Diciembre

¿Ueli Jehová kinyolitia akin yomijkej? Kema. Yejua “nochi ueli kichiua” (Apoc. 1:8). Yejua ueli kitlani maski san akinon, hasta on mikilistli (1 Cor. 15:26). Noijki uelis kuajli tikmatstoskej ika toTajtsin uelis kinyolitis akin yomijkej pampa yejua nochi kuajli kilnamiktika. Biblia kijtoua ika yejua kintokayotia nochi sitlalimej (Is. 40:26). Jehová kuajli kimilnamiki nochimej akin yomijkej (Job 14:13; Luc. 20:38). Melak kuajli kilnamiki ken tlachiayaj, ken onoskaltijkej, tlen okichiujkej niman kenon katkaj. Ijkon ken yotikitakej, uelis tikneltokaskej ika Jehová kinyolitis akin yomijkej pampa yejua kinektika teyolitis niman kipiya kojtilistli para ijkon kichiuas. Noijki uelis tikneltokaskej ika yejua teyolitis pampa yokinyolitijka sekimej tlaltikpakchanejkej. Biblia kinteneua sekimej tlakamej akin Jehová okinmakak kojtilistli para mateyolitikan, ken Jesucristo. w23.04 9, 10 párrs. 7-9

Tla tikteititiaj ika titetlakaitaj niman kualtsin titenotsaj, kinekiskej techkakiskej. San ika, tla yakaj san kineki touan nokualanis noso techpijpinaujtis, xok noneki iuan titlajtoskej (Prov. 26:4). San ika, xnochimej ijkomej, miyekej kanaj kema techkakiskej. Ken yotikitakej, tla tiyolyemankej melak techpaleuis. Xkijli Jehová mamitspaleui ijkuak oksekimej mitstlajtoltiskej itlaj noso san mitstejteneuaskej. Maka xkilkaua ika, maski xtimotlajtolnamiki iuan yakaj, tla tikteititia ika tiyolyemanki kichiuas maka iuan xmokualani. Niman tla tikteititia ika titetlakaita niman kuajli titenankilia, kichiuas ika oksekimej más makinekikan kimatiskej totech niman itech tlen temachtia Biblia. Kuakon, nochipa xteititi ika tiyolyemanki niman titetlakaita ijkuak yakaj itlaj mitstlajtoltis (1 Ped. 3:15). ¡Xteititi ika tiyolyemanki niman tikojtik! w23.09 19 párrs. 18, 19

Matikitakan tlenon kichiua akin teijyouiya niman xnosiaujkaua. Kachtopa, xnimantsin kualani. Yejua nokojtilia yolseujtos ijkuak oksekimej kikualanisnekij niman xtetlakuepiltia (Éx. 34:6). Ika ome, akin tlamachia ika yolseuilistli xnosiaujkaua tla itlaj uejkaui (Mat. 18:​26, 27). Ika yeyi, kuajli tlanemilia achto itlaj kichiuas. Ijkuak noneki nochiuas se tekitl tlen ueyi kijtosneki, akin teijyouiya niman xnosiaujkaua xsan kisiujkachiua. Yejua kikaua tiempo para kinemilis kenon kichiuas niman para kuajli kichiuas yejon tekitl. Ika naui, nokojtilia tlaxikos niman xsan kijtotika tlen xkuajli ipan nochiua. Akin teijyouiya niman xnosiaujkaua nokojtilia tlanemilis itech tlen kuajli niman kitekichiuilia Jehová ika pakilistli (Col. 1:11). Akin tiktekichiuiliaj toTajtsin noneki tokojtiliskej ijkon tikchiuaskej. w23.08 21 párrs. 3-6

Melak noneki matotlajpiyakan pampa Jehová kita tlen tikpiyaj ipan toyojlo. ¿Tlenon kijtosneki yejon? Ika Jehová kita tlen tlaltikpakchanejkej xkitaj. Yejua kimatstok nochi tlen tejuamej tiknemiliaj niman tikmachiliaj. Jehová techtlasojtla ijkuak kita ika tikintlakamatij itlanauatiluan. Kuakon, maka keman matiauilnemikan nion matitekajkayauakan, pampa yejon tlen Satanás niman akin yejua kinyekana kuelitaj (Juan 4:14; 1 Juan 5:​18, 19). Ijkuak más tiknisiuiskej toTajtsin, más tiktlasojtlaskej niman tiktlakaitaskej. Xtiknekiskej tikchiuaskej itlaj tlen makiyolkoko toTajtsin nion xtiknemiliskej tikchiuaskej itlaj tlen yejua xkuelita. Marta, se tokniuj akin ualeua Croacia, okinek kichiuas itlaj tlen xkuajli. Yejua okijkuilo: “Xueliya kuajli nitlanemiliaya. San niknemilijtoya kenon tlen nechyoltilanaya nechyolpaktiskia maski san achijtsin. San ika, pampa niktlakaita Jehová onechpaleui”. ¿Kenon okipaleui? Marta okijto ika pampa kitlakaita toTajtsin opeuj tlanemilia itech kenon onkisaskia tla kitlapejpeniskia tlen xkuajli. Tejuamej noijki uelis ijkon tikchiuaskej. w23.06 20, 21 párrs. 3, 4

