Ijkuak tikmachilia ika xok titlaxikoua

Adriana, akin chanti Brasil, kijtoua: “Nochipa san ninajmantoya, hasta niknemiliaya ika más kuajli yeskia tla ninomiktiskia”.

¿KEMANTIKA melak xkuajli yotimomachilijka niman hasta xok tiknekiya tinemis? Tla ijkon yotimomachilijka, kuakon tikasikamati Adriana. Yejua kipiaya se kokolistli tlen kichiuaya melak maajmankamiki niman hasta xok kimatiya tlenon kichiuas. Sakin Adriana okijlikej ika kipiaya depresión clínica.

Xkita tlen ipan opanok Kaoru, akin ualeua Japón. Yejua okintlajpix itajuan akin youeuentsintiakaj niman kualouayaj. Yejua kijtoua: “Ipan yejon tonaltin, melak xkuajli ninomachiliaya pampa miyek tekitl nikpiaya. Hasta xok napismikiya niman xok ueliya nikochiya. Opeuj niknemilia ika más kuajli yeskia tla nimikiskia pampa ijkon xok nitlajyouiskia”.

Se tlakatl akin ualeua Nigeria, itoka Ojebode, kijtoua: “Nochipa ninajmantinemiya niman nochi nexchoktiaya, kuakon, opeuj niknemilia kenon ninomiktis”. Tipakij ika Ojebode, Kaoru niman Adriana xonomiktikej. San ika, sejse xiuitl miyekej nomiktiaj.

¿AKINOMEJ UELIS MITSPALEUISKEJ?

Miyekej nomiktiaj, san ika, tlakamej akin más nomiktiaj. Miyekej ijkon yokichiujkej pampa pinauij kiteijliskej makinpaleuikan. Jesús okijto ika akin kualoj noneki makimita se tepajtiketl (Lucas 5:31). Yejua ika, tla tejua timomiktisneki, maka xpinaui tikteijlis mamitspaleuikan maka ijkon xtlanemili. Miyekej akin kipiyaj depresión yokitakej ika melak yokinpaleui tlen tepajtiketl kimijlia makichiuakan. Ojebode, Kaoru niman Adriana okitatoj tepajtiketl niman aman más kuajli nomachiliaj.

Tepajtikej kitekitiltiaj miyek tlen ika kinpaleuiyaj akin kipiyaj depresión. Sekimej kinmakaj remedios noso kintlajtlaniliaj makimijlikan kenon nomachiliaj, kemantika kichiuaj nochi yejon ome tlemach. Noijki, akin kualoj noneki makinpaleuikan, makimasikamatikan niman noneki ika inchanejkauan niman akin imiuan nouikaj maka manosiaujkauakan. Jehová yejua akin más kuajli uelis iuan touikaskej niman yejua techpaleuiya itechkopa iTlajtol, Biblia.

¿ONKA ITLAJ TLEN KICHIUAS MAKA SA XMAJMANA?

Miyekpa, akin kipiyaj depresión noneki uejkaujtipan kimitstos se tepajtiketl niman noijki noneki kipatlaskej tlen kichiuaj. San ika, tla tejua tikpiya depresión, kuajli xmatsto ika uelis tiyolpakis ika tlayekapan. Ijkon tlanemilia Ojebode, yejua kijtoua: “Melak nikneki nikitas ijkuak nochiuas tlen kijtoua Isaías 33:24, kampa kijtoua ika ajsis tonajli ijkuak xok yakaj kijtos: ‘Nikualo’”. Ijkon ken Ojebode, mitsyolseuis tikmatis ika toTajtsin yokijto ika onias se “yenkuik tlaltikpaktli” kampa xok onias “ajmantli” (Apocalipsis [Revelación] 21:1, 4). Ipan yejon tonajli xok keman tajmankamikis. Xok titlajyouis ipampa tlen xkuajli tikmachilia. Xok keman ijkon timomachilis niman xok keman tikilnamikis (Isaías 65:17).

Textos itech Biblia tlen uelis mitspaleuiskej

ToTajtsin kasikamati kenon timomachilia

“Nejua nemoTEKO Dios, nemechpiya ipan noma. Nejua nemechilia: ‘Maka xmomojtikan. Nejua nemechpaleuiya’” (Isaías 41:13).

Jehová kuajli kasikamati kenon tomachiliaj xijkon ken oksekimej, niman kineki techpaleuis.

Xtlanemili itech iTlajtol toTajtsin

Elías xok kinekiya nemis, niman okijto: “¡Ma ijki noTEKO! ¡Xnechkixtili no nemilis [...]!” (1 Reyes 19:4).

Ojebode kijtoua: “Onechpaleui ijkuak onitlanemili itech iTlajtol toTajtsin. Onikasikamat ika teotlajtoketl Elías noijki ijkon onomachili ken nejua”.

Xkita tlen inpan onochiuj sekimej itekipanojkauan toTajtsin

Jesús okijli Pedro: “Nejua moka yonitlajtlan itech Dios para maka tikpolos motlaneltok” (Lucas 22:32).

Sakin ika apóstol Pedro yexpa yokijtoka ika xkixmatiya Jesús, Pedro melak onoyolkoko niman oajmankachokak. Kaoru kijtoua: “Tlen ipan onochiuj Pedro onechpaleui manikita ika Jehová niman Jesús okasikamatkej tlen kimachiliaya Pedro. Yejuin onechyolchikauj”.

Xok keman timajmanas niman tikilkauas tlen mitsajmanaya (Isaías 65:17)