Tlen yokichiuj ika miyekej maka kuajli makixmatikan toTajtsin

TLEN SEKIMEJ KIJTOUAJ

Diccionario Akal crítico de Teología kijtoua: “Trinidad kijtosneki ika nemi san se toTajtsin akin noxeloua ika yeyi, Tajtli, teKoneuj niman Espíritu Santo”. Niman Diccionario abreviado del cristianismo noijki ijkon kijtoua: “Católicos, ortodoxos, anglicanos niman protestantes kineltokaj yejuin”.

TLEN BIBLIA KIJTOUA

Jesús, iKoneuj toTajtsin, xkeman okijto ika yejua katka ijkon ken iTaj. Yejua okijto: “Niau itech noTajtsin, pampa yejua más ueyixtikaj xken nejua” (Juan 14:28). Noijki, okijli se inomachtijkauj: “Yeniau itech noTajtsin niman nemoTajtsin, itech noDios niman nemoDios” (Juan 20:17).

Espíritu santo xken tejuamej. Akin kachtopa opeuj kichiuaj ken Cristo ”Espíritu Santo nochimej okinyolten”, niman Jehová okijto: “Niktlalis noEspíritu ipan nochimej tlaltikpaktlakamej” (Hechos 2:1-4, 17). Espíritu santo xteuan itech Trinidad, kijtosneki ikojtilis toTajtsin.

TLEKA NONEKI TIKMATIS

Seki católicos akin nomachtiaj itech Biblia akin intoka Karl Rahner niman Herbert Vorgrimler, kijtouayaj: “Xueliskia tikixmatiskiaj Trinidad tla xakaj techititiskia, niman maski techititiskiaj xueliskia tikasikamatiskiaj”. San ika ¿ueliskia tiktlasojtlaskej yakaj akin xtikixmatij niman xtikasikamatij? Ka. Ika yejon, Trinidad xtechkauilia matiktlasojtlakan toTajtsin.

Marco, akin yotikteneujkej ipan kachtopa tlamachtijli, kijtoua ika Trinidad xkikauiliaya manouika iuan toTajtsin. Ijkin kijtoua: “Niknemiliaya ika toTajtsin xkinekiya matikixmatikan, niman yejon xnechkauiliaya maniknisiui”. San ika, toTajtsin “xkuelita [...] itlaj yejuan tepopoloua” (1 Corintios 14:33). Yejua kineki matikixmatikan. Jesús okijto: “Tejuamej yejuan tihebreos tikmatij akinon tikmauistiliaj” (Juan 4:22).

Marco noijki kijtoua: “Ijkuak oniuel ika toTajtsin xkatka se Trinidad, aman kema kuajli ouel iuan ninouika”. Tla tikitaj Jehová kentla yakaj akin melak nemi, yejon kichiuas ika matiktlasojtlakan. Biblia kijtoua: “On yejuan xtetlajsojtla xkixmati Dios, pampa Dios yejua tetlajsojtlalistli” (1 Juan 4:8).