Jesús kimatstoya ika Jehová melak kineki manochipaua itoka, yejuin kijtosneki ika kineki manoteititi ika xmelauak nochi tlen xkuajli yokijtokej itechkopa. Ika yejon, ijkin okimijli inomachtijkauan makichiuakan teoyotl: “ToTajtsin akin tinemi ne iluikak, machipaui motoka” (Mat. 6:​9, TNM). Jesús kimatstoya ika melak nonekiya ijkin manochiua. Niman san yejua melak yonokojtili kichipauas itoka Jehová. Para yejua melak ueyi tlajtlakojli katka tiktsojkuilos itoka Jehová. San xkonnemili kenon onomachili ijkuak itlauelikniuan okajsikej pampa okijtojkej ika yejua yokitsojkuilojka itoka iTaj. Biblia kijtoua ika ijkuak xikajsiyaj, “yejua sanoyej noyolkokojtikatka” (Luc. 22:​41-44). Kanaj ijkon nomachiliaya pampa kimatstoya ika ijkon kitlajtolchijchiuiliskiaj. w24.02 11 párr. 11

Chika totlalouaj ipan ojtli tlen teuika ipan nemilistli, noneki más tiktlasojtlaskej Jehová niman Jesús xijkon ken tochanejkauan (Mat. 10:37). San ika, yejon xkijtosneki tla xnoneki tikinpaleuiskej niman tikimitaskej kentla itlaj tlen techtsakuilia para kuajli tiktekichiuiliskej Jehová. Tla tiknekij tikyolpaktiskej Jehová niman Jesús, noneki tikinpaleuiskej tochanejkauan (1 Tim. 5:​4, 8). Tla ijkon tikchiuaj, más tiyolpakiskej. Tikmatstokej ika Jehová okichiuj ika familias mayolpakikan. Niman uelis yolpakiskej, tla akin yononamiktijkej notlasojtlaj niman notlakaitaj, tla tajtin kintlasojtlaj niman kinmachtiaj inkoneuan niman tla tekoneuan kintlakamatij intajuan (Efes. 5:33; 6:​1, 4). Xtlaneltoka itech tlen Biblia kijtoua. Maka xchiua san tlen tejua tiknemilia ika kuajli, tlen omitsititijkej ijkuak omitsiskaltijkej noso tlen kijtouaj ixtlamatkej. w23.08 28 párrs. 6, 7

Melak kuajli tla se tokniuj siuatl nomajmachtia kenon uelis kichiuas se tekitl, pampa tlen kichiua ijkuak san ichpokatsin uelis kipaleuis ika tlayekapan. Kanaj uelis nomachtis kuajli tlaamapouas niman kuajli tlajkuilos. Ipan seki kalpamej, kinemiliaj ika siuamej xnoneki ueliskej tlaamapouaskej nion tlajkuiloskej. San ika, tinochimej akin tikchiuaj ken Cristo tikmatstokej ika noneki matiuelikan yejon (1 Tim. 4:13). Kuakon, xmokojtili kuajli titlaamapouas niman titlajkuilos. ¿Kenon mitspaleuis yejuin? Mitspaleuis más nimantsin xnexti se tekitl niman ijkon uelis tikpiyas tlen ika timopanoltis. Noijki, mitspaleuis kuajli xmomachti niman kuajli xtemachti iTlajtol toTajtsin. Niman pampa kuajli tikamapouas Biblia niman itech titlanemilis, mitspaleuis kuajli xmouika iuan Jehová (1 Tim. 4:15). w23.12 20 párrs. 10, 11

Matiktlajtlanilikan Jehová matechpaleui matikxikokan se tlatlatalistli. Pampa titlajtlakolejkej, noneki tokojtiliskej niman ijkon xtikchiuaskej itlaj tlen xkuajli. Niman Satanás kichiua nochi tlen ueli para más ouijtika matikitakan tikchiuaskej tlen kuajli. Yejua kineki matoyolpaktikan ika tlen xkuajli niman ijkon kijtlakos totlamachilis. Tla tejuamej peua toyolpaktiaj ika tlen xkuajli, peuas tiknemiliskej tlen tsokuiltik, niman Jehová kitas ika xok tichipaujkej niman yejon uelis kichiuas matikchiuakan se ueyi tlajtlakojli (Mar. 7:​21-23; Sant. 1:​14, 15). San tejuamej xuelis tikixnamikiskej se tlatlatalistli; noneki matechpaleui Jehová. Ijkuak Jesús otechmachti kenon noneki tikchiuaskej teoyotl, noijki okiteneuj yejuin: “Xtechpaleui para maka titlajtlakoskej, yej xtechejeua maka tikchiuaskej tlen xkuajli” (Mat. 6:13). Jehová kinektok techpaleuis, san noneki tiktlajtlaniliskej matechpaleui. Noijki, noneki tikchiuaskej ijkon ken yotiktlajtlankej ipan toteoyouan. w23.05 6, 7 párrs. 15-17

