Tlen okichiuj ika miyekej maka makimatikan itoka toTajtsin

TLEN SEKIMEJ KIJTOUAJ

Ipan ilibro Theological Studies, David Cunningham okijto: “Hasta aman xtotlajtolnamikij kenon itoka toTajtsin. Niman maski tla totlajtolnamikiskiaj xtikmatiskiaj kenon yemelak itoka”.

TLEN BIBLIA KIJTOUA

ToTajtsin okijto: “Nejua niJehová. Yejuin notokayo” (Isaías 42:8, Traducción del Nuevo Mundo). Ika hebreo tokayotl “Jehová” kijtosneki Yejua kichiua manochiua (Génesis 2:4).

Jehová kineki ika matijkuikan itoka. Biblia kijtoua: “¡Xmakakan tlajsojkamatilistli niman xnotsakan toTEKO! ¡Xtetlajtlajtouilikan nochiuiyan ipan in tlaltikpaktli nochi on tlajtlamach tlen yejua yokichiu! ¡Ma tikelnamikikan ika san toTEKO yejua más ueyixtikaj!” (Isaías 12:4).

Jesús okikuik itoka toTajtsin niman okinmachti inomachtijkauan. Se tonajli okichiuili teoyotl iTaj niman okijli: “Yonikinmachistij akin tejua”. ¿Tleka ijkon okichiuj? Yejua okijto: “Para on tetlajsojtlalistli yejuan tinechpiyalia ma kipiyakan, niman para sano nejua intech ma ninemi” (Juan 17:26).

TLEKA NONEKI TIKMATIS

Teólogo Walter Lowrie okijkuilo: “Tla yakaj xkimati kenon itoka toTajtsin, kijtosneki ika xkixmati [...] niman xuelis kitlasojtlas tla xkita ken yakaj akin yemelak nemi”.

Se tlakatl akin itoka Victor nochipa yaya teopan, san ika, xkixmatiya toTajtsin. Yejua kijtoua: “Ijkuak onikmat ika toTajtsin itoka Jehová, onikmachili kentla kemach toixmatstoskiaj. Aman kema ouel onikixmat akin miyekej kiteneuayaj. Opeuj nikita ken yakaj akin melauak nemi, niman aman melak kuajli iuan ninouika”.

Jehová kijtoua tlenon kinmakas akin kikuij itoka. Yejua kijtoua: “Nejua nikimititis teiknelilistli, ijkon ken se tlakatl kititia teiknelilistli ikoneuj akin kitekichiuilia” (Malaquías 3:16, 17, TNM). ToTajtsin noijki kinteochiua akin kinotsaj ika itoka. Biblia kijtoua: “Nochimej akin kinotsaskej Jehová ika itokayo makisaskej” (Romanos 10:13, TNM).