ITECH TLEN TLAJTOUA IXPAN | TLEN MIYEKEJ YOKITENEUILIJKEJ TOTAJTSIN
¿Yemelak xuelis tiktlasojtlaskej toTajtsin?
“‘Xtlajsojtla moTEKO Dios ikan nochi moyojlo, ikan nochi moalma niman ikan nochi motlamachilis’. Yejua in yejuan más ueyixtikaj niman yejua yakatstikaj de nochimej on tlanauatiltin” (Jesucristo, xiuitl 33).a
Miyekej ouijtika kitaj kitlasojtlaskej toTajtsin, pampa kinemiliaj ika xuelis kixmatiskej, ika uejka nemi noso ika yejua xteiknelia. Xkita tlen sekimej kijtouaj:
“Maski nikijliaya toTajtsin ika manechpaleui, nikmachiliaya ika melak uejka nemiya notech. Niknemiliaya ika yejua xtlaj kimachiliaya niman ika xkeman ueliskia nikasikamatis” (Marco, Italia).
“Niknekiya niktekichiuilis toTajtsin, san ika, niknemiliaya ika yejua melak ueyixtika. Niknemiliaya ika toTajtsin san kinekiya kintlajtlakolmakas oksekimej niman xnikneltokaya tla itlaj kimachiliaya ipampa oksekimej” (Rosa, Guatemala).
“Ijkuak nipitentsin katka, niknemiliaya ika toTajtsin san kitaya tlen xkuajli tikchiuaj para ijkon techtlajtlakolmakas. Sakin opeuj nikita ijkon ken yakaj akin melak uejka nemi, noso se ueyi tekiuaj akin xkajmana tlen inpan nochiua oksekimej” (Raimunda, Canadá).
¿Niman tejua tlenon tiknemilia? ¿Yemelak xuelis tiktlasojtlaskej toTajtsin? Desde yeuejkaui, akin kichiuaj ken Cristo notlajtoltiaj yejuin. Opanok miyek xiuitl ika miyekej xkichiuiliayaj teoyotl toTajtsin. ¿Tleka? Pampa kimakasiyaj. Se ixtlamatki akin itoka Will Durant ijkin okijto: “¿Kenon se tlakatl akin tlajtlakole uelis kichiuilis teoyotl akin melak uejka nemi niman melak temojti?”.
¿Tleka ijkon kinemiliaj itech toTajtsin? ¿Tlenon yemelak temachtia Biblia? ¿Uelis tiktlasojtlaskej toTajtsin tla tikmatij tlen melauak itech yejua?