Tla teueuentsin niman tesiuauj kinekij kuajli nouikaskej iuan Jehová, noneki kichiuaskej tlen yejua kinnauatia. Ijkon uelis kiyektlaliskej se tlauejli niman nochipa notlasojtlaskej. Noijki, akin nouikaj iuan Jehová nokojtiliaj kichiuaskej ijkon ken yejua. Yejuamej kuajli tenotsaj, xnimantsin kualanij niman kinektokej tetlapopoluiskej (Efes. 4:32–5:1). Akin ijkon kichiuaj xouijtika kitaj noititiskej ika notlasojtlaj. Tokniuj Lena, akin ikipiya ipantsin 25 xiuitl ika ononamikti, kijtoua: “¡Xouijtika tikitas tiktlasojtlas niman tiktlakaitas yakaj akin nokojtilia nochipa kitlakamatis Jehová!”. Aman matitlajtokan itech José niman María. Itech nochi iuejkachanejkauan David, Jehová okintlapejpeni niman ijkon makiskaltikan Jesús. ¿Tleka yejuamej okintlapejpenijkej? Pampa kuajli inuan nouikaya niman kimatstoya ika nochipa nokojtiliskiaj kitekichiuiliskej. w23.05 21 párrs. 3, 4

Maski totlayekankauj, Jesús, xtlajtlakole, yejua yokintlali tokniuan akin techyekanaj ipan tlaltikpaktli akin kema tlajtlakolejkej. Kanaj kemantika ouijtika tikitaskej tikintlakamatiskej, más ijkuak techijliskej matikchiuakan itlaj tlen xtiknekij. Sejpatipan, Pedro noijki ijkon onomachili. Se ángel okijli makinkua yolkamej tlen iTlanauatil Moisés kijtouaya ika tsokuiltikej. Pedro yexpatipan okijto ika xijkon kichiuas (Hech. 10:​9-16). Yejua kinemiliaya ika xnonekiya kichiuas tlen kijlitoyaj. San ika, apóstol Pablo otetlakamat ijkuak tlayekankej de Jerusalén okijlikej makiteititi ika kitlakamatstoya Tlanauatijli. Ika yejon, yejua nonekiya yas templo imiuan nauimej tlakamej para onnochipauaskej. Pablo kimatstoya ika tokniuan xok noyekanayaj ika yejon Tlanauatijli niman ika yejua xokichiujka itlaj tlen xkuajli. Maski ijkon, Biblia kijtoua ika “uajmostla, Pablo okinuikak on tlakamej, niman onochipauato inuan” (Hech. 21:​23, 24, 26). Pampa otetlakamat, Pablo okichiuj ika nochimej tokniuan san sekan manemikan (Rom. 14:​19, 21). w23.10 10 párrs. 15, 16

Kanaj xtikijtoskia ika noneki tikmojkaitas yakaj tla tikneki kuajli iuan timouikas. San ika, tla tiknekij kuajli touikaskej iuan Jehová noneki tikmojkaitaskej noso tiktlakaitaskej. Maski tla youejkauj ika tiktekichiuiliaj Jehová noso ka, tinochimej ok noneki tikmojkaitaskej. Kuakon, ¿tlenon kichiua yakaj akin kimojkaita noso kitlakaita toTajtsin? Yakaj akin kimojkaita toTajtsin kitlasojtla niman xkineki kichiuas itlaj tlen makichiua maka sa kuajli iuan manouika. Jesús nochipa “kitlakaitaya Dios” niman xkimakasiya (Heb. 5:7; Is. 11:​2, 3). Yejua melak kitlasojtlaya niman nochipa kinekiya kitlakamatis iTaj (Juan 14:​21, 31). Tejuamej noijki melak tiktlakaitaj Jehová niman chikauak tiktekichiuiliaj pampa yejua tetlasojtla, tlamachilise, kichiua tlen kuajli, niman kojtik. Noijki tikmatstokej ika techtlasojtla niman ika tlen tikchiuaj uelis kiyolpaktis, noso kiyolkokos. Tla xtiktlakamatij, noyolajmana; san ika, tla tiktlakamatij, melak tikyolpaktiaj (Sal. 78:41; Prov. 27:11). w23.06 14 párrs. 1, 2; 15 párr. 5

