¿Kenon mitspaleuis tla tikixmati toTajtsin?

Hasta aman yotikitakej seki tlemach tlen yotechpaleui matikmatikan akinon toTajtsin. Opeuj tikitaj ika Biblia kijtoua ika toTajtsin itoka Jehová niman ika nochi kichiua ipampa tlasojtlalistli. Noijki yotikitakej tlenon yokichiuj niman tlenon kichiuas topampa ika tlayekapan. Maski melak miyek onka tlen ok noneki tomachtiskej itech toTajtsin, kanaj timotlajtoltia tla itlaj ika mitspaleuis timomachtis nochi yejon.

Jehová kijtoua ika “tla tejua tiktejtemoua, yejua kinokauilis xnexti” (1 Crónicas 28:9). San xkonemili, tla tejua tiktejtemoua niman tikixmati, ¡uelis iuan timouikas! Yejuin se kualtsin tlateochiualistli (Salmo 25:14). ¿Kenon mitspaleuis tla iuan timouika?

Yemelak tipakis. Biblia kijtoua ika Jehová kipiya “paktli ipan nochi on tlen okichijchiu” (Salmo 104:31). Tla timokojtilia tiknisiuis niman tikchiuas ken yejua kichiua, yemelak tipakis, niman yejuin mitspaleuis ipan motlalnakayo niman ipan motlamachilis (Salmo 33:12). ToTajtsin uelis mitspaleuis maka xchiua tlen mitsijtlakos, niman noijki uelis mitspaleuis xchiua tlen kuajli niman kuajli xmouika imiuan oksekimej. Kuajli tikmatstokej ika noijki tikijtos ken okijto salmista: “Niknisiuis Dios [...] sanoyej kuajli” (Salmo 73:28).

ToTajtsin mitstlajpiyas. Jehová kimijlia akin iuan nouikaj: “Nejua nimitsmachtis niman nimitstlakanonotsas” (Salmo 32:8). Yejuin kijtosneki ika toTajtsin toseselti techtlajpiya niman ika techmaka tlen techpoloua (Salmo 139:1, 2). Ijkuak kuajli iuan timouikas toTajtsin, kuajli tikitas ika yejua nochipa mitspaleuis.

Tikpiyas se kualtsin nemilistli ika tlayekapan. ToTajtsin xsan kineki mitspaleuis xpaki ipan yejuin tonaltin, yejua noijki kineki mitsmakas se kualtsin nemilistli ika tlayekapan (Isaías 48:17, 18). Biblia kijtoua: “In nemilistli yejuan para nochipa se kiselia ijkuak mitsixmati tejua yejuan san moselti melauak tiDios, niman nejua niJesuCristo yejuan otinechajtitlan” (Juan 17:3). Tla tikchiaj tlen toTajtsin kineki techmakas, techmelajkapiyas niman techpaleuis matitlaxikokan ijkuak tikixnamikiskej tlen ouijtika, ijkon ken “on teposcadena kimelajkapiya on barco ijkuak ika yokisalojkej” (Hebreos 6:19).

Yejuin san seki tlateochiualistin tlen uelis tikseliskej tla más kuajli tikixmatij toTajtsin niman tla tiknisiuiyaj. Tla tikneki tikmatis okseki, timitsyolchikauaj xtlajto iuan se iteixpantijkauj Jehová noso xkalaki ipan página tlen tikpiyaj ipan Internet jw.org.