová techijlia tlenon uelis tikchiuaskej niman ijkon nochipa tiktlakamatiskej Jehová niman xtiktlasojtlaskej tomintsin. Ijkuak tejuamej tikchiuaj tlen techijlia, melak techpaleuiya (Is. 48:​17, 18; 1 Tim. 6:​9, 10). Jehová ok kintekitiltijtos tokniuan niman ijkon kiyekanas ikalpan ijkuak panos ueyi tlajyouilistli niman ijkuak Jesús tekiuajtis Mil Xiuitl. Niman ijkuak ijkon panos, ¿tiknektoskej tiktlakamatiskej Jehová? Tla desde aman tiktlakamatij, ika tlayekapan noijki tiknektoskej tiktlakamatiskej. Kuakon, nochipa matokauilikan matechyekana Jehová, yejon noijki kijtosneki ika noneki tikintlakamatiskej tokniuan akin Jehová yokintlapejpeni para matechtlajpiyakan (Is. 32:​1, 2; Heb. 13:17). Kuajli tikmatstokej ika uelis titlaneltokaskej itech Jehová, akin techyekana. Yejua techpaleuiya maka topan manochiua tlen xkuajli niman noijki techpaleuiya matajsikan ipan yenkuik tlaltikpaktli, kampa uelis nochipa tinemiskej. w24.02 25 párrs. 17, 18

Apóstol Pablo melak oyolpak ijkuak kitekichiuilijtoya toTajtsin, san ika, noijki okixnamik miyek tlen ouijtika. Maski ipan itonaluan ouijtika katka oksekan yas, yejua kemantika uejka onejnen. Ijkuak oksekan yaya, kemantika hasta iamimikiya ipan atentin, ikimiktiskiaj “on tlachtekkej” niman hasta okitlajyouiltijkej itlauelikniuan (2 Cor. 11:​23-27). Noijki, tokniuan xnochipa okipatiojkaitakej tlen kichiuaya inpampa (2 Cor. 10:10; Filip. 4:15). ¿Tlenon okipaleui Pablo maka manosiaujkaua? Yejua miyek youelka itech Jehová ipampa tlen yokipoujka ipan iTlajtol niman ipampa tlen yokixnamijka. Kuajli kimatstoya ika Jehová kitlasojtlaya (Rom. 8:​38, 39; Efes. 2:​4, 5). Niman Pablo noijki melak okitlasojtlak toTajtsin. Yejua ijkon okiteititi pampa nochipa okinpaleui tokniuan (Heb. 6:10). w23.07 9 párrs. 5, 6

Miyekej yokitakej ika melak kuajli pampa nemij gobiernos, niman ika noneki tikintlakamatiskej seki tlanauatiltin tlen yokintlalijkej yejon “tekiuajkej”. San ika, ijkuak kitlajtlanij itlaj tlen xmás kinamiki, ouijtika kitaj kitlakamatiskej yejon tlanauatijli. Biblia kijtoua ika gobiernos akin nemij ipan yejuin tlaltikpaktli kintlajyouiltiaj tlaltikpakchanejkej, ika Satanás yejua akin kinyekantika niman ika sa achijtsin poliui ijkuak kinpopoloskej (Sal. 110:​5, 6; Ecl. 8:9; Luc. 4:​5, 6). Noijki techijlia ika “yejuan kixnamiki sen tekiuaj, kixnamiki on akin Dios okitlalij”. Aman Jehová kitekauilijtika maoniakan gobiernos niman ijkon makitakan ika nochi kuajli maonia niman yejua kichia matikintlakaitakan. Ika yejon, Biblia kijtoua: “Nochimej xkinmakakan on tlen noneki nenkinmakaskej”. Yejuin kijtosneki ika noneki tiktlaxtlauaskej tlen techtlajtlaniliaj tekiuajkej, tikintlakaitaskej niman tikintlakamatiskej (Rom. 13:​1-7). Kanaj tiknemiliaj ika xmás techpaleuis tla tiktlakamatij se tlanauatijli noso kanaj miyek nonekis tiktlaxtlauaskej, noso tikitaj ika xmás kinamiki tlen techtlajtlaniliaj. San ika, tejuamej tiktlakamatij Jehová niman yejua kichia matikintlakamatikan tekiuajkej tla xtechtlajtlaniliaj matikchiuakan itlaj tlen yejua xkuelita (Hech. 5:29). w23.10 8 párrs. 9, 10