Ijkuak tekiuaj Uzías opeuj kipiya miyek tlemach niman opeuj kinpiya miyekej soldados, onoueyimat niman okilkauj ika Jehová okimakak nochi tlen kipiaya. ¿Tlenon techmachtia yejuin? Ika xnoneki tikilkauaskej ika nochi tlen kuajli topan nochiua ualeua itech Jehová. Maka san matikteijlitinemikan tlen yotikchiujkej, yej matikueyiteneuakan Jehová ipampa ken yotechpaleui (1 Cor. 4:7). Noneki tiyolyemankej yeskej, tikasikamatiskej ika titlajtlakolejkej niman ika noneki oksekimej matechpaleuikan. Se tokniuj akin kipiya ipantsin 60 xiuitl okijkuilo: “Yoniuel ika xnoneki nikualanis niman ninajmanas ijkuak oksekimej nechijliaj itlaj tlen xkuajli nikchiua. Ijkuak nikchiujtiuetsi noso nikijtojtiuetsi itlaj tlen xoniknemili niman yakaj nechijlia ika xkuajli tlen onikchiuj, ninokojtilia xok ijkon nikchiuas”. Tla nochipa tikteititiaj ika tiyolyemankej niman tikmojkaitaj Jehová, yejua nochipa techteochiuas (Prov. 22:4). w23.09 10 párrs. 10, 11

Akin onenkej ipan kachtopa siglo nonekiya tlaxikoskej. Yejuamej xsan okixnamijkej tlen oksekimej kixnamikiyaj, noijki otlajyouijkej ipampa intlaneltok. Miyekej tokniuan okintlaueltokakej tlayekankej judíos, tekiuajkej de Roma niman noijki hasta inchanejkauan (Mat. 10:21). Yejuamej noijki ononek tlaxikoskej para maka kinokauiliskej makinkajkayauakan akin yokikaujkaj toTajtsin niman kinekiyaj kixeloskej tlanechikojli ika tlamachtiltin tlen xmelajkej (Hech. 20:​29, 30). Maski ijkon, yejon tokniuan otlaxikojkej (Apoc. 2:3). ¿Kenon otlaxikojkej? Yejuamej otlanemilijkej itech akin noteneuaj ipan Tlajkuiloltin ika Hebreo, ken Job (Sant. 5:​10, 11). Okichiuilijkej teoyotl Jehová para makinyolchikaua (Hech. 4:​29-31). Niman nochipa kilnamiktoyaj kenon Jehová kinteochiuaskia tla yejuamej tlaxikouayaj (Hech. 5:41). Tejuamej noijki uelis titlaxikoskej tla nochipa titlanemiliaj intech akin otlaxikojkej, akin noteneuaj ipan Biblia niman ipan toamatlajkuiloluan. w23.07 3 párrs. 5, 6

Jehová niman Jesús xkeman kinemiliskej tla xuelis topatlaskej. Sakin ika apóstol Pedro okijto ika xkixmatiya Cristo, ononek kitlapejpenis itlaj tlen ueyi kijtosneki. ¿Nosiaujkauaskia? ¿Noso ok yeskia inomachtijkauj Cristo? Jesús okitlajtlanili Jehová makipaleui Pedro para mamelajkanemi. Sakin, okijli Pedro ika yokichiujka teoyotl ipampa niman ika kuajli kimatstoya ika ueliskia kinyolchikauas tokniuan (Luc. 22:​31, 32). ¡Tikmatstokej ika Pedro melak noyolchikauaya ijkuak kilnamikiya itlajtoluan Jesús! Tejuamej noijki noneki tiktlapejpeniskej tlen ueyi kijtosneki. Ijkuakon, Jehová kanaj kintekitiltis tlayekankej para matimelajkanemikan (Efes. 4:​8, 11). Yotikitakej ika Jehová okipaleui Pedro niman oksekimej apóstoles niman ijkon makipiyakan tlen kinpolouaya. Yejua noijki techmakas tlen techpoloua tla chikauak tiktekichiuiliaj. w23.09 24, 25 párrs. 14, 15

Jehová kita tlen tikchiuaj inpampa oksekimej maski xmás ueyi. Kita kentla se ueyi uentli niman ken itlaj tlen noneki kitlaxtlauas. Tla xok titlapaleuiya ken tlayekanketl noso tlapaleuijketl, Jehová xkilkaua nochi tlen ika moyojlo otikchiuj (1 Cor. 15:58). Niman ok kitstika kenon tikteititia ika titetlasojtla. Jehová kineki más matiktlasojtlakan niman más matikintlasojtlakan oksekimej. Ken yotikitakej, tla tiknekij más tiktlasojtlaskej Jehová noneki mojmostla tiknotsaskej, tikpouaskej Biblia niman itech titlanemiliskej. Noijki, tla tiknekij tikimititiskej tokniuan ika tikintlasojtlaj, noneki tikinpaleuiskej. Tla más titetlasojtlaj, más touikaskej iuan Jehová niman imiuan tokniuan. ¡Nochipa uelis imiuan touikaskej! w23.07 10 párr. 11; 11 párr. 13; 13 párr. 18

