¿Kenon timakisaskej itech mikilistli?

MASKI tlen okichiujkej totajuan, Adán iuan Eva, otechuajkuili tlajtlakojli niman mikilistli, yejuin xokipatlak tlen toTajtsin kinekiya matikpiyakan. Ipan iTlajtol, Biblia, miyekpa kijtoua ika tlen yokinemilijka kichiuas, xnopatla.

• “On yolmelajkej tlakamej kinmakaskej on kuajli tlajli, para ipan chantiskej nochipa” (Salmo 37:29).

• “ToTEKO para nochipa kixoxotonis on mikilistli, niman nochimej kimixayopojpouas” (Isaías 25:8).

• “Niman on mikilistli, yejuan nochi tlak[a]tl itlauelikniu, yejua sa ika nochi kitlanis Cristo” (1 Corintios 15:26).

• “Xok onyas mikilistli, nion chokistli, nion ajmantli, nion kokolistli” (Apocalipsis [Revelación] 21:4).

¿Tlenon kichiuas toTajtsin niman ijkon kipopolos mikilistli? Ken yotikitakej, Biblia kuajli kijtoua ika akin “yolmelajkej [...] kinmakaskej on kuajli tlajli, para ipan chantiskej nochipa”. San ika, noijki kijtoua ika “xakaj nemi ipan in tlaltikpaktli yejuan kichiua nochi tlen kuajli niman xkaman tlajtlakoua” (Eclesiastés 7:20). Kuakon, pampa tinochimej titlajtlakouaj, ¿kijtosneki ika toTajtsin kipatlas tlen kintlajtlanilia akin nemiskej nochipa? Ka. Yejua xkeman ijkon kichiuas, pampa toTajtsin “xueli tekajkayaua” (Tito 1:2). Kanaj totlajtoltiaj, ¿tlenon kichiuas toTajtsin niman ijkon uelis tinemiskej ijkon ken kinekiya ijkuak otexchijchiuj?

IKA SE TLAXTLAUIJLI KIPOPOLOSKEJ MIKILISTLI

Pampa Jehová techtlasojtla okitemakak se tlaxtlauijli niman ijkon techmakixtis itech mikilistli. Se tlaxtlauijli kijtosneki itlaj tlen notemaka noso notlaxtlaua ipampa itlaj tlen xkuajli onochiuj. Tlen ika notlaxtlaua noneki ijkon patioj yes ken tlen notlaxtlauasneki. Pampa tinochimej titlajtlakolejkej niman timikij, Biblia kuajli techmelajkaijlia: “Nion se itech yejuamej xuelis kikouas se tokniuj, nion xuelis kimakas toTajtsin itlaj tlen ika kimakixtis (niman tlen notlaxtlaua ipampa innemilis melak kualtsin tlen xkeman uelis kitlaxtlauaskej)” (Salmo 49:7, 8, TNM).

Ijkuak yakaj miki, san kitlaxtlaua itlajtlakoluan. Xueli san no yejua nomakixtia nion xueli kitlaxtlaua itlajtlakoluan yakaj okse (Romanos 6:7). Nonekiya yakaj akin xtlajtlakole makitemaka inemilis, akin xmikiskia san ipampa itlajtlakoluan, yej ipampa tejuamej totlajtlakoluan (Hebreos 10:1-4).

Yejon tlen toTajtsin okichiuj. Okuajtitlan iKoneuj, Jesús, nikan ipan tlaltikpaktli niman ijkon manemiki ken se tlakatl akin xtlajtlakole (1 Pedro 2:22). Jesús kuajli okijto: “Xoniuajlaj para nechtekichiuiliskej, yej para nitetekichiuilis niman niktlaxtlauas ika nonemilis para nikmakixtis miyek tlakatl” (Marcos 10:45). Yejua omik niman ijkon uelis kipopolos mikilistli niman kichiuas ika tejuamej matinemikan nochipa (Juan 3:16).

¿KEMANON POPOLIUIS MIKILISTLI?

Aman inochiujtika tlen kijtoua Biblia, pampa melak ouijtika tinemis niman kemantika hasta xok tikxikos, yejon kiteititia ika tinemij ipan sa itlamiyan tonaltin (2 Timoteo 3:1, TNM). Sa itlamiyan tonaltin tlamiskej ijkuak toTajtsin “kintlajtlakolmakas niman kinxoxotonis nochimej on xyolchipajkej tlakamej” (2 Pedro 3:3, 7). San ika, akin kitlasojtlaj toTajtsin makisaskej ijkuak tlapopoliuis niman kipiyaskej nemilistli tlen xkeman tlamis (Mateo 25:46).

Miyekej akin yoliuiskej uelis nochipa nemiskej. Jesús ouel okiyoliti se akin yomijka ijkuak panotiaya ipan ueyikalpan Naín. Ompa, yomijka isentekonetsin se siuakaualtsintli, niman Jesús, ipampa iteiknelilis, okiyoliti (Lucas 7:11-15). Noijki, apóstol Pablo okijto: “Nikpiya tlamachalistli itech Dios [...]  ika on mikatsitsimej yoliuiskej nochimej yejuan yolmelajkej niman on yejuan xyolmelajkej”. Yejuin tlamachialistli tlen nochiuas ika tlayekapan kuajli techititia ika toTajtsin techtlasojtla (Hechos 24:15).

Melak miyekej uelis kipiyaskej se nemilistli tlen xkeman tlamis. Biblia kuajli kijtoua ika “on yolmelajkej tlakamej kinmakaskej on kuajli tlajli, para ipan chantiskej nochipa” (Salmo 37:29). Kuakon, uelis kijtoskej ijkon ken apóstol Pablo okijto kanaj se 2,000 xiuitl ika tlakuitlapan: “¡Ay mikilistli! ¿Kanon onkaj mopoder para titechmiktis? [...] ¿Kanon onkaj mopoder para titechtlajyouiltis?” (1 Corintios 15:55). Aman kema kitlaniskej toueyitlauelikniuj.