Ijkuak Sansón otlakat, filisteos akin tlayekanayaj ipan kalpan Israel (Juec. 13:1). Pampa filisteos melak tlauelejkej katkaj, israelitas tlajyouiayaj. Kuakon Jehová okitlapejpeni Sansón niman ijkon “yejua peuas kinmanauis on israelitas inmak on filisteos” (Juec. 13:5). Yejua ika, Sansón nonekiya nopaleuis itech Jehová. Sejpatsin, para kajsiskej Sansón, sekimej filisteos oyajkej Lehí, se kalpan tlen onkatka Judá. Pampa tlakamej akin chantiyaj Judá onomojtikej, okijtokej ika kitemaktiliskiaj Sansón itech itlauelikniuan. San no yejuamej ikniuan israelitas okisalojkej ika ome yenkuik mekatl niman okuikakej kampa filisteos (Juec. 15:​9-13). San ika, “iespíritu toTEKO ouajlaj ipan Sansón niman okimakak fuerza”, ijkon ouel onomakixti. Sakin, “okontilan sen ikamachal poloko yejuan ompaka tlajkaltoya nion xe kuajli uakiya”, niman ika okinmikti 1,000 filisteos (Juec. 15:​14-16). w23.09 2 párrs. 3, 4

Jehová ika yolik yotechuajijlitia ipan Biblia tlenon kineki kichiuas. Tlen yejua kineki, nochipa nochiua pampa nochi tlen “okichijchiu kipiya kanon kitekitiltis” (Prov. 16:4). Niman nochi tlen Jehová kichiua xkeman popoliui. Kuakon, ¿tlenon kineki kichiuas Jehová? ¿Niman tlenon yononek kipatlas para kichiuas? Ipan Génesis 1:​28, Jehová okimijli tlaltikpakchanejkej tlenon kinekiya para yejuamej. Yejua okimijli: “Xtlaxinachokan niman xkimpiyakan miyekej nemokoneuan. Xtemiltikan in tlaltikpaktli, niman xkinmomaktikan [ . . . ] on yolkej”. Yemelak ika ijkuak Adán niman Eva xotetlakamatkej, okichiujkej matikpiyakan tlajtlakojli, san ika, yejon xokijtosnek tla Jehová xok kichiuaskia tlen yokijtojka. Yejua, san okipatlak ken kichiuas tlen yokijto. Nimantsin, okijto ika kitlaliskia se Tekiuajyotl ne iluikak tlen kichiuaskia manochiua tlen yokijto inpampa tlaltikpakchanejkej niman ipampa tlaltikpaktli (Mat. 25:34). w23.10 20 párrs. 6, 7

Jehová noijki uelis techpaleuis maka matosiaujkauakan. Kemantika, uelis ouijtika tikitaskej xtosiaujkauaskej, más tla youejkauj tikyejyekojtokej tijkajkauaskej itlaj tlen xkuajli. Niman kanaj uelis tiknemiliskej ika tlen tejuamej tikixnamiktokej más ouijtika xken tlen apóstol Pedro okixnamik. San ika, Jehová uelis techpaleuis maka matosiaujkauakan (Sal. 94:​18, 19). Matontlanemilikan itech se tokniuj tlakatl akin achto nochiuas iteixpantijkauj Jehová kinuelitaya tlakamej. Maski okikajkauj tlen yeuejkaui kichiuaya, kemantika ok xkuajli tlanemiliaya. ¿Tlenon okipaleui maka manosiaujkaua? Yejua kijtoua: “Jehová techyolchikaua. Yoniuel ika tla yejua techmaka iespíritu santo […], uelis nochipa […] tinemiskej ipan ikalpan”. Yejua noijki kijtoua: “Jehová yonechpaleui maniktekichiuili […], niman maski melak ninopopoloua, yejua nechyolchikaua”. w23.09 23 párr. 12

Tla tejua titelpochtli, xkilnamiki ika motlaneltok xsan iselti chikauis. Noneki tiktlapejpenis tikchiuas ijkon ken akin kichiuaj tlen kuajli, kuajli titlanemilis, tikchiuas motech matlaneltokakan, timomajmachtis tikchiuas seki tekitl niman tiuelis tlen mitspaleuis ika tlayekapan. Ijkuak titlanemilia ipan nochi tlemach tlen noneki tikchiuas, kanaj tikmachilia ika xtiuelis. San ika, maka xmosiaujkaua, ¡tejua uelis tikchiuas! Maka xkilkaua ika Jehová kinektika mitspaleuis (Is. 41:​10, 13). Niman tokniuan tlakamej niman siuamej akin nemij ipan motlanechikol noijki mitspaleuiskej. Tla tikchiua tlen Jehová kineki, nochipa tiyolpakis. Telpochtli, kuajli xmatsto ika melak timitstlasojtlaj niman tiktlajtlaniliaj Jehová nochipa mamitsteochiua pampa timokojtilia tikchikauas motlaneltok. w23.12 29 párrs. 19, 20