Tinochimej akin tikchiuaj ken Cristo noneki tiktlapejpeniskej kenon topajtiskej. Ijkuak tikitaskej kenon topajtiskej, xnoneki totlaliliskej yestli nion tiaskej itech akin tetlatemouiliaj (Hech. 15:20; Gál. 5:​19, 20). Xnochimej kuelitaj san noijki nopajtiskej. Kanaj tejuamej itikpiyaj ken tikuelitaj topajtiskej, san ika, noneki titetlakaitaskej pampa tokniuan noijki kinnamiki kitlapejpeniskej ken nopajtiskej. Yejua ika, noneki tikilnamikiskej yejuin: 1) ika san iTekiuajyo toTajtsin uelis kichiuas maka sa matikualokan (Is. 33:24); 2) toseselti noneki tikitaskej tlenon más techpaleuis (Rom. 14:5); 3) maka matikintejteneuakan oksekimej nion matikinchiualtikan makichiuakan tlen tejuamej tiknekij (Rom. 14:13), niman 4) akin kichiuaj ken Cristo, notlasojtlaj niman kitaj ika más tepaleui tla nochimej kuajli nouikaj (Rom. 14:​15, 19, 20). w23.07 25 párr. 15

¿Tejua tiktlasojtla Jehová? ¡Tikmatstokej ika kema! Miyekej itekipanojkauan noijki melak okitlasojtlakej Jehová (Sal. 104:​33, 34). Miyekej akin yeuejkaui onenkej okinejkej kikauaskej seki tlemach niman ijkon más kitekichiuiliskej Jehová, ken nazareos akin nemiyaj ipan kalpan Israel, noso akin yonosentemakakej. Yejuin tlajtojli melak kinnamikiya akin nazareos katkaj pampa yejuamej yokikaujka seki tlemach niman ijkon más chikauak kitekichiuiliskej Jehová. Tlanauatijli tlen okimakakej Moisés kinkauiliaya tlakamej niman siuamej makijlikan Jehová ika ipan se tiempo nemiskiaj ken nazareos (Núm. 6:​1, 2). Ijkuak yakaj ijkin kijliaya Jehová, nonekiya kitlakamatis seki tlanauatiltin tlen oksekimej israelitas xnonekiya kitlakamatiskej. Niman, ¿tleka sekimej israelitas nochiuayaj nazareos? Pampa melak kitlasojtlayaj Jehová niman pampa melak kitlasojkamatiyaj nochi tlen yejua yokichiujka inpampa (Deut. 6:5; 16:17). w24.02 14 párrs. 1, 2

Biblia miyekpa kiteneua tlajtojli “tiyolmelajkanemis” noso “tikteititis tlasojtlalistli tlen xtekaua” ijkuak kiteneua kenon toTajtsin kintlasojtla itekipanojkauan. San ika, noijki uelis notekitiltis ijkuak noteneua kenon itekipanojkauan toTajtsin noititiaj ika notlasojtlaj (2 Sam. 9:​6, 7). Ika yolik, yakaj akin tetlasojtla uelis más yolmelajkanemis. Ijkon tikitaj itech tlen okichiuj Daniel. Daniel miyekpa okiteititi ika yolmelajkanemiya itech Jehová. San ika, melak ouijtika tlen ipan onochiuj ijkuak ikipiaya ipantsin 90 xiuitl. Sekimej akin tlayekanayaj kampa nemiya tekiuaj niman akin uejueyixtoyaj, kitlauelitayaj Daniel niman xkitlakaitayaj Jehová. Kuakon, kuajli okinemilijkej tlenon kichiuaskiaj para makimiktikan Daniel. Okichiujkej ika Darío makitlali ifirma ipan se amatl tlen kichiuaskia ika Daniel makiteititi tla melajkanemiya itech toTajtsin noso itech tekiuaj. Para kiteititis ika melajkanemiya itech tekiuaj, Daniel san nonekiya xkichiuilis teoyotl Jehová 30 tonaltin. Daniel xokikajkauj ika kinotsa toTajtsin (Dan. 6:​12-15, 20-22). w23.08 5 párrs. 10-12

Jehová kineki matikimititikan tokniuan ika tikintlasojtlaj. Tla yakaj ipan totlanechikol xkuajli otechnots noso itlaj xkuajli otexchiuili, matiknemilikan ika xkinekiya ijkon texchiuilis niman ika nokojtilijtika kichiuas ijkon ken kijtoua Biblia (Prov. 12:18). Maski titlajtlakolejkej, Jehová melak techtlasojtla, niman ijkuak topopolouaj, yejua xsan kilnamiktok tlen xkuajli otikchiujkej niman xtechtlalkauiya (Sal. 103:9). Melak kuajli tla tikchiuaj ijkon ken toTaj Jehová niman titetlapopoluiyaj (Efes. 4:​32–5:1). Melak noneki matouikakan imiuan tokniuan pampa iyejkotika ijkuak tlapopoliuis. Kanaj uelis techtlaueltokaskej niman hasta uelis techtsakuaskej. Tla ijkon panoua, melak nonekis matopaleuikan imiuan tokniuan (Prov. 17:17). w24.03 15, 16 párrs. 6, 7

