Ijkuak tikpiya se kokolistli

Linda, akin kipiya 71 xiuitl, kijtoua: “Ijkuak onechijlikej ika nikpiya cáncer de pulmón niman noijki cáncer ipan nokuetlaxkol, onikasikamat ika inimikiskia. San ika, ijkuak onajsik nochan, oniknemili: ‘Xnikchiaya nikpiyas yejuin kokolistin, san ika, noneki nikitas kenon nikimixnamikis’”.

Elise, akin kipiya 49 xiuitl, kijtoua: “Nikpiya se kokolistli tlen kichiua ika tlajko noxayak nochipa manechkokojto. Kemantika melak nechkokoua niman hasta kichiua melak maninajmana. Miyekpa nikmachilia kentla san noselti ninemi niman hasta yoniknemilijka ninomiktis”.

Se tlakatl akin kualo nemi ipan se silla de ruedas niman nemi iuan ichanejkauan

TLA TEJUA noso tla se mochanejkauj yomechijlikej ika nenkipiyaj se ueyi kokolistli tlen temikti, kuakon, tikmatstika ika yejon melak teyolkoko. Niman xsan mitstlajyouiltis yejon kokolistli, noijki melak mitsajmankamiktis. Kanaj noijki melak timotekipachos ijkuak tikonitas tlapajtiketl, ijkuak xkanaj tiknextia remedio noso melak patioj niman ijkuak tikita ika xtlaj mitspaleuiya. Melak mitskuaajmanas ijkuak tikpiyas se ueyi kokolistli.

¿Tlenon uelis mitspaleuis tla ijkon timomachilia? Miyekej yokitakej ika melak yolseuij ijkuak kinotsaj toTajtsin niman ijkuak kimitaj textos ipan Biblia tlen teyolchikauaj. Mochanejkauan niman akin imiuan timouika noijki uelis mitsyolseuiskej ijkuak tikitas ika mitstlasojtlaj niman mitspaleuiyaj.

TLEN SEKIMEJ YOKINPALEUI

Robert, akin kipiya 58 xiuitl, kijtoua: “Tla tikpiya se kokolistli niman tikneki tikixnamikis, xtlaneltoka itech toTajtsin niman yejua mitspaleuis. Xnotsa Jehová. Xkijli tlen tikmachilia. Xtlajtlanili espíritu santo. Xtlajtlanili mamitskojtili niman ijkon mochanejkauan kuajli nomachiliskej, niman xtlajtlanili mamitspaleui xtlaxiko”.

Robert, noijki kijtoua: “Melak tepaleui ijkuak mochanejkauan kinekij mitspaleuiskej. Mojmostla, kanaj se noso omemej nechuajnotsaj niman nechtlajtoltiaj kenon ninemi. Akin imiuan ninouika noijki nechyolchikauaj maski uejka chantij. Yejon kichiua más kuajli maninomachili niman nechpaleuiya manitlaxiko”.

Tla tiknemilijtika tikontlajpalos yakaj akin kualo, xkita tlen Linda kijtoua: “Akin kualo kineki makitakan ken akin xkualo niman xnochipa kineki tlajtlajtos itech ikokolis. Kuakon iuan xtlajtlajto ijkon ken tikchiua iuan oksekimej akin xkualoj”.

Xkilnamiki ika toTajtsin uelis mitsyolchikauas itechkopa Biblia. Mochanejkauan niman akin imiuan timouika noijki uelis mitspaleuiskej maka xnemili ika xok keman uelis tiyolpakis.

Textos itech Biblia tlen uelis mitspaleuiskej

Xkauili mamitspaleui toTajtsin

“Oninoueyikatsajtsilij itech noTEKO niman yejua onechkak, niman onechmanauij de nochi nonemojtil. Nejua akin niajmankatlakatl oninoueyikatsajtsilij itech noTEKO, yejua onechkak” (Salmo 34:4, 6).

Linda kijtoua: “Xkeman nikijlia toTajtsin: ‘Xnechpajti’. Nochipa niktlajtlanilia: ‘Xnechkojtili niman ijkon manikxiko nokokolis’”.

Xpoua Biblia niman mitsyolchikauas

“Xok yakaj kijtos: ‘Nikualo’” (Isaías 33:24).

Xtlanemili itech tlen toTajtsin yokijto kichiuas. Yejon mitsyolchikauas niman mitspaleuis xtlaxiko.

Xkauili mofamilia niman akin imiuan timouika mamitspaleuikan

“Sen tetlajsojkaikniu nochipa tenotski, niman ijkuak onkaj ajmantli nochiua ken sen melauak teikniu” (Proverbios 17:17).

Elise, akin yotikteneujkaj, kijtoua: “Maka xmoxelo. Xkinkauili ika akin imiuan timouika mamitspaleuikan. Kemantika san moselti timomachilis niman hasta tiknemilis ika toTajtsin xmitskaktika, san ika, maka xmoxelo”.