Xkonnemili ika timoyolpaktijtika imiuan sekimej tokniuan niman sakin nenkimokixtiliaj fotos. Tejua tikinkixtia yeyi fotos, san ika, tikita ika ipan se foto se tokniuj xkuajli okis. Tikpopolos yejon foto niman san timokauas ika ome fotos, kampa nochimej uetskatokej. Niman miyekpa más kuajli tikilnamikij kenon otoyolpaktijkej imiuan tokniuan. San ika, matikonnemilikan ika ijkuak toyolpaktijtoyaj se tokniuj okijto noso okichiuj itlaj tlen xkuajli. ¿Tlenon tikchiuaskia ika yejon tlen okijto noso okichiuj? ¿Tleka xtikpopoloua ijkon ken se foto tlen xkuajli okis? Uelis ijkon tikchiuaskej pampa más miyekpa kualtsin yotoyolpaktijkej iuan yejon tokniuj. Melak kuajli tla san tikimejyeuaj “fotos tlen kualtsitsintin”. w23.11 12 párrs. 16, 17

Tlajtoltin ika griego tlen apóstol Pablo okintekitilti, kiteititia ika tokniuan noneki kitaskej ika intlaken maka makichiua ika oksekimej makinemilikan tlen xkuajli noso xkuajli manomachilikan. ¡Melak tiyolpakij ijkuak tikitaj ika miyekej tokniuan kiteititiaj ika chikauak intlaneltokil ipampa ken notlakentiaj! Akin chikauak kipiyaj intlaneltokil noijki nokojtiliaj kuajli tlanemiliskej. Kijtosneki ika kuajli kitaj tlenon kuajli niman tlenon xkuajli, niman ijkon kitlapejpeniskej tlen kinamiki. Matitlajtokan itech Abigaíl. Iueuentsin okitlapejpeni kichiuas itlaj tlen xkuajli, niman Abigaíl okitak ika tlen yokitlapejpenijka ueliskia kichiuas ika nochimej akin imiuan chantiyaj makixnamikikan tlen xkuajli. Yejua nimantsin itlaj okichiuj, niman tlen okitlapejpeni kichiuas otlapaleui maka makinmiktikan miyekej akin imiuan chantiyaj (1 Sam. 25:​14-23, 32-35). Tla kuajli titlanemiliaj, noijki techpaleuis matikitakan kemanon titlajtoskej niman kemanon xnoneki titlajtoskej, noijki, techpaleuis matikimititikan oksekimej ika yemelak tiknekij tikinpaleuiskej (1 Tes. 4:11). w23.12 20 párrs. 8, 9

Apóstol Pablo okimijkuilouili yejuin tlajtoltin tokniuan akin nemiyaj ipan tlanechikojli de Roma. Yejuamej yonomachtijkaj itech Jehová niman Jesús, yokiteititijkaj ika tlaneltokaj niman yonochiujkaj inomachtijkauan Cristo. Ika yejon, toTajtsin okimitak ken akin yolmelajkej ipampa intlaneltok niman okintlapejpeni ika iespíritu santo (Rom. 5:1). Ijkuakon, yejuamej ueliskia kiseliskiaj se nemilistli tlen xkeman tlamis ne iluikak. Sakin, Pablo okimijli tokniuan tlapejpeniltin de Éfeso ika kiseliskiaj se “herencia yejuan Dios kinmaka on yejuan tlaneltokaj” (Efes. 1:18). Niman tokniuan colosenses okinteneuili kanon kiseliskiaj yejuin tetlayokolijli tlen kichiatoyaj. Yejua okimijli: “Yejyejtikaj para nemejuamej ne ipan iluikak” (Col. 1:​4, 5). Kuakon, tokniuan tlapejpeniltin sa kichiatokej yoliuiskej niman nochipa nemiskej ne iluikak kampa tekiuajtiskej iuan Cristo (1 Tes. 4:​13-17; Apoc. 20:6). w23.12 9 párrs. 4, 5