Biblia kinteneua telpokamej akin okinisiuijkej Jehová, okiyolpaktijkej niman kuajli okisatoj, ken David. Ijkuak yejua san telpochtli katka kuajli onouikak iuan Jehová niman ijkuak onochiuj tekiuaj ok omelajkanen (1 Rey. 3:6; 9:​4, 5; 14:8). Tla timomachtia itech David, mitspaleuis kualtsin xtekichiuili Jehová. Noijki, uelis timomachtis itech Marcos noso Timoteo, niman ijkon más tikimixmatis. Yejuamej opeujkej kitekichiuiliaj Jehová ijkuak telpokamej katkaj niman kuajli okitekichiuilijkej. Yejua ika, okiyolpaktijkej Jehová. Tlen tikchiuas aman kiteititis kenon tikneki tinemis ika tlayekapan. Tla titlaneltoka itech Jehová niman xtikchiua san tlen tejua tikita kuajli, yejua mitspaleuis xtlapejpeni tlen kuajli. Tejua uelis kualtsin tinemis niman tiyolpakis. Niman maka xkilkaua ika Jehová melak kitlasojkaita nochi tlen tikchiua ipampa. Melak kuajli tla nochipa tiktekichiuiliaj toTajtsin, akin melak techtlasojtla, pampa san yejon melak techyolpaktis ipan tonemilis. w23.09 13 párrs. 18, 19

Apóstol Pablo kuajli kimatstoya ika tokniuan tlajtlakolejkej. Matikteneuakan seki tlen ipan opanok. Ijkuak opeuj yauj ipan tlanechikojli tlen onkatka Jerusalén, miyekej xmás kuajli kinotsayaj niman kimakasiyaj (Hech. 9:26). Sakin, sekimej xkuajli opeuj kitejteneuaj (2 Cor. 10:10). Satepan, Pablo okitak kenijki se tokniuj akin youejkaujka ipan ikalpan Jehová okichiuj itlaj tlen ueliskia kintlajkalis tokniuan (Gál. 2:​11, 12). Noijki xokuelitak tlen okichiuj Marcos, akin miyekpa iuan kistinemiya (Hech. 15:​37, 38). Melak miyek tlen ipan opanok Pablo niman ueliskia xok kinnotsas tokniuan akin okiyolkokojkej. San ika, xijkon okichiuj, yejua nochipa kuajli okinnots tokniuan niman nochipa kuajli okitekichiuili Jehová. ¿Tlenon okipaleui ijkon makichiua? Pablo melak kintlasojtlaya tokniuan niman xsan kitstoya kenijki nopopolouayaj, yejua kitaya tlen kuajli kichiuayaj. Pampa kintlasojtlaya, okichiuj tlen kijtoua tlaxelojli tlen aman tikitstokej. w24.03 15 párrs. 4, 5

Biblia kinteneua miyekej akin okiteititijkej ika yolyemankej, ken Isaac. Ijkuak yejua chantiya Guerar, filisteos opeujkej kinexikolitaj niman hasta okimintlalpachouilijkaj pozos tlen itlakeualuan itaj okimichkuakaj. Isaac ximiuan onokualani, yejua oksekan oyaj niman oksejpa okimichkuato okseki pozos (Gén. 26:​12-18). San ika, filisteos opeuj kijtouaj ika yejon atl noijki intlatki katka. Maski ijkon, Isaac xokualan (Gén. 26:​19-25). ¿Tlenon okipaleui makiteititi ika yolyemanki maski melak kinekiyaj kikualaniskej? Yejua okitak tlen kichiuayaj itajuan niman yejon melak okipaleui. Abrahán xkeman yakaj iuan nokualaniaya, niman Sara katka “yolyemanki niman tenotski” (1 Ped. 3:​4-6; Gén. 21:​22-34). w23.09 15 párr. 4

Jehová okiteititi ika techtlasojtla pampa okuajtitlan isenteKonetsin nikan ipan tlaltikpaktli. Jesús okinnojnots nochimej itech yejon Tekiuajyotl niman okitemakak inemilis topampa para techmakixtis itech tlajtlakojli niman mikilistli. Sakin, Jehová okiyoliti Jesús ne iluikak niman opeuj tekiuajti ipan iTekiuajyo toTajtsin. Biblia tlajtoua itech yejuin: Jehová kichipauas itokayo ijkuak nochiuas tlen yokijto para yejuin tlaltikpaktli itech iTekiuajyo tlen kiyekana Cristo. ¡Xtlaj onka tlen uelis kiteltis! Yejua yokijto ika kichiuas nochi tlen yotechijli (Is. 46:10; Heb. 6:​17, 18). Sakin, yejuin tlaltikpaktli nokuepas se xochitlalpan kampa iuejkakoneuan Adán niman Eva, akin yolmelajkej, xok kipiyaskej tlajtlakojli niman xok keman mikiskej (Sal. 22:26). Niman xsan yejon, yejua kichiuas ika nochimej ikoneuan, akin nemij iluikak niman akin nemij nikan ipan tlaltikpaktli, manokuepakan san se familia niman nochimej san yejua makitekichiuilikan (Efes. 1:​8-11). ¡Melak kualtsin ken Jehová kichiua tlen yokijto! w23.10 20 párrs. 7, 8

Ijkuak judíos akin okiskej itech Babilonia oajsikej Jerusalén, xkipiayaj tlen ika nopanoltiskej, onkatka tlauejli ipampa política niman noijki intlauelikniuan opeuj kimixnamikij. Miyekej melak ouijtika okitakej tlapaleuiskej manochijchiua iteopan Jehová. Yejua ika, Jehová okomintitlan teotlajtokej Ageo niman Zacarías niman ijkon makinyolchikauatij judíos, tlen okichiujkej melak otepaleui (Ageo 1:1; Zac. 1:1). San ika, 50 xiuitl sakin, yejuin judíos oksejpa okikajkaujkej intekiyo. Kuakon, Esdras, se tlakatl akin melak kuajli kijkuilouaya tlanauatijli, onokuep Jerusalén niman ijkon kinyolchikauas niman kinpaleuis makiueyichiuakan Jehová ijkon ken yejua kitlajtlani (Esd. 7:​1, 6). Teotlajtoltin tlen okinteneujkej Ageo niman Zacarías, okinpaleui itekipanojkauan toTajtsin akin yeuejkaui onenkej para más matlaneltokakan itech Jehová, maski okixnamijkej tlen ouijtika. Niman noijki uelis techpaleuis tejuamej matitlaneltokakan itech Jehová maski san tlenon tikixnamikiskej (Prov. 22:19). w23.11 14, 15 párrs. 2, 3

¿Kenon uelis tikimititiskej tokniuan ika tikintlasojtlaj? Tla tikinyoltlaliaj. Niman, uelis tikinyoltlaliskej, tla tikimikneliaj (1 Tes. 4:18). ¿Kenon uelis nochipa titetlasojtlaskej? Tla tokojtiliaj tikintlapopoluiskej oksekimej ijkuak nopopolouaj. ¿Tleka aman más noneki matotlasojtlakan imiuan oksekimej? Matikitakan tlen okijto Pedro: “Ye nisiu para tlamis nochi tlajtlamach. Yejua ika, […] sanoyej xmotlajsojtlakan iuan oksekimej” (1 Ped. 4:​7, 8). ¿Tlenon nochiuas achto tlapopoliuis? Jesús okimijli inomachtijkauan: “San nopampa nochi tlakatl mechtlauelitas” (Mat. 24:9). Tla tiknekij nochipa tiktekichiuiliskej Jehová maski matechtlauelitakan, noneki san sekan tinemiskej. Satanás kineki techxelos, san ika, xuelis kichiuas tla totlasojtlaj (Filip. 2:​1, 2). w23.11 13 párrs. 18, 19

Tlen temachtia Biblia melak tepaleui. Tlaltikpakchanejkej kentla ixtlapachijtoskiaj pampa kineltokaj tlen Satanás temachtia. San ika, ijkuak peua tikinmachtiaj akinon Jehová niman kenon yejua, kentla ixtlapouiskiaj pampa iuelij kitaj Jehová ken tejuamej tikitaj. Melak mojkatlachiaj ijkuak kasikamatij ika Jehová melak kojtik (Is. 40:26). Melak kuajli nomachiliaj ijkuak kimatij ika toTajtsin nochipa kichiua tlen melajki (Deut. 32:4). Melak kuelitaj ijkuak kasikamatij ika toTajtsin sajnoye tlamachilise (Is. 55:9; Rom. 11:33). Niman melak yolseuij ijkuak kasikamatij ika toTajtsin yejua tlasojtlalistli (1 Juan 4:8). Ijkuak nonisiuiyaj itech Jehová, kasikamatij ika uelis nochipa nemiskej niman nochiuaskej ken ikoneuan. Melak tiyolpakij ijkuak tikinpaleuiyaj oksekimej manonisiuikan itech toTajtsin. Niman ijkuak ijkon tikchiuaj, tikpaleuijtokej Jehová (1 Cor. 3:5). w24.02 12 párr. 15

¿Mitsmachtijtokej Biblia? ¿Noso motajuan iteixpantijkauan Jehová niman mitsmachtijtokej? Tla kema, kanaj tiknemilijtok timoapolaktis. ¡Niman yejon melak kuajli! San ika ¿tlenon noneki tikchiuas tla tikneki timoapolaktis? Noneki timosentemakas itech Jehová. ¿Kenijki yakaj nosentemaka itech Jehová? Ijkuak san iselti kichiuilia teoyotl Jehová niman kijlia ika nochipa san yejua kitekichiuilis niman ika nochipa kichiuas tlen yejua kineki. Kema, yejua kijlijtok Jehová ika nochipa kitlasojtlas ika nochi iyojlo, ialma, itlamachilis niman ichikaualis (Mar. 12:30). Ijkuak timosentemakas, xakaj mitsitas pampa san moselti tinemis ijkuak tikijlis Jehová ika tikneki itech timosentemakas. San ika, ijkuak timoapolaktis, miyekej mitsitaskej para ijkon makimatikan ika tejua yotimosentemakak. Niman xnoneki tikauilmatis tlen tikijlis Jehová ijkuak itech timosentemakas. Noijki xkilnamiki ika nonekis tikchiuas tlen tikijlis Jehová, niman yejua noijki kichia ijkon xchiua (Ecl. 5:4). w24.03 2 párr. 2; 4 párr. 5