Tlajtojli “kejyeuas” notekitiltiaya ijkuak soldados kitlajpiayaj se ueyi kalpan para maka makixnamikikan. Akin chantiyaj ipan yejon ueyi kalpan, ueliyaj kuajli kochiyaj pampa kimatstoyaj ika soldados kintlajpixtoyaj. Noijki ijkon, ijkuak “yolseuilistli” tlen toTajtsin techmaka kitlajpiya toyojlo niman totlamachilis, más kuajli tomachiliaj niman tiyolseuij (Sal. 4:8). Maski tlen tikixnamikij xnimantsin popoliui, ueli achijtsin tiuajyolseuij, ijkon ken ipan opanok Ana (1 Sam. 1:​16-18). Niman yejon techpaleuiya más kuajli matitlanemilikan niman kuajli matiktlapejpenikan tlen tikchiuaskej. ¿Tlenon uelis tikchiuaskej? Tla yakaj akin chantiya ipan ueyi kalpan kinekiya ika se soldado makipaleui, nonekiya kitlajtlanilis. Noijki ijkon, tla tiknekij matechpaleui Jehová, noneki tiktlajtlaniliskej. Matikchiuilikan teoyotl hasta ijkuak tikmachiliskej ika Jehová yotechyolseui (Luc. 11:9; 1 Tes. 5:17). Tla tejua tikixnamiktok itlaj tlen melak ouijtika, maka xkajkaua ika tiknotsa toTajtsin. Tikitas ika yejua mitsmakas yolseuilistli tlen kitlajpiyas moyojlo niman motlamachilis (Rom. 12:12). w24.01 21 párrs. 5, 6

Jesús otlaxiko ijkuak okitlajyouiltijkej, ijkuak okiuijuikaltijkej niman ijkuak okitlajtolchijchiuilijkej pampa kinekiya manochipaua itoka iTaj. Yejua kimatstoya ika nochipa okitlakamat iTaj (Heb. 12:2). Noijki kimatstoya ika Satanás yejua kichiuilijtoya nochi tlen xkuajli ipan panotoya (Luc. 22:​2-4; 23:​33, 34). Diablo kinekiya ika Jesús makitlalkaui Jehová, san ika, xijkon opanok. Jesús okiteititi ika Satanás melak tekajkayaua niman ika kema nemij akin melajkanemij itech Jehová maski kixnamikij tlen ouijtika. ¿Tikneki tikyolpaktis toTekiuaj Jesucristo? Tla kema, kuakon xchiua ijkon ken yejua: xueyiteneua itoka Jehová niman xkinnojnotsa oksekimej itech kenon yejua (1 Ped. 2:21). Tla ijkon tikchiua, melak tikyolpaktis Jehová niman tikteititis ika itlauelikniuj, Satanás, san tekajkayaua. w24.02 11 párrs. 11-13

Ipan makuijli xiuitl tlen youajpanokej, ipantsin se millón tlaltikpakchanejkej onoapolaktijkej ken iteixpantijkauan Jehová. ¿Tlenon kijtosneki timosentemakas ipan yejuin tonaltin? Kijtosneki tiktlapejpenis timochiuas inomachtijkauj Jesús niman nochipa tikchiuas tlen Jehová kineki. Jesús okijto: “Tla yakaj kineki nouan yas, ma kelkaua nochi on tlen más kitlajsojtla” (Mat. 16:24). Ika tlajtojli griego “ma kelkaua nochi on tlen más kitlasojtla” uelis noijki notlajtolkuepas ken “xok kichiuas tlen itlalnakayo kileuiya”. Ijkuak timosentemakas itech Jehová, xok nonekis tikchiuas tlen yejua xkuelita (2 Cor. 5:​14, 15). Yejuin kijtosneki ika xnoneki tikchiuas “tlen xkuajli kileuiya [mo]tlalnakayo”, ken auilnemilistli (Gál. 5:​19-21; 1 Cor. 6:18). ¿Ouijtika tikchiuas yejuin? Ka, xouijtika tikitas tla tiktlasojtla Jehová niman tla tikmatstok ika melak mitspaleuiya ijkuak tiktlakamati (Sal. 119:97; Is. 48:​17, 18). w24.03 2 párr. 1; 3 párr. 4

Jehová kinmaka iespíritu santo akin kiyolpaktiaj (Mat. 12:18). Uelis totlajtoltiskej: “¿Nikinteititia kualneskayomej tlen kitemaka espíritu santo?”. Xnemili, ¿aman más titeijyouiya xijkon ken ijkuak xitikixmatiya Jehová? Uelis más kuajli tikmatis tla tikyolpaktia Jehová tla tikita ika más yopeuj tikinteititia kualneskayomej. Jehová kichiua ika akin kiyolpaktiaj makinpaleui imikilis Cristo (1 Tim. 2:​5, 6). San ika ¿tlenon uelis tikchiuaskej tla tiknemiliaj ika xtikyolpaktiaj Jehová maski titlaneltokaj itech tlaxtlauijli niman maski yotoapolaktijkej? Matikilnamikikan ika kemantika toyojlo techkajkayaua. San ika, Jehová xtechkajkayaua, niman yejua techijlia ika akin tlaneltokaj itech imikilis Cristo yejuamej yolmelajkej niman yejua kinteochiuas (Salmo 5:12; Rom. 3:26). w24.03 30 párr. 15; 31 párr. 17