Biblia kijtoua ika nochimej akin nonamiktiaj “tlajtlamach kimpajsoloua ipan in nemilistli” (1 Cor. 7:28). ¿Tleka? Pampa teueuentsin niman tesiuauj tlajtlakolejkej. Noijki tlamantik ken tlanemiliaj niman tlen kuelitaj. Sekimej xsan noijki kampa ualeuaj noso xsan noijki ken onoskaltijkej. Noijki, ijkuak peuaj san sekan chantij, peuaj kitaj tlen ijkuak novios katkaj xonoitilijkej. Nochi yejuin ueliskia kichiuas manokualanikan. Niman kemantika nion se xkineki kijtos tla okipix tlajtlakojli niman xkiyektlaliaj tlauejli. Kinemiliaj ika más kuajli tla nokauaj noso kitlajtlanij divorcio. San ika ¿kuajli tla ijkon kichiuaj? Ka. Jehová kineki ika akin yononamiktijkej nochipa san sekan manemikan, maski tla kemantika xnasikamatiskej. w24.03 16 párr. 8; 17 párr. 11

Sakin ika otimoapolakti más opeuj tikneltoka ika uelis tinemis para nochipa ipan yejuin tlaltikpaktli, pampa más kuajli yotimomachti niman más yochikauj motlaneltokil (Heb. 5:13–6:1). Kanaj tejua noijki yotikixnamik miyek tlemach, ijkon ken kijtoua Romanos 5:​2-4. San ika, noijki yotikitak kenon Jehová yomitspaleui. Pampa tikmati ika tikyolpaktijtika Jehová aman más tikneltoka ika kichiuas tlen yokijto. Ijkon tikteititia ipampa ken tikinnotsa mofamilia, ipampa tlen tiktlapejpenia tikchiuas niman ken tiktekitiltia motiempo. Sakin ika apóstol Pablo okijto ika tla tikyolpaktiaj toTajtsin titlaneltokaskej itech tlen yokijto techmakas, okijto ika uelis kuajli tikneltokaskej ika tlen tikchiaj yemelak nochiuas (Rom. 15:13). w23.12 12, 13 párrs. 16-19

Tla tikixnamiktokej tlen ouijtika, kanaj xkuajli titlanemiliaj nion xueli itlaj kuajli tikchiuaj. Kanaj tomachiliaj ken se barco tlen yopoliuj itlajkotian mar niman iakoxonajlo chikauak kimailia. ¿Kenon techpaleuiya Jehová ijkuak xueli kuajli titlanemiliaj? Yejua yokijto ika techmelajkapiyas. Tla se barco panoua kampa chikauak ajakakiyaujtika, uelis chikauak peuas noolinis. Miyek barcos kipiyaj innajnakastlan tlen kinpaleuiya maka melak manolinikan. Niman pampa barco xsanoyej noolinia, akin ompa yauej xnomojtiaj niman más kuajli nomachiliaj. Seki tlen kinpaleuiya barcos maka sanoyej manolinikan más kuajli tekitij tla xnoteltia barco. Noijki ijkon, tla tiknekij matechmelajkapiya Jehová ijkuak itlaj tikixnamikiskej, xnoneki toteltiskej noso xnoneki tijkajkauaskej ika tiktekichiuiliaj. w24.01 22 párrs. 7, 8

Ijkuak itlaj mitsmojtis, xmotlajtolti: “¿Tlenon yokichiuj Jehová yeuejkaui?”. Niman xkilnamiki nochi tlen yejua yokichijchiuj. Xkonnemili kenon Jehová kintlajpiya totomej niman xochimej maski yejuamej xuelij kiueyichiuaj, yejuin techpaleuiya más matikneltokakan ika yejua techtlajpiyas (Mat. 6:​25-32). Noijki, xtlanemili itech tlen Jehová yokichiuj inpampa itekipanojkauan. Kanaj uelis timomachtis itech yakaj akin kiteneua Biblia noso itlaj tlen ipan yonochiuj se iteixpantijkauj Jehová. Maka xkilkaua kenon Jehová yomitsuajtlajpixtia desde yeuejkaui niman hasta aman. ¿Kenon omitspaleui xkixmati tlen melauak? (Juan 6:44). ¿Kenon yokinnankili moteoyouan? (1 Juan 5:14). ¿Kenon mojmostla mitspaleuiya pampa okitemakak isenteKonetsin? (Efes. 1:7; Heb. 4:​14-16). w24.01 3 párr. 6; 7 párr. 17